“O Molemo Haholo”

1, 2. Molemo oa Molimo o fihla boholeng bofe, hona Bibele e hatisa tšobotsi ee joang?

METSOALLE e ’maloa eo e leng khale e ntšana se inong e thabela lijo hammoho ka ntle ha letsatsi le se le ntse le likela, ea keketeha le ho qoqa ha e ntse e boha sebaka. Sebakeng se seng se hojana, sehoai se akhela mahlo masimong a sona ’me se bososela ka khotsofalo kaha maru a thibile ’me pula e qala ho fafatsa lijalong tse e nyoretsoeng. Kae-kae, monna le mosali ba thabela ho bona ngoan’a bona a qala ho tlosa leoto.

² Ebang baa tseba kapa ha ba tsebe, batho bana kaofela ba thabela ntho e tšoanang, e leng molemo oa Jehova Molimo. Batho ba bang ba bolumeli ba atisa ho bua mantsoe a reng “Molimo o molemo.” Bibele e toboketsa taba le ho feta. E re: “O molemo haholo.” (Zakaria 9:17) Empa ho bonahala eka ke ba seng bakae feela kajeno ba hlileng ba tsebang se boleloang ke mantsoe ao. Ha e le hantle molemo oa Jehova Molimo o akarelletsa eng, hona tšobotsi ee ea Molimo e ama e mong le e mong oa rona joang?

Tšobotsi e Hlaheletseng ea Lerato la Molimo

3, 4. Molemo ke eng, hona ke hobane’ng ha molemo oa Jehova o ka ’na oa hlalosoa ka tsela e qaqileng e le ponahatso ea lerato la hae?

³ “Molemo” e batla e le lentsoe le akaretsang lipuong tse ngata kajeno. Leha ho le joalo, ho ea kamoo Bibele e o senolang kateng, molemo ha se lentsoe le akaretsang. Ha e le hantle, le bolela bokhabane le boitšoaro bo botle. Ka mantsoe a mang re ka ’na ra re molemo o susumetsa Jehova. Litšobotsi tsohle tsa hae ho akarelletsa matla a hae, toka ea hae le bohlale ba hae, li molemo ka ho feletseng. Ka lehlakoreng le leng, molemo o ka ’na oa hlalosoa ka tsela e qaqileng e le ponahatso ea lerato la Jehova. Hobane’ng?

⁴ Molemo ke tšobotsi e bontšoang ka liketso. Moapostola Pauluse o ile a bontša hore ho batho o ipiletsa le ho feta ho loka. (Baroma 5:7) Motho ea lokileng a ka tšepeloa ho khomarela ka botšepehi se hlokoang ke molao, empa motho ea molemo o etsa ho fetang hoo. O nka khato pele, ka mafolofolo o batla litsela tsa ho etsetsa ba bang se molemo. Joalokaha re tla bona, ka sebele Jehova o molemo ka kutloisiso eo. Ka ho hlakileng, molemo oo o tsoa leratong la Jehova le se nang meeli.

5-7. Ke hobane’ng ha Jesu a ile a hana ho bitsoa “Mosuoe ea molemo,” hona o ile a tiisa ’nete efe ea bohlokoa ka seo?

⁵ Jehova o boetse oa ikhetha ka molemo oa hae. Nakoana pele Jesu a shoa, monna e mong o ile a tla ho eena ho mo botsa potso, a mo bitsa “Mosuoe ea molemo.” Jesu o ile a mo arabela a re: “Ke hobane’ng ha u mpitsa ea molemo? Ha ho na motho ea molemo ha e se Molimo feela.” (Mareka 10:17, 18) U ka ’na oa makatsoa ke karabelo eo. Ke hobane’ng ha Jesu a ile a khalemela monna eo? Na Jesu e ne ehlile e se “Mosuoe ea molemo”?

⁶ Ho hlakile hore monna eo o ne a sebelisa mantsoe “Mosuoe ea molemo” e le tlotla e rorisang ho feta tekanyo. Ka ho inyenyefatsa, Jesu o ile a lebisa khanya eo ho Ntate oa hae ea leholimong, e leng eena ea molemo ka tsela e phahameng ka ho fetisisa. (Liproverbia 11:2) Empa Jesu o ne a boetse a tiisa ’nete e ’ngoe ea bohlokoa. Ke Jehova feela ea lekanyetsang se molemo. Ke eena feela ea nang le tokelo e phahameng ka ho fetisisa ea ho bolela hore na se molemo le se sebe ke sefe. Adama le Eva, ka ho itjella ka borabele litholoana tsa sefate sa tsebo ea botle le bobe, ba ile ba leka ho inkela tokelo eo. Ho fapana le bona, ka boikokobetso Jesu o siea taba ea ho beha litekanyetso matsohong a Ntate oa hae.

⁷ Ho feta moo, Jesu o ne a tseba hore Jehova ke Mohloli oa sohle se molemo. Ke Mofani oa “mpho e ’ngoe le e ’ngoe e molemo le ntho e ’ngoe le e ’ngoe e phethahetseng.” (Jakobo 1:17) A re hlahlobeng kamoo molemo oa Jehova o totobatsoang kateng ke ho fana ha hae ka seatla se bulehileng.

Bopaki ba Hore Molemo oa Jehova o Mongata

8. Jehova o bontšitse molemo ho batho bohle joang?

⁸ Motho e mong le e mong ea kileng a phela o kile a thabela molemo oa Jehova. Pesaleme ea 145:9 e re: “Jehova o molemo ho lintho tsohle tse phelang.” Mehlala e meng ea kamoo a bileng molemo kateng ke efe? Bibele e re: “O ile a ipaka hore na ke Molimo ea joang ka ho etsa lintho tse ntle, a le fa lipula le chai ka nako ea tsona, a le fa lijo hore le je ho fihlela le khotsofetse a ba a etsa hore le thabe.” (Liketso 14:17) Na u kile oa hlasimolloa ke ho thabela lijo tse monate? Hoja e ne e se ka molemo oa Jehova ha a etsa lefatše lena le phepelo ea lona ea metsi a hloekileng a lulang a potoloha le lijo tse hlahang “ka nako ea tsona,” ho ne ho ke ke ha e-ba le lijo. Jehova haa etsetsa ba mo ratang feela molemo oo empa o o etselitse bohle. Jesu o ile a re: “O chabisetsa batho ba khopo le ba lokileng letsatsi la hae ’me o nesetsa batho ba lokileng le ba sa lokang pula ea hae.”—Matheu 5:45.

9. Apole e bontša molemo oa Jehova joang?

⁹ Ba bangata ba khella tlase limpho tse ngata tse fuoeng moloko oa batho ka seatla se bulehileng, tse kang tšebetso e tsoelang pele ea letsatsi, pula le lijo tse hlahang ka nako ea tsona. Ka mohlala, nahana ka apole. Ke tholoana e fumanehang hohle libakeng tse futhumetseng tsa lefatše. Leha ho le joalo, e khahla mahlo, ea hlabosa, ebile e na le lero le khathollang le limatlafatsi tsa bohlokoa. Na u ne u tseba hore lefatšeng ka bophara ho na le mefuta e sa tšoaneng ea liapole e 7 500, e fapanang ka mebala ho tloha ho o mofubelu, o mosehla le o motala le hore e fapana ka boholo ho tloha ho e feta-fetang morara ka boholo ho isa ho e lekanang le lamunu e kholohali? Ha u tšoere peo e nyenyane ea apole letsohong, e ka ’na ea bonahala eka ha e na thuso ea letho. Empa ha e mela e hlahisa se seng sa lifate tse ratehang ka ho fetisisa. (Sefela sa Lifela 2:3) Kamehla ka nako ea selemo sefate sa liapole se hlahisa lithunthung tse ntle ’me ka hoetla se hlahisa litholoana. Selemo le selemo ka lilemo tse ka bang 75, sefate se itekanetseng sa liapole se beha litholoana tse ka tlatsang mabokose a 20 a boima ba lik’hilograma tse 19 lebokose ka leng!

10, 11. Mecha ea kutlo e bontša molemo oa Molimo joang?

¹⁰ Ka molemo oa hae o ke keng oa lekanngoa, Jehova o re file ’mele e ‘entsoeng ka tsela e hlollang haholo,’ e nang le mecha ea kutlo e etselitsoeng ho re thusa ho lemoha mesebetsi ea hae le ho e thabela. (Pesaleme ea 139:14) Ak’u nahane hape ka maemo a hlalositsoeng qalong ea khaolo ena. Ipone u le teng ha lintho tsena li etsahala, u ne u ka thabela ho bona eng haholo? Mohlomong u ne u ka thabela o bona marama a boreletsana a ngoana ea thabileng, pula ea litloebelele e nang kapa bofubelu, bosehla le bopherese ha letsatsi le likela. Leihlo la motho le etselitsoe ho bona mebala e mengata, mohlomong e limilione. Mocha oa rona oa kutlo o utloa melumo e sa tšoaneng ea lentsoe la motho eo re mo ratang, moea ha o foka hasesaane lifateng le ha ngoana a keketeha. Ke hobane’ng ha re thabela ho bona lintho tsee le ho li utloa? Bibele e re: “Tsebe e utloang le leihlo le bonang, Jehova o li entse ka bobeli ba tsona.” (Liproverbia 20:12) Empa ena ke e ’meli feela ea mecha ea kutlo.

¹¹ Mocha oa ho fofonela ke bopaki bo bong ba molemo oa Jehova. Nko ea motho e ka khetholla menko e mengata e sa tšoaneng e ka bang likete ho isa ho e libilione tse likete. Ak’u nahane ka e seng mekae feela. Oa lijo tse phehiloeng tseo u li ratang, oa lipalesa, makhasi a oeleng le oa mosi o fokolang oa mollo o futhumetseng hamonate. Mocha oa hao oa ho ama o u nolofalletsa ho utloa ha u hahloa ke moea o pholileng sefahlehong, u koptjoa ke moratuoa ka matsoho a mofuthu le ha u thabela ho tšoara tholoana e boreleli. Ha u e shemola, mocha oa hao oa tatso o qala ho sebetsa. Ha e qala e fihla ka hanong u utloa monate o lutlisang mathe ha leleme la hao le latsoa lik’hemik’hale tse rarahaneng tseo tholoana eo e entsoeng ka tsona. Ka sebele, re na le mabaka ’ohle a ho hoeletsa tjena mabapi le Jehova: “Kannete u molemo haholo. U o boloketse ba u tšabang.” (Pesaleme ea 31:19) Leha ho le joalo, Jehova o “boloketse” ba mo tšabang molemo joang?

Molemo o Nang le Liphello Tse sa Feleng

12. Jehova o re fa eng e bohlokoa ka ho fetisisa, hona ke hobane’ng ha re ka re e bohlokoa haholo?

¹² Jesu o ile a re: “Mangolo a re: ‘Motho a ke ke a phela ka bohobe feela empa o tla phela le ka lentsoe le leng le le leng le tsoang molomong oa Jehova.’” (Matheu 4:4) Ha e le hantle, mantsoe a Jehova a ka Bibeleng a ka re tsoela molemo ho feta lijo hobane a ka re thusa ho fumana bophelo bo sa feleng. Khaolong ea 8 ea buka ena, re ile ra hlokomela hore Jehova o sebelisa matla a hae a ho tsosolosa kapa ho nchafatsa matsatsing ana a ho qetela ho tlisa paradeise ea moea. Tšobotsi ea bohlokoa ea paradeise ena ke matletsetletse a lijo tsa moea.

13, 14. (a) Moprofeta Ezekiele o ile a bona eng ponong, hona seo se bolela’ng ho rona kajeno? (b) Jehova o fa bahlanka ba hae ba tšepahalang eng e le hore ba fumane bophelo bo sa feleng?

¹³ Boprofeteng bo bong ba Bibele ba tsosoloso e kholo, moprofeta Ezekiele o ile a fuoa pono ea tempele e tsosolositsoeng le e khanyang. Ho ne ho e-na le metsi a phallang a tsoang tempeleng eo, a pharalla le ho teba ho fihlela e le noka. Hohle moo noka eo e neng e phallela teng, e ne e tlisa litlhohonolofatso. Mabopong a eona ho ne ho metse lifate tse tlokomang tse hlahisang lijo le tse folisang. Noka eo e ne e bile e tlisa bophelo le litholoana Leoatleng le Shoeleng la letsoai le bileng le se nang bophelo! (Ezekiele 47:1-12) Empa seo sohle se ne se bolela eng?

¹⁴ Pono eo ea tempele e ne e bolela hore Jehova o tla tsosolosa borapeli ba ’nete, bo neng bo tla lumellana le melao ea hae e lokileng. Joaloka noka eo ea ponong, lintho tse molemo tseo Jehova a neng a tla li fa batho ba hae e le hore ba phele ka ho sa feleng li ne li tla eketseha. Haesale Jehova a ba hlohonolofatsa ka lintho tsena ho tloha ha ho ne ho tsosolosoa borapeli ba ’nete ka 1919. O fane ka eng? Libibele, lingoloa tsa Bibele, liboka le likopano kaofela li thusitse ho tlisetsa ba limilione linnete tsa bohlokoa. Jehova o sebelisitse lintho tseo ho ruta batho ka tokisetso ea bohlokoa ka ho fetisisa e phelisang, e leng sehlabelo sa Kreste sa tefo ea topollo, se fanang ka boemo bo hloekileng ka pel’a Jehova le tšepo ea bophelo bo sa feleng ho bohle ba ratang Molimo e le kannete le ba mo tšabang.a Kahoo, matsatsing ana a ho qetela, ha lefatše le le tlaleng ea boja-likata moeeng, batho ba Jehova ba ’nile ba thabela nala ea moea.—Esaia 65:13.

15. Molemo oa Jehova o tla phallela ho batho ba tšepahalang ka kutloisiso efe nakong ea Puso ea Kreste ea Lilemo Tse Sekete?

¹⁵ Empa noka ea ponong ea Ezekiele ha e khaotse ho phalla ha tsamaiso ena ea khale ea lintho e fihla pheletsong ea eona. Ho e-na le hoo, e tla phalla ka matla le ho feta nakong ea Puso ea Kreste ea Lilemo Tse Sekete. Ka nako eo, ha Jesu a busa e le Mesia, Jehova o tla sebelisa molemo o feletseng oa sehlabelo sa Jesu ’me butle-butle a phahamisetse batho ba tšepahalang phethehong. Ka nako eo re tla thaba hakaakang ka lebaka la molemo oa Jehova!

Litšobotsi Tse Ling Tsa Molemo oa Jehova

16. Bibele e bontša joang hore molemo oa Jehova o akarelletsa litšobotsi tse ling, hona tse ling tsa tsona ke life?

¹⁶ Molemo oa Jehova ha se feela ho ba seatla se bulehileng. Molimo o ile a bolella Moshe a re: “Ke tla etsa hore molemo oohle oa ka o fete ka pel’a sefahleho sa hao ’me ke tla bolela lebitso la Jehova ka pel’a hao.” Tlaleho eo e tsoela pele ho re: “Jehova o ne a feta ka pel’a hae ’me a re: ‘Ke ’na Jehova, ke ’na Jehova, Molimo ea mohau le ea nang le kutloelo-bohloko, ea liehang ho halefa le ea nang le lerato le ’nete.’” (Exoda 33:19; 34:6) Kahoo molemo oa Jehova o akarelletsa litšobotsi tse ’maloa tse ntle. A re ke re hlahlobeng tse peli feela tsa tsona.

17. Mosa ke eng, hona Jehova o o bontšitse joang ho batho feela tjee ba sa phethahalang?

¹⁷ “Mosa.” Lentsoe le sebelisitsoeng ho hlalosa tšobotsi ena le ka boela la bolela ho ba le “kutloelo-bohloko” ’me le re ruta ho hongata ka tsela eo Jehova a sebelisanang le libopuoa tsa hae ka eona. Ho fapana le ho ba ea hlokang mamello, ea se nang kutloelo-bohloko, kapa ea hatellang, joalokaha ba nang le matla ba atisa ho ba joalo, Jehova o bonolo ebile o mosa. Ka mohlala, Jehova o ile a re ho Abrame: “Ke kopa hore sebakeng seo u leng ho sona u shebe ka leboea, ka boroa, ka bochabela le ka bophirimela.” (Genese 13:14) Liphetolelo tse ngata li siea mantsoe “ke kopa” ka thoko. Empa litsebi tsa Bibele li bolela hore mantsoe a Seheberu sa qalong ha a fetoleloa a bontša hore polelo eo ke kopo e etsoang ka tlhompho e seng taelo. Ho na le litemana tse ling tse tšoanang le eo. (Genese 31:12; Ezekiele 8:5) Nahana feela ’Musi oa Lintho Tsohle a re “ke kopa” ho batho feela tjee! Lefatšeng leo ho lona ho atileng ho khahlapetsa, mabifi le ho hloka mekhoa e metle, na ha ho khatholle ho nahana ka mosa oa Molimo oa rona, Jehova?

18. Jehova ke “ea nang le . . . ’nete” ka kutloisiso efe, hona ke hobane’ng ha mantsoe ao e le a khothatsang?

¹⁸ “Ea nang le . . . ’nete.” Ho se tšepahale ho atile lefatšeng kajeno. Empa Bibele ea re hopotsa hore “Molimo ha se motho hore a bue leshano.” (Numere 23:19) Ha e le hantle, Tite 1:2 e re ‘Molimo a ke ke a bua leshano.’ O molemo hoo a ke keng a bua leshano. Kahoo, litšepiso tsa Jehova li tšepahala ka ho feletseng hobane kamehla seo a se buileng se tlameha ho phethahala. Jehova o bile o bitsoa “Molimo ea nang le ’nete.” (Pesaleme ea 31:5) Ha se feela hore o qoba ho bua leshano empa o aba ’nete ka bongata. Ha a itšehle thajana, ha a ipolokele boitsebiso, kapa hona ho bo boloka e le lekunutu. Ho e-na le hoo, o bo senolela bahlanka ba hae ba tšepahalang ho tsoa polokelong ea hae ea bohlale e se nang meeli.b O bile o ba ruta ho phela ka linnete tseo a li abang e le hore ba ka ‘tsoela pele ba phelela ’nete.’ (3 Johanne 3) Ka hona, molemo oa Jehova o lokela ho re ama joang ka bomong?

‘Tlala Thabo ka Lebaka la Melemo e Tsoang ho Jehova’

19, 20. (a) Satane o ile a leka ho fokolisa ho tšepa ha Eva molemo oa Jehova joang, hona ka phello efe? (b) Ka nepo molemo oa Jehova o lokela ho re ama joang, hona hobane’ng?

¹⁹ Ha Satane a leka Eva serapeng sa Edene, ka mano o ile a qala ho fokolisa ho tšepa ha hae molemo oa Jehova. Jehova o ne a ile a bolella Adama a re: “U ka ja litholoana tsa lifate tsohle tse serapeng hore u khotsofale.” Har’a lifate tse likete tseo e tlamehang ebe li ne li khabisitse serapa seo, ke se le seng feela seo Jehova a ileng a se thibela. Empa hlokomela kamoo Satane a ileng a beha potso ea hae ea pele ho Eva kateng, ha a re: “Na kannete Molimo o itse le se ke la ja litholoana tsa lifate tsohle tse serapeng?” (Genese 2:9, 16; 3:1) Satane o ile a sotha mantsoe a Jehova ho etsa hore Eva a nahane hore Jehova o ba hanela ka ho hong ho molemo. Ka masoabi, leqheka leo le ile la atleha. Eva, ho tšoana le banna le basali ba bangata ba bileng teng ka mor’a hae, o ile a qala ho belaella molemo oa Molimo, ea neng a mo file ntho e ’ngoe le e ’ngoe eo a nang le eona.

²⁰ Re tseba ho teba ha masoabi le masisa-pelo a tlisitsoeng ke lipelaelo tse kang eo. Kahoo a re nkeng ka ho teba mantsoe a Jeremia 31:12 a reng: “Ba tla . . . [tlala] thabo ka lebaka la melemo e tsoang ho Jehova.” Ka sebele molemo oa Jehova o lokela ho re tlatsa thabo. Le ka mohla ha rea lokela ho belaella sepheo sa Molimo oa rona, ea tletseng molemo. E se eka re ka mo tšepa ka ho feletseng, kaha o batlela ba mo ratang se molemo ka ho fetisisa.

21, 22. (a) U ka rata ho bontša ka litsela life hore u ananela molemo oa Jehova? (b) Re tla tšohla tšobotsi efe khaolong e latelang, hona e fapana le molemo joang?

²¹ Ho feta moo, ha re fumana monyetla oa ho buisana le ba bang ka molemo oa Molimo, rea thaba. Pesaleme ea 145:7 e re ka batho ba Jehova: “Ba tla bua ba sa khaotse ha ba hopola lintho tse ngata tse molemo tseo u li entseng.” Letsatsi ka leng leo re le phelang, re rua molemo o itseng ka lebaka la molemo oa Jehova. Ke hobane’ng ha u sa itloaetse ho leboha Jehova ka molemo oa hae letsatsi ka leng, u tobe taba ka hohle kamoo ho khonehang kateng? Ho nahana ka tšobotsi eo, ho leboha Jehova ka eona letsatsi le letsatsi le ho bolella ba bang ka eona ho tla re thusa ho etsisa Molimo oa rona ea molemo. Ha re ntse re batla litsela tsa ho etsa molemo joaloka Jehova, re tla atamela haholoanyane ho eena. Moapostola Johanne ea neng a se a holile o ile a ngola a re: “Ngoan’eso eo ke mo ratang, u se ke oa etsisa mehlala ea batho ba etsang lintho tse mpe empa u etsise ea ba etsang lintho tse ntle. Ea etsang lintho tse ntle o tsoa ho Molimo.”—3 Johanne 11.

²² Molemo oa Jehova o boetse o amahanngoa le litšobotsi tse ling. Ka mohlala, Molimo o na le “lerato le tšepahalang.” (Exoda 34:6, naletsana) Tšobotsi ena e batla e e-na le morero o tobileng ho feta molemo, kaha Jehova o e bonahatsa ka ho khetheha ho bahlanka ba hae ba tšepahalang. Khaolong e latelang, re tla ithuta kamoo a e bonahatsang kateng.