Lebaka Leo ka Lona Molimo a re Khothalletsang ho Rapela

Molimo o batla re be metsoalle ea hae.

Metsoalle ea buisana e le hore e tiise setsoalle. Ka ho tšoanang, Molimo o re khothalletsa hore re bue le eena, kaha seo se tla matlafatsa setsoalle sa rōna le eena. O re: “Le tla mpitsa ’me le tl’o nthapela, ’me ke tla le mamela.” (Jeremia 29:12) Ha u ntse u buisana le Molimo, u tla ‘Atamela ho eena, ’me o tla atamela ho uena.’ (Jakobo 4:8) Bibele e re: “Jehova o haufi le bohle ba ipiletsang ho eena.” (Pesaleme ea 145:18) Ha re mo rapela kamehla, setsoalle sa rōna le eena se tla tiea.

Molimo o batla ho u thusa.

Jesu o itse: “Ke motho ofe har’a lōna eo mora oa hae a kōpang bohobe—a ke ke a mo neha lejoe, na ha ho joalo? Kapa, mohlomong, o tla kōpa tlhapi—a ke ke a mo neha noha, na ha ho joalo? Ka hona, haeba lōna . . . le tseba ho fa bana ba lōna limpho tse molemo, Ntat’a lōna ea maholimong o tla fana ka lintho tse molemo joalo hakaakang ho ba mo kōpang!” (Matheu 7:9-11) Ka sebele, Molimo o batla hore u mo rapele hobane ‘oa u tsotella’ ’me o batla ho u thusa. (1 Petrose 5:7) Ebile o u khothalletsa hore u tšollele mathata a hao ho eena. Bibele e re: “Le se ke la tšoenyeha ka letho, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo.”—Bafilipi 4:6.

Batho ba lakatsa ho tseba Molimo.

Litsebi tsa kelello li hlokometse hore batho ba bangata ba rata ho rapela. Esita le batho ba reng Molimo ha a eo baa rapela.a Sena se bontša hore batho ba bōpiloe ba e-na le takatso ea ho tseba Molimo. Jesu o ile a re: “Ho thaba ba elang hloko tlhoko ea bona ea moea.” (Matheu 5:3) Tsela e ’ngoe eo ka eona re ka bontšang hore re ela hloko tlhoko ea rōna ea moea, ke ka ho buisana le Molimo khafetsa.

Haeba re amohela memo ea Molimo ea hore re mo rapele, re ka lebella melemo efe?