“Ho Bua ka ho Sebetsa Hammoho”
Morao tjena Lipaki tsa Jehova Tiverton, Rhode Island, li hahile Holo ea ’Muso kapele-pele. Tlas’a sehlooho se ka holimo, moruti oa moo o ile a tlaleha ketelo ea hae setšeng sa mohaho. Moko oa lengolo la hae ke ona.
‘LIPEHO tse ngata tse sa tloaelehang li ile tsa fihla litsebeng tsa ka ka ho hahuoa ha kereke ’Mileng oa Fish. Ka bolelloa hore batho ba 500 ba haha kereke ka matsatsi a mabeli. Ka ea ’Mileng oa Fish ho hlahloba taba ena. Ho ne ho e-na le batho ba ka bang 1 500 ba sebetsang moo—babetli, ba sebetsang ka lipeipi, batei ba motlakase, ba sebetsang ka ligalase, ba khabisang mabala, ba lilang, ba kenyang tsamaiso ea mocheso, lihahi, ba qetellang ka samente, le basebetsi le bathusi ba bang ba makholo.
‘Literaka tse bulehileng li ne li le hohle setšeng, se ka bang lihekthere tse 1,2. Letšoao le leng le ne le ngotse “Tse Lahlehileng le tse Fumanehileng.” Haeba motho a lahlehetsoe ke sesebelisoa sa hae, o ne a ea terakeng ena ’me a se fumane. Haeba u fihla setšeng u apare liaparo tse hloekileng ’me u batla ho thusa, ho ne ho eme teraka e tšoereng liaparo tsa mosebetsi le likatiba tsa tšireletso. Teraka ea thuso ea tšohanyetso e ne e le teng ho thusa leha e le ofe ea tsoang kotsi kapa ea hlokang thuso ea meriana.
‘Tente e khōlō e kang ea liserekisi e ne e hlonngoe ’me ka hare banna le basali ba ne ba fepa batho ba 1 500 ka metsotso e 15. Ke bone basali ba tšoere meqomo ea metsi ba ntse ba fafatsa mobu ho thibela lerōle, ’me ba ne ba etsa seo letsatsi lohle. Ha li-board li khokhotheloa libakeng tsa tsona, baferefi ba ne ba se ba le teng ho ferefa lehong. Ke ne ke qala ho bona mohlolo oo.
‘Bo-rakontraka sebakeng seo ba ne ba boletse hore ke ntho e ke keng ea etsoa. Empa e entsoe. Ke ile ka ea moo ’me ke bone sena ka mahlo a ka a mabeli. Batho baa e ne e le bo-mang? Lipaki tsa Jehova, ’me kereke e ne e le Holo ea ’Muso. Metheo e ne e tšetsoe pelenyana, empa karolo eohle e setseng ea mohaho e entsoe ka matsatsi a mabeli! Ha kea ka ka utloa le lentsoe le le leng la hlapa. Ho ne ho se na phehisano. E ne e le sehlopha se sa tloaelehang sa batho. Ba iketsetsa mosebetsi oa bona ba ikhutselitse. Matsoho a bona a ne a le moo mosebetsi o leng teng—e seng melomo ea bona!
‘Ho na le ntho e le ’ngoe eo re ntseng re ipotsa eona likerekeng tsa Unitarian-Universaiist ke hore na ke hobane’ng ha re sa khone ho hapa thahasello ea batho ba batšo ba bangata le ba meloko e sa tšoaneng ba bangata le lihlopha tsa lichaba tse sa tšoaneng. Mona ke bone batho ba bangata ba batšo le ba meloko e sa tšoaneng ba sebetsa hammoho joaloka lelapa. Mona ho ne ho na le batho ba tsoang hohle New England le ka ntle ho eona. Sehlopha sa ba ’mala haholo-holo ba bacha se ne se tletse mafolofolo.
‘Ha kea utloela haholo ka batho bana ka baka la phatlalatso ea likoranta e mpe ka bona le lipeho tsa molomo tse ba nyatsang, empa seo ke se boneng e ne e le se molemo feela. Ke ne ke sa tsotelle ho mamela batho bao ba kokotang monyakong oa ntlo ea ka ka lilemo tse fetileng, empa le ka kholiseha hore ke tla ba lumelisa ka hlompho e eketsehileng.
‘Ho ile ha hlaka ho ’na hore ba bangata ho rōna re koala mehopolo ea rōna hore e se amohele likhopolo le likatamelo tse ncha ka baka la ho hloka tsebo le ho ahlola lintho ka leeme ntle ho mabaka. Ke nahana hore kaofela ha rōna re lokela ho lula le ho mamelisisa seo ba re bolellang sona ha ba feta. Ho hloka tsebo le ho tšaba ho ee ho re laole le pele re qala ho ba mamela. Empa haholo-holo ha ba etsa mosebetsi o joalo oa bona o molemo oa ho hōlisa le ho tsosa cheseho e khōlō hakana.
‘Haeba ba ne ba kōpile kontraka ho ba hahela mohaho ona—likamore le hohle—ho ne ho tla ba bitsa lidolara tse 500 000 [R1 100 000] kapa ho feta. Kea ipotsa haeba rōna likerekeng tsa Unitarian-Universalist le New England ka litsela tsa rōna tse tloaelehileng re ne re tla leka ntho e tšoanang le ena. Ak’u nahane ka sena—haholo barati ba likomiti ba buang haholo. E! Nahana ka sena!’