Thabo e Boloketsoeng ba Fumanang ’Nete
MONNA e mong oa Mofinnishe o ile a fumana buka The Divine Plan ofthe Ages mokatong o ka holimo-limo oa ntlo ea hae. O ile a qala ho e bala hang-hang, ’me kapele-pele o ile a ipolella, ‘Sena ke ’nete; sena ke ’nete.’ Ha a theoha mokatong oo, o ile a bolella mosali oa hae, “Ke fumane bolumeli ba ’nete.”
Phihlelo ena ke e sa tloaelehang mabapi le tsela eo monna enoa a fumaneng ’nete ka eona, empa ba bangata ba Lipaki tsa Jehova ba ka bolela hore ba ile ba arabela ka tsela e tšoanang. Kaofela ha bona ba ka u bolella ka thabo e tlisoang ke ho fumana ’nete. Liphihlelo tse latelang li totobatsa sena.
Lithuto Tsa ’Nete Tsa Bibele li Tlisa Thabo
Margarita Königer o hōletse Munich, Jeremane, nakong ea Ntoa ea II ea Lefatše. Kamehla ho ne ho bonoa matlo a chesitsoeng ke libomo le a tukang. Khaitseli ea hae e ile ea shoella ntoeng. Ha a le litšebeletsong tsa kereke e K’hatholike, o ile a utloa ha ho etsoa lithapelo bakeng sa masole a Jeremane le moeta-pele, Hitler. Ka mor’a ntoa, o ile a fumana lihlapiso bakeng sa ho ea kolecheng United States e le karolo ea lenaneo la ho fapanyetsana liithuti. O ile a fumana hore batho ba ne ba le botsoalle ho eena, kahoo o ile a ipotsa hore na ke eng se neng se bonahala se susumetsa batho, bao takatso ea bona ea tlhaho e leng ho phela ka khotso, hore ba se tšepane le ho hloeana nakong ea ntoa. Ha a khutletse Munich, o ile a kopana le Lipaki tsa Jehova, ’me ka ho ithuta Bibele le tsona, o ile a fumana likarabo lipotsong tsa hae. O re: “Ke ile ka bontšoa Bibeleng hore tšusumetso ea meea e khopo ea ameha . . . Bibele e e bitsa ‘marena a lefatše,’ ebile ha e le hantle, e bolela hore Satane ‘o thetsa lefatše kaofela.’ . . . Ka ho lemoha liketso tse se nang bomolimo le tsa bodiabolose tsa lichaba le mefuta ea batho, karabo ee ke e utloahalang le e khotsofatsang hakaakang!”—Ba-Efese 6:12; Tšenolo 12:9.
Margarita o tsoela pele: “Ho ile ha ntlisetsa thabo e khōlō ho ithuta ka tokisetso ea Molimo ea ho rarolla mathata a lefatše. Che, e ke ke ea e-ba ka maikutlo a itseng a motho kapa tsamaiso, joalokaha li buelloa ke barupeli ba lefatše. Ho e-na le hoo, Bibele e bontša hore puso e ncha ea leholimo e tla laola litaba tsa lefatše. . . . Jesu Kreste o rutile balateli ba hae ho rapela: ‘Ho tle ’muso oa hao.’ . . . Ke ile ka qala ho bona hore ’muso ona ke puso ea sebele le hore ke ka oona feela khotso ea sebele e ka finyelloang, lefatšeng ka bophara.” Nakong ea lilemo tse ka bang 30, Margarita o sebelelitse e le moromuoa linaheng tsa Afrika tse ka bang hlano—’me o qetile lilemo tsa ho qetela tse 19 a bolela ’nete ho batho ba ikokobelitseng ba Ouagadougou, Burkina Faso.
Hase Margarita feela ea bileng le phihlelo e joalo. Ba bangata ba ’nile ba arabela hantle feela joalo ha ba fumana hore baruti ba Bokreste-’mōtoana ka mahlakoreng a mabeli a loantšanang ba rapela Molimo bakeng sa tlhōlo. Batho ba lipelo li tšepahalang baa bona hore Bibele ea utloahala ha e re Molimo ha a ikamahanye le lintoa tsa motho empa hore lintoa tsena li ba teng kahobane “lefatše lohle le rapaletse ka tlase ho e mobe.” Batho bana ba batlang ’nete baa ithuta hore Bakreste ba ’nete ba lokela ho se be “karolo ea lefatše” empa hore ba lokela ho lula ba sa nke lehlakore litabeng tsa lona. Ha ba hlokomela hore Lipaki tsa Jehova li nkile boemo bo joalo, batho bana ba sa tsoa thahasella baa kholiseha hore ba fumane ’nete. Tšepo le thabo tsa ba joalo lia hōla ha ba fumana tsebo e eketsehileng mabapi le hore na ke hobane’ng ha Molimo a lumeletse bokhopo le hore na ke joang haufinyane a tlang ho tlisa khotso le maemo a lokileng lefatšeng ka ’Muso oa hae.—1 Johanne 5:19; Johanne 17:16, NW; Mattheu 6:9, 10.
Melao-motheo ea ’Nete ea Bibele e Tlisa Thabo
Daniel Rosero oa Ecuador o ne a ikutloa hore bophelo ha bo na morero, kahoo o ile a qala ho noa joala haholo. Kereke eo a neng a e kena e ne e mo rutile hore ntho feela eo a neng a lokela ho e lebella e ne e le lefu le mollo oa lihele. O ile a arabela, “Ke il’o cha, kahoo ke hore ke hle ke noe!” O ne a e-na le lelapa la litho tse robeli leo a neng a sa le hlokomele, ’me kamehla o ne a loana le mosali oa hae, Delia. Phetoho e khōlō e ile ea etsahala hoseng ha Sontaha se seng ha ba eteloa ke Lipaki tsa Jehova ’me ba qalisa ho ithuta Bibele. Ka lekhetlo la pele Daniel a ba teng kopanong ea potoloho ea Lipaki tsa Jehova, o ile a hlokomela hore o fumane ’nete. O re: “Ke ile ka hlolloa ke tlhophiso. Batho ba bangata ba ne ba isana ’moho. U ne u ka utloa lerato har’a letšoele. Ho ne ho se ea tsubang. Ho se puo e litšila. . . . Ke hopola ke nahana, ‘Hona ke ’nete!’ Ke ne ke sa susumetsoe ke tšabo ea lefu kapa tšabo ea bofelo ba lefatše. E ne e le bohloeki ba tlhophiso.”
Lelapa lohle la ha Rosero le ile la fetoha Lipaki tsa Jehova. Bophelo ba bona ba lelapa le boemo ba bona ba lichelete bo ile ba ntlafala ha ba sebelisa melao-motheo ea Bibele. Delia Rosero o re: “Sena sohle se bile teng ka lebaka la ’nete ea Bibele. Ke mang ea tsebang hore na bana ba ka ba ka be ba le hokae ntle le Lentsoe la Molimo? Kaofela ha bona ba supileng ba kolobelitsoe ’me ba tsitsitse. ’Nete e ntliselitse bophelo bo bocha ka ho feletseng le thabo e ncha.”
Phihlelo ea lelapa la Rosero hase eona feela. Ba bangata mehleng ea rōna ba khathatsoa ke mathata. Lebaka le leng ke hore litekanyetso tsa boitšoaro tse fanoeng ka Bibeleng ka kakaretso ha li sa hlomphuoa, joalokaha li ne li hlomphuoa ke meloko ea pejana. Malumeli a mangata a latetse mokhoa ona, ebang ke ka lebaka la ho lumella litumelo tse fapaneng le tsa ’ona kapa kahobane a ikutloa hore ka lebaka la ho fetoha ha linako, mekhoa ea khale ea boitšoaro e siuoe ke nako. Kahoo, joaloka ba bang, ba ha Rosero ba ne ba siuoe ba ntse ba tlatselela ntle le tataiso ea Bibele. Leha ho le joalo, ha batho ba ikokobelitseng joalo ba utloisisa pono ea Molimo litabeng tsa boitšoaro le bophelong ba lelapa, ntle ho tšenyo ea nako ba sebelisa seo ba ithutang sona. Lipaleng tsa bona re ka bona liphello tse molemo tsa ho etsa joalo.
Thabo e Tlameha ho Hlaoleloa
Leha ho le joalo, sena ha se bolele hore kamehla Mokreste o ntse a le boemong ba thabo e khaphatsehang. Ka ho totobetseng, mathata ao batho ka kakaretso ba tobanang le ’ona, a kang ho hloka mosebetsi, ho kula, le lefu, a ama Bakreste ka ho tšoanang. Hape Bakreste ba tlameha ho loana ntoa e tsoelang pele khahlanong le ho se phethahale ha bona le mefokolo. Tlaleho ea Bibele e bolela hore Lota o ne a “hlora hampe ka baka la ketso tse lihlong tsa batho bao ba manyala” motseng oa Sodoma. Bakreste ba tšepahalang ba ke ke ba qoba maikutlo a tšoanang ha ba bona maemo a mabe a ntse a ja setsi.—2 Petrose 2:7, 8.
Leha ho le joalo, ba fumaneng ’nete ba na le monyetla. Ka mohlala, molumeli ea llelang motho ea shoeleng ha aa tlameha ho “hlomoha joalo ka ba bang ba se nang tšepo.” Ho utloa bohloko ha hae ho tla ba le meeli. Sena se joalo le ka mathata a mang. Motho ea fumaneng ’nete oa tseba hore mathata a teng hajoale ke a nakoana feela. Tšepo e etsa hore ho be bonolo haholoanyane ho mamella tlas’a mathata. Mokhoa oa bophelo o leka-lekaneng le oona oa thusa.—1 Ba-Thessalonika 4:13.
Pauluse o ile a khothatsa Bakreste ka tsela ena: “Ithabeleng Moreneng ka mehla; ke boela ke rialo, ke re: Ithabeleng.” (Ba-Filippi 4:4) Sena se bontša hore le hoja kaofela re ka fumana thabo, ho ka boela ha etsahala hore re se be le eona. Matšoenyeho a tsamaiso ena ea lintho ea khale a ka ipaka e le tšitiso. Ho phaella moo, Bibele e re bolella hore re tlameha ho hlaolela thabo, e leng e ’ngoe ea litholoana tsa moea oa Molimo. (Ba-Galata 5:22) Haeba u tsoela pele ho fumana tsebo ea ’nete le ho ikhopotsa ka melemo ea moea eo e u tliselitseng eona le eo e ntseng e u tlisetsa eona, thabo ea hao e ke ke ea fokotseha. E tla eketseha haholoanyane ha re ntse re atamela nako ea ha Molimo a tla “hlakola meokho eohle” mahlong a batho le nakong eo ho ke keng ha hlola ho e-ba teng “masoabi, leha e le ho bokolla, kapa bohloko.”—Tšenolo 21:4.
[Litšoantšo tse leqepheng la 8]
Ba bangata ba khahloa ke thabo le tlhophiso e ntle likopanong tsa Lipaki tsa Jehova