Ke hobane’ng ha Molimo a lumella hore batho ba matla ba hatelle ba fokolang?

Bibele e na le litlaleho tse seng monate tsa batho ba nang le matla a bolaoli ba ileng ba hatella ba fokolang. Sena se re hopotsa se ileng sa etsahalla Nabothe.a Akabe, eo e neng e le morena oa Iseraele lilemong tsa bo-900 pele ho mehla ea Kreste, o ile a lumella mosali oa hae Jezebele hore a fane ka taelo ea hore Nabothe le bara ba hae ba bolaoe e le hore morena a ka inkela serapa sa morara sa Nabothe. (1 Marena 21:1-16; 2 Marena 9:26) Ke hobane’ng ha Molimo a ile a lumella hore batho ba sebelise bolaoli ba bona hampe hakaale?

A re ke re hlahlobisise lebaka lena la bohlokoa: Molimo a ke ke a bua leshano. (Tite 1:2) Seo se amana joang le taba ea hore batho ba khopo ba hatella ba bang? Tšimolohong Molimo o ile a lemosa batho hore ha ba mo fetohela seo se tla ba le liphello tse bohloko—e leng lefu. Mantsoe ao e ne e le ’nete, hobane haesale batho ba shoa ho tloha ha batho ba pele ba ne ba fetohela Molimo tšimong ea Edene. Ha e le hantle, motho oa pele ea ileng a shoa o ile a shoa ka lebaka la ho hatelloa ke motho e mong—e ne e le ha Kaine a bolaea moen’ae Abele.—Genese 2:16, 17; 4:8.

Ha le hlalosa tsela eo batho ba ’nileng ba etsa lintho ka eona ho tloha ka nako eo, Lentsoe la Molimo le re: ‘Motho o busitse motho ho mo ntša kotsi.’ (Moeklesia 8:9) Na mantsoe ao ke ’nete? Jehova o ile a lemosa Baiseraele hore marena a bona a ne a tla ba hatella ’me seo se ne se tla etsa hore ba hoeletse ho Molimo. (1 Samuele 8:11-18) Esita le Morena Solomone ea bohlale o ne a lefisa batho lekhetho le le ngata ka ho feteletseng. (1 Marena 11:43; 12:3, 4) Marena a khopo a kang Akabe ’ona a ne a hatella batho le ho feta. Nahana: Haeba Molimo a ile a thibela liketso tsohle tse joalo tsa khatello, na ha e le hantle o ne a sa tl’o hlahella a le leshano?

U hopole hape hore Satane o bolela hore batho ba sebeletsa Molimo hobane Molimo a ba etsetsa lintho tse molemo. (Jobo 1:9, 10; 2:4) Haeba Molimo a ne a ka sireletsa bahlanka ba hae hore ba se ke ba hatelloa, na seo se ne se ke ke sa bolela hore Satane o ne a bua ’nete? Hape haeba Molimo a ne a ka sireletsa batho bohle hore ba se ke ba hatelloa, na seo se ne se ke ke sa bontša hore o leshano le ho feta? Haeba Molimo a ne a ka sireletsa batho ka tsela e joalo, ba bangata ba ne ba ka nahana hore ba ka khona ho ipusa ka katleho ntle ho Molimo. Empa Lentsoe la Molimo le bua se fapaneng—hore motho a ke ke a khona ho ipusa ho hang. (Jeremia 10:23) Re hloka hore ’Muso oa Molimo o tle; ke ka oona feela o tla felisa ho hloka toka.

Na seo se bolela hore hajoale ha ho na letho leo Molimo a ka le etsang? Che. Nahana ka lintho tse peli tseo a li etsang: Ea pele, ha a re patele seo khatello e leng sona. Ka mohlala, Lentsoe la hae le pepesa ntho e ’ngoe le e ’ngoe eo Jezebele a ileng a e etsa ha a loha leqheka khahlanong le Nabothe. Ho feta moo, Bibele e senola hore liketso tseo tse khopo li susumetsoa ke ’musi ea matla ea patang seo a leng sona. (Johanne 14:30; 2 Bakorinthe 11:14) Bibele e re ’musi eo ke Satane Diabolose. Ka hore a pepese bokhopo le khatello hammoho le sesosa sa tsona, Molimo o re thusa hore le rōna re se ke ra etsa liketso tse khopo. Kahoo oa re sireletsa e le hore re phele ka ho sa feleng.

Ea bobeli, Molimo o re fa tšepo e tiileng ea hore khatello e tla fela. Tsela eo a ileng a pepesa, a ahlola le ho otla Akabe le Jezebele ka eona—hammoho le ba bangata ba tšoanang le bona—e etsa hore re be le tšepo ea hore ka letsatsi le leng o tla otla batho bohle ba etsang bobe. (Pesaleme ea 52:1-5) Molimo o boetse o re fa tšepo ea hore o tla etsolla liphello tse mpe tsa bokhopo ho batho ba mo ratang.b Nabothe ea neng a tšepahala o tla phela ka ho sa feleng hammoho le bara ba hae lefatšeng la paradeise le se nang khatello.—Pesaleme ea 37:34.