Lipono tse Hlollang tse Matlafatsang Tumelo
Lintlha tse Khōlō tsa Tšenolo
MOHLANKA oa Jehova Johanne o sehleke-hlekeng se senyenyane sa Patmose, mathōkong a lebōpo le ka bophirimela la Asia Minor. Ha moapostola enoa ea hōlileng a ntse a le moo o bona lintho tse hlollang—tsa tšoantšetso, tseo hangata li neng li tsietsa, ebile e le tsa bohlokoa ka sebele! Ho etsahala hore a be letsatsing la Morena, le qalang ho tloha ha Jesu a behoa teroneng ka 1914 ’me le tsoela pele ho fihlela qetellong ea Puso ea Hae ea Lilemo tse Sekete. Le hoja Johanne a bona liketsahalo tse tla etsahala nakong ea batho e lefifi, ponelo-pele ea hae ea Puso ea Kreste ea Lilemo tse Sekete ke e hlollang hakaakang! Ka nako eo batho ba utloang ba tla thabela mahlohonolo a makaakang!
Johanne o tlalehile lipono tsena bukeng ea Bibele ea Tšenolo. Le hoja e ngotsoe hoo e ka bang ka 96 C.E., e ka matlafatsa tumelo ea rōna ho Molimo oa boprofeta, Jehova, le ho Mora oa oona, Jesu Kreste.—Bakeng sa boitsebiso bo eketsehileng, bona buka ea Tšenolo—Tlhōrō ea Eona e Hlollang ka Botle e Haufi!, e hatisitsoeng ke Watchtower Bible and Tract Society of New York, Inc.
Kreste o Fana ka Keletso e Lerato
Qalong ea tšenolo e tsoang ho Molimo ka Kreste ho bonahala mangolo a eang liphuthehong tse supileng tsa majalefa a ’Muso hammoho le Jesu. (1:1–3:22) Ka kakaretso, mangolo ana a fana ka pabatso, a hlokomelisa ka mathata a leng teng, a fana ka khalemelo le khothatso kapa khothatso feela, ’me a bontša mahlohonolo a tlisoang ke ho utloa ka botšepehi. Le hoja Baefese ba ne ba mamelletse, ba ne ba lahlile lerato leo ba neng ba e-na le lona pele. Phutheho ea Smyrna e ruileng moeeng e khothalletsoa ho lula e tšepahala har’a matšoenyeho. Phutheho ea Pergame ha ea hlōloa ke mahloriso, empa e lumelletse thuto ea lihlotšoana tsa bokhelohi. Ho sa tsotellehe tšebetso e eketsehileng ea Bakreste ba Thyatire, ho na le tšusumetso ea Jezebele moo. Ho hlokahala hore phutheho ea Sarda e tsohe moeeng, phutheho e Filadelfia e phehelloa hore e tšoarelle ho seo e nang le sona, ’me ho hlokahala hore Balaodicea ba leng foofo ba phekoloe moeeng.
Ke mantsoe a matle hakaakang bakeng sa ho koetlisa marena a leholimo a nakong e tlang—ha e le hantle, bakeng sa ho koetlisa Bakreste bohle! Ka mohlala, na ho na le ba bang ba foofo har’a rōna? Joale nkang khato! E-bang ba khathollang joaloka senoelo sa metsi a batang letsatsing le chesang empa hape le qalise ho bonahatsa cheseho e tukang bakeng sa Jehova le tšebeletso ea hae.—Bapisa le Mattheu 11:28, 29; Johanne 2:17.
Konyana e Phetla Buka
Joale Jehova o bonoa a le teroneng ea hae e khanyang. (4:1–5:14) O pota-potiloe ke baholo ba 24 le libōpuoa tse ’nè tse phelang. Buka e koetsoeng ka litiiso tse supileng e ka letsohong la hae. Ke mang ea ka phetlang buka eo? Ke Konyana, Jesu Kreste, e tšoanelehang ho etsa joalo!
Ho koaholloa liketsahalo tse matla ha Konyana e bula litiiso tse tšeletseng. (6:1–7:17) Ha ho buloa tiiso ea bosupa, Kreste o hlaha a kaletse pere e tšoeu, o amohela moqhaka (ka 1914), ’me o tsoa e le ea hlōlang. Ha ho buloa litiiso tse eketsehileng tse tharo, banna ba bang ba lipere ba tlisa ntoa, tlala, le lefu ho batho. Ha ho buloa tiiso ea bohlano, batho ba bolaetsoeng tumelo ka baka la Kreste baa hooa hore mali a bona a phetetsoe, ’me e mong le e mong oa bona o fuoa “seaparo se selelele se sesoeu,” se bontšang boemo bo lokileng mabapi le ho tsosoa ha bona hore e be libōpuoa tsa moea tse sa shoeng tse nang le litokelo tsa borena. (Bapisa le Tšenolo 3:5; 4:4.) Ha ho buloa tiiso ea botšelela, letsatsi la khalefo ea Molimo le ea Konyana le etelloa pele ke tšisinyeho ea lefatše. Empa ‘meea e tsoang likhutlong tse ’nè tsa lefatše,’ e tšoantšetsang kahlolo ea timetso, ea thibeloa ho fihlela bahlanka ba 144 000 ba Molimo ba tšoailoe. Ha ba tlotsoa ka moea oa Molimo ’me ba amoheloa e le bara ba oona ba moea, ba fumana pontšo ea bopaki esale pele—letšoao, kapa tebeletso—ea lefa la bona la leholimo. Ho tšoauoa hona e tla ba ha ka ho sa feleng feela ka mor’a hore ba lekoe. (Ba-Roma 8:15-17; 2 Ba-Korinthe 1:21, 22) ’Me e tlameha ebe Johanne o maketse hakaakang ha a bona “bongata bo boholo ba batho” bo tsoang lichabeng tsohle—letšoele le nang le tšepo ea bophelo bo sa feleng lefatšeng la paradeise! Bo tsoa “mahlomoleng a maholo,” e leng nako ea tsieleho har’a batho eo ho se nang e ka tšoanang le eona.
Ha tiiso ea bosupa e buloa ho etsahala liketsahalo tse tšosang hakaakang! (8:1–11:14) Ho khutsa ka nako e etsang hora, ho fang lithapelo tsa bahalaleli sebaka sa hore li utluoe, ho lateloa ke ho liheloa ha mollo lefatšeng o tsoang aletareng. Joale mangeloi a supileng a itokisetsa ho letsa literompeta hore a tsebahatse likotlo tseo Molimo o tla li liha holim’a Bokreste-’mōtoana. Literompeta li letsoa ho pholletsa le nako eohle ea bofelo ho fihlela mahlomoleng a maholo. Literompeta tse ’nè li tsebahatsa likotlo tse tla oela lefatše, leoatle, mehloli ea metsi a hloekileng, le letsatsi, khoeli, le linaleli. Ho letsoa ha terompeta ea bohlano ho bitsa litsie tse tšoantšetsang Bakreste ba tlotsitsoeng ba phallelang ntoeng ho tloha ka 1919 ho ea pele. Ha ho letsoa terompeta ea botšelela, lebotho la ba kalletseng lipere lea hlasela. Phethahatsong ea sena, batlotsuoa, ba tšehelitsoeng ke “bongata bo boholo ba batho” ho tloha ka 1935, ba bolela melaetsa e hlokofatsang ea kahlolo khahlanong le baeta-pele ba bolumeli ba Bokreste-’mōtoana.
Joale Johanne o ja buka, ho bontšang hore batlotsuoa ba amohela kabelo ea bona ’me ba matlafatsoa ke karolo ea Lentsoe la Molimo e nang le lipolelo tsa bomolimo tsa kahlolo tseo ba li bolelang khahlanong le Bokreste-’mōtoana. Moapostola o laeloa hore a lekanye sehalalelo sa tempele, ho bontšang ho phethahatsoa ho tiileng ha merero ea Jehova mabapi le tokisetso ea tempele le hore litekanyetso tsa Molimo li finyelloe ke ba kopanelang le eona. Joale ‘lipaki tse peli’ tse tlotsitsoeng tsa Molimo li profeta li apere lesela le mahoashe, lia bolaoa, empa lia tsosoa. Sena se supa ho 1918-19, ha lira li ne li sitisa mosebetsi oa tsona oa ho bolela hoo e neng eka o shoele, empa bahlanka ba Jehova ba ile ba hlasimolloa ka mohlolo bakeng sa tšebeletso ea bona.
’Muso o Tsoetsoe!
Ho letsoa ha terompeta ea bosupa ho tsebahatsa ho tsoaloa ha ’Muso. (11:15–12:17) Leholimong mosali oa tšoantšetso (mokhatlo o hlophisitsoeng oa leholimo oa Jehova Molimo) o tsoala ngoana e motona (’Muso oa Molimo ’me Kreste e le Morena), empa drakone (Satane) o leka ho o harola le hoja a hlōleha. Ha a fihlisa ntoa e leholimong sehlohlolong ka mor’a ho tsoaloa ha ’Muso ka 1914, Mikaele ea hlōtseng (Jesu Kreste) o lahlela drakone le mangeloi a eona tlaase lefatšeng. Drakone e tsoela pele ho loantša masala a tlotsitsoeng a peō ea mosali oa leholimo.
Joale Johanne o bona sebata se etsetsoang setšoantšo se manyala. (13:1-18) Sebata sena sa lipolotiki se lihlooho li supileng, se linaka li leshome se nyoloha “leoatleng,” e leng matšoele a befileng a batho ao mebuso ea batho e hlahang ho ’ona. (Bapisa le Daniele 7:2-8; 8:3-8, 20-25.) Mohloli oa matla a sebōpuoa see sa tšoantšetso ke ofe? Ke Satane, drakone! Ak’u nahane feela! Sebata se linaka li peli (’Muso oa Lefatše oa Manyesemane le Maamerika) se bonoa se etsetsa sebata sena se tšosang sa lipolotiki “setšoantšo,” seo hona joale se tsejoang e le Machaba a Kopaneng. Ba bangata ba susutlelloa ho rapela sebata le ho amohela “letšoao” la sona ka ho etsa lintho ka tsela ea sona le ho se lumella hore se buse bophelo ba bona. Empa ka tieo Lipaki tsa Jehova li hana letšoao leo la sebata la bodemona!
Bahlanka ba Jehova ba Nka Khato
Bahlanka ba sa tšoaneng ba Molimo ba bonoa ba nka khato ha ho tšolloa linkho tse supileng tsa bohale ba oona. (14:1–16:21) Mamela! Johanne o utloa ba 144 000 ba bina joalokaha eka ba bina pina e ncha a le holim’a Thaba ea Sione ea leholimo. Lengeloi le fofang mahareng a leholimo le tšoere litaba tse molemo tsa ka ho sa feleng hore le li bolelle baahi ba lefatše. See se bontša eng? Se bontša hore Lipaki tsa Jehova li thusoa ke mangeloi ha li bolela molaetsa oa ’Muso.
E tlameha ebe Johanne o maketse ha a bona morara oa lefatše o kotuloa ’me lichaba tsohle li silakanngoa ha ho hatakeloa sehatelo sa veine sa bohale ba Molimo. (Bapisa le Esaia 63:3-6; Joele 3:12-14.) Ka taelo ea Jehova, joale mangeloi a supileng a tšolla linkho tse supileng tsa bohale ba Molimo. Lefatše, leoatle, le mehloli ea metsi a hloekileng, hammoho le letsatsi, terone ea sebata, le Nōka ea Eufrate, li angoa ke ho tšolloa ha linkho tsa pele tse tšeletseng. Nahana kamoo Johanne a ileng a tšoha ka teng ha a hlokomela hore leshano le susumetsoang ke bademona le bokella marena a batho ho ea ntoeng ea Molimo ea Harmagedone. ’Me liphello tsa eona e ba tse senyang ha nkho ea bosupa e tšolleloa moeeng.
Basali ba Babeli ba Tšoantšetso
Ruri, Johanne o hlolletsoe ke ho bona bopaki ba ho fela ha Babylona e Moholo, e leng ’muso oa lefatše oa bolumeli ba bohata, le ho bona liketsahalo tse thabisang tse latelang timetso ea eona. (17:1–19:10) E tahiloe ke mali a bahalaleli, e bonoa e kaletse sebata se ’mala oa sekarelata se nang le lihlooho tse supileng le linaka tse leshome (Selekane sa Lichaba le mohlahlami oa sona, Machaba a Kopaneng). Khele, empa e timetsoa hampe hakaakang ha linaka tseo li e fetohela!
Ho utloahala mantsoe a tsoang leholimong a rorisang Jehova ka ho timetsa Babylona e Moholo. Ke mohoo o moholo hakaakang oa thoriso o tsebahatsang lenyalo la Konyana le monyaluoa oa eona, batlotsuoa ba tsositsoeng!
Kreste oa Hlōla ’me oa Busa
Joale Johanne o bona ha Morena oa marena a etella pele mabotho a leholimo ho ea felisa tsamaiso ea lintho ea Satane. (19:11-21) E, Jesu, “Lentsoe la Molimo,” o loantša lichaba. Moapostola o bona sebata (mokhatlo o hlophisitsoeng oa lipolotiki oa Satane) le moprofeta oa bohata (’Muso oa Lefatše oa Manyesemane le Maamerika) ba akheloa “letšeng le tukang mollo,” le tšoantšetsang timetso e felletseng le ea ka ho sa feleng.
Joale ho latela eng? Johanne o bona ho akheloa sekoting ha Satane. Joale ho latela ponelo-pele ea Puso ea Kreste ea Lilemo tse Sekete, eo nakong ea eona Jesu le babusi-’moho le eena ba tsositsoeng ba ahlolang batho, ba phahamisetsa ba utloang phethehong ea botho! (20:1-10) Joale ke nako ea teko ea ho qetela. Ha Satane a lokolloa sekoting, o tla futuha hore a khelose batho ba seng ba phethahetse, empa timetso e tla felisa lipakane tsa bafetoheli bohle ba bademona le batho ba khahlanong le Molimo.
E tlameha e be Johanne o hlolletsoe hakaakang ha a khutlela morao ka nako ’me a bona bohle ba shoeleng, ba leng Hades (lebitla le tloaelehileng la batho), le ba leoatleng ba tsosoa ’me ba ahloloa pel’a Molimo, o lutseng teroneng e khōlō e tšoeu! (20:11-15) ’Me ba lokileng ba tla thabela topollo e khōlō hakaakang ha lefu le Hades li akheloa letšeng la mollo, li se li ke ke tsa hlola li sebetsa!
Ha lipono tsa Johanne li se li tla fela, o bona Jerusalema e Mocha. (21:1–22:21) Motse oo o busang o theoha leholimong ’me o tlisetsa lichaba khanya. ‘Nōka ea metsi a bophelo’ e tšoantšetsang ’nete ea Mangolo le tokisetso leha e le efe ea Molimo e theiloeng sehlabelong sa Jesu bakeng sa ho phekola batho ba utloang sebeng le lefung le ho ba fa bophelo bo sa feleng, e ne e phalla ho pholletsa le Jerusalema e Mocha. (Johanne 1:29; 17:3; 1 Johanne 2:1, 2) Lebōpong le leng le le leng la nōka ena, Johanne o bona lifate tse nang le mahlaku a phekolang, tse tšoantšetsang tokisetso ea Jehova ea ho fa batho ba utloang bophelo bo sa feleng. Melaetsa ea ho qetela e tsoang ho Molimo le Kreste e lateloa ke memo. Ke ho hlollang hakaakang ho utloa ha moea le monyaluoa ba mema e mong le e mong ea nyoriloeng hore ‘a tle, a nke metsi a bophelo ntle ho tefo’! ’Me ntle ho pelaelo ha re bala mantsoe a qetellang a Tšenolo, re hooa ka cheseho joaloka Johanne: “Amen! Tlo, Morena Jesu!”
[Lebokose/Setšoantšo se leqepheng la 21]
Lula u Falimehile: Har’a mantsoe a boprofeta a bolelang ntoa ea Molimo ea Harmagedone (Armageddone), ho thoe: “Bonang, [’na Jesu Kreste] ke tla joale ka lesholu. Ho lehlohonolo ea lebelang [“ea lulang a falimehile,” NW], ea bolokang liaparo tsa hae, hore a tle a se ke a tsamaea a le feela, ’me lihlong tsa hae li se ke tsa bonahala!” (Tšenolo 16:15) Mohlomong mona ho buuoa ka mesebetsi ea molebeli, kapa ofisiri, oa thaba ea tempele e Jerusalema. Nakong ea litebelo, o ile a kena ka har’a tempele ho bona hore na balebeli ba eona ba Balevi ba ne ba falimehile kapa ba robetse libakeng tsa bona. Molebeli ofe kapa ofe ea neng a fumanoa a robetse o ne a otloa ka thupa, ’me liaparo tsa hae li ne li ka chesoa e le kotlo e hlabisang lihlong. Kaha joale Harmagedone e haufi, masala a tlotsitsoeng a “baprista le marena,” kapa “ntlo ea Moea,” a ikemiselitse ho lula a falimehile moeeng. Metsoalle ea ’ona, ea “bongata bo boholo ba batho,” e nang le tšepo ea lefatšeng, le eona ka ho tšoanang e tlameha ho lula e falimehile hobane le eona e nehelana ka tšebeletso e halalelang ho Molimo tempeleng. (1 Petrose 2:5, 9; Tšenolo 7:9-17) Haholo-holo balebeli ba Bakreste ba lokela ho lula ba lebetse hore ho se hlahe maemo a mabe ka phuthehong. Kaha barapeli bohle ba tšepahalang ba leng tempeleng ea Molimo ea moea ba lula ba falimehile, ba ipoloka ba apere “liaparo tse telele” tsa bona, tse bontšang tšebeletso ea bona e hlomphehang e le Lipaki tsa Jehova.