Bahalaleli ba ’Nete ba ka U Thusa Joang?

LENTSOE la Segerike le fetoletsoeng e le “mohalaleli” ka Mangolong le ne le sebelisoa ho bo-mang? An Expository Dictionary of New Testament Words, e re: “Ha le le ka bongateng le sebelisoa ho balumeli, le bolela balumeli bohle ’me ha le sebelisoe feela ho batho ba nang le khalalelo e ikhethang, kapa bao ha ba se ba shoele, ba ileng ba tsebahatsoa ka liketso tse ikhethang tsa bohalaleli.”

Kahoo, moapostola Pauluse o ile a re Bakreste bohle ba pele ke bahalaleli ba ’nete. Ka mohlala, lekholong la pele la lilemo C.E. o ile a ngola lengolo leo a ileng a re le ngoletsoe “phutheho ea Molimo e Korinthe, hammoho le bahalaleli bohle ba leng [profinseng ea Roma ea] Akaia eohle.” (2 Bakorinthe 1:1) Hamorao, Pauluse o ile a ngola lengolo le eang “ho bohle ba leng Roma e le baratuoa ba Molimo, ba bitselitsoeng ho ba bahalaleli.” (Baroma 1:7) Ho hlakile hore bahalaleli bana ba ne ba e-s’o shoe, ebile ba ne ba sa khethoa hore ba phahamele balumeli ba bang kaofela ka lebaka la ho ba le bokhabane bo itseng bo ikhethang. Ba ne ba khethiloe hore e be bahalaleli ka lebaka lefe?

Ho Halaletsoa ke Molimo

Lentsoe la Molimo le bontša hore motho ha a etsoe mohalaleli ke batho kapa mokhatlo. Mangolo a re: “[Molimo] o ile a re pholosa ’me a re bitsa ka pitso e halalelang, eseng ka lebaka la mesebetsi ea rōna, empa ka lebaka la morero le mosa oa hae o sa tšoanelang.” (2 Timothea 1:9) Mohalaleli o halalela ka lebaka la ho bitsoa ke Jehova, ka mosa oa Molimo o sa tšoanelang, le tumellanong le morero oa Hae.

Bahalaleli ba phutheho ea Bokreste ba kopanela ‘selekaneng se secha.’ Mali a Jesu Kreste a tšolotsoeng a tiisa selekane sena ’me a halaletsa ba kopanelang ho sona. (Baheberu 9:15; 10:29; 13:20, 24) Kaha ba hloekile mahlong a Molimo, ke ‘boprista bo halalelang ’me ba nyehela mahlabelo a moea a amohelehang ho Molimo ka Jesu Kreste.’—1 Petrose 2:5, 9.

Ho Kōpa Thuso ho Bahalaleli le ho ba Etsa Babuelli

Kaha ba lumela hore “bahalaleli” ba ka fa balumeli matla a khethehileng, ba limilione ba ba fa tlhompho ea borapeli ka ho sebelisa litšoantšo kapa ka ho kōpa hore e be babuelli ba bona. Na ee ke thuto ea Bibele? Thutong ea Thabeng, Jesu o ile a ruta balateli ba hae mokhoa oa ho atamela Molimo, a re: “Joale, le rapele ka tsela ena: ‘Ntat’a rōna ea maholimong, lebitso la hao le ke le halaletsoe.’” (Matheu 6:9) Ka nepo lithapelo li lebisoa ho Jehova Molimo feela.

E le ha ba leka ho tšehetsa taba ea hore “bahalaleli” baa re buella, baruti ba bang ba thuto ea bolumeli ba qotsa Baroma 15:30, moo e reng: “Kea le eletsa, barab’eso, ka Morena oa rōna Jesu Kreste le ka lerato la moea, hore le ikitlaetse le ’na lithapelong ho Molimo bakeng sa ka.” Na Pauluse o ne a khothalletsa balumeli bao hore ba mo rapele kapa ba ipiletse lebitsong la hae ha ba atamela ho Molimo? Che. Le hoja ka Bibeleng ho khothalletsoa lithapelo tse etsetsoang bahalaleli ba ’nete, ha ho kae kapa kae moo Molimo a re laelang hore re rapele bahalaleli ba joalo kapa re rapele ka lebitso la bona.—Bafilipi 1:1, 3, 4.

Leha ho le joalo, Molimo o khethile ’Muelli bakeng sa lithapelo tsa rōna. Jesu Kreste o ile a re: “Ke ’na tsela le ’nete le bophelo. Ha ho ea tlang ho Ntate haese ka ’na.” Hape Jesu o ile a re: “Eng kapa eng eo le e kōpang ka lebitso la ka, ke tla e etsa, e le hore Ntate a ka tlotlisoa ka Mora. Haeba le kōpa ntho leha e le efe ka lebitso la ka, ke tla e etsa.” (Johanne 14:6, 13, 14) Re ka kholiseha hore Jehova o ikemiselitse ho utloa lithapelo tse etsoang ka lebitso la Jesu. Ka Jesu, Bibele e re: “O khona le ho pholosa ka ho feletseng ba atamelang Molimo ka eena, hobane o phela kamehla ho ba kōpela ka tieo.”—Baheberu 7:25.

Haeba Jesu a ikemiselitse ho re buella, ke hobane’ng ha barapeli ba Bokreste-’mōtoana ba rapella thuso ea “bahalaleli”? Bukeng ea hae ea The Age of Faith, rahistori Will Durant o sala tšimoloho ea tloaelo ena morao. Ha a bontša hore Molimo ea Matla ’Ohle o ne a tšajoa ’me ho ne ho bonahala ho le bonolo ho atamela Jesu, Durant o re : “Ha ho ea neng a le sebete ho bua le [Jesu] ka ho toba ka mor’a ho hlokomoloha ka ho feletseng lithuto tsa Hae tsa Thuto ea Thabeng. Ho ne ho bonahala ho le bohlale haholoanyane ho isa thapelo ho mohalaleli eo ho neng ho lumeloa hore o leholimong kahobane e le mohalaleli, ebe ho ipiletsoa ho eena hore a buelle motho ho Kreste.” Na mabaka aa aa utloahala?

Bibele e re ruta hore ka Jesu re ka ‘bua ka bolokolohi le ho atamela ka kholiseho’ ka thapelo ho Molimo. (Baefese 3:11, 12) Molimo ea Matla ’Ohle ha a hōle haholo kapa ha aa sutha ho moloko oa batho hoo a ke keng a utloa lithapelo tsa rōna. Ka kholiseho mopesaleme Davida o ile a rapela: “Uena Ea Utloang thapelo, batho ba nama eohle ba tla tla ho uena.” (Pesaleme ea 65:2) Ho e-na le ho fetisa matla ka litšoantšo tsa “bahalaleli” ba shoeleng, Jehova o tšollela moea oa hae o halalelang holim’a ba o kōpang ka tumelo. Jesu o ile a beha lebaka lena: “Haeba lōna, le hoja le le khopo, le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!”—Luka 11:13.

Mosebetsi oa Bahalaleli

Bahalaleli bao Pauluse a neng a ba ngoletse mangolo ba shoele lilemong tse makholo tse fetileng ’me ka mor’a nako ba ne ba tla amohela “moqhaka oa bophelo,” e leng ho tsosetsoa leholimong. (Tšenolo 2:10) Barapeli ba Jehova Molimo baa hlokomela hore ho fa bahalaleli bana ba ’nete tlhompho ea borapeli ho khahlanong le Mangolo ’me ho ke ke ha re sireletsa maloetseng, likoluoeng tsa tlhaho, ho se tsitseng ha moruo, botsofaling kapa lefung. Kahoo, u ka ’na ua ipotsa, ‘Na ruri bahalaleli ba Molimo baa re tsotella? Na re ka lebella hore ba re etsetse lintho?’

Bahalaleli baa hlahella boprofeteng bo tlalehiloeng ke Daniele. Lekholong la botšelela la lilemo B.C.E., o ile a bona pono e susumetsang, eo phethahatso ea eona e fetelang le mehleng ea rōna. Leoatleng ho ile ha tsoa libata tse tšosang tse ’nè tse emelang mebuso ea batho, e sitoang ho fa batho lintho tseo ba li hlokang e le kannete. Ka mor’a moo Daniele o ile a profeta: “Empa bahalaleli ba Ea Holimo-limo ba tla amohela ’muso, ’me ba tla rua ’muso ho isa nakong e sa lekanyetsoang, esita le ho isa nakong e sa lekanyetsoang holim’a linako tse sa lekanyetsoang.”—Daniele 7:17, 18.

Pauluse o ile a tiisa “lefa [lena] bakeng sa bahalaleli,” e leng ho ba majalefa-’moho le Kreste maholimong. (Baefese 1:18-21) Mali a Jesu a ile a bula tsela ea hore bahalaleli ba 144 000 ba tsosetsoe khanyeng ea leholimo. Moapostola Johanne o ile a re: “Ho thaba ’me ho halalela mang kapa mang ea nang le kabelo tsohong ea pele; lefu la bobeli ha le na matla holim’a bona, empa e tla ba baprista ba Molimo le ba Kreste, ’me ba tla busa le eena e le marena ka lilemo tseo tse sekete.” (Tšenolo 20:4, 6; 14:1, 3) Ponong, Johanne o ile a utloa lebotho la libōpuoa tsa leholimo le bina ka pel’a Jesu ea tlotlisitsoeng: “Ka mali a hao ua rekela Molimo batho molokong o mong le o mong le lelemeng le leng le le leng le bathong ba bang le ba bang le sechabeng se seng le se seng, ’me ua ba etsa hore e be ’muso le baprista ho Molimo oa rōna, ’me ba tla busa e le marena holim’a lefatše.” (Tšenolo 5:9, 10) See se khothatsa hakaakang! Jehova Molimo ka boeena o khethile banna le basali bana ka hloko. Ho feta moo, ba sebelelitse ka botšepehi lefatšeng, ba tobana le hoo e ka bang bothata bo bong le bo bong bo hlahelang batho. (1 Bakorinthe 10:13) Kahoo, re ka kholiseha hore bahalaleli bana ba tsositsoeng, e tla ba babusi ba mohau le ba nang le kutloisiso, ba nahanelang mefokolo ea rōna.

Litlhohonolofatso Tlas’a Puso ea ’Muso

Haufinyane puso ea ’Muso e tla nka khato ho tlosa bokhopo bohle le mahlomola lefatšeng. Ka nako eo, batho ba tla atamela ho Molimo ho feta leha e le neng pele. Johanne o ile a ngola: “Eaba ke utloa lentsoe le phahameng le tsoang teroneng le re: ‘Bonang! Tente ea Molimo e ho moloko oa batho, o tla lula le bona, ’me e tla ba batho ba hae. Molimo o tla ba le bona.’” Sena se tla tlisetsa batho litlhohonolofatso tse ke keng tsa lekanngoa, etsoe boprofeta bona bo tsoela pele: “O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:3, 4.

E tla ba nako e monate hakaakang! Liphello tsa puso e phethahetseng ea Kreste Jesu le bahalaleli ba 144 000 li boetse li hlalosoa ka mantsoe ana a tlalehiloeng ho Mikea 4:3, 4: “[Jehova] o tla ahlola har’a lichaba tse ngata, ’me a lokise litaba lichabeng tse matla tse hōle haholo. Ba tla lokela ho tea lisabole tsa bona hore e be mehoma le marumo a bona hore e be likere tse faolang limela. Sechaba se ke ke sa phahamisetsa sechaba se seng sabole, ha ba sa tla hlola ba ithuta ntoa. Ka sebele e mong le e mong o tla lula tlas’a sefate sa hae sa morara le tlas’a sefate sa hae sa feiga, ho ke ke ha e-ba le ea etsang hore ba thothomele; kaha molomo oa Jehova oa mabotho o boletse.”

Bahalaleli ba ntša memo ea hore re rue molemo litlhohonolofatsong tsena. Bahalaleli ba ’nete ba tšoantšetsoa ke monyaluoa, ’me ba tsoela pele ho re: “Tloo!” Temana e tsoela pele: “Mang kapa mang ea utloang a ke a re: ‘Tloo!’ Mang kapa mang ea nyoriloeng a ke a tle; mang kapa mang ea lakatsang a ke a nke metsi a bophelo ntle ho tefo.” (Tšenolo 22:17) “Metsi a bophelo” a kopanyelletsa eng? Har’a lintho tse ling, ke tsebo e nepahetseng ka merero ea Molimo. Ha Jesu a rapela Molimo, o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) Tsebo ena e fumaneha ka ho ithuta Bibele kamehla. Re ka thaba hakaakang hore ebe ka Lentsoe la Molimo re ka lemoha bahalaleli ba ’nete ’me ra ithuta kamoo a tla ba sebelisa kateng molemong oa ka ho sa feleng oa batho!

[Setšoantšo se leqepheng la 4]

Pauluse o ile a ngolla bahalaleli ba ’nete mangolo a bululetsoeng

[Setšoantšo se leqepheng la 4, 5]

Baapostola ba Jesu ba tšepahalang ba ile ba fetoha bahalaleli ba ’nete

[Setšoantšo se leqepheng la 6]

Ka kholiseho re ka rapela Molimo ka Jesu Kreste

[Setšoantšo se leqepheng la 6]

Bahalaleli ba tsositsoeng e tla ba babusi ba nang le kutloelo-bohloko holim’a lefatše