U Bontša Moea oa Mofuta Ofe?
1 Pauluse o ile a phetha lengolo la hae le eang phuthehong ea Filippi ka khothatso ena: “Mohau oa Morena oa rōna Jesu Kreste o be le [moea oo le o bontšang, NW].” (Ba-Fil. 4:23) O ile a ba babatsa bakeng sa thahasello ea bona ea ’nete boboleling ba litaba tse molemo haesita le bakeng sa kameho ea bona e mofuthu, e lerato ka katleho ea ba bang.—Ba-Fil. 1:3-5; 4:15, 16.
2 Takatso ea rōna e lokela ho ba ho bonahatsa moea o tšoanang phuthehong ea rōna. Ha bohle ba bontša cheseho, mosa, le kamohelo e mofuthu ea baeti, sena se etsa hore ho be le moea o totobalang ho ba shebelletseng. Moea o nepahetseng le o lerato o etsa hore ho be le bonngoe le khatelo-pele ea moea. (1 Ba-Kor. 1:10) Moea o fosahetseng o baka ho nyahama le ho etsa lintho ka monyebe.—Tšen. 3:15, 16.
3 Baholo Etellang Pele: Baholo ba na le boikarabelo ba ho boloka moea o motle, o nepahetseng har’a bona le ka har’a liphutheho tseo ba leng ho tsona. Hobane’ng? Hobane phutheho e ka susumetsoa ke boikutlo le boitšoaro ba bona. Re ananela ho ba le baholo ba chesehelang tšebeletso ea tšimo, ba re lumelisang ka pososelo e mofuthu le lentsoe le mosa, le ba fanang ka keletso e nepahetseng le e hahang, ebang ke lekunutung kapa sethaleng.—Ba-Heb. 13:7.
4 Ha e le hantle, bohle re lokela ho phetha karolo ea rōna ea ho etsa hore phutheho e be le botsoalle, e be le kamohelo e mofuthu ea baeti, e chesehe, ’me e amehe ka lintho tsa moea. Ka bomong, re ka bontša mofuthu le lerato botsoalleng ba rōna le ba bang. (1 Ba-Kor. 16:14) Ha hoa lokela hore ho be le khethollo ea lilemo, moloko, thuto, kapa boemo ba lichelete har’a rōna. (Bapisa le Ba-Efese 2:21.) Ka lebaka la tšepo ea rōna, re ka bonahatsa moea oa thabo, ho amohela baeti ka mofuthu ka seatla se bulehileng, le cheseho tšebeletsong ea rōna.—Ba-Roma 12:13; Ba-Kol. 3:22, 23.
5 Bohle ba kopanelang le rōna, ho akarelletsa le ba bacha ’neteng, ba lokela ho etsoa hore ba ikutloe ba amohelehile ’me ba utloe lerato le boinehelo ba boena. Ka tšebeletso ea rōna le ka ho bonahatsa litšoaneleho tse ntle tsa Bokreste, re fana ka bopaki ba hore phutheho ke “tšiea le motheo oa ’nete.” (1 Tim. 3:15) Re boetse re latsoa tšireletseho ea moea ka lebaka la “khotso ea Molimo” e lebelang lipelo tsa rōna le matla a rōna a kelello. (Ba-Fil. 4:6, 7) E se eka kaofela ha rōna ka khothalo re ka loanela ho bontša moea o tla re tiisetsa ho thabela mosa o sa tšoanelang oa Jehova ka Morena Jesu Kreste.—2 Tim. 4:22.