Lipotso Tse Tsoang ho Babali
“Molula-Qhooa” oa August 15, 1996, o itse: “Karolong ea ho qetela ea matšoenyeho ana, ‘nama’ e balehetseng ka lehlakoreng la Jehova e tla pholoha.” Na seo se bolela hore ka mor’a karolo ea pele ea matšoenyeho a maholo, ba bangata ba bacha ba tla tla ka lehlakoreng la Molimo?
Eo hase ntlha e neng e phahamisoa. Mantsoe a Jesu a fumanoang ho Matheu 24:22 ka ho khetheha a tla phethahatsoa nakong e tlang ka ho pholoha karolo ea pele ea matšoenyeho a maholo a tlang, e leng ho hlaseloa ha bolumeli. Sehlooho seo se ile sa re: “Hopola hore ‘nama’ ea masala a batlotsuoa le ea ‘bongata bo boholo,’ e tla be e se e ile ea pholoha ha Babylona e Moholo a timela ka potlako le ka ho feletseng karolong ea pele ea matšoenyeho ana.”
Bao ba tšepahalang ba ke ke ba ba kotsing ha Jesu le lekhotla la hae la leholimong ba nka bohato karolong ea ho qetela ea matšoenyeho. Empa joale ke bo-mang ba tla pholoha karolo eo ea matšoenyeho? Tšenolo 7:9, 14 e bontša hore bongata bo boholo bo nang le tšepo ea lefatšeng bo tla pholoha. Ho thoe’ng ka Bakreste ba tlotsitsoeng ka moea? Sehlooho sa “Lipotso Tse Tsoang ho Babali” ho Molula-Qhooa oa August 15, 1990, se tšohla taba ea hore na ke hobane’ng ha re ke ke ra tsitlella tabeng ea hore na masala a batlotsuoa a tla nkeloa leholimong neng. Ka hona, tokollo ea morao-rao (August 15, 1996) e siile taba eo e sa etsetsoa qeto, ea fana ka tlhaloso e akaretsang: “Ka ho tšoanang karolong ea ho qetela ea matšoenyeho ana, ‘nama’ e balehetseng ka lehlakoreng la Jehova e tla pholoha.”
Ha e le tabeng ea hore na ba bacha ba tla khona ho ithuta ’nete ’me ba tle ka lehlakoreng la Molimo ka mor’a hore matšoenyeho a maholo a qale, hlokomela mantsoe a Jesu a tlalehiloeng ho Matheu 24:29-31. Ka mor’a ho qaleha ha matšoenyeho, pontšo ea Mora oa motho e tla bonahala. Jesu o itse meloko eohle ea lefatše e tla ikotla le ho lla. Ha aa ka a bua letho ka batho ba hlakeloang ke boemo, ba bakang, ba nka lehlakore la Molimo ’me ba fetoha barutuoa ba ’nete.
Ka ho tšoanang, papisong ea linku le lipōli, Mora oa motho oa bonahala ’me ka boahloli o arola batho motheong oa seo ba ileng ba se etsa kapa oa seo ba sa se etsang nakong e fetileng. Jesu ha aa re letho ka batho bao e leng khale ba bontša litšobotsi tsa lipōli ba seng ba fetoha ka potlako ’me e e-ba linku. O tla ho tla ahlola batho motheong oa seo ba seng ba bile sona.—Matheu 25:31-46.
Leha ho le joalo, le hona mona ha ho na lebaka la hore re tsitlallele maikutlo ana. Batho ba Molimo, batlotsuoa le bongata bo boholo, ba tseba seo ba lokelang ho se etsa hona joale—ho bolela le ho etsa barutuoa. (Matheu 28:19, 20; Mareka 13:10) Hona joale ke nako ea hore re nke ka botebo khothatso ena: “Ha re sebetsa hammoho le eena, re boetse re le kōpa ka tieo hore le se ke la amohela mosa o sa tšoanelang oa Molimo ’me la lahleheloa ke morero oa oona. Kaha o re: ‘Ka nako e amohelehang ke ile ka u utloa, ’me ka letsatsi la poloko ke ile ka u thusa.’ Bonang! Joale ke nako e amohelehang ka ho khethehileng. Bonang! Joale ke letsatsi la poloko.”—2 Bakorinthe 6:1, 2.