Kemiso e Ncha ea Liboka Tsa Phutheho
1, 2. Ho qala ka January 2009 ho tla ba le liphetoho life libokeng tsa rōna?
1 Barab’abo rōna lefatšeng ka bophara ba ile ba utloa tsebiso e thahasellisang bekeng ea la 21-27 April, 2008. E ne e re, “Ho tloha ka la 1 January, 2009, Thuto ea Buka ea Phutheho e tla tšoaroa ka nako e le ’ngoe le Sekolo sa Tšebeletso sa Puso ea Molimo hammoho le Seboka sa Tšebeletso. Thuto ea Buka ea Phutheho e se e tla bitsoa Thuto ea Bibele ea Phutheho.”
2 Kemiso ea Liboka Tsa Beke le Beke: Liboka tsena, ho kopanyelletsa le pina le thapelo, li tla nka hora e le ’ngoe le metsotso e 45. Li tla qala ka pina le thapelo (5 mets.), ho latele Thuto ea Bibele ea Phutheho (25 mets.). Hang ka mor’a moo e tla ba Sekolo sa Tšebeletso sa Puso ea Molimo (30 mets.). Ebe ho latela pina (5 mets.) e kenyelletsang Seboka sa Tšebeletso (35 mets.). Liboka li tla phethoa ka pina le thapelo (5 mets.). Ho u thusa hore u lokisetse liboka tsena, kemiso ea Thuto ea Bibele ea Phutheho, Sekolo sa Tšebeletso sa Puso ea Molimo le Seboka sa Tšebeletso e tla hatisoa khoeli le khoeli Tšebeletsong ea Rōna ea ’Muso.
3. Seboka sa Thuto ea Bibele ea Phutheho se tla tšoaroa joang?
3 Thuto ea Bibele ea Phutheho: Seboka sena se tla tšoaroa joaloka Thuto ea Molula-Qhooa. Ho ke ke ha hlokahala hore ho qaloe ka ho ikhopotsa lintlha tsa thuto ea beke e fetileng. Ho e-na le hoo, seboka sena se lokela ho kenyelletsoa ka mantsoe a seng makae. Sena se tla etsa hore ho be le nako e lekaneng ea hore bohle ba fane ka litlhaloso tse khutšoanyane. Molebeli ea okamelang o tla ikarabella ho khetha baholo ba tla chenchana beke le beke ho tšoara seboka sena.
4. Seboka sa Tšebeletso se tla fetoha joang?
4 Seboka sa Tšebeletso: Seboka sa Tšebeletso se ke ke sa fetoha empa lipuo tsa sona li tla khutsufala. Ka tloaelo litsebiso li tla nka metsotso e mehlano. Nako ena e tla ba e lekaneng bakeng sa litsebiso tsa bohlokoa le mangolo a mang a tsoang ofising ea lekala. Ha ho hlokahale hore phutheho e balloe litsebiso tse kang tsa litokisetso tsa tšebeletso ea tšimo, kemiso ea ho hloekisa, litlaleho tsa liak’haonte le mangolo a tloaelehileng a tsoang ofising ea lekala, empa li tla behoa lematjaneng la litsebiso hore barab’abo rōna ba ipalle tsona. Ba nang le lipuo sebokeng sena ba lokela ho li lokisetsa hantle, ba latele litaelo tse fanoeng ’me ba se ke ba ja nako.
5. Bolela kemiso ea liboka tsa phutheho nakong ea ketelo ea molebeli oa potoloho.
5 Ketelo ea Molebeli oa Potoloho: Kemiso ea beke le beke ea ketelo ea molebeli oa potoloho e ke ke ea fetoha. Ka Labobeli, ho tla ba le Sekolo sa Tšebeletso sa Puso ea Molimo le Seboka sa Tšebeletso, ebe ho latela pina. Ka mor’a moo molebeli oa potoloho o tla fana ka puo ea metsotso e 30. Joalokaha ho ntse ho etsoa bekeng ea ketelo ea hae, mantsiboea a mang a tla behelloa ka thōko bakeng sa Thuto ea Bibele ea Phutheho, ebe ho latela pina le puo ea tšebeletso ea molebeli oa potoloho. Seboka se tla phethoa ka pina le thapelo.
6. Boikarabelo ba molebeli oa setsi ke bofe?
6 Liboka Tsa Tšebeletso ea Tšimo: Balebeli ba litsi ba tla khethoa ke sehlopha sa baholo hore ba hlokomele litsi tsa tšebeletso ea tšimo le ho etsa maeto a bolisa ho batho ba litsing tsa bona. Haeba ho hlokahala hore ho sebelisoe mohlanka ea sebeletsang, o tla bitsoa “mohlanka oa setsi.”
7. Re ka lebella eng kemisong e ncha ea liboka tsa phutheho?
7 Joalokaha ho bontšitsoe sehloohong sena, re tla ba le mokete oa lijo tsa moea tse rutang le tse matlafatsang. Sena se tla re thusa hore re be baboleli le matichere a atlehang, a koetlisitsoeng bakeng sa tšebeletso e behang haholoanyane.—Baef. 4:13, 14; 2 Tim. 3:17.
8. Ho lokisetsa ka bomong esale pele ho tla re tsoela molemo ho be ho tsoele le ba bang molemo joang?
8 Ho lokisetsa liboka tsena esale pele ho tla re thusa hore re ele hloko lintlha tsa bohlokoa tse tla totobatsoa sebokeng ka seng. Bohle re tla ba le monyetla oa ho fana ka litlhaloso, e leng se tla etsa hore re khothatsane. (Bar. 1:11, 12; Baheb. 10:24) Sepheo sa rōna ke ho ‘etsa hore tsoelo-pele ea rōna e bonahale’ ka hore re ‘tšoare lentsoe la ’nete ka nepo.’—1 Tim. 4:15; 2 Tim. 2:15.
9. Re ikemiselitse ho etsa eng, hona hobane’ng?
9 Re thabela phetoho ena e khōlō libokeng tsa rōna tsa phutheho. E se eka bohle re ka tsoela pele ho latela tataiso ea “lekhoba le tšepahalang le le masene” ’me re lule haufi le Molisa oa rōna e Moholo ha a ntse a re hlomella bakeng sa ‘matšoenyeho’ a maholo a seng a atametse.—Mat. 24:21, 45; Baheb. 13:20, 21; Tšen. 7:14.