Na Mangeloi a Hlile a Teng?

Ka Sontaha se seng Kenneth le mosali oa hae Filomena ba lulang Curaçao, ba ile ba ea ha banyalani bao ba tloaetseng ho ithuta Bibele le bona.

Kenneth o re: “Ha re fihla moo, ho ne ho koetsoe ebile koloi ea bona e le sieo kantle, eaba ke letsetsa ’mè oa teng.”

A araba fono a bolella Kenneth hore monna oa hae o mosebetsing. Empa a hlaha ha a utloa hore Kenneth le Filomena ba kantle ’me a re ba kene.

Ha ba kena ba ile ba hlokomela hore o ne a ntse a lla. Kenneth o ile a rapela e le hore ba tsebe ho tsoela pele ka ho ithuta empa ’mè eo o qala ho lla hape, eaba ba mo botsa ba mo hauhetse hore na molato ke eng.

O ile a re Kenneth le Filomena ba mo letselitse nakong eo a ntseng a ngolla monna oa hae lengolo kaha o ne a rerile ho ipolaea. O ne a batla ho ipolaea hobane a e-na le khatello ea maikutlo, kahoo ba mo balla Bibele. Mangolo ao ba ileng ba mo balla ’ona a ile a mo tšelisa haholo.

Kenneth o ile a re: “Re leboha haholo hore ebe Jehova o re file matla a ho thusa ’mè eo. Mohlomong ke eena ea rometseng mangeloi kapa moea o halalelang hore o re tataisetse ho ea mo thusa.”a  

Na ho ka etsahala hore ebe Kenneth le Filomena ba thusitsoe ke mangeloi kapa ke moea o halalelang? Kapa na e ne empa e le ka tšohanyetso feela Kenneth a ileng a letsa ka nako eo?

Ha ho na motho ea nang le bonnete ba hore na ho etsahetse’ng. Empa re kholisehile hore Molimo o sebelisa mangeloi ho thusa batho hore ba mo tsebe. Mohlala o hlahang ka Bibeleng ke oa ha lengeloi le isa Mokreste ea bitsoang Filipi ho monna oa Moethiopia ea neng a batla ho tseba Molimo.—Liketso 8:26-31.

Likerekeng tse ngata batho ba rutoa hore motho e mong le e mong o na le lengeloi le mo thusang ho phetha thato ea Molimo. Empa ho ntse ho e-na le batho ba bangata ba lumelang hore mangeloi ha a eo.

Na ehlile mangeloi a teng? Haeba ho joalo a bopiloe ke mang? Bibele e re’ng ha e bua ka ’ona? Na a ka u thusa kapa a u ntša kotsi? Sehloohong sena re tl’o hlokomela hore na Bibele e re’ng ha e bua ka ’ona.