Na u ne u Tseba?
Baprista ba ne ba etsa’ng ka mali a liphoofolo tse neng li nyeheloa tempeleng e Jerusalema?
SELEMO le selemo baprista ba Iseraeleng ea boholo-holo ba ne ba nyehela mahlabelo a likete a liphoofolo aletareng e neng e le tempeleng. Ho latela rahistori oa Mojuda oa lekholong la pele la lilemo e leng Josephus, ka Paseka ho ne ho nyeheloa likonyana tse ka holimo ho 250 000 ’me sena se ne se etsa hore ho tšolloe mali a mangata. (Lev. 1:10, 11; Num. 28:16, 19) Ho ne ho etsoa’ng ka mali a mangata hakaalo?
Baepolli ba ile ba cheka ho potoloha tempele eo Heroda a ileng a e haha e ileng ea senngoa ka 70 C.E, ’me ba ile ba fumana mecha e neng e tsamaisa mali a mahlabelo a tsoang tempeleng.
Nahana ka lintho tse peli tse neng li thusa hore aletare e lule e hloekile:
Likoti tse karolong e ka tlas’a aletare: Tlhaloso ea tsela eo mali a neng a tsamaisoa ka eona ho tloha aletareng, e fumanoa bukeng ea melao le litso tsa Sejuda e ngotsoeng lilemong tsa bo-200 e bitsoang Mishnah. E bontša hore ho ne ho e-na le likoti tse peli k’honeng e ’ngoe ea aletare. Mali a mahlabelo le metsi a neng a sebelisetsoa ho hloekisa aletare, a ne a phallela ka likoting tseo ebe a fetela Khohlong ea Kidrone.
Baepolli ba mehleng ena ba lumellana le seo buka ena e se buang ha e bua ka likoti tse neng li le pel’a aletare. Buka ea The Cambridge History of Judaism ea paka hore ke ’nete hore ho ne ho e-na le mecha e neng e le pel’a tempele. E re: “E ka ’na eaba e ne e sebelisetsoa ho ntša metsi a kopaneng le mali a mahlabelo a neng a tsoa aletareng.”
Metsi a mangata: Baprista ba ne ba lokela ho ba le metsi a mangata e le hore likarolo tse ka tlaase tsa aletare le liforo tse neng li tsamaisa metsi li lule li hloekile. E le hore ba phethe mosebetsi ona oa bohlokoa, ba ne ba fumana metsi ao ba neng ba a hloka motseng oa Jerusalema. Metsi ao a ne a fumanoa likotopong, lilibeng le matamong. Moepolli ea bitsoang Joseph Patrich o ile a re: “Ho bonahala eka tempele ena ke eona feela mehleng eo e neng e e-na le mehloli ea metsi e kang ena hammoho le liforo tse neng li tsamaisa metsi a sa hloekang.”