Ho ba Teng Libokeng Kamehla—Ke Habohlokoa Hore re Eme re Tiile
1 Moapostola Pauluse o ile a re khothaletsa hore re lule re “phela hantle tumelong.” (Tite 1:9, 13, NW) Libokeng tsa phutheho re nahana ka mehopolo e hahang ’me re rutoa hore na re ka lula re ikapesitse ka ho feletseng ka lihlomo tsa moea joang e le hore re ka ‘hlōla lihlōhō tsohle tsa Diabolose.’—Ba-Ef. 6:11; Ba-Fil. 4:8.
2 Liboka li Fana ka Seo re se Hlokang: Ho ba teng libokeng tsa phutheho kamehla ke habohlokoa hore re eme re tiile. (1 Ba-Kor. 16:13) Libokeng ho etsoa lithapelo ho leboha le ho rorisa Molimo, hammoho le ho etsa thapeli molemong oa phutheho le seo e se hlokang. (Ba-Fil. 4:6, 7) Ho kopanela lipineng tsa ’Muso hoa re hlasimolla ’me ho re nolofalletsa ho bonahatsa mehopolo ea rōna le maikutlo a rōna ha re rapela Jehova. (Ba-Ef. 5:19, 20) Botsoalle ba rōna hammoho Holong ea ’Muso pele le ka mor’a liboka boa re khothatsa, boa re haha le ho re khatholla.—1 Ba-Thess. 5:11.
3 Ka April, puo e khethehileng e neng e re, “Bofelo ba Bolumeli ba Bohata bo Haufi,” e ile ea hatisa ka matla likelellong tsa barati ba ’nete hore ho potlakile hore ba nke bohato kapele hore ba tsoe Babylona e Moholo. (Tšen. 18:4) Ka June le July, e bile ho susumetsang hakaakang ho akaretsa lihlooho tse tharo tse ithutoang tsa Molula-Qhooa tse neng li bua ka mahlaseli a leseli a ’nileng a bonesa tsela ea ba lokileng! (Liprov. 4:18) Nahana hore na re ka be re ile ra lahleheloa hakae hoja ra hlokomoloha ho ba teng libokeng tseo.
4 Ho Hlophisetsoa ho Phetha Tšebeletso ea Rōna leqepheng la 72 e totobatsa hore Sekolo sa Tšebeletso sa Puso ea Leholimo ke tokisetso e ’ngoe bakeng sa thuto e tsoelang pele ea phutheho eohle. Hona joale, tšobotsi e ’ngoe ea lenaneo lena e re thusa ho tloaelana hamolemo le histori ea kajeno ea mokhatlo o hlophisitsoeng ka ho sebelisa buka Baboleli. Ho hang ha rea lokela ho etsa hore thuto ena e re lahlehele.
5 Seboka sa Rōna sa Tšebeletso se re hlomella hore re be ba atlehang haholoanyane tšebeletsong. Sena se ile sa hlakisoa ke seboka seo ho sona re ileng ra fumana taeo mabapi le ho kopanela ho abeng Kingdom News No. 34 ka bongata. Tlhohonolofatso ea Jehova mosebetsing ona e ne e le khōlō, joalokaha ho bonoa liphellong tse ikhethang lefatšeng ka bophara. (Bapisa le 2 Ba-Korinthe 9:6, 7.) Ba bang teng libokeng kamehla ba ile ba khothatsoa, ’me ba ile ba thusa ho etsa hore phutuho eo e tšehetsoe.
6 Thutong ea Buka ea Phutheho, boikutlo ba rōna ba ho potlaka bo totisoa ke lintho tseo re ithutang tsona Lentsoeng la Molimo ka thuso ea buka Tlhōrō ea Tšenolo. Kaha lintho li etsahala ka potlako lefatšeng, ho hlokahala re utloisise ho phethahala ha boprofeta bo tebileng ba Tšenolo.
7 Etsa Hore ho ba Teng Libokeng Kamehla e be Ntho ea Pele: Linaheng tse ngata moo baena ba rōna ba utloang bohloko ka lebaka la liteko, ba ntse ba hlokomela kamoo e leng habohlokoa kateng ho bokana hammoho beke le beke. Ka mohlala, Burundi, Rwanda, Liberia, le Bosnia le Herzegovina, ba bangata ba bacha ba ba teng libokeng hoo ba menang palo ea bahoeletsi ka makhetlo a mabeli esita le a mararo. Ka tsela ena Jehova o thusa baena ho lula ba tiile moeeng o le mong.—Ba-Fil. 1:27; Ba-Heb. 10:23-25.
8 Leha e le bafe bao e ka ’nang eaba ba ’nile ba hlokomoloha ho ba teng libokeng kamehla ba lokela ho nka bohato hona joale ho lokisa tloaelo ena. (Moek. 4:9-12) E le hore re ka ema re tiile, re hloka ho khothatsana le ba hōlileng moeeng, joalokaha ho lokiselitsoe ka ho ba teng libokeng kamehla.—Ba-Roma 1:11.