Iponahatseng le le ba Lebohang
1 Le hoja re phela ‘linakong tse mahlonoko tseo ho leng thata ho sebetsana le tsona,’ re na le mabaka a mangata a ho leboha Jehova. (2 Tim. 3:1) Le ka sehloohong ke mpho ea bohlokoa eo a re fileng eona, e leng Mora oa hae. (Joh. 3:16) Ho feta moo, le hoja ba leng bolumeling ba bohata ba lapa moeeng, re thabela matletsetletse a lijo tsa moea. (Esa. 65:13) Re karolo ea mokhatlo oa bara ba motho oa lefatšeng ka bophara ’me re na le tokelo ea ho kopanela katolosong e thabisang ea borapeli ba ’nete. (Esa. 2:3, 4; 60:4-10, 22) Re ka iponahatsa re le ba lebohang joang ho Jehova bakeng sa litlhohonolofatso tseo a re tšollelang tsona?—Bakol. 3:15, 17.
2 Tšebeletso e Thabisang le ea Pelo Eohle: Ha moapostola Pauluse a bua ka ho fana ka lintho tse bonahalang o ile a ngola: “Molimo o rata ea fanang a nyakaletse.” (2 Bakor. 9:7) Molao-motheo ona o sebetsa le tšebeletsong ea rōna ho Molimo. Re iponahatsa re le ba lebohang ka ho chesehela ’nete, ka ho thaba ha re le libokeng tsa Bokreste, ka ho chesehela tšebeletso ea tšimo le ka ho thabela ho etsa thato ea Molimo.—Pes. 107:21, 22; 119:14; 122:1; Bar. 12:8, 11.
3 Mefuteng e itseng ea linyehelo Iseraeleng ea boholo-holo, Molao o ne o sa lekanyetse hore na ho fanoe ka tse kae. Morapeli ka mong o ne a ka leboha ka ho fana “ho lekana le tlhohonolofatso eo Jehova” a mo fileng eona. (Deut. 16:16, 17) Ka ho tšoanang kajeno, pelo e tletseng teboho e tla re susumelletsa ho fana ho latela maemo a rōna mosebetsing oa ho bolela ka ’Muso le oa ho etsa barutuoa. Ba bang ba sebelisa nako ea phomolo mosebetsing kapa sekolong bakeng sa ho eketsa nako eo ba e qetang tšebeletsong ea tšimo, esita le ho ba bo-pula-maliboho ba thusang.
4 Ho Leboha ka Tsela e Khaphatsehang: Tsela e ka sehloohong ea ho leboha Jehova ke thapelo. (1 Bathes. 5:17, 18) Lentsoe la Molimo le re phehella ho “khaphatseha tumelo litebohong.” (Bakol. 2:7) Esita leha re phathahane haholo kapa re le tlas’a khatello, re lokela hore kamehla re akarelletse liteboho lithapelong tsa rōna tsa letsatsi le letsatsi. (Bafil. 4:6) E, ka tšebeletso ea rōna le ka lithapelo tsa rōna, e se eka re ka “rua lipolelo tse ngata tsa teboho ho Molimo.”—2 Bakor. 9:12.