Na u sa Hopola?
Na u kile ua nahana ka hloko ka litokollo tsa haufi tjee tsa Molula-Qhooa? Haeba ho joalo, mohlomong u tla hopola tse latelang:
◻ Jesu o bontšitse lerato la hae bakeng sa batho ho fella kae?
Ka boithatelo a tloha lehaeng la leholimo la khotso le tšireletseho ho tla ja, ho robala le ho tloaelana le batho ba kulang le ba shoang. Kamor’a tsena, Jesu ka boithatelo a tela bophelo ba hae ba botho bo phethahetseng e le hore a ka lokisetsa topollo molemong oa batho. (Matheu 20:28)—12/15, maqephe 3, 4.
◻ Ke melemo efe ea botho e tlelang Mokreste ea hlaolelang boitšoaro?
Mokreste o fumana boitlhompho bo boholo ka ho sebelisa boitšoaro. Hape, o thabela khotso e kholoanyane le thabo ka lapeng, ka phuthehong, le likamanong tsa letsatsi le letsatsi. Ka holimo ho tsohle, boitšoaro bo mo thusa ho haha kamano e ntle le ’Mōpi oa hae, le ho itsebahatsa e le Mokreste oa ’nete.—12/15, leqephe 24.
◻ Sepheo-pheo sa ho amohela baeti e lokela ho ba sefe?
Le hoja e le ho khotsofatsang ho amohela pontšo ea teboho e tsoang ho ba bang le ho hlokomela hore boiteko ba rōna bo ananetsoe, re lokela ho batla ho amohela baeti haholo-holo hobane e le ntho e nepahetseng le e lerato ho e etsa. Ho feta moo, ho khahlisa Jehova Molimo hore ebe re etsa joalo.—1/15, leqephe 22.
◻ Mopalami oa pere e tšoeu, ea hlalositsoeng ho Tšenolo 6:2, o ama bophelo ba hao joang?
Jesu ke mopalami oa pere e tšoeu, ’me o qalile ho palama hoa hae hoa leholimo ka 1914. Ha a profeta kamoo batho ba neng ba tla angoa ke puso ea hae, o itse: “Mohla Mor’a motho a tlang a teetsoe hare ke khanya ea hae, . . . o tla khetha ba bang ho ba bang, joale ka molisa ha a khetha linku ho lipōli.” Kajeno, batho bohle baa aroloa, ’me hore na u arabela joang molaetseng oa ’Muso ho tla bolela lefu kapa bophelo ho uena. (Matheu 25:31-33; 24:14)—1/15, leqephe 6.
◻ E meng ea mekhoa eo Jehova a tšelisang le ho boloka bahlanka ba hae ka eona ke efe?
Jehova o tšelisa le ho boloka bahlanka ba hae ka moea oa hae o halalelang. (1 Petrose 4:12-14) O boetse o ba tšelisa ka ho arabela lithapelo tsa bona. (Bafilipi 4:6, 7) Ho feta moo, Lentsoe la Molimo ke mohloli o moholo oa matšeliso, le tiisetsa bahlanka ba hae hore ha ho letho le ka ba hlahelang leo Jehova a sa le boneng kapa a ke keng a le laola.—2/1, leqephe 19.
◻ Timetso e profetiloeng ke Bibele ke efe?
Ke ho kenella ho khethang hoa Molimo litabeng tsa batho.—2/15, leqephe 7.
◻ Ke eng se boleloang ke polelo ea Jesu “bophelo ka ho lōna,” e ho Johanne 6:53?
Ho Johanne khaolo ea 6, Jesu o lekanya “bophelo bo sa feleng” le ho ba le “bophelo ka ho lōna,” ke hore, ho qetella motho a kene bophelong bo feletseng. “Mohlatsoana” oa majalefa a ’Muso o latsoa hoo tsohong ea oona ha o kena maholimong, ’me “linku tse ling” li etsa joalo kamorao ho bofelo ba Puso ea Lilemo tse Sekete ea Kreste Jesu. (Tšenolo 20:4, 5)—2/15, leqephe 19.
◻ Ke molao-motheo ofe o hatisoang ka bukeng eohle ea Nehemia oo e leng thuto ho rōna kajeno?
Molao-motheo ke hore “ekare ha e se Jehova ea hahang ntlo, ba e hahang ba sebeletsa lefeela.” (Pesaleme ea 127:1) Kajeno, mesebetsing eohle ea rōna, re tla atleha feela haeba Jehova a re hlohonolofatsa.—2/15, leqephe 26.
◻ Ke eng e ileng ea boloka Jobo nakong ea liteko tsa hae, ’me hona ho ka re thusa joang kajeno?
Jobo o ne a kholisehile hore bophelo bona hase bona phetho bo teng. (Jobo 14:13-15) Ho ba le kholiseho e joalo kajeno, hore Jehova o tla tsosa bahlanka ba hae ba tšepahalang, ho ka re thusa ho talimana le liteko leha e le life tseo Satane a ka ’nang a re lihela tsona. (Baheberu 6:10; 11:6)—3/1, leqephe 20.
◻ Batsoali ba ka ithuta eng ka phello ea sebe sa Davida le Bathe-Sheba?
Jehova o atoloselitse mohau oa hae ho Davida ka lebaka la selekane sa ’Muso, kahoo a mo lumella hore eena le Bathe-Sheba ba ’ne ba phele. Leha ho le joalo, seboholi sa Jehova sa re ho eena: “Ka baka la hobane u nyefolisitse lira tsa Jehova ka taba eo, ngoana ea tsoaletsoeng uena o tla shoa ruri.” (2 Samuele 12:14) Hona ho lokela ho hatisa ho batsoali hore boitšoaro ba bona bo ka ama bana ba bona haholo.—3/15, leqephe 31.
◻ Ho hlokoa eng haeba motho e tla ba motsoalle ea amohelehang oa Lipaki tsa Jehova?
Motho ea joalo o tlameha ho amohela letoto lohle la lithuto tsa Bibele, ho akarelletsa litumelo tsa Mangolo tse khethollang Lipaki tsa Jehova.—4/1, leqephe 31.
◻ Haeba menahano e mebe e kena ka likelellong tsa rōna nako le nako, re lokela ho etsa joang?
Re lokela ho hanela likelello tsa rōna ho lula menahanong ena e mebe. Ho re thusa hore re etse sena, re lokela ho ea ho Jehova ka thapelo hang-hang, ‘re jarisa Jehova phahlo tsa rōna.’ (Pesaleme ea 55:22)—4/1, leqephe 21.