Lengolo le Tsoang Dominican Republic

“Ke Qala ho Utloa Lerato le Lekana”

NIURKA o ile a fana ka puo ea Bibele ka lekhetlo la pele phuthehong ea rōna bekeng ena. O ne a lokiselitse seo a neng a tla se bua ’me a se ngotse ka Braille, eaba o se tšoara ka hlooho. Ke ne ke e-na le eena sethaleng, ke ikentse motho ea lakatsang ho ithuta ’nete ea Bibele. Ke ne ke sebelisa sebuela-hōle ’me a ’mametse ka li-headphone tsa hae. Ha re qeta, bamameli ba ile ba opa mahofi hoo a ileng a utloa. Pososelo ea hae e ile ea bontša hore o thabile ebile o khotsofetse. Le ’na ke ne ke thabile. Ho bolela evangeli linaheng tse ling ho thabisa haholo.

Ke hopola ha ke ne ke qala ho kopana le Niurka. Ke lilemong tse peli tse fetileng. Ke ile ka ’mona ka lekhetlo la pele ka mor’a ho tsamaea ka koloi ka metsotso e mashome a mararo litseleng tse lerōle tsa mahaeng. O ne a lutse foranteng ea ntlo ea mahaeng e tloaelehileng—e hahuoeng ka lifate le setene sa samente le molora e ruletsoeng ka masenke a mafome. Ho ne ho e-na le lephoka le lerata la lipōli, limmutla le lintja. Niurka o ne a lutse a iname, e leng se neng se fana ka maikutlo a hore o hlorile ebile o tetebetse maikutlo. Le hoja a ne a le lilemo li 34, o ne a shebahala a le moholo ho feta lilemo tsa hae.

Ke ile ka mo phathatsa lehetleng, eaba o re talima ka mahlo a ileng a foufala lilemong tse 11 tse fetileng. Ka buela ka tsebeng ea hae ka lentsoe le phahameng, ka itsebisa eena le motho eo ke neng ke tsamaea le eena. Hamorao re ile ra hlokomela hore Niurka o tšoeroe ke Marfan syndrome, e leng boloetse bo neng bo mo sotla haholo. Niurka o boetse o na le lefu la tsoekere le hlokang hore boemo ba tsoekere ’meleng oa hae bo lule bo behiloe leihlo kaha bo phahama le ho theoha ka tšohanyetso.

Ha ke beha Bibele ka matsohong a hae, o ile a e tseba ’me a re pele a foufala o ne a rata ho bala Mangolo. Leha ho le joalo, ke ne ke tla khona joang ho ruta motho eo ea hlorileng, ea ikokobelitseng, ea hlokang tlhokomelo e khōlō linnete tse ka har’a Lentsoe la Molimo? Kaha o ne a tseba litlhaku tsa alfabeta, ke ile ka qala ho beha litlhaku tseo ke li entseng ka polasetiki ka matsohong a hae. Ka mor’a nakoana o ne a se a li tseba. Ka mor’a moo, ka hore a tšoare matsoho a ka ha ke ntse ke bua le eena ka puo ea matsoho, o ile a ithuta ho kopanya tlhaku ka ’ngoe le tse tsamaisanang le eona ka Puo ea Matsoho ea Amerika. Butle-butle a ithuta puo ena ea matsoho ho ea pele. Kaha le ’na ke ne ke sa tsoa qala ho ithuta eona, ho ne ho hlokahala hore ke qete lihora tse ngata ke lokisetsa thuto ka ’ngoe. Leha ho le joalo, ’na le Niurka re ne re ikemiselitse haholo, kahoo re ile ra tseba puo ea matsoho kapele.

Niurka o ile a ntlafatsa tsebo ea hae haholo ha mokhatlo o mong o thusang bahloki o mo fa mochine oa litsebe o hōlisang molumo. Le hoja e se oa morao-rao, o ile oa mo thusa haholo. Ka mor’a ho qeta nako e fetang lilemo tse leshome a sa bone a bile a utloela thateng, o ne a itšehlile thajana. Empa moea oa Jehova o ile oa tsosa kelello ea hae le pelo ea hae, oa li tlatsa tsebo, tšepo le lerato. Ka mor’a nako e seng kae, Niurka o ne a tsamaea a tšoere molamu motseng oa habo, a bolella ba bang ’nete ea Bibele.

Niurka o ruta ’mangoane oa hae le bo-motsoala ba hae ba babeli Bibele. O lokisetsa hantle, ebe o tšoara thuto e ’ngoe le e ’ngoe ka hlooho. Liithuti tsa hae li bala lirapa, ebe Niurka o bala lipotso bukeng ea hae ea Braille. Motho eo a tsamaeang le eena o bolella Niurka likarabo ka ho bua ka lentsoe le phahameng kapa ka hore Niurka a mo tšoare matsoho ha a ntse a bua le eena ka puo ea matsoho.

Phutheho eohle e thusa Niurka ebile ea mo khothatsa. Barab’abo ba bangata ba Bakreste ba mo thusa ka ho mo isa libokeng le likopanong. Ba bang ba tsamaea le eena ho ea bolela evangeli. Haufinyane Niurka o ile a re ho ’na: “Ke qala ho utloa lerato le lekana.” O na le tšepo ea hore o tla kolobetsoa kopanong ea rōna ea setereke e latelang.

Ha re kena tseleng e eang moo Niurka a lulang teng, re bona a lutse foranteng a orile letsatsi a phahamisitse hlooho ebile a bososela. Ha ke mo botsa hore na ke hobane’ng ha a bososela, o re: “Ke ne ke nahana ka nako e tlang ha lefatše e tla be e le paradeise. ’Me ke ipona ke se ke le moo.”

[Setšoantšo se leqepheng la 25]

Niurka le litho tse ling tsa phutheho ea habo rōna ka pel’a Holo ea ’Muso

[Setšoantšo se leqepheng la 25]

Niurka o bolella ba bang seo a ithutileng sona