SE KA THUSANG LELAPA | LENYALO

Na le Lokela ho Lula ’Moho Pele le Nyalana?

Batho ba bangata ba leferehong ba khetha ho lula ’moho pele ba nyalana. Ba etsa sena e le hore ba bone hore na baa tšoanelana le hore na ba ka ba le lenyalo le atlehileng. Empa na ho molemo hore batho ba lule ’moho pele ba nyalana?

Seo re tl’o ithuta sona sehloohong sena

Bibele e re’ng?

Bibele e khahlanong le batho ba etsang thobalano ba sa nyalana. Ka mohlala, e re: “Le se ke la etsa boitšoaro bo bobe bo amanang le thobalano.” (1 Bathesalonika 4:3; 1 Bakorinthe 6:18) Taba ena e akareletsa thobalano e etsoang ke batho ba lulang ’moho empa ba sa nyalana le hoja ba rera ho nyalana hamorao.a Melao ea Bibele e thusa batho ba leferehong hore ba se ke ba ba le bana ka ntle ho lenyalo le ho ba qobisa mathata a ka bang teng ha ba lula ’moho pele ba nyalana.
Lenyalo ke tokisetso e tsoang ho Molimo. Ha a ne a theha lenyalo o ile a re: ‘Monna o tla siea ntate oa hae le ’mè oa hae ’me a khomarele mosali oa hae, bobeli ba bona e tla ba nama e le ’ngoe.’ (Genese 2:24) Ha monna le mosali ba tšepahalla likano tsa bona tsa lenyalo ba tla etsa hore lelapa la bona e be le thabileng le le tsitsitseng.

Na ho lula ’moho pele le nyalana ho tla le thusa ho itokisetsa lenyalo?

Batho ba bang ba nahana joalo. Ba lumela hore ha batho ba babeli ba leng leferehong ba etsa mesebetsi ea ka tlung ’moho ebile ba sheba tsela eo e mong a itšoarang ka eona, ba tla tsebana hamolemo pele ba nyalana. Leha ho le joalo, ntho ea bohlokoa e etsang hore lenyalo le atlehe ke haeba banyalani ba tšepahalla likano tsa bona.

Ke’ng e tla thusa batho ba rerang ho nyalana hore ba lule ba tšehetsana ha ho theosetsa kapa ho nyolosetsa lenyalong la bona? Ba tla thusoa ke haeba ka bobeli ba tšepahallana ebile ba sebetsa ’moho ho rarolla mathata. Ho lula ’moho pele ba nyalana ho ke ke ha ba thusa hobane ha ba nke kamano ea bona e le ea bohlokoa ’me e mong le e mong o na le bolokolohi ba ho itsamaela neng le neng ha a batla. Kahoo seo se ke ke sa etsa lenyalo le atlehileng.

Ntlha ea bohlokoa: Ha batho ba leferehong ba lula ’moho ba ka qetella ba arohane le pele ba nyalana.

Molao-motheo: “Motho e mong le e mong o tla kotula seo a se jetseng.”—Bagalata 6:7.

Na ho lula ’moho pele le nyalana ho ka le thusa hore le boloke chelete?

Batho ba bang ba nahana joalo. Lipatlisiso tse entsoeng ke mokhatlo oa Pew Research Center li bontša hore United States feela, hoo e ka bang batho ba bane ho ba leshome ba ile ba lula ’moho pele ba nyalana. Ba entse joalo hobane ba nahana ho tla ba thusa ho boloka chelete. Leha ho le joalo, ka mor’a nako ba lutse ’moho ba bang ba ile ba bona hore mathata a lichelete a ile a ba mangata le ho feta ’me seo sa etsa hore ba utloe ba e-so lokele ho nyalana.

Ha batho ba lula ’moho pele ba nyalana, nakong eo ba etsang qeto ea ho arohana, ho ba le litla-morao tse bohloko tse amang bo-’mè hobane ke bona hangata ba nkang boikarabelo ba ho hlokomela le ho holisa bana ba le bang.

Mosali ea tšoanang o lutse fatše o nkile ngoana ea llang. Monna o tsoa a nkile lebokose le tšetseng thoto ea hae.

Ntlha ea bohlokoa: Ha batho ba lula ’moho pele ba nyalana ho ba le litla-morao tse ngata tse bohloko.

Molao-motheo: “’Na Jehova ke Molimo oa hao ea u rutang lintho tse tsoelang uena molemo.”—Esaia 48:17.

Na ho lula ’moho pele le nyalana ho ka le thusa hore le qobe ho nyalana le motho ea fosahetseng?

Batho ba bang ba nahana joalo. Buka ea Fighting for Your Marriage e re: “Batho ba lulang ’moho pele ba nyalana hangata ha ba hlokomele hore ho ka ba thata hore ba arohane.” Hobane’ng? Bafuputsi ba fumane hore batho ba lulang ’moho ba e-so nyalane baa mamella leha ba se ba sa bone lintho ka tsela e tšoanang hobane feela ba kopanetse thepa, ba rekile ntlo ’moho kapa ba tl’o ba le ngoana ba sa lebella.b Buka ea Fighting for Your Marriage e boetse e re: “Le hoja batho ba lulang ’moho pele ba nyalana ba ne ba ka arohana, ba se ba etsa qeto ea ho nyalana hobane feela ba se ba tloaelane.”

Ntlha ea bohlokoa: Ho lula ’moho pele le nyalana ho tla etsa hore ho be thata hore le arohane leha le bona hore ha le ka nyalana, lenyalo la lona le ke ke la atleha.

Molao-motheo: “Ea bohlale o bona kotsi ebe oa ipata empa ba se nang kelello ha ba ipate ebe ba fumana litholoana tse bosula.”—Liproverbia 22:3.

Ke’ng e ka le thusang hore le be le lenyalo le atlehileng?

Ke’ng e ka le thusang ho qoba mathata a tlisoang ke ho lula ’moho pele le nyalana le ho le thusa hore le tle le be le lenyalo le atlehileng? Ntho e ka thusang ke ho latela melao ea Bibele ka lenyalo. Le boetse le lokela ho ipha nako ea ho tsebana pele le ka etsa qeto ea ho lula ’moho le le monna le mosali ba nyalaneng. Ha u khetha motho eo u tla nyalana le eena, u lokela ho sheba hore na le lumellana ka lintho tsa bohlokoa bophelong le hore na tumelo ea lona ea tšoana, eseng feela ho ameha ka ho khotsofatsa takatso ea hao ea ho etsa thobalano.

Bibele e fana ka keletso e ka u thusang hore u tle u thabe lenyalong le hore lenyalo la hao le tšoarelle.c Ka mohlala, Bibele e na le melao-motheo e ka u thusang hore u tle u . . .

qobe ho se tšepahale lenyalong
be molekane ea molemo oa lenyalo
hlokomele matšoao a lemosang likotsi tse itseng ka motho eo u ratanang le eena

Ho ithuta ho eketsehileng ka lihlooho tsena sheba karolo ea “Se ka Thusang Banyalani le Batsoali” e hlahang ho jw.org/st.

Molao-motheo: “Mangolo ’ohle a halalelang a tsoa ho Molimo. A molemo hobane aa ruta.”—2 Timothea 3:16.

a Sheba sehlooho se reng: “Na ho Ratana ho Lokafatsa ho Kopanela Liphate Pele ho Lenyalo?”

b Sheba sehlooho se reng: “Sliding Versus Deciding: Inertia and the Premarital Cohabitation Effect” se ngotsoeng ke Scott M. Stanley, Galena Kline Rhoades le Howard J. Markman, se hatisitsoeng bukaneng ea Family Relations.

c Litsong tse ling ho tloaelehile hore batsoali ba khethele bana ba bona balekane ba lenyalo. Le maemong a joalo, Bibele e ka thusa batsoali hore ba shebe makhabane ao motho ea nyalanang le ngoana oa bona a lokelang ho ba le ’ona.