Kreste o Etella Pele ka Mafolo-folo Kajeno
“Ke na le lōna ka mehla eohle, ho isa bofelong ba lefatše.”—MATTHEU 28:20.
1. Ke ka tsela efe Kreste a ileng a siea “mesebetsi” ea hae ho barutuoa ba hae?
HA KRESTE a le haufi le ho siea barutuoa ba hae ’me a khutlela leholimong ka 33 C.E., o ile a “ba neela letlotlo la hae.” Hona ho ne ho akarelletsa ho ba “manģosa a Kreste” le ho etsa mosebetsi oa ho bolela oo a neng a se a o qalile, ho o atolosa “ho isa pheletsong ea lefatše.” Pele a ba siea, o ne a ile a ba laela hore ba “etse batho ba lichaba tsohle barutuoa.” Na re na le bopaki ba hore o ne a le hlokolosi hore na ba phetha thōmo eo joang? Ka sebele re na le bona!—Mattheu 25:14; 2 Ba-Korinthe 5:20; Liketso 1:8; Mattheu 28:19, NW.
2. Ke eng e bontšang hore Kreste o ne a latetse haufi-ufi liketso tsa liphutheho tsa lekholo la pele la lilemo?
2 Kamor’a lilemo tse fetang 60 Kreste a nyolohetse leholimong, o ile a bontša hore o ne a ntse a latetse ka matla litšebeletso tsa liphutheho tsa Bokreste lefatšeng. Tšenolong e filoeng moapostola Johanne, setho sa sehlopha se busang sa lekholo la pele la lilemo, Jesu Kreste o ile a romela melaetsa e eang ho liphutheho tse supileng tse neng li le Asia Minor. Ho tse hlano tsa tsona o itse: “Ke tseba mesebetsi ea hao.” ’Me o ile a bontša hore o ne a tloaelane haholo le se neng se etsahala ka hare ho tse ling tse peli, Smyrna le Pergame. O ile a khothatsa le ho eletsa phutheho ka ’ngoe ka ho toba. Ba ne ba ke ke ba belaela likelellong tsa bona hore na ke mang eo e neng e le Moetapele oa bona ea mafolo-folo.—Tšenolo 1:11; 2:1–3:22.
3. Hantle melaetsa e supileng e ne e lebisitsoe ho mang, ’me hoo ho pakoa ke eng?
3 Ha e le hantle, melaetsa eo e supileng e ne e sa lekanyetsoa feela liphuthehong tse supileng tsa Asia tse boletsoeng. Keletso e molemo le litemoso tseo e li fupereng li ne li sebetsa liphuthehong tsohle, ho tloha lekholong la pele la lilemo ho tla fihlela ‘letsatsing la Morena,’ moo re leng teng hona joale.a Mahlo a Kreste, a tšoantšoang le “khabo ea mollo,” a ’nile a shebella se etsahalang ka hare ho ‘liphutheho tsohle.’—Tšenolo 1:10; 2:18, 23, NW.
Morena le Mohlanka oa Hae
4. Kreste o ile a ‘etela hōle’ joang ’me hape a khutla joang “tšiu tse ngata ha li fetile”?
4 Hoba a itšoantše le “motho ea etang, eo eitseng hobane a bitse bahlanka ba hae, a ba neela letlotlo la hae,” Kreste o ile a phaella: “Tšiu tse ngata ha li fetile, morena oa bahlanka bao a fihla, ’me a hlahloba litaba le bona.” (Mattheu 25:14, 19) Ka 33 C.E. Kreste ‘a ea leholimong,’ moo a ileng a lula ka “letsohong le letona la Molimo.” (1 Petrose 3:22) “Tšiu tse ngata ha li fetile,” kamor’a hore a beoe teroneng ka 1914, Kreste a qala ‘ho busa har’a lira tsa hae’ ka ho lihela Satane le bademona ba hae lefatšeng. (Pesaleme ea 110:1, 2; Tšenolo 12:7-9) Eaba o lebisa tlhokomelo ea hae ho bahlanka ba hae. Nako e ne e fihlile ea hore a hlahlobe litaba le bona. E ne e le Moetapele oa bona ea mafolo-folo ho feta leha e le neng pele.
5. Nako ea ho hlahloba e ile ea tla neng, ’me ba tšepahalang ba ile ba putsoa joang?
5 Pale ea kajeno ea batho ba Molimo e bontša hore nako ena ea ho hlahloba e tlile ka 1918-19. Setšoantšo sa litalenta se bontša kamoo Morena a neng a tla hlahloba litaba le masala a bahlanka ba hae ba tlotsitsoeng. Ba ne ba tla lokela ho ikarabella ka bomong ka tsela eo ba ileng ba sebelisa matlotlo a hae ka eona, “e mong le e mong . . . ka matla a hae, ” kapa menyetla ea moea. Ba ’nileng ba bea ba kena thabong ea Morena oa bona, ea ileng a re ho bona: “U bile khabane linthong li se kae, joale ke tla u bea holim’a tse ngata.”—Mattheu 25:15, 20-23.
6. Bakreste ba joalo ba tšepahalang ba tlotsitsoeng ba ile ba bōpa eng joaloka sehlopha, ’me Morena oa bona o ile a re ba hlokomele eng?
6 Bakreste ba joalo ba tlotsitsoeng ka bomong ba ile ba fumanoa e le manģosa a tšepahalang a Morena ea busang hona joale, ba utloisisa ho etsetsa Morena oa bona barutuoa. E le sehlopha ba ile ba fumanoa e le “mohlanka” eo Morena oa bona a ileng a re ka eena: “Ana ke mang mohlanka ea khabane, ea bohlale, eo morena oa hae a ’meileng moalosi oa bahlanka ba hae ho ba nea lijo nakong ea teng? Ho lehlohonolo mohlanka eo morena oa hae, mohla a fihlang, a tla mo fumana a etsa joalo. Ka ’nete ke re ho lōna: O tla ’mea moalosi oa mesebetsi ea hae kaofela.”—Mattheu 24:45-47.
7. (a) “Mesebetsi” ea Kreste e eketsehile joang ho tloha ka 1914? (b) Ke eng e bontšang hore Kreste e boetse ke Moetapele ea mafolo-folo oa “linku tse ling”?
7 “Mesebetsi” ea Kreste e bile mengata haholo ho tloha ka 1914. O apesitsoe ka ‘matla a borena,’ a akarelletsang matla a maholoanyane le boikarabelo bo boholoanyane. (Luka 19:11, 12) Pele o ile a tsoela pele ho bokella masala a “bana ba ’muso,” Bakreste ba tlotsitsoeng ba 144 000 ba “lopolotsoeng har’a batho” ho ea ba marena le baprista le eena leholimong. (Mattheu 13:38; Tšenolo 14:1-4; 5:9, 10) Joale, joalokaha a bontšitse ka pale ho tloha ka 1935, o ’nile a bokella “bongata bo boholo ba batho” ba “linku tse ling” tseo a itseng ka tsona: “Le tsona e ka khona ke li tlise.” (Tšenolo 7:9, 10; Johanne 10:16) E, ke Eena ea tlisang “linku” tsena, ’me eba Moetapele oa tsona ea mafolo-folo. Ho thahasellisang, temana ea Segerike ka ho toba e re, “Le tseo ho hlokahala [hore] ke li etelle pele.” O etella pele “linku” tsohle tsa hae ka mafolo-folo joang kajeno?
Balebeli Letsohong le Letona la Kreste
8, 9. (a) Moapostola Johanne o ile a amohela pono efe? (b) Likandelare tse supileng le linaleli tse supileng li ne li tšoantšetsa eng?
8 Moapostola Johanne, setho sa sehlopha se busang sa phutheho ea pele ea Bokreste, o ile a fumana pono eo ho eona a ileng a “bona likandelare tsa gauda tse supileng; ’me har’a likandelare ka bona e mong ea kang mor’a motho . . . O na a tšoere linaleli tse supileng letsohong le letona la hae.” Jesu Kreste o ile a hlalosetsa Johanne: “Sephiri sa linaleli tse supileng tseo u li boneng letsohong la ka le letona, le likandelare tse supileng tsa gauda. Linaleli tse supileng ke mangeloi a likereke [liphutheho] tse supileng; ’me likandelare tse supileng tseo u li boneng, ke likereke [liphutheho] tse supileng.”—Tšenolo 1:12-20.
9 Ha e hlalosa ka serapa sena, buka “Then Is Finished the Mystery of God” e re: “Na ‘mangeloi’ ao ke a sa bonahaleng? Che. Moapostola Johanne o ile a amohela Tšenolo e feletseng ho Jesu Kreste ka lengeloi la leholimong, ’me e ne e tla ba ho sa utloahaleng hore o ne a ka boetse a ngolla mangeloi a leholimong, sebakeng se sa bonahaleng. Ha a hloke melaetsa e neng e ngoletsoe liphutheho tse supileng Asia. Moelelo oa motheo oa tlotla ‘lengeloi’ ke ‘lenģosa; moromuoa.’ . . . Kaha linaleli tsena tse supileng tsa tšoantšetso li bonoa li le ka letsohong le letona la Jesu, li tlhokomelong ea hae le boikarabellong ba hae hape li tlas’a tataiso ea hae, ‘letsoho la hae le letona’ la matla ao a a sebelisang le khona ho li tataisa le ho li sireletsa. . . . Kaha ‘likandelare tse supileng’ ponong ea ‘letsatsi la Morena’ li tšoantšetsa liphutheho tsohle tsa ’nete tsa Bokreste hona joale, ‘letsatsing lena la sebele la Morena’ ho tloha ka 1914 C.E., kahoo ‘linaleli tse supileng’ li tšoantšetsa balebeli bohle ba tsoetsoeng ka moea, ba tlotsitsoeng ba kang mangeloi ba liphutheho tse joalo tsa kajeno.”b—Maqephe 102-4.
10. Ke “mesebetsi” efe e eketsehileng e beiloeng tlhokomelong ea mohlanka?
10 Balebeli bana ba tlotsitsoeng ba ka letsohong le letona la Kreste kaofela ke karolo ea “mohlanka” eo A mo khethileng ho ba “moalosi oa mesebetsi ea hae kaofela.” Kaha Morena oa mohlanka enoa o apesitsoe ka boikarabelo bo boholoanyane ho tloha ka 1914, “mesebetsi ea hae kaofela” e tlameha ho akarelletsa lintho tse ling tse ngata bakeng sa mohlanka ho feta nakong e fetileng. Ka lebaka le le leng, joaloka “manģosa a Kreste,” hona joale masala ke manģosa a Morena ea busang a busa holim’a ’Muso o hlomiloeng. (2 Ba-Korinthe 5:20) A beiloe ho ikarabella linthong tsohle tsa moea tseo e leng tsa Morena lefatšeng. A tlameha ho sebeletsa ho phethahatsa boprofeta bo sebelitseng ho tloha ha ho hlongoa ’Muso. Hona ho akarelletsa ho bolela “litaba tsena tse molemo tsa ’muso . . . lefatšeng lohle le ahiloeng bakeng sa bopaki.” (Mattheu 24:14, NW) Ho feta leha e le neng pele, a tlameha ho tsoa ho ea etsa “barutuoa ba batho ba lichaba tsohle,” kahoo a bokella “bongata bo boholo ba batho” bo se nang palo. (Mattheu 28:19, 20, NW; Tšenolo 7:9) E, tsena “tse lakatsehang tsa lichaba tsohle” ke karolo ea “mesebetsi” e ekelitsoeng ea Kreste lefatšeng.—Haggai 2:7.
11. (a) “Mesebetsi” ee e eketsehileng e ile ea etsa hore ho hlokahale eng? (b) Ke mang ea tsamaisang mosebetsi, hona joang?
11 Hona hohle ho bolela mosebetsi o eketsehileng bakeng sa “mohlanka” enoa ea entsoeng ka batho ba sehlopha, tšimo e kholoanyane ea tšebetso, e hlileng e atolohang “ho isa pheletsong ea lefatše.” Ho boetse ho hloka ntlo-kholo e kholoanyane le makala a maholoanyane bakeng sa ho tsamaisa mosebetsi le bakeng sa ho hatisa le ho aba libuka bakeng sa boboleli le boithuto ba botho. Joaloka lekholong la pele la lilemo, mosebetsi ona o phethoa tlas’a boetapele bo mafolo-folo ba Jesu Kreste, eo ka tšoantšetso a leng “har’a likandelare,” kapa liphutheho. O li tsamaisa ka balebeli ba tlotsitsoeng, bao a ba tšoereng ka tšoantšetso ka “letsohong le letona la hae.” (Tšenolo 1:13, 16) Joaloka linakong tsa pele tsa Bokreste, sehlopha sa balebeli bana ba tlotsitsoeng se etsa Sehlopha se Busang se bonahalang sa phutheho ea Kreste lefatšeng. ‘Letsoho la hae le letona’ la matla a a sebelisang le tsamaisa banna bana ba tšepahalang ha ba tsamaisa mosebetsi oa ’Muso.
Ka Moea
12, 13. (a) Ho hlaha potso efe ka lebaka la keketseho e khōlō? (b) Kreste o sebelisa moea joang ho koala tlhokahalo ea balebeli har’a barutuoa ba hae lefatšeng?
12 Ka “linku tse ling” tseo hona joale li fetang limillione tse tharo, tse hlophisitsoeng ka liphutheho tse ka bang 52 000, ho hlakile hore masala a tlotsitsoeng a hloka thuso bakeng sa ho hlokomela mesebetsi ea Morena ea lefatšeng. Ba katlaase ho 9 000, ho akarelletsa le bo-khaitseli ba bangata, ba ja litšoantšetso tsa Sehopotso, kahoo ha ho le molebeli ea tlotsitsoeng a le mong bakeng sa phutheho ka ’ngoe. Na hoo ho bolela hore Jesu Kreste ha a ikarabelle liphuthehong tseo ho se nang “lengeloi” le tsoetsoeng ka moea, kapa ‘naleli’?
13 Le hanyenyane! Joalokaha re bone sehloohong se fetileng, lekholong la pele la lilemo Kreste ka mafolo-folo o ile a etella pele phutheho ea hae ka moea o halalelang. Kajeno o sebelisa litho tse tsoetsoeng ka moea tsa Sehlopha se Busang ho khetha balebeli ba khethoang har’a “linku tse ling.” Bana ba tlameha ho khahlametsa litšoaneleho tse hlokoang ho baholo ba tlotsitsoeng, joalokaha ho bontšitsoe mangolong a kang 1 Timothea 3:1-7 le Tite 1:5-9. Litšoaneleho tsena tsa Mangolo li ile tsa ngoloa tlas’a tataiso ea moea o halalelang. Lipuello le likhetho li etsoa kamor’a thapelo le ka tlas’a tataiso ea moea o halalelang. Ho baholo ba joalo ba sa tlotsoang keletso ea Pauluse e sebetsa ka matla a tšoanang: “Le itise, le lise le mohlape kaofela, oo Moea o Halalelang o le beileng balebeli ba oona.”—Liketso 20:28.
14. (a) Boprofeta ba Esaia 32:1, 2 bo se bo ntse bo phethahatsoa joang? (b) Baholo bohle ba tlameha ho ikokobeletsa ‘letsoho le letona’ la Kreste joang?
14 Kahoo, liphuthehong tse baloang ka mashome a likete, Morena ea lokileng ea busang Jesu Kreste o sebelisa “linku tse ling” e le “mahosana” ho sireletsa “linku” tsa hae sefefong sa moea, sekhoholeng sa moea le komellong ea moea. (Esaia 32:1, 2) Joaloka Davida oa khale, baholo, e bang ke tsa batlotsuoa kapa tsa “linku tse ling,” li rapela Jehova: “Moea oa hao o molemo o ke o ntsamaise naheng ea ho loka.” (Pesaleme ea 143:10) ’Me Jehova o utloa thapelo ea tsona. Ka Mora oa hae, o li fa moea oa Hae, ’me Jesu o sebelisa mokhoa ona ka mafolo-folo ho etella pele barutuoa ba hae lefatšeng. Ka tlhaho, baholo bohle ba tlameha ho ikokobeletsa “letsoho le letona” la Kreste la taolo, tataiso le tsamaiso, leo a le sebelisang ka moea le litho tse tsoetsoeng ka moea tsa Sehlopha se Busang.
Ka Mangeloi
15. Kreste o na le mokhoa ofe hape o matleng a hae bakeng sa ho etella pele barutuoa ba hae lefatšeng ka mafolo-folo?
15 Sehlooho se fetileng se boletse hore mangeloi a ne a sebelisoa lekholong la pele la lilemo ho tsamaisa le ho lopolla Bakreste ba pele le ho ba thusa mosebetsing oa bona oa ho bolela. Na e ne e tla ba ho utloahalang ho nahana hore Morena oa rōna ea busang Jesu Kreste ha a sa sebelisa mangeloi ka mafolo-folo ho etella pele barutuoa ba hae kajeno? E ne e ke ke ea ba ho sa utloahaleng feela empa ho ne ho tla boetse ho hanana le Mangolo.
16, 17. Re na le bopaki bofe ba hore Kreste o sebelisa mangeloi ho kotula “bana ba ’muso” le ho bokella “linku tse ling”?
16 Ho latela setšoantšo sa Jesu sa koro le mofoka, nako ea kotulo e ne e tla tla “bofelong ba lefatše,” bo qalileng ka 1914. Nakong ea kotulo, “bana ba ’muso” ba ne ba tla aroloa ho “bana ba e mobe.” Morena o ne a tla sebelisa mang hore a kotule? “Bakotuli bona ke mangeloi.” Kreste o ile a phaella: “Mor’a motho o tla roma mangeloi a hae; a tla khetha ’musong oa hae likhopiso tsohle le ba etsang bokhopo.” (Mattheu 13:37-41) Kreste o sebelisa mangeloi ho sireletsa baena ba hae lefatšeng.
17 Empa ho thoe’ng ka “linku tse ling”? Na Kreste o sebelisa mangeloi ho li bokella? Ha ho pelaelo! Setšoantšo sa hae sa linku le lipōli se re: “Mohla Mor’a motho a tlang a teetsoe hare ke khanya ea hae, mangeloi a e-na le eena kaofela, ke moo a tla lula teroneng ea khanya ea hae. Lichaba tsohle li tla bokelloa pel’a hae; ’me o tla khetha ba bang ho ba bang, joale ka molisa ha a khetha linku ho lipōli.” (Mattheu 25:31, 32) Kreste o sebelisa mangeloi a hae mosebetsing ona oa ho arola. Feela joalokaha lengeloi le ile la tataisetsa Filippi ho leqhalaha la Moethiopia, kahoo ho na le bopaki bo bongata kajeno ba hore Kreste o sebelisa mangeloi a hae ho tataisetsa Lipaki tsa hae ho ba kang linku. Batho ba bangata ba pakile hore ba ne ba ntse ba rapella thuso pejana Paki e kokota menyakong ea bona.—Liketso 8:26, 27.
Tšepo e Feletseng Tataisong ea Kreste
18, 19. Motheong oa se etsahetseng lekholong la pele la lilemo, re tšepile eng?
18 Lekholong la pele la lilemo, maemo hase kamehla a neng a lumella hore Kreste a sebelise sehlopha se busang Jerusalema ho rarolla bothata bo tobileng. Ha Pauluse a ne a le mong Asia Minor e ka leboea ’me a hloka ho tseba hore na ke tšimo efe e bulehileng e latelang, Kreste o ile a sebelisa moea. (Liketso 16:6-10) Kajeno Lipaki tsa Jehova li na le tšepo ea hore baena leha e le bafe ba tsona ba arohanngoang le Sehlopha se Busang ka nakoana ka lebaka la mahloriso ba ntse ba le tlas’a boetapele bo mafolo-folo ba Kreste, ka moea le ka tšehetso ea mangeloi.
19 Morao koana mehleng ea Bokreste ba pele, liqeto tse ling tse ileng tsa etsoa ke sehlopha se busang e ka ’na eaba ho ne ho le thata ho li utloisisa ka nako eo. Hona ha ho pelaelo hore e bile ’nete ha Pauluse a khutlisetsoa Tarese kapa ha a romeloa tempeleng kamor’a leeto la hae la boraro la boromuoa. (Liketso 9:30; 21:23-25) Empa, ha e le hantle Kreste o ne a susumetsa liqeto tse joalo. (Liketso 22:17-21; 23:11) Kajeno re ka tšepa hore ho sa tsotellehe hore na Kreste o lumella eng hore e etsahale har’a barutuoa ba hae lefatšeng e na le morero o moholo o ipatileng, joaloka lekholong la pele la lilemo.
20. Re kholisitsoe ke eng, hona boikemisetso ba rōna ke bofe?
20 Kahoo, ha re bala ka Bibeleng hore Kreste “ke eena hloho ea ’mele, ea kereke [phutheho],” rea kholiseha hore hase Hlooho feela tjee ka lebitso. (Ba-Kolosse 1:18) Rea tseba ka phihlelo hore ke Hlooho ea sebele le e mafolo-folo. Ha re bala buka ea Liketso ’me re bona kamoo Kreste a tsamaisitseng litaba kateng har’a Bakreste ba pele, re ka bona hore o ntse a sebelisa mokhoa o tšoanang le kajeno. Re bona bopaki ba hore Kreste o sebelisa moea o halalelang, mangeloi le “mohlanka ea khabane, ea bohlale” le Sehlopha sa hae se Busang, ho khetha baholo ba tšoanelehang moeeng. Re tšepile ho tsamaisa lintho ha Kreste ho mafolo-folo re ikemiselitse ho tsoela pele re ‘bua ’nete’ le ho hōla leratong “nthong tsohle ho Kreste, e leng hloho.”—Ba-Efese 4:15.
[Mongolo o botlaaseng ba leqephe]
a Bakeng sa tlhaloso e feletseng ea melaetsa ena e supileng le tšebetso ea eona, bona buka “Then Is Finished the Mystery of God,” likhaolo 7 ho ea ho 14, e hatisitsoeng ke Watchtower Bible and Tract Society of New York, Inc.
b Tokollo ea Molula-Qhooa oa la 15 Motšeanong, 1972, e hlakisitse ntlha ena haholoanyane, e re: “Ntle ho pelaelo, hase moholo a le mong, mopresibitheri, molebeli kapa molisa, empa ‘sehlopha sa baholo’ kaofela e ne e le sona seo Morena ea tlotlisitsoeng, Jesu Kreste, a se bitsitseng ‘lengeloi’ le neng le tšoantšetsoa ka naleli ea leholimong. . . . ‘Sehlopha sa baholo’ (kapa presibitheri) mane Efese se ne se lokela ho sebetsa joaloka naleli bakeng sa ho khantša leseli la leholimong, la moea holim’a phutheho eo moea o halalelang o ba entseng balisa ba eona.”
Lintlha tse Khōlō tse ka Hopoloang
◻ Re na le bopaki bofe ba hore Kreste o ne a latetse haufi-ufi liketso tsa liphutheho tsa lekholo la pele la lilemo?
◻ Kreste o ile a khetha mang ho alosa “mesebetsi” ea hae kaofela, ’me mesebetsi ee e akarelletsa eng?
◻ Ke bo-mang ba tšoantšetsoang ke linaleli tse supileng tse letsohong le letona la Kreste?
◻ Kreste o sebelisa moea o halalelang, mangeloi le Sehlopha se Busang se tlotsitsoeng joang ho etella pele phutheho ea hae kajeno?
◻ Ke hobane’ng re ka tšepa tsamaiso ea lintho ea Kreste ka ho feletseng kajeno?
[Lebokose le leqepheng la 20]
Liteko tse tlang ka lebaka la lintoa, liphetohelano kapa mahloriso a tobileng le lithibelo tsa molao li ka ’na tsa u thatafalletsa ho ntšetsa pele borapeli ba Bokreste ka mokhoa o hlophisehileng ka botlalo. Maemo a ka ’na a hlaha a etsang hore ho be thata ho tšoara liboka tse khōlō tsa phutheho. Ho kopana le ofisi ea lekala ho ka ’na ha khaoloa ka nakoana. Ho eteloa ke balebeli ba potoloho ho ka ’na ha sitisoa. Litokollo tse ncha li ka ’na tsa se ke tsa fihla. Haeba u etsahalloa ke e ’ngoe ea lintho tsena, u lokela ho etsa joang?
Karabelo ke ena: Tlas’a maemo a joalo, etsa sohle seo u ka se khonang, le kamoo u ka khonang, ka tsela ea borapeli bo hloekileng. Boithuto ba botho bo lokela ho ba teng. Hangata lihlopha tse nyenyane tsa baena li ka kopana bakeng sa ho ithuta malapeng. Litokollo tse ithutiloeng nakong e fetileng le Bibele ka boeona li ka sebelisoa e le motheo bakeng sa liboka. U se ke ua tšoha kapa ua khathatseha. Ka kakaretso, ka nako e khutšoanyane mokhoa o mong oa ho buisana le baena ba ikarabellang o tla ba teng. Sehlopha se Busang se batla litsela tsa ho kopana le baena.
Empa le haeba u iphumana u arotsoe ho baena bohle ba hao ba Bakreste, u ’ne u hopole hore ha ua aroloa ho Jehova le Mora oa hae Jesu Kreste.—Ho Hlophisetsoa ho Phetha Tšebeletso ea Rōna, Leqephe 168.
[Setšoantšo se leqepheng la 17]
Ka tšoantšetso Kreste o har’a liphutheho, a tšoere balebeli ka letsohong la hae le letona