Lipina Tsa ’Muso li re Tsosa Molota

Pauluse le Silase ba ne ba rorisa Molimo ka ho bina ha ba ntse ba le teronkong. (Lik 16:25) Mehleng ena, Lipaki tse ling li ile tsa bina lipina tsa ’Muso ha li ntse li le kampong ea mahloriso ea Manazi e Sachsenhausen Jeremane. Le ha li lelekiloe naheng ea ha bo tsona li isitsoe Siberia li ne li ntse li bina. Mehlala ena e bontša kamoo lipina tsa ’Muso li ka thusang Bakreste hore ba be sebete ha ba hlaheloa ke liteko.

Haufinyane buka ea lipina e ncha e nang le sehlooho se reng ‘Binelang Jehova le Thabile’ e tla ba teng ka lipuo tse ling. Ha re se re iphumanetse eona, re ka bina lipina tsena nakong ea borapeli ba lelapa e le hore re li tšoare ka hlooho. (Ef 5:19) Ha re etsa joalo, moea o halalelang o tla re thusa hore re li hopole ha re hlaheloa ke liteko. Lipina tsa ’Muso li ka re thusa hore re lule re e-na le tšepo. Li ka re khothatsa ha re e-na le mathata. Ha re thabile, mantsoe a tsona a ka re thusa ho ‘binela Jehova re thabile’ ka lebaka la boikutlo bo botle ba pelo. (1Ko 15:16; Pes 33:1-3) E se eka kaofela ha rona re ka bina lipina tsena tsa ’Muso!

SHEBELLA VIDEO EA PINA E ILENG EA KHOTHATSA BARAB’ABO RONA. EBE LE BUISANA KA LIPOTSO TSE LATELANG:

• Ke maemo afe a ileng a susumelletsa Mora’bo rona Frost hore a qape pina?

• Pina eo e ile ea khothatsa barab’abo rona ba neng ba le kampong ea mahloriso e Sachsenhausen joang?

• Ke maemong afe bophelong ba letsatsi le letsatsi moo lipina tsa ’Muso li ka u matlafatsang?

• Ke lipina life tsa ’Muso tseo u ka thabelang ho li tšoara ka hlooho?