Ho Boloka Bonngoe ba Rōna ba ’Muso
1 ’Muso oa Molimo ke puso ea sebele, e nang le matla le bolaoli. E ne e le sehlooho sa boboleli ba Jesu. (Matt. 4:17) Ho ruta ba bang le ho pakela ’nete ea ’Muso e ne e le karolo ea sehlooho tšebeletsong ea Jesu. O ile a re ruta ho rapella ’Muso le hore re ’ne re tsoele pele ho batla oona pele. (Matt. 6:9, 10, 33) Ho lula haufi le Jehova le mokhatlo oa hae o hlophisitsoeng, ho phethahatsa thōmo ea rōna ea ho bolela, le ho ipoloka re arohile lefatšeng ho re nolofalletsa ho boloka bonngoe ba rōna ba ’Muso. Ka liketso tsa rōna le ka mantsoe, re bontša hore re ka lehlakoreng la ’Muso.—Joh. 18:37.
2 Ho tloha ka 1914, ’Muso o fetohile ntho ea sebele ho bafo ba limilione. Bonngoe bo bontšitsoeng ke bafo bana ba ’Muso bo fapane haholo le lefatše le arohaneng. Re tlameha ho etsa hore ’Muso e be oa sebele bophelong ba rōna e le hore e ka ba matla a kopanyang. Ke eng se etsang hore e be oa sebele ho rōna?
3 Ho tšoana le mebuso e meng, ’Muso o na le melao. Leha ho le joalo, o fapana le mebuso e meng ka hore melao ea oona e fumanoa ka Bibeleng. Ho bala Lentsoe la Molimo kamehla ho re fa likhopotso tse hlokahalang mabapi le se hlokoang ho rōna joaloka bafo ba ’Muso. Thuto ea botho ea lingoliloeng tsa rōna le tataiso e tsoang ho “mohlanka ea khabane, ea bohlale” li re thusa ho sebelisa melao ea Molimo bophelong ba rōna ba letsatsi le letsatsi. (Matt. 24:45) Ha re sebelisa litokisetso tsena bophelong ba botho, ’Muso o fetoha oa sebele haholoanyane ho rōna, o re atametsa hammoho mokhatlong oa lefatše lohle oa baena, o re etsa lelapa le kopaneng la barapeli tlas’a bobusi ba Jesu.
4 Bonngoe ka Boboleli ba ’Muso: Thōmo ea rōna ke ho bolela litaba tse molemo tsa ’Muso “ho isa pheletsong ea lefatše.” (Lik. 1:8) Ho bolela ka “khopolo e le ’ngoe” hoa re kopanya ha re ntse re leka ka tieo ho ‘tlotlisa’ Jehova. (Ba-Roma 15:5, 6) Ho kopanela ka cheseho le basebetsi-’moho le rōna lefatšeng ka bophara ho matlafatsa tumelo ea rōna ’me ho lumella moea oa Jehova hore o sebetse ka ho rōna hore re phethe thato ea hae. ‘Ho ba le ho hongata hoo re ho etsang Moreneng’ ho etsa hore re ‘tiee, re se ke ra sisinyeha.’—1 Ba-Kor. 15:58.
5 Linaheng tse ngata Satane o leka ho senya bonngoe ba rōna ka ho kena-kenana le mosebetsi oa rōna oa boboleli. O sebelisa sohle se matleng a hae ho jala ho hloka kutloano le ho baka ho se utloisisane, ho leka ho hlahisa liqabang le lintoa. (Liprov. 6:19; Ba-Gal. 5:19-21, 26) A ka rata hore re kenelle litsekong tsa lefatše esita le ho nka lehlakore litabeng tsa lipolotiki le tsa sechaba. (Jak. 3:14-16) Mangolo a re khothatsa hore re hanele tšusumetso ea hae; ho seng joalo, o tla re harola joaloka phofu ea hae. (1 Pet. 5:8, 9) Ha rea lokela ho lumella hore taba ea hore tšepo ea ’Muso ke ntho ea sebele e hlakohe lipelong le likelellong tsa rōna.
6 Ho hlokahala ho hlaphoheloa kelellong le bohlale bo tsoang holimo hore re boloke bonngoe ba rōna. Ha ho hlaha mathata, haholo-holo haeba a ama baena ba rōna, re tlameha ho bontša litholoana tsa moea bakeng sa ho boloka khotso. Mekhoa ea lefatše, e kang boikhohomoso, mohono, le boikholiso, ea arola ’me e tlameha ho qojoa. (Ba-Ef. 4:1-3; Ba-Kol. 3:5-10, 12-14) Ho hlokahala hore re boloke likelello tsa rōna li tletse mehopolo e nepahetseng, e hahang. ’Muso ke ntho ea sebele bophelong ba rōna! Empa ho hlokahala hore re falimehe hore o ’ne o be joalo!—Ba-Ef. 6:11, 13.
7 Hore tšepo ea rōna e hlollang ea ’Muso ke ntho ea sebele ho re kopanya moeeng oa bonngoe bo ke keng ba fela.—Pes. 133:1.