Litlhaloso
1. Lintlha Tse re Thusang ho Tseba Babylona e Moholo
Re tseba joang hore “Babylona e Moholo” ke malumeli ’ohle a bohata? (Tšenolo 17:5) Hlokomela lintlha tsena:
Babylona e Moholo o lefatšeng lohle. Babylona e Moholo o hlalosoa a lutse holim’a ‘matšoele a batho le lichaba.’ O na le “ ’muso holim’a marena a lefatše.”—Tšenolo 17:15, 18.
Babylona e Moholo ha se mekhatlo ea lipolotiki kapa ea khoebo. “Marena a lefatše” le “bahoebi” ba tla pholoha ha a felisoa.—Tšenolo 18:9, 15.
Babylona e Moholo o senya Molimo lebitso. Babylona e Moholo o bitsoa seotsoa hobane o sebelisana le mebuso e le hore a fumane chelete le melemo e meng. (Tšenolo 17:1, 2) O khelosa batho bohle, ebile batho ba bangata ba shoele ka lebaka la hae.—Tšenolo 18:23, 24.
Khutlela khaolong ea 13 ntlheng ea 6
2. Mesia o ne a Tla Hlaha Neng?
Bibele e boletse esale pele hore ho ne ho tla feta libeke tse 69 pele Mesia a fihla.—Bala Daniele 9:25.
Libeke tse 69 li qalile neng? Li qalile ka selemo sa 455 ha ’Musisi Nehemia a fihla motseng oa Jerusalema ho ea o ‘tsosolosa le ho o haha hape.’—Daniele 9:25; Nehemia 2:1, 5-8.
Libeke tse 69 li nkile nako e kae? Boprofeteng bo bong ba Bibele, letsatsi le emela selemo. (Numere 14:34; Ezekiele 4:6) Taba ena e bolela hore matsatsi a supileng a beke ke lilemo tse supileng. Boprofeteng bona, libeke tse 69 ke lilemo tse 483 (libeke tse 69 x matsatsi a 7).
Libeke tse 69 li ile tsa fela neng? Ha re bala lilemo tse 483 ho tloha ka selemo sa 455 pele ho mehla ea Jesu, re fumana selemo sa 29 mehleng ea Jesu.a Sena ke sona selemo seo Jesu a ileng a kolobetsoa ka sona ’me ea e-ba Mesia.—Luka 3:1, 2, 21, 22.
Khutlela khaolong ea 15 ntlheng ea 5
3. Mokhoa oa Phekolo ho Sebelisoa Mali
Ho na le mekhoa ea phekolo e hlokang hore ho sebelisoe mali a mokuli. Bakreste ha baa lokela ho sebelisa e meng ea mekhoa ena, e kang ho fana ka mali a bona kapa hore mali a bona a bolokoe sebakeng se itseng ka nakoana kapa libeke pele a khutlisetsoa ’meleng ea bona.—Deuteronoma 15:23.
Empa ho ntse ho e-na le mekhoa e meng eo Bakreste ba ka e amohelang. E akarelletsa liteko tsa mali, ho hloekisa mali ka mochine (hemodialysis), ho hlapolla mali (hemodilution), ho boloka lisele (cell-salvage) kapa ho sebelisa mochine o etsang mosebetsi oa pelo le matšoafo.b Mokreste e mong le e mong o lokela ho iketsetsa qeto ea hore na mali a hae a tla sebelisoa joang nakong eo a lokelang ho sebetsoa ke lingaka, ha ho etsoa liteko tsa mali kapa ha a ntse a fumana phekolo ea mofuta o itseng. Lingaka tse fapaneng li ka ’na tsa sebelisa mekhoa ena ka litsela tse sa tšoaneng. Kahoo, pele Mokreste a lumela ho sebetsoa ke ngaka, ho etsa liteko tsa mali kapa pheko leha e le efe e amanang le mali o lokela ho batlisisa hantle hore na mali a hae a tla sebelisoa joang. Ipotse lipotso tse latelang:
Na tsela eo mali a ka a phallang ka eona e ke ke ea sitiseha haeba ho ka ntšoa mali a mang ’meleng oa ka? Na letsoalo la ka le tla ntumella hore ke nke mali ao e ntse e le a ka ’me ke se ke ka batla hore ‘a qhalloe fatše’?—Deuteronoma 12:23, 24.
Ke tla etsa’ng haeba nakong eo ke phekoloang mali a mang a ka a ntšoa ebe aa hlapolloa, ka mor’a moo a khutlisetsoa ’meleng oa ka? Na taba ee e tla tšoenya letsoalo la ka le koetlisitsoeng ka Bibele kapa ke tla amohela phekolo ea mofuta oo?
Khutlela khaolong ea 39 ntlheng ea 3
4. Ho Arohana ha Banyalani
Lentsoe la Molimo ha le khothaletse banyalani hore ba arohane ebile lea hlakisa hore ha banyalani ba arohane, ha baa lokela ho nyalana le batho ba bang. (1 Bakorinthe 7:10, 11) Leha ho le joalo, ho na le maemo a mang a etsang hore Bakreste ba arohane.
Ho se hlokomele lelapa ka boomo: Monna ha a batle ho hlokomela lelapa ka lintho tseo le li hlokang hoo lelapa le se nang litlhoko tsa letsatsi le letsatsi.—1 Timothea 5:8.
Tlhekefetso e feteletseng: Molekane e mong a ka hlekefetsa e mong hoo a ka mo lematsang kapa a beha bophelo ba hae kotsing.—Bagalata 5:19-21.
Ho beha setsoalle sa motho le Jehova kotsing ka ho feletseng: Motho o thibela molekane oa hae ka ho feletseng ho sebeletsa Jehova.—Liketso 5:29.
5. Matsatsi a Phomolo le Mekete
Bakreste ha ba kenelle matsatsing a phomolo a sa thabiseng Jehova. Mokreste e mong le e mong o lokela ho sebelisa letsoalo la hae le koetlisitsoeng ka Bibele ho etsa qeto ea hore na o tla etsa’ng ha a le har’a batho ba ketekang matsatsi ana a phomolo. Nahana ka mehlala e latelang.
Motho e mong o u lakaletsa letsatsi la phomolo le monate. U ka ’na oa re feela: “Kea leboha.” Haeba motho a batla ho tseba hore na ke hobane’ng ha u sa keteke letsatsi leo la phomolo, u ka mo hlalosetsa.
Molekane oa hao eo e seng Paki ea Jehova o u memela lijong le beng ka eena ka letsatsi la phomolo. Haeba letsoalo la hao le u lumella ho ea, u ka hlalosetsa molekane oa hao esale pele hore haeba ho na le lintho tse tla etsoa moo tse amanang le letsatsi leo la phomolo, u ke ke oa kenella ho tsona.
Mohiri oa hao o u fa bonase nakong ea matsatsi a phomolo. Na u lokela ho e hana? Ha se maemong ’ohle u ka e hanang. Na mohiri oa hao o u fa bonase eo e le karolo ea ho keteka letsatsi la phomolo kapa na o nka feela e le tsela ea ho u leboha ka mosebetsi o motle oo u o etsang?
Motho o u fa mpho nakong ea matsatsi a phomolo. A ka ’na a re: “Kea tseba hore ha u keteke letsatsi lena la phomolo empa ke batla ho u fa mpho ena.” Mohlomong motho eo o mpa feela a le mosa. Ho thoe’ng haeba u nahana hore motho eo o batla ho bona hore na u tiile nthong eo u e lumelang, kapa o batla hore u keteke letsatsi leo? Ka mor’a ho nahana ka lintlha tsena, u tla iketsetsa qeto ea hore na u tla amohela mpho eo kapa che. Liqetong tsohle tseo re li etsang, re batla ho tšepahalla Jehova le hore re se ke ra ba le letsoalo le molato.—Liketso 23:1.
Khutlela khaolong ea 44 ntlheng ea 1
6. Mafu a Tšoaetsanoang
Kaha re rata batho re etsa sohle seo re ka se khonang hore re se ke ra ba tšoaetsa ha re tšoeroe ke mafu a tšoaetsanoang, esita le haeba re belaela hore a re tšoere. Re etsa joalo hobane Bibele e re: “U rate moahelani oa hao joalokaha u ithata.”—Baroma 13:8-10.
Re ka etsa’ng ho bontša hore re mamela taelo ee? Motho ea tšoeroeng ke lefu le ka tšoaetsang batho ba bang o lokela ho qoba ho etsa lintho tse kang ho haka batho kapa ho ba suna. Ha aa lokela ho utloa bohloko ha batho ba bang ba sa mo memele malapeng a bona hobane ba batla ho itšireletsa le ho sireletsa ba malapa a bona. Hape pele a kolobetsoa o lokela ho bolella mohokahanyi oa sehlopha sa baholo ka lefu leo e le hore ho ka etsoa litlhophiso tsa hore ho sireletsoe batho ba bang ba tl’o kolobetsoa. Pele motho a ka ratana, o lokela ho etsa liteko tsa mali haeba ho kile ha etsahala hore a be kotsing ea ho tšoaroa ke lefu le tšoaetsanoang. Ha a etsa joalo oa bontša hore o rata batho ba bang hobane ha a ‘hlokomele lithahasello tsa litaba tsa hae feela, empa hape o hlokomela lithahasello tsa ba bang.’—Bafilipi 2:4.
Khutlela khaolong ea 56 ntlheng ea 2
7. Litaba Tsa Khoebo le Tsa Molao
Re ka qoba mathata a mangata ka hore re ngole fatše litumellano tsohle tse amanang le khoebo le chelete esita le haeba ke litumellano tseo re li entseng le Mokreste-’moho. (Jeremia 32:9-12) Ho ntse ho le joalo, Bakreste ba ka ’na ba se ke ba utloana ka litaba tse amanang le chelete kapa lintho tse ling. Ba lokela ho lokisa litaba tse joalo ka potlako, ka khotso ebile ba le bang.
Empa re lokela ho etsa’ng haeba e mong a entse ntho e kholo joaloka ho etsa bobolu kapa ho senya e mong lebitso? (Bala Matheu 18:15-17.) Jesu o re file mehato e meraro eo re lokelang ho e latela:
Lekang ho lokisa taba le le bang. (Sheba temana ea 15.)
Haeba mohato oa pele o sa sebetse, kopa Mokreste a le mong kapa ba babeli bao e leng khale ba li bona hore ba tsamaee le uena. (Sheba temana ea 16.)
Haeba bothata bo ntse bo sa rarollehe, ke hona u ka kopang thuso ea baholo. (Sheba temana ea 17.)
Maemong a mangata, ha rea lokela ho isa bara le barali ba bo rona makhotleng hobane ho etsa joalo ho ka senya lebitso la Jehova ha ba ha hlahisa phutheho hampe. (1 Bakorinthe 6:1-8) Empa ho na le maemo a ka hlokang hore motho a ee makhotleng, joaloka ho hlala, ho fumana tokelo ea molao ea ho holisa ngoana, ho fumana chelete ea ho hlokomeloa ke molekane, ho batla chelete ea inshorense eo motho a e fumanang haeba a tsoile kotsi mosebetsing, haeba motho ea nang le likoloto tse kholo a sa khone ho li patala kapa ho phethahatsoa ha lengolo le bontšang thato ea mofu. Haeba Mokreste a ea makhotleng ho rarolla litaba tse joalo ka khotso, o tla be a sa tlole molao oa Molimo.
Haeba Mokreste a tlalehela ba boholong pusong ka tlolo ea molao e kang peto, tlhekefetso ea ngoana, ho loantšoa, bosholu kapa polao, o tla be a sa tlole molao oa Molimo.
a Ha u bala ho tloha ka selemo sa 455 B.C.E. (e leng pele ho mehla ea Jesu) ho fihlela ka selemo sa 1 B.C.E. u fumana lilemo tse 454. Ha u bala ho tloha ka selemo sa 1 B.C.E. ho fihlela ho sa 1 C.E. ( e leng mehleng ea Jesu) u fumana selemo se le seng (lilemo li ne li qala ho 1 eseng ho 0). Ho tloha ka selemo sa 1 C.E. ho fihlela ho sa 29 C.E. ke lilemo tse 28. Ha re li kopanya re fumana lilemo tse 483.
b E le hore u fumane tlhaloso ea mekhoa ena, bala Molula-Qhooa oa October 15, 2000 sehloohong sa “Lipotso Tse Tsoang ho Babali.”