Ba Kopantsoe ke Lerato la Molimo

HA PHUTHEHO ea Bokreste e ne e thehoa lekholong la pele la Mehla ea rōna e Tloaelehileng, tšobotsi e ’ngoe e ka sehloohong eo e neng e tsebahala ka eona—ho sa tsotellehe ho se tšoane ha litho tsa eona—e ne e le bonngoe ba eona. Barapeli bao ba Molimo oa ’nete ba ne ba tsoa lichabeng tsa Asia, Europe le Afrika. E ne e le batho ba maemo a sa tšoaneng—baprista, masole, makhoba, baphaphathehi, bahoebi, barutehi le bo-rakhoebo. Ba bang e ne e le Bajuda, ’me ba bang e le Balichaba. Ba bangata e ne e kile ea e-ba bafebi, basodoma, matahoa, masholu kapa bahanyapetsi. Leha ho le joalo, ha e e-ba Bakreste, ba ile ba tlohela mekhoa ea bona e mebe eaba ba kopana ka ho feletseng tumelong.

Ke eng e ileng ea thusa Bokreste ba lekholong la pele la lilemo hore bo khone ho kopanya batho baa kaofela? Ke hobane’ng ha ba ne ba phela ka khotso ba bile ba phelisana ka khotso le batho ka kakaretso? Ke hobane’ng ha ba sa ka ba kenya letsoho ha mebuso e tsoheloa matla le ha ho qhoebeshanoa? Ke hobane’ng ha Bokreste ba pele bo ne bo fapane hakaale le malumeli a maholo a kajeno?

Ke Eng e Neng e Momahanya Litho Tsa Phutheho?

Ntho e ka sehloohong e neng e kopanya balumeli-’moho lekholong la pele la lilemo ke lerato la bona ho Molimo. Bakreste bao ba ne ba elelloa hore boikarabelo ba bona bo ka sehloohong ke ho rata Molimo oa ’nete, Jehova, ka lipelo, meea le likelello tsohle tsa bona. Ka mohlala, moapostola Petrose, eo e neng e le Mojuda, o ile a laeloa hore a etele ntlong ea Molichaba, motho eo ka tloaelo a neng a ke ke a tloaelana le eena haholo. Ntho e ka sehloohong e ileng ea mo susumelletsa ho mamela e ne e le ho rata Jehova. Petrose le Bakreste ba bang ba pele ba ne ba e-na le kamano e haufi le Molimo e neng e thehiloe tsebong e nepahetseng ea botho ba Hae, ea lintho tseo a li ratang le tseo a sa li rateng. Qetellong, barapeli bohle ba ile ba utloisisa hore e ne e le thato ea Jehova hore ba “kopane ka ho loketseng kelellong e tšoanang le mokhoeng o tšoanang oa ho nahana.”—1 Bakorinthe 1:10; Matheu 22:37; Liketso 10:1-35.

Ho feta moo, balumeli ba ile ba kopanngoa ke tumelo ea bona ho Jesu Kreste. Ba ne ba batla ho latela mehato ea hae haufi-ufi. O ile a ba laela a re: “Le ratane feela joalokaha ke le ratile. Bohle ba tla tseba ka sena hore le barutuoa ba ka, haeba le e-na le lerato har’a lōna.” (Johanne 13:34, 35) E ne e sa lokela ho ba ho nkeha maikutlo feela, empa e ne e lokela ho ba lerato la ho itela. Phello e ne e tla ba efe? Jesu o ile a rapella ba behang tumelo ho eena tjena: “Ke etsa kōpo . . . e le hore kaofela ba ka ba bang, feela joalokaha uena, Ntate, u le bonngoeng le ’na ’me ’na ke le bonngoeng le uena, e le hore le bona ba ka ba bonngoeng le rōna.”—Johanne 17:20, 21; 1 Petrose 2:21.

Jehova o ile a tšollela moea oa hae o halalelang, kapa matla a sebetsang, holim’a bahlanka ba hae ba ’nete. Moea ona o ile oa etsa hore ba be le bonngoe. O ile oa ba thusa hore ba utloisise lithuto tsa Bibele tse neng li lumeloa liphuthehong tsohle. Barapeli ba Jehova ba ne ba bolela molaetsa o tšoanang—oa ho halaletsoa ha lebitso la Jehova ka ’Muso oa Molimo oa Bomesia, e leng ’muso oa leholimo o tla busa moloko oohle oa batho. Bakreste ba pele ba ne ba utloisisa tlamo ea bona ea hore “hase karolo ea lefatše lena.” Kahoo, neng kapa neng ha batho ba ne ba tsohela mebuso matla kapa ho e-na le liqhoebeshano tsa sesole, Bakreste ba ne ba sa jele paate. Ba ne ba loanela ho ba le khotso le batho bohle.—Johanne 14:26; 18:36; Matheu 6:9, 10; Liketso 2:1-4; Baroma 12:17-21.

Balumeli bohle ba ne ba nka ho hōlisa bonngoe e le boikarabelo ba bona. Joang? Ka ho tiisa hore boitšoaro ba bona bo ne bo lumellana le Bibele. Kahoo, moapostola Pauluse o ile a ngolla Bakreste tjena: “Le lahle botho ba khale bo lumellanang le tsela ea lōna ea pele ea boitšoaro,” ’me le “apare botho bo bocha.”—Baefese 4:22-32.

Ba Lutse ba le Bonngoeng

Ke ’nete hore balumeli ba lekholong la pele la lilemo ba ne ba sa phethahala, ’me ho ne ho ee ho hlahe maemo a lekang bonngoe ba bona. Ka mohlala, Liketso 6:1-6 e bolela hore ho ile ha tsoha khang pakeng tsa Bakreste ba Bajuda ba neng ba bua Segerike le ba neng ba bua Seheberu. Ba neng ba bua Segerike ba ne ba nka hore ba ne ba khetholloa. Leha ho le joalo, hang ha baapostola ba tsebisoa taba ena, ba ile ba e potlakela ’me ba e rarolla ka ho hloka leeme. Hamorao, potso e mabapi le thuto ea bolumeli e ile ea baka khang mabapi le lintho tseo e neng e le tlamo bakeng sa bao e neng e se Bajuda ka phuthehong ea Bokreste. Ho ile ha etsoa qeto e thehiloeng melao-motheong ea Bibele, ’me qeto ena e ile ea amoheloa liphuthehong tsohle.—Liketso 15:1-29.

Mehlala ena e bontša hore phuthehong ea Bokreste ea lekholong la pele la lilemo, ho se utloane ha hoa ka ha fella ka ho arohana ha merabe kapa ka likarohano tse bakoang ke ho se lumellane le thuto e itseng. Hobane’ng? Hobane mabaka a neng a e momahantse—e leng ho rata Jehova, tumelo ho Jesu Kreste, lerato la ho itella ba bang, ho amohela tataiso ea moea o halalelang, ho utloisisa lithuto tsa Bibele ka tsela e tšoanang le ho ikemisetsa ho fetola tsela ea boitšoaro—a ne a le matla haholo ho etsa hore phutheho ea pele e lule e e-na le bonngoe le khotso.

Ho Kopana Borapeling Mehleng ea Kajeno

Na bonngoe bo ka finyelloa ka tsela e tšoanang kajeno? Na mabaka aa a ntse a ka kopanya litho tsa bolumeli bo le bong le ho li thusa ho ba le khotso le batho ba merabe eohle likarolong tsohle tsa lefatše? Hantle haholo! Lipaki Tsa Jehova li bonngoeng mokhatlong oa bara ba motho oa lefatše ka bophara o nametseng linaheng, lihlekehlekeng le libakeng tse fetang 230. ’Me li kopantsoe ke mabaka a tšoanang le a ileng a kopanya Bakreste lekholong la pele la lilemo.

Ntho e ka sehloohong e etsang hore Lipaki Tsa Jehova li be bonngoeng ke boinehelo ba tsona ho Jehova Molimo. Sena se bolela hore li ikitlaelletsa ho tšepahala ho eena tlas’a maemo ’ohle. Lipaki Tsa Jehova li boetse li bontša tumelo ho Jesu Kreste le lithutong tsa hae. Bakreste bana ba bontša lerato la ho itella balumeli-’moho le bona ba bile ba bolela litaba tse tšoanang tse molemo tsa ’Muso oa Molimo linaheng tsohle tseo ba bolelang ho tsona. Ba thabela ho bua ka ’Muso ona le batho ba malumeli ’ohle, ba merabe eohle, ba lichaba tsohle le ba maemo ’ohle a bophelo. Lipaki Tsa Jehova li boetse li lula li sa nke lehlakore litabeng tsa lefatše, e leng se li thusang ho ema li tiile khahlanong le khatello ea lipolotiki, ea meetlo, ea sechaba le ea moruo e leng lintho tse arotseng moloko oa batho haholo. Lipaki tsohle li amohela boikarabelo ba tsona ba ho hōlisa bonngoe ka ho itšoara tumellanong le litekanyetso tsa Bibele.

Bonngoe bo Hohela ba Bang

Khafetsa bonngoe bona bo ’nile ba etsa hore batho bao e seng Lipaki ba be le thahasello. Ka mohlala, Ilsea e ne e le moitlami oa Mok’hatholike ea neng a lula matlong a baitlami Jeremane. Ke eng se ileng sa mo hohela hore e be e mong oa Lipaki Tsa Jehova? Ilse o itse: “Ke batho ba molemo ka ho fetisisa bao nkileng ka kopana le bona. Ha ba ee ntoeng; ha ba lematse motho leha e le ofe. Ba batla ho thusa batho hore ba phele ka thabo lefatšeng la paradeise tlas’a ’Muso oa Molimo.”

Mohlala o mong ke oa Günther, lesole la mehleng la Jeremane le neng le rometsoe Fora nakong ea ntoa ea bobeli ea lefatše. Ka letsatsi le leng moruti e mong oa Moprostanta o ile a tšoara tšebeletso ea bolumeli bakeng sa masole a neng a le lebothong leo Günther a neng a le ho lona. Moruti eo o ile a rapella thuso, tšireletso le tlhōlo. Ka mor’a tšebeletso eo, Günther o ile a ea sebakeng seo a neng a lebela a le ho sona. O ile a sebelisa sebonela-hōle sa hae, eaba o bona mabotho a ba lireng ka mose oane ho mola oa ntoa le ’ona a le tšebeletsong ea bolumeli e neng e tšoeroe ke moruti. Hamorao Günther o ile a re: “Mohlomong moruti eo o ne a rapella thuso, tšireletso le tlhōlo. Ke ile ka ipotsa hore na ho ne ho tla joang hore ebe likereke tsa Bokreste li ne li le ka mahlakoreng a loantšanang ntoeng e le ’ngoe.” Lintho tsena tseo Günther a li boneng ha lia ka tsa hlakoha kelellong ea hae. Hamorao ha a teana le Lipaki Tsa Jehova, tse sa keneleng ntoa, Günther e ile ea e-ba karolo ea mokhatlo oa tsona oa bara ba motho oa lefatše lohle.

Ashok le Feema e ne e le litho tsa bolumeli bo bong ba Bochabela. Ba ne ba e-na le tempelana ea molingoana ka tlung ea bona. Ha lelapa la bona le hlaseloa ke boloetse bo itseng bo kotsi, ba ile ba boela ba hlahloba bolumeli ba bona. Ha Ashok le Feema ba ntse ba buisana le Lipaki Tsa Jehova, ba ile ba khahloa ke lithuto tsa Bibele le lerato le teng har’a Lipaki. Hona joale ke bahoeletsi ba chesehang ba litaba tse molemo tsa ’Muso oa Jehova.

Ilse, Günther, Ashok le Feema ba bonngoeng le Lipaki Tsa Jehova tse limilione mokhatlong oa lefatše lohle oa bara ba motho. Ba lumela tšepiso ea Bibele ea hore mabaka ’ona ana a ba kopanyang borapeling kajeno haufinyane a tla kopanya moloko oohle oa batho o mamelang. Nakong eo, ho ke ke ha hlola ho e-ba le masisa-pelo, ho hloka kutloano le likarohano tse bang teng ka lebitso la bolumeli. Lefatše lohle le tla be le kopane borapeling ba Molimo oa ’nete, Jehova.—Tšenolo 21:4, 5.

[Mongolo o botlaaseng ba leqephe]

[Litšoantšo tse leqepheng la 4, 5]

Bakreste ba pele ba ne ba kopane ho sa tsotellehe hore ba ne ba tsoa maemong a fapaneng