Lebokose la Lipotso

◼ Ke mantsoe afe a ka sebelisoang ho bolela pina e bulang Sekolo sa Tšebeletso sa Puso ea Molimo, Seboka sa Tšebeletso, Seboka sa Phatlalatsa le Thuto ea Molula-Qhooa, hona e boleloa ke mang?

Lipina tse khethetsoeng ho bula Sekolo sa Tšebeletso sa Puso ea Molimo beke le beke li thathamisitsoe Kemisong ea Sekolo sa Tšebeletso sa Puso ea Molimo e tsoang e le kenyelletso ea Tšebeletso ea Rōna ea ’Muso ea October. Pina e bulang le e koalang Seboka sa Tšebeletso sa beke le beke e hlaha leqepheng la 2 la Tšebeletso ea Rōna ea ’Muso. Ka tsela e tšoanang, linomoro tsa lipina tsa beke le beke tsa Thuto ea Molula-Qhooa li hlaha leqepheng la 2 la Molula-Qhooa o mong le o mong. Lipina tse lokiselitsoeng hore li binoe, li nkoa e le karolo ea seboka seo li binoang ho sona ’me li lokela ho boleloa ke mor’abo rōna ea tsamaisang seboka seo eseng ke Molebeli oa Sekolo kapa molula-setulo oa Puo ea Phatlalatsa.

Ka mohlala, molebeli oa Sekolo sa Tšebeletso sa Puso ea Molimo o tla amohela bamameli, a bolele pina e bulang seboka, a khanne sekolo, ka mor’a moo, o tla bitsa sebui sa pele sa Seboka sa Tšebeletso hore se tle sethaleng. Mora enoa oabo rōna ea nang le puo Sebokeng sa Tšebeletso ke eena ea tla bolela pina e bulang Seboka sa Tšebeletso.

Ka tsela e tšoanang, Seboka sa Phatlalatsa se tla buloa ke molula-setulo. O tla amohela bohle ba teng ka thabo, ebe o ba kōpa hore ba bine pina e bulang seboka e khethiloeng ke sebui. Molula-setulo (kapa mohlomong mor’abo rōna e mong ea tšoanelehang ea abetsoeng esale pele) o tla bula seboka sena ka thapelo. O tla bitsa sebui a be a bolele le sehlooho sa puo ea phatlalatsa. Ha puo e fela, molula-setulo a ke ke a akaretsa lintlha tsa puo, empa o tla bua mantsoe a makhutšoanyane feela a ho leboha thuto e fanoeng. O tla bolela sehlooho sa puo ea phatlalatsa ea beke e latelang, ’me ka mor’a moo o tla kōpa bohle ba teng hore ba emele Thuto ea Molula-Qhooa. Ha ho hlokahale hore molula-setulo a botse bamameli hore na ba ka rata hore sebui se fetisetse lerato la bona le litumeliso phuthehong ea habo sona. Ka mor’a moo, molula-setulo o tla kōpa mokhanni oa Thuto ea Molula-Qhooa hore a tle sethaleng.

Mokhanni oa Thuto ea Molula-Qhooa o tla bolela pina ea pele e lokelang ho binoa thutong eo. O tla khanna thuto tumellanong le litaelo tse hatisitsoeng ’me ka mor’a moo a bolele pina e koalang. Ka tloaelo, Mokhanni oa Thuto ea Molula-Qhooa o tla kōpa mor’abo rōna ea faneng ka puo ea phatlalatsa hore a tl’o koala ka thapelo.

Ho latela melao-motheo ena e akaretsang ho tla etsa hore liboka tsa rōna tsa phutheho li tšoaroe ka tsela e bontšang bonngoe.