Lebokose la Lipotso
◼ Re lokela ho hlokomela joang lintho tseo re li sebelisang mosebetsing oa bopaki?
1 Le hoja mohoeletsi oa litaba tse molemo a ka ba le nehelano e loketseng ea Mangolo ka kelellong, a ka ’na a fumana hore ha aa itokisa tabeng ea lintho tseo a li sebelisang. Ha a le monyako, a ka ’na a hloka sengoliloeng se tsamaisoang ka nako eo. Limakasine, libuka tse lekanang le makasine, le lipampitšana tse leng ka mokotleng oa hae oa tšimo e ka ’na eaba li sosobane kapa li tabohile. A ka ’na a se khone ho fumana pentšele kapa tlaleho ea ntlo le ntlo hobane mokotla oa hae o sa hlophisoa hantle. Ho bohlokoa ho ela hloko ka ho fetisisa lintho tseo u li sebelisang pele u kopanela tšebeletsong ea tšimo.
2 Mokotla oa tšimo o hlomeletsoeng hantle o lokela ho ba le lintho life? Bibele ea hlokahala. Akarelletsa le litlaleho tsa ntlo le ntlo. Tiisa hore u na le sengoliloeng se tsamaisoang khoeling eo. Ho boetse ho hlokahala litokollo tsa morao-rao tsa limakasine, haesita le lipampitšana le libuka tse lekanang le makasine. Nka kopi ea buka ea Ho Bea Mabaka. Ho ba le Tšebeletso ea Rōna ea ’Muso ea morao-rao ho tla u lumella hore u ikhopotse linehelano tseo ho entsoeng tlhahiso ea hore li sebelisoe pele u e-ea monyako. Ha u sebetsa tšimong eo ho ka etsahalang hore u kopane le batho ba buang puo esele, ho tla ba hotle ho ba le bukana Good News for All Nations. Ho ba le kopi ea e ’ngoe ea lingoliloeng tsa rōna tse etselitsoeng bacha ho tla u thusa hore u lokele ho bua le bacha.
3 Ntho e ’ngoe le e ’ngoe e sebelisoang e lokela ho behoa ka makhethe ka mokotleng. Ha ho hlokahale hore mokotla o be mocha, empa o lokela ho hloeka ’me o be boemong bo botle. Mokotla oa hao oa tšimo ke karolo ea thepa eo u e sebelisang ho phatlalatsa litaba tse molemo. Etsa hore o lule o le makhethe.