Na U Itokiselitse Letsatsi la Jehova?
“Letsatsi le leholo la Jehova le haufi. Le haufi, ’me le potlakile haholo.”—SOFONIA 1:14.
1-3. (a) Bibele e re’ng ka letsatsi la Jehova? (b) Re lebeletse ‘letsatsi lefe la Jehova’?
LETSATSI la Jehova le leholo ha le bolelele ba lihora tse 24. Ke nako e teletsana eo ka eona Molimo a ahlolang ba khopo. Ba sa sebeletseng Molimo ba lokela ho tšaba letsatsi leo la lefifi, la khalefo, la bohale bo tukang, la mahlomola le la lesupi. (Esaia 13:9; Amose 5:18-20; Sofonia 1:15) Boprofeta ba Joele bo re: “Jo! letsatsi leo; hobane letsatsi la Jehova le haufi, ’me le tla tla joaloka ho tlatlapa ho tsoang ho Ea Matla ’Ohle!” (Joele 1:15) Leha ho le joalo, letsatsing leo le leholo, Molimo o tla pholosa ba “lipelo li lokileng.”—Pesaleme ea 7:10.
2 “Letsatsi la Jehova” ke linako tse sa tšoaneng tseo Molimo a lihang kahlolo ka tsona. Ka mohlala, “letsatsi la Jehova” le ile la fihla ha Bababylona ba sebelisoa ho ahlola baahi ba Jerusalema ka 607 B.C.E. (Sofonia 1:4-7) Le ka 70 C.E. Molimo o ile a liha kahlolo ha a ne a sebelisa Baroma ho ahlola sechaba sa Bajuda se ileng sa lahla Mora oa hae. (Daniele 9:24-27; Johanne 19:15) Bibele e boetse e bolela esale pele ka “letsatsi la Jehova” leo ka lona a tla ‘loana khahlanong le lichaba.’ (Zakaria 14:1-3) Moapostola Pauluse o ile a bululeloa hore a bolele hore letsatsi leo le amana le ho ba teng ha Kreste ho qalileng ka hore Jesu a behoe teroneng e le Morena leholimong ka 1914. (2 Bathesalonika 2:1, 2) Kaha letsatsi la Jehova le haufi, temana ea selemo ea Lipaki Tsa Jehova ea 2007 e bile e loketseng haholo. E tsoa ho Sofonia 1:14, ’me e re: “Letsatsi le leholo la Jehova le haufi.”
3 Kaha letsatsi le leholo la Molimo le haufi, joale ke nako ea hore u itokise. U ka itokisetsa letsatsi leo joang? Na ho na le lintho tse eketsehileng tseo ho hlokahalang hore u li etse ho itokisetsa letsatsi la Jehova?
Itokise
4. Jesu o ile a itokisetsa teko efe e khōlō?
4 Boprofeteng ba hae bo mabapi le qetello ea tsamaiso ea lintho, Jesu Kreste o ile a re ho barutuoa ba hae: “Le itokise.” (Matheu 24:44) Ha Jesu a ne a rialo, le eena o ne a itokiselitse teko e khōlō ea lefu la hae la sehlabelo sa thekollo. (Matheu 20:28) Re ka ithuta’ng tseleng eo Jesu a neng a itokisitse ka eona?
5, 6. (a) Ho rata Molimo le batho ho re thusa joang hore re itokisetse letsatsi la Jehova? (b) Jesu o re behetse mohlala ofe tabeng ea ho rata moahelani?
5 Jesu o ne a rata Jehova le melao ea Hae e lokileng ka pelo eohle. Ha Baheberu 1:9 e bua ka Jesu e re: “U ratile ho loka, ’me u hloile tlōlo ea molao. Ke ka lebaka leo Molimo, Molimo oa hao, a u tlotsitseng ka oli ea thabo e khaphatsehang ho feta balekane ba hao.” Kaha Jesu o ne a rata Ntate oa hae oa leholimo, o ile a lula a tšepahala ho Eena. Haeba le rōna re rata Molimo ’me re boloka melao ea hae, o tla re sireletsa. (Pesaleme ea 31:23) Ho mo rata le ho mo mamela ka tsela eo ho tla re thusa ho itokisetsa letsatsi le leholo la Jehova.
6 Jesu o ne a tsebahala ka ho rata batho. Ka sebele o ile ‘a ba hauhela, hobane ba ne ba sohlokehile ’me ba qhalakane joaloka linku tse se nang molisa.’ (Matheu 9:36) Ke kahoo a ileng a ba bolella litaba tse molemo, feela joalokaha lerato le re susumelletsa ho bolella baahelani ba rōna molaetsa oa ’Muso. Lerato leo re ratang Molimo le moahelani ka lona le etsa hore re lule re le basebeletsi ba Bakreste ba mafolofolo, kahoo le re thusa ho itokisetsa letsatsi le leholo la Jehova.—Matheu 22:37-39.
7. Re ka thaba joang ha re ntse re letetse letsatsi la Jehova?
7 Jesu o ne a thabela ho etsa thato ea Jehova. (Pesaleme ea 40:8) Haeba re e-na le boikutlo bo tšoanang, re tla thabela ho etsetsa Molimo tšebeletso e halalelang. Joaloka Jesu, re tla fana ka seatla se bulehileng, ’me seo se tla re thabisa e le kannete. (Liketso 20:35) Ha ho pelaelo hore “thabo ea Jehova ke qhobosheane ea [rōna].” Ha re e-na le thabo eo, re tla ba malala-a-laotsoe bakeng sa letsatsi le leholo la Molimo.—Nehemia 8:10.
8. Ke hobane’ng ha re lokela ho atamela haufi le Jehova ka thapelo?
8 Ho rapela Molimo ka tieo ho ile ha thusa Jesu hore a itokisetse liteko tsa tumelo. O ne a ntse a rapela ha Johanne a mo kolobetsa. Jesu o ile a rapela bosiu bohle ha a ne a khetha baapostola ba hae. (Luka 6:12-16) Na ho na le motho ea balang Bibele ea ke keng a angoa ke lithapelo tseo Jesu a ileng a li etsa ho tsoa botebong ba pelo bosiung ba ho qetela a phela lefatšeng? (Mareka 14:32-42; Johanne 17:1-26) Na u atisa ho rapela joaloka Jesu? Rapela Jehova khafetsa, u nke nako ha u rapela, u batle tataiso ea moea o halalelang, ’me ha tataiso ea oona e hlaka, u potlakele ho e amohela. Ke habohlokoa ho ba le kamano e matla le Ntate oa rōna oa leholimo nakong ena e mahlonoko ha letsatsi le leholo la Molimo le atamela ka potlako. Kahoo, tsoela pele ho atamela haufi le Jehova ka thapelo.—Jakobo 4:8.
9. Ke hobane’ng ha e le habohlokoa hore re amehe ka ho halaletsoa ha lebitso la Jehova?
9 Ho ameha ka ho halaletsoa ha lebitso la Jehova le halalelang le hona ho ile ha thusa Jesu hore a itokisetse liteko tseo a neng a talimane le tsona. Ha e le hantle, o ile a ruta balateli ba hae hore ha ba rapela Molimo ba lokela ho akarelletsa kōpo e reng: “Lebitso la hao le ke le halaletsoe.” (Matheu 6:9) Haeba re e-na le takatso e matla ea hore lebitso la Jehova le halaletsoe, re tla leka ka matla hore re qobe ho etsa ntho leha e le efe e ka etsang hore le rohakoe. Ka ho etsa joalo, re tla ba malala-a-laotsoe bakeng sa letsatsi le leholo la Jehova.
Na U Lokela ho Etsa Liphetoho?
10. Ke hobane’ng ha re lokela ho itlhahloba?
10 Haeba letsatsi la Jehova le ka fihla hosasane, na u tla be u hlile u itokiselitse lona? Kaofela ha rōna re lokela ho itlhahloba e le hore re bone hore na ho na le moo re ka lokisang teng metsamaong kapa menahanong ea rōna. Kaha bophelo ba motho bo bokhutšoanyane ebile ha boa tsitsa, kaofela re lokela ho falimeha moeeng letsatsi le letsatsi. (Moeklesia 9:11, 12; Jakobo 4:13-15) Kahoo, a re hlahlobeng lintho tseo ho ka ’nang ha hlokahala hore re li ele hloko bophelong ba rōna.
11. U iketselitse pakane efe ea ho bala Bibele?
11 Ntho e ka sehloohong eo re lokelang ho e ela hloko ke keletso ea “lekhoba le tšepahalang” ea ho bala Bibele kamehla. (Matheu 24:45) U ka ’na ua iketsetsa pakane ea hore selemo le selemo u bale Mangolo ho tloha ho Genese ho ea ho Tšenolo le ho nahanisisa ka ’ona. Ka ho bala likhaolo tse ’nè ka letsatsi, u ka bala likhaolo tsohle tsa Bibele tse 1 189 ka selemo. Morena e mong le e mong oa Iseraele o ne a lokela ho bala Molao oa Jehova “ka matsatsi ’ohle a bophelo ba hae.” Kamoo ho bonahalang kateng, Joshua o ile a etsa se tšoanang. (Deuteronoma 17:14-20; Joshua 1:7, 8) Ka sebele ke habohlokoa hore balisa ba phutheho ba bale Lentsoe la Molimo letsatsi le letsatsi, hobane sena se ba thusa ho ruta “thuto e phelisang hantle”!—Tite 2:1.
12. Kaha letsatsi la Jehova le haufi u lokela ho susumelletseha ho etsa eng?
12 Kaha letsatsi la Jehova le haufi u lokela ho susumelletseha ho kopanela kamehla libokeng tsa Bokreste le ho nka karolo ho tsona ka hohle kamoo u ka khonang. (Baheberu 10:24, 25) Ho etsa joalo ho tla u thusa ho ntlafatsa tsebo ea hao ea ho ba ’moleli oa ’Muso ea batlang ho fumana le ho thusa ba nang le tšekamelo e nepahetseng bakeng sa bophelo bo sa feleng. (Liketso 13:48) Mohlomong u ka ba mafolofolo haholoanyane phuthehong ka litsela tse ling hape, tse kang ho thusa ba hōlileng le ho khothatsa ba bacha. Ka sebele mesebetsi ena e ka u khotsofatsa.
Litšebelisano Tsa Hao le ba Bang
13. Re ka ipotsa lipotso life ka ho apara botho bo bocha?
13 Kaha letsatsi la Jehova le haufi, na u lokela ho leka ka matla hore u “apare botho bo bocha bo ileng ba bōptjoa ho ea ka thato ea Molimo ho lokeng ha ’nete le botšepehing”? (Baefese 4:20-24) Ha u ntse u sebeletsa ho ba le litšobotsi tsa bomolimo, ba bang ba ka ’na ba bona hore u ‘tsamaea ka moea oa Molimo’ ’me u bonahatsa tholoana ea oona. (Bagalata 5:16, 22-25) Na ho na le lintho tse tobileng tseo uena le lelapa la hao le li entseng tse bontšang hore le apere botho bo bocha? (Bakolose 3:9, 10) Ka mohlala, na balumeli-’moho le uena le ba bang ba tseba u le mosa ka lebaka la lintho tseo u ba etsetsang tsona? (Bagalata 6:10) Ho ithuta Mangolo kamehla ho tla u thusa ho ba le litšobotsi tsa bomolimo tse tla etsa hore u itokisetse letsatsi la Jehova.
14. Ke hobane’ng ha motho a lokela ho rapella moea o halalelang ha a ntse a sebeletsa ho ba le boitšoaro?
14 Ho thoe’ng haeba u le sefela-peloana ’me u hlokomela hore u lokela ho etsa boiteko bo eketsehileng ba ho ba le boitšoaro? Boitšoaro ke karolo ea tholoana eo moea o halalelang oa Molimo o ka e hlahisang ka ho uena. Ka lebaka leo, rapella moea o halalelang, tumellanong le mantsoe a Jesu a reng: “Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa. . . . Haeba lōna, le hoja le le khopo, le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!”—Luka 11:9-13.
15. U lokela ho etsa’ng haeba u qabane le molumeli-’moho le uena?
15 Ak’u nke hore u qabane le molumeli-’moho le uena. Ha ho le joalo, leka ka hohle hore u lokise litaba, ka tsela eo u etse hore ho be le khotso le bonngoe ka phuthehong. (Pesaleme ea 133:1-3) Sebelisa keletso ea Jesu e tlalehiloeng ho Matheu 5:23, 24 kapa ho Matheu 18:15-17. Haeba u ne u tloaetse hore letsatsi le u likelle u halefile, potlakela ho lokisa litaba. Hangata se hlokahalang feela ke ho ikemisetsa ho tšoarela. Pauluse o ile a ngola a re: “Le be le qenehelo e bonolo, le tšoarelane ka bolokolohi feela joalokaha Molimo le eena ka Kreste a ile a le tšoarela ka bolokolohi.”—Baefese 4:25, 26, 32.
16. Ke maemong afe moo ho hlokahalang qenehelo lenyalong?
16 Lenyalong ho hlokahala hore banyalani ba be le qenehelo e bonolo, ba tšoarelane nako le nako. Haeba u lokela ho etsa boiteko bo eketsehileng ba ho rata le ho qenehela molekane oa hao, leka ka matla ho finyella pakane ena ka thuso ea Molimo le Lentsoe la hae. Na ho hlokahala hore u etse ho itseng e le hore u iphaphathe le 1 Bakorinthe 7:1-5 bakeng sa ho ntlafatsa likamano lenyalong le ho qoba ho se tšepahale? Ka sebele boemong bona ke hona moo ho hlokahalang hore monna kapa mosali a be le “qenehelo e bonolo.”
17. Motho ea entseng sebe se tebileng o lokela ho nka mehato efe?
17 U lokela ho etsa’ng haeba u entse sebe se tebileng? Lokisa boemo kapele-pele. U se ke ua tsilatsila ho batla thuso ea baholo ba Bakreste. Lithapelo tsa bona le keletso li tla u thusa hore u hlaphoheloe moeeng. (Jakobo 5:13-16) Rapela Jehova u ikemiselitse ho baka. Haeba u sa etse joalo u tla ba le letsoalo le molato. Ke sona se ileng sa etsahalla Davida, empa ka sebele o ile a imoloha ka mor’a ho bolella Jehova sebe sa hae. Davida o ile a ngola a re: “Ho thaba eo bofetoheli ba hae bo tšoaretsoeng, eo sebe sa hae se koahetsoeng. Ho thaba motho eo Jehova a sa kenyeng phoso tlalehong ea hae, le eo moeeng oa hae ho se nang thetso.” (Pesaleme ea 32:1-5) Jehova o tšoarela baetsalibe ba bakileng e le kannete.—Pesaleme ea 103:8-14; Liproverbia 28:13.
Ikarole Lefatšeng
18. U lokela ho ikutloa joang ka lefatše lee?
18 Ha ho pelaelo hore u lebeletse lefatše le lecha le hlollang leo Ntate oa rōna oa leholimo a le tšepisitseng. Joale, u ikutloa joang ka lefatše lee—e leng moloko oa batho ba sa lokang ba furaletseng Molimo? “’Musi oa lefatše lena,” e leng Satane o ne a se na matla holim’a Jesu. (Johanne 12:31; 14:30, Bibele—Phetolelo e Ncha) Ka sebele ha u batle hore Diabolose le lefatše la hae ba be le matla holim’a hao, kahoo, nka ka botebo mantsoe a moapostola Johanne a reng: “Le se ke la rata lefatše kapa lintho tse lefatšeng.” Haeba u etsa joalo u tla be u bontša hore u bohlale, kaha “lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.”—1 Johanne 2:15-17.
19. Bacha ba Bakreste ba khothalletsoa ho iketsetsa lipakane tsa mofuta ofe?
19 Na u thusa bana ba hao hore ba “ipoloke [ba] se na letheba lefatšeng”? (Jakobo 1:27) Satane a ka rata ho tšoasa bana ba hao joalokaha motho a tšoasa litlhapi. Mekhatlo e sa tšoaneng e entsoe ka morero oa ho hohella bacha lefatšeng la Satane. Empa bahlanka ba Jehova e se e ntse e le litho tsa mokhatlo o le mong feela o tla pholoha bofelo ba tsamaiso ena ea lintho e khopo. Ka hona, bacha ba Bakreste ba lokela ho khothalletsoa ho ba “le ho hongata hoo [ba] ka ho etsang mosebetsing oa Morena.” (1 Bakorinthe 15:58) Ho hlokahala hore batsoali ba ratang Molimo ba thuse bana ba bona hore ba iketsetse lipakane tse tla etsa hore ba phele bophelo bo monate le bo khotsofatsang bo tlotlisang Molimo le bo ba thusang ho itokisetsa letsatsi la Jehova.
Talima ka Nģane ho Letsatsi le Leholo la Jehova
20. Ke hobane’ng ha re lokela ho lula re nahanne ka bophelo bo sa feleng?
20 U tla khona ho letela letsatsi la Jehova u khobile matšoafo haeba u lula u nahanne ka bophelo bo sa feleng. (Juda 20, 21) U na le tšepo ea ho phela ka ho sa feleng Paradeiseng le ea ho boela u e-ba mocha ea mahlahahlaha ’me u be le nako e sa feleng ea ho hahamalla lipakane tsa hao le ho ithuta se eketsehileng ka Jehova. Ha e le hantle u ka tsoela pele ho ithuta ka Molimo ka ho sa feleng kaha hona joale batho ba tseba “linyane feela tsa litsela tsa hae.” (Jobo 26:14) Ena ke tšepo e thabisang hakaakang!
21, 22. Ke lintho life tseo u ka buisanang ka tsona le ba tsohileng bafung?
21 Paradeiseng, ba tsohileng bafung ba tla re hlaha leseling ka lintho tseo re sa li tsebeng tse etsahetseng nakong e fetileng. Enoke o tla re hlalosetsa se ileng sa etsa hore a be sebete ho bolella batho ba sa tšabeng Molimo molaetsa oa Jehova. (Juda 14, 15) Noe o tla re bolella hore na ho haha areka ho ne ho le joang. Abrahama le Sara ba tla bolela hore na ba ile ba ikutloa joang ha ba siea mabothobotho a Ure ’me ba lula litenteng. Ak’u inahanele feela ha Esthere a se a fana ka makolopetso a kamoo a ileng a buella sechaba sa habo ’me a nyopisa morero o mobe oa Hamane khahlanong le sona. (Esthere 7:1-6) Nahana feela ha Jonase a se a bolela hore na ho ne ho le joang ha a le ka mpeng ea tlhapi e khōlō kapa Johanne Mokolobetsi a bolela hore na o ile a ikutloa joang ha a ne a kolobetsa Jesu. (Luka 3:21, 22; 7:28) E tla ba ho thahasellisang hakaakang ho utloa litaba tsee!
22 Pusong ea Kreste ea Lilemo Tse Sekete, u ka ’na ua ba le tokelo ea ho thusa ba tsohileng bafung hore ba fumane “tsebo ea Molimo.” (Liproverbia 2:1-6) Kajeno re thaba hakaakang ha re bona batho ba ithuta ka Jehova Molimo ’me ba sebelisa seo ba ithutileng sona! Empa nahana hore na u tla thaba hakaakang nakong eo e tlang ha Jehova a hlohonolofatsa mosebetsi oa hao oa ho ruta batho ba mehleng ea boholo-holo ’me ba ananela seo ba ithutang sona!
23. Re lokela ho ikemisetsa ho etsa’ng?
23 Re le batho ba Jehova, melemo eo re e fumanang hona joale e mengata hoo re ka sitoang le ho e bala kahobane re batho ba sa phethahalang. (Pesaleme ea 40:5) Ka ho khetheha re leboha litokisetso tsa Molimo tsa moea. (Esaia 48:17, 18) Ho sa tsotellehe maemo a rōna, a re etseng tšebeletso e halalelang ka lipelo tsohle ha re ntse re letetse letsatsi le leholo la Jehova.
U ka Araba Joang?
• “Letsatsi la Jehova” ke eng?
• U ka bontša joang hore u itokiselitse letsatsi la Jehova?
• Kaha letsatsi le leholo la Molimo le haufi, ho ka hlokahala hore re etse liphetoho life?
• U lebeletse lintho life ka mor’a letsatsi la Jehova?
[Setšoantšo se leqepheng la 12]
Jesu o ne a itokiselitse liteko
[Setšoantšo se leqepheng la 15]
E tla ba tlotla e kaakang ho thusa ba tsohileng bafung hore ba ithute ka Jehova!