Batho ba Bangata ba na le Khatello ea Maikutlo

Na u na le ho ikutloa ka tsela eo batho baa ba ikutloang ka eona kapa na ho na le motho eo u mo tsebang ea kileng a ikutloa ka tsela ee?

Kholiseha hore ha u mong. Batho ba bangata le bona ba na le khatello ea maikutlo. Ba bang ba tšoenyehile ka ba malapa a bona ba nang le khatello ea maikutlo.

Kannete hona joale ‘bophelo bo thata.’ (2 Timothea 3:1) Lipatlisiso li bontša hore lefatšeng lohle motho a le mong ho ba robeli o na le khatello ea maikutlo. Ha ho bapisoa pakeng tsa selemo sa 2019 le selemo sa 2020, lipalo-palo tsa batho ba nang le bothata ba ho tšoenyeha haholo li ile tsa eketseha ka liphesente tse 26 ’me tsa batho ba nang le khatello ea maikutlo tsa eketseha ka liphesente tse 28 ka lebaka la seoa sa COVID-19.

Le hoja e le habohlokoa ho tseba hore na ke batho ba bakae ba nang le khatello ea maikutlo, ntho ea bohlokoa le ho feta ke ho tseba hore na uena le ba lelapa la hao le ka sebetsana le bothata bona joang.

Na u na le khatello ea maikutlo?

Motho ea se nang khatello ea maikutlo o qeta nako e ngata a ikutloa hantle ebile a etsa lintho hantle. O khona ho sebetsana le lintho tse mo tšoenyang, o sebetsa ka thata ha a le mosebetsing ebile o thabela ho phela.

Ho ba le khatello ea maikutlo . . .

• HA HO BOLELE hore oa fokola.

• KE bothata bo hlokang ngaka. Bo ka ama tsela eo motho a nahanang ka eona, a ikutloang ka eona le eo a etsang lintho ka eona.

• Ho ka etsa hore motho a thatafalloe ke ho ba le metsoalle le ho sebetsana le mathata a bophelo.

• Ho ka ama batho ba lilemo tsohle, litso tsohle, merabe eohle, malumeli ’ohle, batho ba rutehileng le ba sa rutehang, ba nang le chelete kapa ba se nang eona.

Batla thuso ea lingaka

Haeba u hlokomela hore u se u etsa lintho ka tsela e sa tloaelehang kapa u bona motho e mong eo u mo ratang a etsa lintho ka tsela e sa tloaelehang, mohlomong o se a robala nako e telele haholo kapa ha a sa robala hantle, ha a sa ja hantle, o se a tšoenyeha haholo kapa o qeta nako e ngata a sa thaba, ho ka ’na ha hlokahala hore le batle thuso e le hore le ka tseba hore na bothata bona bo bakoa ke’ng. Le ka fumana thuso hokae?

Monna ea bohlale ka ho fetisisa ea kileng a phela e leng Jesu Kreste o ile a re: “Batho ba phetseng hantle ha ba hloke ngaka empa ba kulang baa e hloka.” (Matheu 9:12) Batho ba kulang ba ka thusoa ke ho ea ngakeng e le hore ba khone ho fumana meriana e tla ba thusa hore ba phele hantle. E ka ba hantle hore ba potlakele ho fumana thuso ea lingaka haeba bothata bona bo tsoela pele.a

Bibele ha se buka ea lingaka empa e ka u thusa hore u sebetsane le bothata ba khatello ea maikutlo. Re kopa hore u bale lihlooho tse latelang tse bontšang kamoo Bibele e ka re thusang kateng hore re sebetsane le bothata ba khatello ea maikutlo.