Tsela e Nang le Morero ea Bophelo

JOALOKAHA HO BOLETSE MELVA A. WIELAND

Ka March 1940, likhoeli tse seng kae hoba ke kolobetsoe, morali’eso Phyllis o ile a tla ho ’na ’me a botsa: “Ke hobane’ng ha u sa bule maliboho?” “Ho bula maliboho?” Ke ile ka botsa. “U bolela ho bolela ka nako e tletseng, hoo e batlang e le letsatsi le leng le le leng?”

KE ILE ka nahana, ‘Nka ba pula-maliboho joang, ke e-na le tsebo e fokolang hakaale ea Bibele haesita le chelete e fokolang hakaale bankeng?’ Leha ho le joalo, potso ea Phyllis e ile ea etsa hore ke qale ho nahana. Hape ke ile ka rapela haholo ka eona.

Qetellong ke ile ka beha lebaka lena, ‘Ke hobane’ng ha nke ke ka tšepa Molimo ha a tšepisa ho re hlokomela haeba re batla ’Muso oa hae pele?’ (Mattheu 6:33) Kahoo ka June 1940, ke ile ka fana ka tsebiso ea ho tlohela mosebetsi oa ka oa ho rōka mese. Kahoo ke ile ka ngolla ofisi ea lekala ea Mokhatlo oa Watch Tower Australia, ke kōpa kabelo ea bopula-maliboho.

Kabelo ea ka ea Bophelo Bohle

Libekeng tse ’maloa hamorao, ke ile ka fumana karabo, e neng e ntsebisa hore ke ne ke tla fuoa kabelo ka mor’a ho ba teng kopanong e neng e tla tšoareloa sebakeng sa ntlo-khōlo ea Lipaki tsa Jehova Strathfield, motseng oa bolulo o mathōkong a motse-moholo oa Australia, Sydney. Hoseng ho latelang kopano ke ile ka itlaleha ofising bakeng sa ho ea fumana kabelo ea ka.

Motho ea neng a le ofising eo o ile a hlalosa: “Hona joale re tšoarehile haholo sebakeng seo ho hlatsoetsoang liaparo ho sona. Na u ka khona ho lula le ho thusa ka libeke tse seng kae?” E ne e le ka August 1940—’me le joale ke sa ntse ke sebetsa sebakeng seo ho hlatsoetsoang liaparo ho sona! Ka nako eo ho ne ho e-na le ba 35 feela lelapeng la ntlo-khōlō; hona joale ho na le ba 276.

Empa u ka ’na ua ipotsa hore na ke hobane’ng ha ke nahana hore ho sebetsa sebakeng seo ho hlatsoetsoang liaparo ho sona ke “tsela e nang le morero ea bophelo,” haholo-holo hobane sena e ’nile ea e-ba mosebetsi oa ka ka lilemo tse fetang 50 joale. Pele ke hlalosa, a nke ke bolele ka lipakane tsa ka tsa pejana.

Lipapali li Ile tsa Fetoha Tsela ea ka ea Bophelo

Ke ile ka hlahela Melbourne ka la 1 January, 1914, ke le oa letsibolo ho bana ba bahlano. Re ne re e-na le batsoali ba lerato ba neng ba phela ka melao-motheo e phahameng ’me ba ne ba sebelisa taeo ha ho hlokahala. Hape re ile ra ba le seo mohlomong se ka bitsoang ho hōlisetsoa bolumeling ho se nang morero, hobane batsoali ba rōna ba ne ba sa kene kereke. Leha ho le joalo, ba ne ba phehella hore rōna bana re be teng litlelaseng tsa sekolo sa Sontaha tsa Kereke ea Chache.

Ha ke qeta sekolong ka 1928 ’me ke qala ho sebetsa ke le serōki, ke ile ka etsa qeto ea ho qeta boholo ba nako eo ke lokolohileng ka eona ke bapala lipapali, ke ne ke lumela hore sena se ka ’na sa nthusa ho hlōla lihlong tsa ka. Ke ile ka kena sehlopheng sa tenese ’me ka bapala selemo ho pota. Nakong ea mariha ke ne ke bapala basketball le baseball, ’me nakong ea lehlabula ke ne ke bapala thiming ea basali ea krikete. Krikete e ile ea fetoha thatohatsi ea ka, ke ile ka leka ka matla ho chorisa tsebo ea ka ea ho ba bowler e matjato e le hore ke tle ke tšoanelehe bakeng sa lipapali tse bang pakeng tsa lithimi tse tsoang linaheng tse fapaneng.

Morero o Fapaneng le oa Lipapali

Pejana bophelong ke ile ka khathatsoa ke thuto ea hore Molimo ea lerato o na le sebaka se bitsoang lihele moo ba etsang lintho tse mpe ba tlang ho hlokofatsoa teng ka ho sa feleng. Hona e ne e le ho sa utloahaleng ho ’na. Kahoo inahanele thabo ea ka ha ka tšohanyetso ke ithuta ka se hlileng se boleloang ka “lihele” ka Bibeleng. Ho ile ha etsahala ka tsela ena:

Morali’eso Phyllis, eo ke mo sieang ka lilemo tse hlano, le eena o ne a thabela ho bapala lipapali, ’me re ne re le thiming e le ’ngoe ea basali ea krikete. Ka 1936 molekane-’moho le rōna thiming o ile a tsebisa Phyllis mohlankana ea bitsoang Jim ea neng a tsebahala ka ho rata bolumeli haholo. Kapele Jim o ile a qala ho bua le Phyllis ka lithuto tsa Bibele. Thahasello ea hae e ile ea tsoha. O ne a ee a mpolelle: “Ke ntho e utloahalang le e nang le kelello.”

Ka nako eo ’na le Phyllis re ne re lula kamoreng e le ’ngoe lapeng, ’me o ile a leka ho tsosa thahasello ea ka ho seo Jim a neng a mo bolella sona ka ’Muso oa Molimo. O ile a mpolella a thabile: “O tla etsa seo mebuso ea batho e hlōlehileng ho se etsa.” Leha ho le joalo, ke ile ka mo phehisa khang ka hore bona e mpa e le bolumeli bo bong feela ho tla re ferekanya le hore ha ho motho ea hlileng a tsebang ka bokamoso. Empa Phyllis o ile a phehella ’me a siea libuka libakeng tse fapa-fapaneng ka kamoreng, a tšepile hore mohlomong ke tla li bala.

Ke ile ka ba le taba-tabelo ea hore na ke hobane’ng ha Phyllis a ne a chesehela bolumeli bona bo bocha, kahoo ka letsatsi le leng ke ile ka nka bukana. E ne e e-na le sehloho se thahasellisang, Hereafter. Ke ile ka ‘qahamisa litsebe’ ha ke phetla maqephe a eona ka potlako ’me ke bona lentsoe “lihele.” Ho makaleng ha ka, ke ile ka ithuta hore lentsoe la Bibele “lihele” ha e le hantle le bolela lebitla le tloaelehileng la batho le hore batho ba lokileng le ba babe ba ea teng. Ke ile ka boela ka ithuta hore lihele hase sebaka sa tlhokofatso; bafu ha ba ikutloe ’me ba ke ke ba utloa letho.—Moeklesia 9:5, 10; Pesaleme ea 146:3, 4.

Sena se ile sa utloahala hantle ho ’na, haholo-holo ha bukana eo e ne e hlalosa hore Molimo ea lerato le ea matla o tšepisitse ho khutlisa bafu ka mohlolo o bitsoang tsoho. (Johanne 5:28, 29) Joale ke ile ka boela ka batla ho fumana lintho tse eketsehileng tseo Jim a neng a li boleletse Phyllis. Ke ile ka fumana King James Version e nyenyane eo ntate a neng a mphile eona ke sa le ngoana ’me ka sheba mangolo a thathamisitsoeng bukaneng eo. E ile ea tiisa se neng se boleloa ka lihele le boemo ba bafu.

Ntho e ’ngoe e hlollang eo ke neng ke sa e lebella e bile ho ithuta hore Molimo o na le lebitso la botho, Jehova. (Pesaleme ea 83:18) Hape ke ile ka khona ho bona hore Molimo o na le morero, kapa lebaka, la ntho e ’ngoe le e ’ngoe eo a e entseng kapa a e lumelletseng hore e etsahale. Sena se ile sa etsa hore ke ipotse, ‘Hantle-ntle morero oa ka ke ofe bophelong?’ Ho tloha ka nako eo ho ea pele ke ile ka ipotsa hore na ebe ho molemo hore ke nke lipapali ka ho tebileng—hoo ke neng nka hlokomoloha lintho tse ling tsohle.

Ho Nka Bohato bo Lumellanang le Liqeto

Jim le Phyllis ho hang ba ne ba sa tsebe hore pono ea ka bophelong e fetohile, empa ba ile ba tseba ha lelapa labo rōna le ne le memeloa moketjaneng oa motsoalle. Mehleng eo, liketsahalong tse joalo ba neng ba le teng ba ne ba ee ba eme, ’me ho ne ho ee ho kōptjoe hore ho otlanngoe likhalase tlotlisong ea Morena oa Engelane, ’me bohle ba ne ba ee ba phahamise likhalase tsa bona ho noa tlotlisong ea morena. Leha ho le joalo, ke ile ka etsa qeto ea ho sala ke lutse le Jim le Phyllis. Ba ne ba sa kholoe mahlo a bona ha ba mpona ke ntse ke lutse! Ha e le hantle, re ne re sa bontše ho hloka tlhompho, empa joaloka Bakreste re ile ra ikutloa hore re lokela ho se nke lehlakore le ho se kopanele meketeng e joalo ea bochaba.—Johanne 17:16.

Leha ho le joalo, batsoali ba ka le ba bang ba lelapa ba ile ba haroha letsoalo. Ba ile ba re ha re tšepahale, kapa rea hlanya—kapa tsona ka bobeli! Kahoo, ha ’na le Phyllis re ne re e-ba teng moketeng oa selemo le selemo oa ho abjoa ha limpho bakeng sa thimi ea basali ea krikete, ho ile ha etsahala ntho e tšoanang nakong ea mokete oa bochaba. Phello e ile ea e-ba hore ka bobeli re ile ra tsoa thiming eo. Sena ha sea ka sa e-ba thata joalokaha ke ne ne ke nahanne, hobane ke ile ka hlokomela hore ho tšepahala ha ka le botšepehi bo sa sekisetseng li ne li le ho Kreste Jesu, Morena oa ’Muso oa leholimo oa Molimo.

Phyllis o ile a hlalosa hore joale ho ne ho hlokahala hore ke be teng libokeng tsa Lipaki tsa Jehova kamehla e le ho haha tumelo ea ka ka tsebo e eketsehileng ea Bibele. Ka nako eo ho ne ho e-na le phutheho e le ’ngoe feela Melbourne, kahoo ke ile ka qala ho ba teng libokeng moo thapameng ea Sontaha se seng le se seng. Ke ile ka kholiseha kapele hore ona ke mokhatlo oa ’nete o hlophisitsoeng oa Molimo lefatšeng.

Kapele ke ile ka memeloa ho kopanela mosebetsing oa phutheho oa boboleli ba ntlo le ntlo. Qalong ke ne ke le leqe, empa hoseng ho hong ha Sontaha ke ile ka etsa qeto ea ho tsamaea le ba bang e le ho ea bona feela hore na o etsoa joang. Ke ile ka thaba ha ke abeloa ho tsamaea le Paki e nang le phihlelo e ileng ea bua ka kholiseho ntlong ea pele ’me ea fumana karabelo e thabisang ho mong’a ntlo. Ke ile ka nahana, ‘Koana, hoo ho ne ho se thata hakaalo, empa ho tla hlokahala ke tloaele haholoanyane pele nka etsa hamolemo joalo.’ Kahoo u ka inahanela kamoo ke ileng ka makala kateng ha ka mor’a ntlo eo ea pele, Paki eo e re ho ’na: “Joale u tla khona ho tsamaea u le mong boboleling.”

“Ke tsamaee ke le mong?” Ke ile ka botsa, ke maketse! “Ua soasoa! Ke tla re’ng haeba motho a ka botsa potso eo ke sa tsebeng karabo ea eona?” Empa motho eo ke tsamaeang le eena o ile a phehella. Kahoo, ke ile ka tsamaea ke le mong ke ntse ke tlakasela ka tsela ea sebele, ha a ntse a tsoela pele ho paka ho batho ba ka lehlakoreng le leng la seterata. Ka tsela e itseng ke ile ka tsoella hoseng hoo ha pele.

Ho tloha ka nako eo ho ea pele ke ile ka qala ho ba le karolo mosebetsing oa boboleli hoseng ha Sontaha se seng le se seng. Ha motho a mpotsa potso eo ke neng nke ke ka e araba ha ke le matlong, ke ne ke ee ke re: “Ke tla etsa patlisiso ka eona ’me ke tla tla ke u bona.” Ka ho thabisang, Jehova o ile a ’na a mpha matla le sebete sa ho tsoela pele tseleng ea ka e ncha e nang le morero ea bophelo. Ke ile ka nehela bophelo ba ka ho eena, ’me ka October 1939, ke ile ka kolobetsoa matamong a ho sesa a motse oa Melbourne. Kapele ka mor’a moo, Phyllis ea neng a se a nyetsoe ke Jim, o ile a botsa hore na ke hobane’ng ha ke ne ke sa qalise ka ho bula maliboho.

Ho Sebeletsa Lekaleng

Ka January 1941, hang ka mor’a hore ke qale ho sebeletsa Bethele, e leng kamoo re neng re bitsa ofisi ea lekala kateng, ho ile ha thibeloa mosebetsi oa Lipaki tsa Jehova Australia. Ka mor’a moo sesole se ile sa nka taolo ea Lehae la Bethele le Strathfield, ’me ke ile ka romeloa polasing ea Mokhatlo Ingleburn, hoo e ka bang lik’hilomithara tse 48 kantle ho motse. Ka June 1943 makhotla a ile a hlakola molato ka ho feletseng holim’a Mokhatlo oa Watch Tower ’me a tlosa thibelo. Bofelong ba selemo seo, ba 25 ba rōna re ile ra boela ra memeloa Bethele Strathfield. Ke ile ka boela ka tsoela pele moo ke sebetsa sebakeng seo ho hlatsoetsoang liaparo ho sona, haesita le ho nka karolo mesebetsing e meng ea lelapa.

Lilemo tse leshome tse latelang li ile tsa bonahala li feta ka potlako. Kahoo ka 1956, ke ile ka nyaloa ke mosebetsi-’moho le ’na Bethele, Ted Wieland. Ted e ne e le monna ea khutsitseng haholo, ea mamellang, ’me re ile ra thaba ha re fumana kamohelo ea ho tsoela pele re lula Bethele joaloka monna le mosali. Ka bobeli ba rōna re ne re ananela tsela e nang le morero ea bophelo, re thabela tokelo ea ho sebeletsa lekaleng la Australia. Ka sebele, ho phaella mosebetsing oa rōna oa Bethele, re ile ra ba le thabo ea ho sebetsa hammoho ho thusa ba bang hore e be barutuoa ba Kreste. E le o mong oa mehlala, u ka bala ka ba lelapa la Weekes tokollong ea Awake! ea October 22, 1993.

Khōlo e tsitsitseng ea ho boleloa ha ’Muso e ne e hloka feela kekeletso ea batho ba 10 kapa 12 basebetsing ba rōna nakong ea lilemo tsa ka tsa pele tse 30 ke le Bethele. Empa boemo bo ile ba fetoha ka potlako ka bo-1970 ha re ne re qala ho hatisa limakasine tsa Molula-Qhooa le Tsoha! mona. Kaho ea setsi sa khatiso e ile ea qaleha ka January 1972. Kapele mochini o hatisang oa boima ba lithane tse 40 o ile oa fihla o e-tsoa Japane, ’me ka 1973 re ne re hatisa limakasine tse batlileng li e-ba 700 000 ka khoeli. Joale lelapa la rōna la Bethele le ne le qalile ho hōla.

Hape lilemo tsa bo-1970 li ile tsa ntlisetsa nako ea mesarelo ea botho. Pele, monna oa ka ea ratehang, Ted, o ile a shoa ka 1975 a le lilemo li 80. Joale, ka nako e ka tlaase ho selemo hamorao, ntate ea neng a se a hōlile le eena o ile a robala lefung. Ke ile ka fumana matšeliso a maholo ho Jehova le Lentsoeng la hae, Bibele, le ho baena le bo-khaitseli ba ka ba moea. Hape ho ile ha thusa haholo hore ebe ke ile ka tšoareha Bethele ka mosebetsi o nang le morero nakong ena ea mesarelo e meholo bophelong ba ka.

Leha ho le joalo, bophelo bo ile ba ’na ba tsoela pele, ’me ke ile ka boela ka qala ho latsoa khotsofalo le mahlohonolo joale ke se ke le mohlolohali. Ka 1978, ke ile ka ba teng kopanong London, Engelane, ’me ka mor’a moo ka etela ntlo-khōlō ea lefatše ea Mokhatlo oa Watch Tower Brooklyn, New York. Ho bona baena le bo-khaitseli ba makholo ba sebetsang ba thabile moo Bethele ea Brooklyn ho ile ha sala e le tšusumetso ho ’na ho tla fihlela ho lena le holimo.

Ha lilemo tsa bo-1970 li haba bofelong, re ile ra utloa hore ho ntse ho reroa katoloso e tsoelang pele bakeng sa mehaho ea Bethele ea Australia. Leha ho le joalo, katoloso e ne e sa tl’o etsoa Strathfield, moo re neng re se re haelloa ke sebaka. Ho e-na le hoo, mehaho e mecha, le e meholoanyane e ne e lokela ho hahoa setšeng sa rōna se Ingleburn, moo ke neng ke sebetsa teng nakong ea thibelo qalong ea bo-1940.

Tsela e Nang le Morero ea Bophelo e Tšoarellang

E bile thabo e kaakang ka January 1982 ha re fallela mehahong ea rōna e mecha! Ke ’nete, qalong ho ne ho e-na le ho sareloa ho seng ho kae ha re tloha tikolohong eo re e tloaetseng, empa kapele re ile ra hlasimolloa ke lehae la rōna le lecha le nang le likamore tse 73 tsa ho robala. Joale ho e-na le ho bona mabota a setene le literata tsa motse oa bolulo o mathōkong a motse-moholo, re bona masimo a matala le lifate, likhomo li ntse li fula, ho chaba ho khanyang ha letsatsi le ho likela ha lona—tikoloho e thabisang haholo.

Ka la 19 March, 1983, re bile le nehelano e thabisang ea mohaho o mocha letsatsing le chabileng hamonate la nako ea lehoetla. Lloyd Barry oa Sehlopha se Busang sa Lipaki tsa Jehova o ile a fana ka puo ea nehelano e sisinyang maikutlo. Ka bonna ke ile ka ananela hore e be eena le mosali oa hae ba tlile bakeng sa lenaneo la nehelano, kaha ke ne ke ile ka sebetsa le bona Bethele Strathfield ha kaofela ha rōna re ne re sa le bacha haholoanyane.

Khōlo e tsoelang pele ea mosebetsi oa ho bolela ka ’Muso e ile ea etsa hore ho hlokahale katoloso ea mehaho ea rōna mona Ingleburn. Ka 1987 ofisi e ile ea atolosoa. Kahoo, ka la 25 November, 1989, mohaho o mocha oa bolulo o mekato e mehlano le mekato e meraro e mecha e ekelelitsoeng fekthering e ile ea neheloa. Re ile ra eketseha hakaakang—ho tloha ho basebeletsi ba 4 000 Australia ha ke ne ke qala tšebeletso ea ka ho isa ho ba ka bang 59 000!

Haufinyane tjena lekala la Australia le ile la etsoa e ’ngoe ea Liofisi tsa Mokhatlo tsa Boenjiniere tsa Libaka, hammoho le Japane le Jeremane. Sena se ile sa etsa hore ho hlokahale katoloso e eketsehileng ea mehaho ea Bethele. Hona joale mohaho o mong oa mekato e meraro o se o felile, ’me mosebetsi o se o le haufi le ho phethoa mohahong o mekato e mehlano oa bolulo, o tlang ho ba le likamore tse fetang 80 bakeng sa ho fana ka bolulo lelapeng la rōna le ntseng le hōla le sa khaotse.

Sebakeng seo ho hlatsoetsoang liaparo ho sona, re na le basebetsi ba bangata bakeng sa ho etsa mosebetsi, empa hangata ke ee ke hopole letsatsi lela la August ka 1940 ha ke ne ke memeloa ho thusa lefapheng lena bakeng sa libeke tse peli. Ke motlotlo haholo hore ebe libeke tseo tse peli li ile tsa atolohela ho lilemo tse fetang 50 le hore Jehova Molimo o ile a tataisa mehato ea ka ho isa tseleng e nang le morero joalo ea bophelo.

[Setšoantšo se leqepheng la 21]

Ha ke ne ke le lilemo li 25

[Setšoantšo se leqepheng la 23]

Letsatsi la lechato la rōna ka 1956

[Litšoantšo tse leqepheng la 24]

Ka 1938 ’na le morali’eso re ne re hlile re keneletse lipapaling, empa bophelo ba ka hona joale ke bo hlahisang litholoana haholoanyane