Etsa Matsoho a Jehova a sa Feleng Tšehetso ea Hao
“Molimo oa ka ho sa feleng ke bolulo ba hao, ’me matsoho a oona a sa feleng a ka tlas’a hao.”—DEUTERONOMA 33:27, American Standard Version.
1, 2. Ke hobane’ng ha batho ba Jehova ba ka kholiseha hore o tla ba tšehetsa?
JEHOVA o tsotella batho ba hae. Ka mohlala, nakong eohle ea ha Baiseraele ba le tsietsing, ‘o ile a ba tsietsing le bona’! A susumetsoa ke lerato le kutloelo-bohloko, o ile a “ba tiisa, a ba jara.” (Esaia 63:7-9) Kahoo haeba re tšepahala ho Molimo, re ka kholiseha hore o tla re tšehetsa.
2 Moprofeta Moshe o itse: “Molimo oa ka mehla ke setšabelo sa hao, ’me matsoho a sa feleng a ka tlas’a hao.” (Deuteronoma 33:27) Phetolelo e ’ngoe e re: “Molimo oa ka ho sa feleng ke bolulo ba hao, ’me matsoho a oona a sa feleng a ka tlas’a hao.” (American Standard Version) Empa matsoho a Molimo a tšehetsa bahlanka ba oona joang?
Ke Hobane’ng ha Mathata a le Mangata Hakaale?
3. Batho ba utloang ba tla thabela ‘tokoloho e khanyang ea bana ba Molimo’ ka ho felletseng neng?
3 Ho sebeletsa Jehova ha ho re sireletse mathateng a tloaelehileng ho batho ba sa phethahalang. Mohlanka oa Molimo, Jobo, o itse: “Motho ea tsoetsoeng ke mosali o na le matsatsi a se makae, ’me o khotše litsietsi.” (Jobo 14:1) Mabapi le “matsatsi a ho phela ha rōna,” mopesaleme o itse: “Boikakaso ba [’ona] ke khathatso le bomalimabe.” (Pesaleme ea 90:10) Bophelo bo tla ba joalo ho fihlela ha ‘pōpo e lokolloa bohlankeng ba tšenyeho, ’me e ba le tokoloho e khanyang ea bana ba Molimo.’ (Ba-Roma 8:19-22) Seo se tla etsahala nakong ea Puso ea Kreste ea Lilemo tse Sekete. Ka nako eo batho bao e leng bafo ba ’Muso ba tla lopolloa sebeng le lefung motheong oa sehlabelo sa topollo sa Jesu. Qetellong ea Lilemo tse Sekete, Kreste le marena le baprista ’moho le eena ba tla be ba thusitse batho ba utloang hore ba finyelle phetheho, ’me ba tlang ho tšepahala ho Molimo tekong ea ho qetela ea Satane le bademona ba hae, mabitso a bona a tla ngoloa “bukeng ea bophelo” ’me a ke ke a hlakoloa. (Tšenolo 20:12-15) Joale ba tla thabela tokoloho e khanyang ea bana ba Molimo ka ho felletseng.
4. Ho e-na le hore re belaele ka boemo ba rōna bophelong, re lokela ho etsa eng?
4 Ho sa le joalo, ho e-na le ho belaela ka boemo ba rōna bophelong, a re tšepeng Jehova. (1 Samuele 12:22; Juda 16) Hape a re leboheng Moprista oa rōna ea Phahameng, Jesu, eo re ka atamelang Molimo ka eena “hore re tle re bone mohau, ’me re fumane lereko, re tle re thusoe nakong e loketseng.” (Ba-Heberu 4:14-16) Le ka mohla ha rea lokela ho tšoana le Adama. Ha e le hantle, ka phoso o ile a nģosa Jehova ka hore o mo file mosali e mobe, a re: “Mosali eo u ’neileng eena hore a lule le ’na, ke eena ea mphileng tsa sefate, ka li ja.” (Genese 3:12) Molimo o fana ka lintho tse molemo ’me ha o re tlisetse mathata. (Mattheu 5:45; Jakobo 1:17) Hangata lintho tse bohloko li hlahisoa ke ho haelloa ha rōna ke bohlale kapa liphoso tsa motho e mong. Li ka boela tsa re hlahela hobane re le baetsalibe ’me re phela lefatšeng le leng tlas’a taolo ea Satane. (Liproverbia 19:3; 1 Johanne 5:19) Leha ho le joalo, ka mehla matsoho a Jehova a sa feleng a tšehetsa bahlanka ba hae ba tšepahalang ba itšetlehang ka eena ka thapelo le ba sebelisang keletso ea Lentsoe la hae bophelong ba bona.—Pesaleme ea 37:5; 119:105.
Ho Tšehetsoa ha re Kula
5. Ba kulang ba ka fumana khothatso efe ho Pesaleme ea 41:1-3?
5 Ka linako tse ling ho kula ho re kenya tsietsing. Leha ho le joalo, Davida o itse: ‘Ho thabile ea hlokomelang mofutsana; Jehova o tla mo lopolla, a mo lopolle mohla letsatsi la tlokotsi. Jehova o tla mo sireletsa, a mo phelise hamonate. Lefatšeng batho ba tla re o thabile; a ke ke a tlohella lira tsa hae ho etsa borata ka eena. Jehova o tla mo thusa liphateng tsa lefu, a ’ne a fetole liphate tsa hae, a li fetole ha a ntse a kula.’—Pesaleme ea 41:2-4, BPN.
6, 7. Molimo o ile oa thusa Davida joang ha a ne a robetse liphateng ’me a kula, ’me ke joang see se ka khothatsang bahlanka ba Jehova kajeno?
6 Motho ea nahanelang o thusa ba hlokang. ‘Letsatsi la tlokotsi’ e ka ba ketsahalo efe kapa efe e bakang tlokotsi kapa ho hlaheloa ke mathata a mo fokolisang ka nako e telele. O tšepa Molimo bakeng sa hore o mo sireletse nakong ea ho kula, ’me ba bang ‘ba re ke motho ea thabileng lefatšeng’ ka ho phatlalatsa litaba tsa litšebelisano tse bontšang mohau pakeng tsa Jehova le eena. Molimo o ile oa tšehetsa Davida “ha a le liphateng tsa boloetse,” mohlomong nakong e thata ea ha mora oa Davida, Absalome, a batla ho nka terone ea Iseraele.—2 Samuele 15:1-6.
7 Kaha Davida o ne a nahanela ba futsanehileng, o ne a lumela hore Molimo o tla mo tšehetsa ha a robetse betheng a kula ’me ho se letho leo a ka le etsang. (Pesaleme ea 18:24-26) Le hoja a ne a kula haholo, o ne a kholisehile hore Molimo o tla ‘fetola liphate tsa hae,’ e seng ka ho felisa ho kula hoo ka mohlolo, empa ka ho mo matlafatsa ka mehopolo e tšelisang. Ho ne ho tla ba joalokaha eka Jehova o fetola liphate tsa hae tsa ho kula ka ho mo folisa. Ka ho tšoanang, haeba re kula joaloka bahlanka ba Molimo, matsoho a sa feleng a Jehova a tla re tšehetsa.
Ho Tšelisa ba Tepelletseng Maikutlo
8. Mokreste e mong ea kulang o bontšitse joang hore o itšetlehile ka Molimo?
8 Ho kula ho ka tepelletsa motho maikutlo. Mokreste ea kulang haholo, eo ka linako tse ling a hlokang matla a lekaneng a ho bala, o re: “Sena hangata se etsa hore ke tepelle maikutlo, ke ikutloe ke se na thuso, ’me ke lle.” Kaha oa tseba hore Satane o batla ho mo nyahamisa, oa mo loantša, oa hlokomela hore Jehova o tla mo thusa hore a se ke a hlōleha. (Jakobo 4:7) Monna enoa ke khothatso ho ba bang ba tsebang hore o tšepa Molimo. (Pesaleme ea 29:11) Le hoja a kene sepetlele, o letsetsa bakuli le ba bang ho ba thusa ho ikaha moeeng. Eena ka boeena o ikaha moeeng ka ho mamela lik’hasete tse rekotiloeng tsa Kingdom melodies le lihlooho tse leng koranteng ena le makasine o tsamaeang le eona oa Tsoha! le ka ho kopanela le Bakreste-’moho. Moena enoa o re: “Ka mehla ke bua le Jehova ka thapelo, ke mo kōpa hore a mphe matla, tataiso, matšeliso, le ho nthusa ho mamella.” Haeba u Mokreste ea nang le mathata a tebileng a bophelo, ka mehla u tšepe Jehova ’me u etse matsoho a hae a sa feleng tšehetso ea hao.
9. Ke mehlala efe e bontšang hore ka linako tse ling batho ba tšabang Molimo ba tepella maikutlo?
9 Ho tepella maikutlo ke bothata bo bileng teng ho tloha khale. Ha Jobo a le tlas’a teko, o ile a bua joaloka motho ea lahliloeng ke Molimo. (Jobo 29:2-5) Kameho ea Nehemia ka ho ripitloa ha Jerusalema le marako a eona e ile ea mo nyahamisa, ’me Petrose o ile a tepelletsoa maikutlo haholo ke ho latola Kreste hoo a ileng a lla habohloko. (Nehemia 2:1-8; Luka 22:62) Epafrodite o ile a tepella maikutlo hobane Bakreste ba Filippi ba ne ba utloile hore oa kula. (Ba-Filippi 2:25, 26) Bakreste ba bang Thessalonika ba ne ba tepelletse maikutlo, hobane Pauluse o ile a phehella baena ba bang moo ho “bua ka tsela e tšelisang ho liphefumolohi tse tepelletseng maikutlo.” (1 Ba-Thessalonika 5:14, NW) Kahoo, Molimo o thusa batho ba joalo joang?
10. Re ka thusoa ke eng ha re leka ho loantša ho tepella maikutlo?
10 Motho o tlameha ho iketsetsa qeto mabapi le phekolo ea ho tepella ho matla ha maikutlo.a (Ba-Galata 6:5) Mohlomong ho fumana phomolo e lekaneng le ho itekanya mesikaro mesebetsing e itseng ho ka thusa. Ho e-na le ho talima mathata a itseng hammoho e le tsietsi e khōlō, mohlomong motho ea tepelletseng maikutlo a ka thusoa ke ho loanela ho rarolla bothata bo le bong ka nako. Thuso e tšelisang e tsoang ho baholo ba phutheho e ka thusa haholo, haholo-holo haeba bothata bona ba maikutlo bo baka matšoenyeho moeeng. (Jakobo 5:13-15) Ka holim’a tsohle, ho itšetleha ka Jehova ke habohlokoa, ‘ho lahlela lipelaelo tsohle tsa rōna ho eena, hobane oa re tsotella.’ Ho se khaotse ho rapela le ho rapela ka tieo ho ka tlisetsa motho ‘khotso ea Molimo e tla lebela pelo ea hae le matla a kelello ka Kreste Jesu.’—1 Petrose 5:6-11; Ba-Filippi 4:6, 7, NW.
Jehova o re Thusa ho Mamella Bohloko ba ho Shoeloa
11-13. Ke eng se ka kokobetsang bohloko ba ho shoa ha motho ea ratoang?
11 Phihlelo e ’ngoe e bakang tsieleho ke ho shoa ha motho ea ratoang. Abrahama o ile a lla ha a lahleheloa ke mosali oa hae, Sara. (Genese 23:2) Ha mora oa hae Absalome a e-shoa, Davida o ile a utloa bohloko. (2 Samuele 18:33) Esita le motho ea phethahetseng Jesu o ile a “lla” hobane motsoalle oa hae Lazaro a shoele! (Johanne 11:35) Kahoo ha motho ea itseng ea ratoang a e-shoa ho utloisa bohloko. Empa ke eng se ka kokobetsang bohloko bo joalo?
12 Molimo o thusa batho ba oona ho mamella bohloko bo boholo ba ho shoeloa. Lentsoe la oona le bolela hore ho tla ba le tsoho. Ka hona, ha re ‘hlomohe joaloka ba bang ba se nang tšepo.’ (1 Ba-Thessalonika 4:13; Liketso 24:15) Moea oa Jehova o re thusa ho ba le khotso le tumelo le ho nahanisisa ka bokamoso bo tsotehang bo tšepisitsoeng ka Lentsoeng la hae, e le hore re se ke ra imeloa ka ho felletseng ke menahano e utloisang bohloko ka moratuoa ea shoeleng. Ho bala Mangolo le ho rapela “Molimo oa matšeliso ’ohle” hoa khothatsa.—2 Ba-Korinthe 1:3, 4; Pesaleme ea 68:4-6.
13 Re ka fumana matšeliso tšepong ea tsoho joaloka Jobo ea tšabang Molimo, ea ileng a re: “Jo! hola [Jehova] u ka mpata nģalong ea bafu! Hola u ka nkoahela teng, khalefo ea hao ea ba ea feta, ua mpeela letsatsi leo u tla nkhopola ka lona! Hoja motho ea shoang a ka boela a phela, ke be nka mamella ka matsatsi ’ohle a ntoa ea ka, ho be ho fihle se seng bakeng sa ka; u no u tla bitsa, ke ne ke tla araba, ’me u no u tla hloloheloa mosebetsi oa matsoho a hao!” (Jobo 14:13-15) Hangata ha re utloe bohloko haholo ha motsoalle oa rōna a nka leeto, hobane re ba le tebello ea ho ’mona hape. Haeba re talima lefu la Mokreste ea tšepahalang ka tsela e tšoanang, sena se ka ’na sa fokotsa ho utloa bohloko bo boholo ba ho lahleheloa ke moratuoa ea itseng. Haeba o ne a na le tšepo ea lefatšeng, o tla tsosoa borokong ba lefu lefatšeng nakong ea Puso ea Kreste ea Lilemo tse Sekete. (Johanne 5:28, 29; Tšenolo 20:11-13) Haeba re na le tšepo ea ho phela lefatšeng ka ho sa feleng, mohlomong re tla ba teng hore re amohele moratuoa oa rōna ea tsositsoeng.
14. Bahlolohali ba bang ba Bakreste ba babeli ba ile ba sebetsana joang le lefu la banna ba bona?
14 Ka mor’a hore monna oa khaitseli e mong a shoe, khaitseli o ne a tseba hore o lokela ho ntšetsa pele bophelo ba hae tšebeletsong ea Molimo. Ka ntle le ho ipoloka a tšoarehile ‘ka ho hongata hoo a ho etsang mosebetsing oa Morena,’ o ne a etsa malase-lapi ka likotoana tse 800. (1 Ba-Korinthe 15:58, NW) O re: “Ona e ne e le mosebetsi o motle, hobane ka linako tsohle ha ke sebetsa ke mamela Kingdom melodies le litheipi tsa Bibele, tse etsang hore kelello ea ka e lule e ntse e nahana ho hong.” Ka thabo o hopola mohla a neng a etetsoe ke moholo e mong ea nang le phihlelo le mosali oa hae. Moholo eo o ile a mo hlalosetsa a sebelisa Bibele hore Molimo o tsotella bahlolohali. (Jakobo 1:27) Mosali e mong oa Mokreste ha aa ka a inehela boikutlong ba ho iqenehela ha monna oa hae a shoa. O ile a ananela tšehetso ea metsoalle ’me a bontša thahasello e khōloanyane ho ba bang. O re: “Ke ne ke rapela hangata ’me ke ile ka ba le kamano e haufi-ufi le Jehova.” Ke tlhohonolofatso e kaakang ho tšehetsoa ke matsoho a Molimo a sa feleng!
Ho Fumana Thuso ha re Etsa Liphoso
15. Moelelo oa mantsoe a Davida a ho Pesaleme ea 19:8-14, (BPN) ke ofe?
15 Le hoja re rata molao oa Jehova, ka linako tse ling re etsa liphoso. Ntle ho pelaelo sena se re beha tsietsing, joalokaha se ile sa beha Davida tsietsing, eo ho eena melao ea Molimo, likhopotso tsa oona, litaelo tsa oona, le liqeto tsa oona tsa boahloli li neng li le molemo ho feta gauda. O itse: “Li ruta mohlanka oa hao, ea li bōlōkang o fumana moputso o moholo. Empa ke mang ea ka elelloang liphoso tsa hae? Ak’u ntokolle ho tseo ke sa li tsebeng. Phemisa mohlanka oa hao, u mo phemise boikhantšo, u se ke ua lumella hore bo mpuse. Kahoo ke tla hloka koli, ke hloke molato oa sebe se seholo.” (Pesaleme ea 19:8-14, BPN) A re hlahlobisiseng mantsoe ana.
16. Ke hobane’ng ha re lokela ho qoba boikhantšo?
16 Liketso tsa boikhantšo ke libe tse tebileng ho feta liphoso. Saule o ile a lahleheloa ke ho ba morena ka baka la ho nyehela sehlabelo ka boikhantšo le ka ho pholosa morena Agage oa Baamaleke le ho ikhapela lintho tse molemohali, le hoja Molimo o ne o laetse hore Baamaleke ba timetsoe. (1 Samuele 13:8-14; 15:8-19) Morena Oziase o ile a otloa ka lepera ka baka la ho inkela mesebetsi ea boprista ka boikhantšo. (2 Likronike 26:16-21) Ha areka ea selekane e isoa Jerusalema ’me likhomo tse hulang kariki li batla li liha Areka, Molimo o ile oa bolaea Uzza ka baka la ho se bontše tlhompho ka ho e tšoara hore a e tsitsise. (2 Samuele 6:6, 7) Kahoo, haeba re sa tsebe seo re lokelang ho se etsa kapa re sa tsebe hore na re lumelletsoe ho etsa ntho e itseng kapa che, re lokela ho bontša boikokobetso ’me re iteanye le ba tsebang. (Liproverbia 11:2; 13:10) Ha e le hantle, haeba ho na le mohla re kileng ra ikhantša, re lokela ho rapella hore Molimo o re tšoarele ’me re kōpe hore o re thuse ho itebela khahlanong le ho ba le boikhantšo nakong e tlang.
17. Libe tse patiloeng li ka ama motho joang, empa tšoarelo le topollo li ka fumanoa joang?
17 Libe tse patiloeng li ka baka tsietsi. Ho latela Pesaleme ea 32:1-5, Davida o ile a leka ho pata sebe sa hae, empa o ile a re: “Enere ha ke khutsitse, masapo a ka a na a felisoa ke ho bobola ha ka ka letsatsi lohle. Hobane letsoho la hao le ne le le boima ho ’na nyene le bosiu; metsi a bophelo ba ka a na a omeletse joale ka hola ke lebatama la selemo.” Ho leka ho hatella letsoalo le molato ho ne ho khathatsa Davida, ’me ho tšoenyeha ho ile ha fokolisa matla a hae joaloka sefate ha se felloa ke mongobo o se phelisang nakong ea komello kapa ea mocheso oa lebatama la lehlabula. Ka ho hlakileng o ile a hlaheloa ke liphello tse bohloko kelellong le ’meleng ’me a lahleheloa ke thabo ka baka la ho se ipolele. Ho ipolela ho Molimo ke hona feela ho ka tlisang tšoarelo le topollo. Davida o itse: “Ho lehlohonolo eo tšito ea hae e tšoaretsoeng, eo sebe sa hae se apesitsoeng! . . . Ka ba ka u bolella sebe sa ka, ’me ha kea ka ka pata bokhopo ba ka, ka re: Ke tla bolela ho tlōla ha ka ho Jehova; ’me ua hlakola bokhopo ba sebe sa ka.” Thuso e lerato e tsoang ho baholo ba Bakreste e ka etsa hore motho a hlaphoheloe moeeng.—Liproverbia 28:13; Jakobo 5:13-20.
18. Ho na le bopaki bofe ba hore sebe se ka ba le liphello tsa nako e telele, empa maemong a joalo ke eng seo e ka bang mohloli oa matšeliso?
18 Sebe se ka ’na sa ba le liphello tsa nako e telele. Ho bile joalo ka Davida, ea ileng a etsa bofebe le Bathe-sheba, a etsa mano a hore monna oa hae a bolaoe, eaba o nyala mohlolohali eo oa moimana. (2 Samuele 11:1-27) Le hoja Molimo o ile oa bontša mohau ka baka la selekane sa ’Muso, pako ea Davida, le ho sebelisana ha hae le batho ba bang ka mohau, Davida o ile a hlaheloa ke ‘bobe ka tlung ea hae.’ (2 Samuele 12:1-12) Ngoana ea tsoetsoeng ka bofebe o ile a shoa. Amnone, mor’a Davida, o ile a beta Tamare, khaitseli ea hae ka bo-’m’a bona ’me ngoan’abo Absalome o ile a laela hore a bolaoe. (2 Samuele 12:15-23; 13:1-33) Absalome o ile a hlabisa Davida lihlong ka ho robala le lirethe tsa Davida. O ile a leka ho nka terone empa o ile a bolaoa. (2 Samuele 15:1–18:33) Sebe se na le liphello. Ka mohlala, mofosi ea khaotsoeng a ka ’na a baka ’me a khutlisetsoa ka phuthehong, empa ho ka ’na ha feta lilemo-lemo hore motho a tlose botumo bo silafalitsoeng le khatello ea maikutlo e bakoang ke sebe. Ho sa le joalo, ke ho khothatsang hakaakang ho tšoareloa ke Jehova le ho tšehetsoa ke matsoho a hae a sa feleng!
Ho Lopolloa Linthong tse re Hatellang
19. Moea oa Molimo o ka re thusa joang ha re le tlas’a liteko tse boima?
19 Ha re hlaheloa ke liteko tse boima, re ka ’na ra haelloa ke bohlale bo lekaneng le matla a ho etsa qeto le ho e phethahatsa. Boemong bo joalo, moea oa Molimo “o re tlatsa mefokolong ea rōna; hobane ha re tsebe seo re tšoanetseng ho se kōpa ka tšoanelo; empa Moea oona o re rapella ka mefehelo e ke keng ea boleloa.” (Ba-Roma 8:26) Haeba Jehova a fetola maemo a itseng, re lokela ho leboha. Leha ho le joalo, letsoho la hae le ka re pholosa ka tsela e ’ngoe hape. Haeba re rapella bohlale, ka moea oa hae, Jehova a ka re bontša seo re lokelang ho se etsa le ho re fa matla a hlokahalang a ho se etsa. (Jakobo 1:5-8) Ka thuso ea hae, ha re “hlomohile ke meleko e mengata” re ka e mamella ’me ra tsoa ho eona tumelo ea rōna e lekiloe ’me e le matla.—1 Petrose 1:6-8.
20. Ke eng seo re tla se thabela haeba ka sebele re etsa hore matsoho a Jehova a sa feleng e be tšehetso ea rōna?
20 Le ka mohla a re se keng ra khathala ho retelehela ho Molimo ka thapelo. Davida o itse: “Mahlo a ka a talima Jehova ka mehla, hobane o tla tšoasolla maoto a ka lerabeng. Jehova, u retelehele ho ’na, u nkhauhele, hobane ke ’notši, ke malimabe! Matsoalo a pelo ea ka a eketsehile; u ntokolle tsietsing tsa ka. Talima bomalimabe le bohloko ba ka, u ntšoarele libe tsa ka tsohle.” (Pesaleme ea 25:15-18) Joaloka Davida, re tla fumana topollo e tsoang ho Molimo, mohau, le tšoarelo haeba ka sebele re etsa matsoho a Jehova a sa feleng tšehetso ea rōna.
[Mongolo o botlaaseng ba leqephe]
a Bona lihlooho tse buang ka ho tepella maikutlo ho Tsoha! ea November 8, 1987, maqephe 17-30, le Awake! ea November 8, 1987, maqephe 12-16.
U ne U tla Arabela Joang?
◻ Jehova o thusa bahlanka ba hae ba kulang joang?
◻ Re ka thusoa ke eng ha re leka ho loantša ho tepella maikutlo?
◻ Ke eng se ka kokobetsang bohloko ba ho shoa ha motho ea ratoang?
◻ Ba patang libe tsa bona ba ka fumana topollo joang?
◻ Batho ba Jehova ba ka fumana thuso efe ha ba le tlas’a liteko tse boima?
[Setšoantšo se leqepheng la 16, 17]
Re ka fumana matšeliso tšepong ea tsoho, joaloka Jobo ea neng a tšaba Molimo