Ba Bangata Ba Tla Pholoha Bofelo Le Uena U Ka Pholoha

Ha Bibele e bua ka bofelo e re: “Ho tla ba le matšoenyeho a maholo ao a kang ’ona a e-s’o ka a e-ba teng ho tloha tšimolohong ea lefatše ho fihlela joale . . . Ha e le hantle, hoja matsatsi ao a se ke a khutsufatsoa, ha ho nama e neng e tla pholoha.” (Matheu 24:21, 22) Empa Bibele e bua ka tšepiso ea Molimo ea hore batho ba bangata ba tla pholoha ha e re: “Lefatše lea feta . . . , empa ea etsang thato ea Molimo o hlola ka ho sa feleng.”—1 Johanne 2:17.

Haeba u batla ho pholoha bofelo ba lefatše lena ’me u ‘hlole ka ho sa feleng,’ u lokela ho etsa’ng? Na u lokela ho bokella lintho kapa u itokise ka tsela e itseng? Che. Bibele e re bontša tsela e nepahetseng eo re lokeng ho itokisa ka eona. E re: “Kaha lintho tsena tsohle li tla qhibiliha ka tsela eo, le tšoanela ho ba batho ba mofuta ofe liketsong tse halalelang tsa boitšoaro le liketsong tsa boinehelo ba bomolimo, le letile ’me le lutse le hopola ho ba teng ha letsatsi la Jehova.” (2 Petrose 3:10-12) Taba eo ho buuoang ka eona e bontša hore “lintho tsena tsohle” tse lokelang ho qhibiliha li akarelletsa mebuso ea lefatše lena le bolileng hammoho le batho ba e tšehetsang. Ho hlakile hore ho bokella thepa ho ne ho ke ke ha re pholosa ha bofelo bo fihla.

Ha e le hantle, poloko ea rōna e itšetlehile ka hore re inehele ho Jehova Molimo le ho ithuta kamoo re lokelang ho itšoara kateng e le hore re mo khahlise. (Sofonia 2:3) Ho e-na le ho etsisa bongata le ho hlokomoloha lipontšo tse hlakileng tsa hore re phela matsatsing a ho qetela, re lokela ho ‘lula re hopola ho ba teng ha letsatsi la Jehova.’ Lipaki Tsa Jehova li ka sebelisa Bibele ho u bontša hore na u ka etsa’ng e le hore u pholohe bofelo.