Litlhaku Tse ’nè Tsa Seheberu Tse Emelang Lebitso la Molimo ho Septuagint
LEBITSO la Molimo, Jehova, le ngoloa ka Tetragrammaton, e leng litlhaku tse ’nè tsa Seheberu יהוה (YHWH). Ke khale ho lumeloa hore Tetragrammaton e ne e sa hlahe likoping tsa Septuagint. Kahoo, ho ne ho phehisanoa ka hore ha bangoli ba Mangolo a Segerike a Bakreste ba qotsa Mangolong a Seheberu, e tlameha hore ebe ba ne ba sa sebelise lebitso la Molimo mangolong a bona.
Litšibollo tse ngata tse entsoeng lilemong tse ka bang lekholo tse fetileng li senotse hore lebitso la Molimo le ne le hlaha ho Septuagint. Buka e ’ngoe e re: “Takatso ea ho boloka lebitso le halalelang la Molimo le nepahetse e ne e le matla hoo ha Bajuda ba mehleng ea Bagerike ba ne ba fetolela Bibele ea Seheberu ka Segerike, ba ileng ba kopitsa litlhaku tsa Tetragrammaton ka ho toba, ba li kenya tabeng e ngotsoeng ea Segerike.”
Sekhechana sa moqolo o entsoeng ka loli se bontšitsoeng ka letsohong le letšehali ke mohlala o le mong ho e mengata e ntseng e le teng. Se fumaneha Oxyrhynchus, Egepeta, ’me se filoe nomoro ea 3522, ’me ke sa morao lekholong la pele la lilemo C.E.a Se boholo ba lisenthimithara tse 7 ka 10,5 ’me se na le temana e tsoang ho Jobo 42:11, 12. Tetragrammaton, e kentsoeng ka har’a selikalikoe, e hlaha ka litlhaku tsa boholo-holo tsa Seheberu.b
Kahoo, na lebitso la Molimo le ne le hlaha likoping tsa pele tsa Mangolo a Segerike a Bakreste? George Howard oa setsebi o re: “Kaha Tetragrammaton, e ne e ntse e ngotsoe likoping tsa Bibele ea Segerike [Septuagint] eo e neng e le Mangolo a sebelisoang ke kereke ea pele, hoa utloahala ho lumela hore bangoli ba [Testamente e Ncha], ha ba qotsa Mangolo, ba ile ba boloka Litlhaku Tse ’Nè Tsa Seheberu Tse Emelang Lebitso la Molimo ka har’a taba e ngotsoeng ka Bibeleng.” Ho bonahala eka nakoana ka mor’a moo bakopitsi ba ile ba nkela lebitso la Molimo sebaka ka mantsoe a kang Kyʹri·os (Morena) le The·osʹ (Molimo).
[Mongolo o botlaaseng ba leqephe]
a Bakeng sa boitsebiso bo eketsehileng ka sekhechana sa moqolo o entsoeng ka loli se fumanoeng Oxyrhynchus, bona Molula-Qhooa oa February 15, 1992, leqepheng la 26-8.
b Bakeng sa mehlala e meng ea lebitso la Molimo liphetolelong tsa boholo-holo tsa Segerike, bona New World Translation of the Holy Scriptures−With References, sehlomathiso 1C.
[Tlhaloso ea Moo Setšoantšo se Nkiloeng Teng e leqepheng la 30]
Courtesy of the Egypt Exploration Society