“Ke Mosebetsi oa Jehova”

Seo e ne e le sehlooho se ho El Norte, koranta ea Monterrey City, Mexico. Taba e ne e le mabapi le Holo e ncha ea Kopano ea Lipaki tsa Jehova.

Monterrey ke motse o moholo o nang le baahi ba 2 300 000 (ho akareletsa metse ea litoropo e ka mathōko) karolong e ka leboea ho Mexico, ’me e na le bahoeletsi ba ’Muso ba 19 200. Hoo e ka bang selemo le halofo, Lipaki li ile tsa kopanya matsoho ho haha Holo ea Kopano e ntle le e sebetsang e nang le litulo tse mabotho-botho tse 3 000 le sefehla-moea. Lipaki tsa moo li ile tsa thaba ha setho sa Sehlopha se Busang sa Lipaki tsa Jehova se fana ka puo ea nehelo. Lenaneo le ile la akareletsa pale e khutšoanyane ea mosebetsi Monterrey, ’me ho ile ha e-ba le lipuisano le bao ba bileng le karolo kahong. Kahoo ba 4 500 ba neng ba le teng sebokeng ba ile ba thabela puo ea nehelo.

Ena ke ea boraro ea Liholo tsa Kopano tsa morao-rao tjena tse ’nileng tsa hahuoa Mexico ho se ’nileng sa hlalosoa e le letšolo bakeng sa “Liholo tsa ’Muso le Liholo tsa Likopano tse Eketsehileng, tse Khōloanyane le tse Ntlafalitsoeng.”

Ka bahoeletsi ba fetang 443 000 Mexico, le ba bileng teng Sehopotsong ba 1 492 500 ka 1995, Liholo tse ncha tsa Likopano, tse kang e Monterrey, ka sebele li tla sebeletsa morero oa bomolimo.