Thusa Batho Bao u Ithutang Bibele le Bona Hore ba Etse Qeto ea ho Sebeletsa Jehova

1, 2. (a) Ke hobane’ng ha batho ba bang ba ithutang Bibele ba qeaqea ho etsa qeto ea hore e be Lipaki Tsa Jehova? (b) Re tl’o ithuta’ng sehloohong see?

NA LE uena ho ne ho e-na le lintho tse ling tse neng li etsa hore u qeaqee ho ba e mong oa Lipaki Tsa Jehova? Mohlomong u ne u tšaba hore batho bao u sebetsang le bona, metsoalle kapa ba lelapa ba tla u fetohela. Mohlomong u ile oa utloa eka u ke ke oa khona ho phela ka melao ea Molimo. Haeba ho joalo, oa utloisisa hore na batho ba bang ba ithutang Bibele ba ikutloa joang le hore na ke hobane’ng ha ho le thata hore ba nke khato ea ho ba Lipaki Tsa Jehova.

² Jesu o ile a hlokomela hore ho ka ba bonolo hore lintho tse kang tsena li sitise motho hore a hole moeeng. (Mat. 13:​20-22) Empa ha aa ka a tela ho thusa batho ba neng ba le leqe ho mo latela. Ho e-na le hoo, o ile a bontša barutuoa ba hae hore na ba ka thusa batho bana joang (1) hore ba tsebe hore na ke lintho life tse ba sitisang hore ba hatele pele, (2) hore ba rate Jehova le ho feta, (3) ho tseba hore na ke lintho life tse tlang pele bophelong le (4) ho hlola liteko tseo ba kopanang le tsona. Re ka sebelisa seo Jesu a ileng a se bolella barutuoa ba hae joang ha re sebelisa buka ea U ka Thaba ka ho sa Feleng! ho thusa motho eo re ithutang Bibele le eena hore a etse qeto ea hore a sebeletse Jehova?

THUSA MOTHO EO U ITHUTANG LE EENA HORE A TSEBE HORE NA KE’NG E MO SITISANG HO HATELA PELE

3. Ke eng e ka ’nang eaba e ile ea etsa hore ho be thata hore Nikodemase e be morutuoa oa Jesu?

³ Ho ile ha e-ba thata hore Nikodemase, moeta-pele oa Bajuda ea neng a hlomphuoa, e be molateli oa Jesu. Nikodemase o ile a hlokomela ka mor’a likhoeli tse ka bang tse tšeletseng feela Jesu a qalile tšebeletso ea hae, hore Jesu o rometsoe ke Molimo. (Joh. 3:​1, 2) Leha ho le joalo, Nikodemase o ile a khetha ho kopana le Jesu sephiring ka lebaka la “ho tšaba Bajuda.” (Joh. 7:13; 12:42) E ka ’na eaba o ile a nahana hore o tla lahleheloa ke lintho se ngata haeba e ka ba morutuoa oa Jesu.a

4. Jesu o ile a thusa Nikodemase joang hore a utloisise hore na Molimo o ne a lebelletse eng ho eena?

⁴ Nikodemase o ne a tseba Molao oa Moshe, empa o ne a hloka ho thusoa hore a utloisise hore na ke’ng eo Jehova a e lebelletseng ho eena. Jesu o ile a mo thusa joang? O ne a ikemiselitse ho qeta nako le eena, leha e ne e le bosiu. O ile a bolella Nikodemase ka ho hlaka hore na ke’ng seo a lokelang ho se etsa e le hore e be morutuoa. O ne a lokela hore a bakele libe tsa hae, a kolobetsoe ka metsi le hore a be le tumelo ho Mora oa Molimo.—Joh. 3:​5, 14-21.

5. Re ka thusa motho eo re ithutang Bibele le eena joang ho hlokomela hore na ke’ng e mo sitisang ho hatela pele?

⁵ Le hoja motho eo u ithutang Bibele le eena a tseba Mangolo hantle, a ka ’na a hloka hore u mo thuse hore a tsebe hore na ke’ng e mo sitisang hore a hatele pele. Mohlomong mosebetsi kapa khanyetso eo a e fumanang ka lapeng e ka mo sitisa hore a finyelle lipakane tsa moea tseo a ipehetseng tsona. Kahoo, iphe nako ea ho thusa motho eo u ithutang le eena. U ka mo memela hore le il’o noa tee kapa le otlolle maoto. Ha u etsa joalo, u ka ’na oa khona ho mo thusa hore a u phetlele sefuba ka liteko tseo a kopanang le tsona. Kahoo, khothalletsa motho eo u ithutang le eena hore a etse liphetoho tse hlokahalang hobane a rata Jehova eseng hobane a batla ho u khahlisa.

6. U ka thusa motho eo u ithutang le eena joang hore a be le sebete sa ho sebelisa seo a ithutileng sona? (1 Bakorinthe 16:13)

⁶ Ha motho eo u ithutang le eena a kholisehile hore Jehova o tla mo thusa hore a phele ka melao ea Bibele, o tla ba le sebete sa ho sebelisa seo a ithutileng sona. (Bala 1 Bakorinthe 16:13.) Karolo ea hao e ka bapisoa le ea tichere sekolong. Na u sa hopola hore na tichere eo u neng u e rata haholo sekolong ke efe? Mohlomong e ne e le tichere eo ka mamello e ileng ea u thusa hore u itšepe haholoanyane linthong tseo u khonang ho li etsa. Ka tsela e tšoanang, motho ea rutang batho Bibele ka tsela e atlehang ha a ba rute feela lintho tseo Molimo a batlang hore ba li etse, empa o boetse o tiisetsa motho eo a ithutang le eena hore ka thuso ea Jehova a ka khona ho etsa liphetoho tse hlokahalang bophelong ba hae. U ka etsa seo joang?

THUSA MOTHO EO U ITHUTANG LE EENA HORE A RATE JEHOVA LE HO FETA

7. Jesu o ile a etsa eng ho thusa bamameli ba hae hore ba rate Jehova le ho feta?

⁷ Jesu o ne a tseba hore ho rata Molimo ho tla susumetsa barutuoa ba hae hore ba sebelise seo ba ithutileng sona. Hangata o ne a ba ruta lintho tse tla ba thusa hore ba rate Ntate oa bona ea leholimong le ho feta. Ka mohlala, o ile a bapisa Jehova le ntate ea fang bana ba hae lintho tse molemo. (Mat. 7:​9-11) Ho ka etsahala hore ebe ba bang ba bamameli ba Jesu ba ne ba lakatsa ho ba le ntate ea lerato joalo. Ak’u nahane hore na ebe ba ile ba ikutloa joang ha Jesu a ne a etsa papiso ka ntate ea nang le kutloelo-bohloko ea ileng a amohela mora oa hae ea ileng a phela bophelo bo litšila. Ba ne ba ka bona hore Jehova ke Molimo ea utloelang bana ba hae ba lefatšeng bohloko.—Luka 15:​20-24.

8. U ka thusa motho eo u ithutang le eena joang hore a rate Jehova haholoanyane?

⁸ Le uena u ka thusa motho eo u ithutang Bibele le eena hore a rate Jehova haholoanyane ka hore u bue haholo ka makhabane a matle a Molimo ha le ntse le ithuta. Nako le nako ha le ithuta, mo thuse hore a bone hore na seo a ithutang sona se bontša joang hore Jehova oa re rata. Ha le ntse le ithuta ka tefo ea topollo, hatisa kamoo e bontšang kateng hore Jehova oa mo rata. (Bar. 5:8; 1 Joh. 4:10) Motho eo u ithutang le eena a ka rata Jehova le ho feta ha a nahana kamoo Jehova a mo ratang kateng.—Bagal. 2:20.

9. Ke eng e ileng ea thusa ntate e mong ea bitsoang Michael hore a fetole bophelo ba hae?

⁹ Nahana ka mohlala oa Michael ea lulang Indonesia. O holetse ’neteng empa ha aa ka a kolobetsoa. Ha a le lilemo li 18, o ile a ea naheng e ’ngoe a il’o sebetsa e le mokhanni oa literaka. Hamorao o ile a khutlela Indonesia a il’o nyala empa a siea lelapa la hae moo a khutlela mosebetsing. Ha nako e ntse e ea mosali oa hae le morali oa hae ba ile ba qala ho ithuta Bibele le ho sebelisa seo ba ithutang sona. Michael o ile a etsa qeto ea hore a khutlele hae ka mor’a hore ’mè oa hae a hlokahale e le hore a il’o hlokomela ntate oa hae eaba o qala ho ithuta Bibele. O ile a ameha haholo ha a ne a bala karolo ea “Ithute Lintlha Tse Ling” khaolong ea 27 bukeng ea U ka Thaba ka ho sa Feleng! O ile a ntša meokho ha a nahana kamoo Jehova a ileng a ikutloa kateng ha a bona Mora oa hae a utloa bohloko. O ile a ananela tefo ea topollo haholo ’me a susumelletseha ho fetola bophelo ba hae a ba a kolobetsoa.

THUSA MOTHO EO U ITHUTANG LE EENA HORE A BEHE JEHOVA PELE BOPHELONG

10. Jesu o ile a thusa barutuoa ba hae ba pele joang hore ba etelletse pele mosebetsi oa ho bolela litaba tse monate? (Luka 5:​5-11) (Sheba setšoantšo.)

¹⁰ Barutuoa ba Jesu ba pele ba ile ba hlokomela kapele hore Jesu ke Mesia ea tšepisitsoeng empa ba ne ba hloka ho thusoa hore ba etelletse pele mosebetsi oa ho bolela litaba tse monate. Petrose le Andrease ba ne ba e-na le nako e seng kae e le barutuoa ha Jesu a re ba mo sale morao. (Mat. 4:​18, 19) E ne le batšoasi ba litlhapi le Jakobo le Johanne ’me khoebo ea bona e ne e atlehile haholo. (Mar. 1:​16-20) Ha Petrose le Andrease “ba tlohela matlooa a bona,” e tlameha ebe ba ile ba etsa bonnete ba hore ba tla tsoela pele ba hlokomela ba malapa a bona ha ba ntse ba latela Jesu. Ba ile ba thusoa ke’ng hore ba nke ho bolela litaba tse monate e le habohlokoa ho feta ho ba le chelete e ngata? Tlaleho ea Luka e re bolella hore Jesu o ile a etsa mohlolo o ba thusitseng hore ba kholisehe le ho feta hore Jehova a ka khona ho ba hlokomela.—Bala Luka 5:​5-11.

11. Re ka bolella motho eo re ithutang Bibele le eena eng ho mo thusa hore a matlafatse tumelo ea hae?

¹¹ Re ke ke ra khona ho etsa mehlolo joaloka Jesu empa re ka bolella batho bao re ithutang Bibele le bona kamoo Jehova a thusang batho ba mo behang pele bophelong kateng. Ka mohlala, na u sa hopola kamoo Jehova a ileng a u thusa kateng ha u ne u qala ho ea libokeng? Mohlomong u ile oa tlameha hore u hlalosetse mohiri oa hao hore na ke hobane’ng ha u ke ke oa hlola u sebetsa lihora tse eketsehileng haeba li ne li u sitisa ho ea libokeng. Hlalosetsa motho eo u ithutang le eena hore na tumelo ea hao e ile ea matlafala joang ha u bona kamoo Jehova a ileng a u tšehetsa kateng ha u etsa hore ho mo sebeletsa ho tle pele bophelong ba hao.

12. (a) Ke hobane’ng ha re lokela ho mema bara le barali ba bo rona ba fapaneng ha re ithuta Bibele le motho? (b) U ka sebelisa livideo joang ho ruta motho eo u ithutang le eena ka tsela e atlehang? Fana ka mohlala.

¹² Motho eo u ithutang le eena a ka boela a rua molemo ha a utloa hore na Bakreste ba bang ba ile ba etsa’ng hore ba fetole bophelo ba bona e le hore ho sebeletsa Jehova e be eona ntho e tlang pele bophelong ba bona. Kahoo, mema bara le barali ba bo rona ba fapaneng hore ba be teng ha le ntse le ithuta Bibele. Ba kope hore ba hlalose hore na ho tlile joang hore e be Lipaki le hore na ke’ng eo ba ileng ba e etsa hore ho sebeletsa Jehova ho tle pele bophelong ba bona. Ho ekelletsa moo, iphe nako le motho eo u ithutang Bibele le eena hore le shebelle livideo tse hlahang ho “Ithute Lintlha Tse Ling” kapa ha ho hlokahala le tse hlahang ho “Batla” bukeng ea U ka Thaba ka ho sa Feleng! Ka mohlala, ha le le khaolong ea 37, u ka hatisa melao-motheo e hlahang videong ea Jehova o Tla U Hlokomela.

THUSA MOTHO EO U ITHUTANG LE EENA HO HLOLA LITEKO TSEO A KOPANANG LE TSONA

13. Jesu o ile a thusa barutuoa ba hae joang hore ba itokisetse ho hanyetsoa?

¹³ Ka makhetlo Jesu o ile a bolella balateli ba hae hore ba tla hanyetsoa ke batho ba bang esita le ba lelapa. (Mat. 5:11; 10:​22, 36) Nakoana pele Jesu a shoa, o ile a bolella barutuoa ba hae hore ba ka ’na ba bolaoa ka lebaka la hore ba sebeletsa Jehova. (Mat. 24:9; Joh. 15:20; 16:2) O ile a ba bolella hore ba be seli ha ba ntse ba bolela litaba tse monate. Hape o ile a ba eletsa hore ba se ke ba ngangisana le batho ba ba hanyetsang le hore ba be hlokolosi e le hore ba ka tsoela pele ba bolela litaba tse monate.

14. Re ka thusa batho bao re ithutang le bona joang hore ba itokisetse khanyetso? (2 Timothea 3:12)

¹⁴ Re ka thusa motho eo re ithutang le eena hore a itokisetse ho hanyetsoa ka ho mo bolella hore na basebetsi-’moho, metsoalle le ba lelapa ba ka ’na ba re’ng ho eena. (Bala 2 Timothea 3:12.) Ba bang ba basebetsi-’moho le eena ba ka ’na ba mo soma ka lebaka la tsela eo a seng a phela ka eona. Ba bang esita le ba lelapa ba ka ’na ba se lumellane le seo a ithutang sona ka Bibeleng. Ha re thusa batho bao re ithutang le bona hona joale hore ba itokisetse ho hanyetsoa, ba tla be ba le malala-a-laotsoe nakong e tlang ha ba tobana le khanyetso.

15. Ke’ng se ka thusang motho eo u ithutang le eena hore a sebetsane le ho hanyetsoa ke ba lelapa?

¹⁵ Haeba motho eo u ithutang le eena a hanyetsoa ke ba lelapa, mo khothalletse hore a nahane hore na ke hobane’ng ha ba mo halefetse. E ka ’na eaba ba nahana hore o thetsitsoe kapa hore Lipaki Tsa Jehova ke batho ba babe. Le ba bang ba lelapa la bo Jesu ba ne ba sa rate seo a se etsang. (Mar. 3:21; Joh. 7:5) Ruta motho eo u ithutang le eena hore a be le mamello le ho bua ka mosa le ba bang ho akarelletsa le ba lelapa.

16. Re ka thusa motho eo re ithutang Bibele le eena joang hore a bue ka mosa le ho nahanela ha a bolella ba lelapa seo a se lumelang?

¹⁶ Haeba ba lelapa la motho eo u ithutang Bibele le eena ba thahasella ho tseba ho eketsehileng, ke habohlokoa hore a se ke a ba hlalosetsa lintho tsohle ka nako e le ’ngoe. Haeba a ba bolella lintho tse ngata haholo ba ka ’na ba imeloa ’me ba se ke ba hlola ba batla ho utloa ka seo a se lumelang. Kahoo, khothalletsa motho eo u ithutang le eena hore a ba bolelle seo a se lumelang ka tsela e tla etsa hore ba batle ho utloa ho eketsehileng nakong e tlang. (Bakol. 4:6) Mohlomong a ka bolella ba lelapa hore ba kene websaeteng ea jw.org. Sena se tla ba lumella hore ba ithute ho eketsehileng ka Lipaki Tsa Jehova ka lebelo la bona.

17. U ka thusa motho eo u ithutang Bibele le eena joang ho araba batho ba ka ’nang ba e-ba le maikutlo a fosahetseng ka Lipaki Tsa Jehova? (Sheba setšoantšo.)

¹⁷ U ka sebelisa karolo ea “Lipotso Tse Botsoang Hangata ka Lipaki Tsa Jehova” e ho jw.org/st, ho thusa motho eo u ithutang le eena ho lokisetsa likarabo tse bonolo tsa lipotso tse ka botsoang ke ba lelapa kapa batho bao a sebetsang le bona. (2 Tim. 2:​24, 25) Buisanang ka karolo e reng “Batho ba Bang ba Re” bukeng ea U ka Thaba ka ho sa Feleng! qetellong ea thuto ka ’ngoe. Khothalletsa motho eo u ithutang le eena hore a itloaetse ho araba ka mantsoe a hae. U se ke oa tšaba ho mo bolella hore na a ka ntlafatsa likarabo tsa hae joang. Ha u etsa joalo, u tla mo thusa hore a emele tumelo ea hae ka sebete.

18. U ka thusa motho eo u ithutang Bibele le eena joang hore a bolelle ba bang seo a se lumelang ha a le tšimong? (Matheu 10:27)

¹⁸ Jesu o ile a khothalletsa barutuoa ba hae hore ba bolelle batho litaba tse monate. (Bala Matheu 10:27.) Haeba motho eo u ithutang le eena a qala ho bolella batho ba bang seo a ithutang sona ka pele kamoo ho ka khonehang kateng, o tla ithuta ho tšepa Jehova le ho feta. U ka thusa motho eo u ithutang le eena joang hore a ipehele pakane ea ho qala ho bolella batho ba bang seo a se lumelang? Haeba ho e-na le letšolo phuthehong ea heno, khothalletsa motho eo u ithutang le eena ho nahana ka hore na a ka etsa’ng hore a tšoanelehe hore e be mohoeletsi. Mo hlalosetse hore na ke hobane’ng ha ho ile ha e-ba bonolo hore ba bang ba qale ho bolela matšolong a kang ana. A ka boela a ipehela pakane ea hore a qale ho beha lipuo libokeng tsa har’a beke. Ha a ntse a beha lipuo, o tla ithuta ho bolella ba bang seo a se lumelang ka kholiseho.

TŠEPA MOTHO EO U THUTANG LE EENA

19. Jesu o ile a bontša joang hore o tšepa barutuoa ba hae, hona re ka mo etsisa joang?

¹⁹ Pele Jesu a shoa ’me a ea leholimong, o ile a bolella barutuoa ba hae hore o tla ba le bona hape. Ba ne ba sa utloisise hore Jesu o ne a bolela hore ba tla ea leholimong. Ho ntse ho le joalo, ha aa ka a nahana haholo ka lipelaelo tsa bona empa o ile a ameha ka hore baa tšepahala. (Joh. 14:​1-5, 8) O ne a tseba hore ba ne ba hloka nako e le hore ba ka utloisisa lintho tse ling, joaloka tšepo ea ho phela leholimong. (Joh. 16:12) Joaloka Jesu, le rona re ka bontša batho bao re ithutang le bona hore re tšepa hore ba batla ho khahlisa Jehova.

20. Morali oa bo rona e mong oa Malawi o ile a bontša joang hore o tšepa motho eo a ithutang le eena?

²⁰ Re lokela ho lula re tšepa hore batho bao re ithutang Bibele le bona ba batla ho etsa se nepahetseng. Ka mohlala, Morali oa bo rona Chifundo ea lulang Malawi o ile a qala ho ithuta le ’mè e mong e mocha oa Mok’hatholike ea bitsoang Alinafe, a sebelisa buka ea U ka Thaba ka ho sa Feleng! Ha ba qeta khaolo ea 14, Morali oa bo rona Chifundo o ile a botsa ’mè enoa hore na o nahana eng ka ho sebelisoa ha litšoantšo borapeling. ’Mè Alinafe o ile a utloa bohloko ’me a re: “Ke qeto ea motho ka bomong!” Morali oa bo rona Chifundo o ile a ipotsa hore na ebe e se e le tšomo ka mathetho ka ho ithuta. Leha ho le joalo, ka mamello o ile a tsoela pele a ithuta le ’Mè Alinafe, a tšepile hore ha nako e ntse e ea o tla utloisisa. Likhoeli tse ’maloa hamorao, Morali oa bo rona Chifundo o ile a mo botsa potso e hlahang khaolong ea 34 e reng: “U fumane melemo efe ka ho ithuta ka Molimo oa ’nete Jehova le ka ho ithuta Bibele?” Morali oa bo rona Chifundo o re: “Ha ’Mè Alinafe a nkarabela, o ile a bua ka lintho tse ngata tseo a li ratileng. E ’ngoe ea tsona ke hore Lipaki Tsa Jehova ha li etse lintho tse khahlanong le Bibele.” Nakoana ka mor’a moo, ’Mè Alinafe o ile a khaotsa ho sebelisa litšoantšo a ba a tšoaneleha hore a ka kolobetsoa.

21. Re ka thusa motho eo re ithutang Bibele le eena joang hore a batle ho etsa qeto ea ho sebeletsa Jehova?

²¹ Le hoja Jehova e le eena “ea holisang,” ho na le karolo eo re e phethang ho thusa motho eo re ithutang le eena hore a hatele pele. (1 Bakor. 3:7) Ha re mo rute feela seo Molimo a batlang hore a se etse empa re mo thusa hore a rate Jehova ka ho tebileng. Re boetse re mo khothalletsa hore a bontše hore o rata Jehova ka hore ho mo sebeletsa ho tle pele bophelong ba hae. Hape re mo ruta hore na a ka itšetleha ka Jehova joang ha a kopana le mathata. Ha re mo bontša hore rea mo tšepa, re mo thusa hore a kholisehe hore le eena a ka khona ho phela ka melao ea Jehova le hore a etse qeto ea hore o batla ho mo sebeletsa.