Bacha Baa Botsa . . .

Ke Joang Nka Sebeletsang Molimo Haeba Batsoali ba ka ba Nkhanyetsa?

BA ILE ba shapuoa, ba sokeloa le ho tinngoa lijo, ’me qetellong ba qobelloa ho tloha lapeng. Mohloli oa tšoaro ena e mpe e ne e le ofe? Litho tsa lelapa la bona. Ena e bile phihlelo ea Kamal, Chani, le Jaswinder, bana ba motho ba bararo ba Maindia ba lulang Engelane. Ba ne ba rata ho fetoha Bakreste, empa batsoali ba bona—bonneteng lelapa lohle—ba ne ba hanyetsa haholo ha ba lahla litumelo tsa moetlo tsa bona.

Mohlomong u boemong bo tšoanang. Ka ho ithuta Bibele, u hlaoletse takatso ea ho ba e mong ea ‘rapelang Ntate ka moea le ka ’nete.’ (Johanne 4:23) Ho ka etsahala hore batsoali ba hao ha ba rate ho utloa letho ka bolumeli kapa tumelo e ncha eo u e fumaneng e sa tšoaneng le litumelo tsa bona tseo e leng khale ba li khomaretse. Leha ho ka ba joang, ha oa lokela ho makatsoa ke khanyetso ea lelapa. Jesu ka boeena o profetile hore hangata Bokreste ba ’nete bo ne bo tla arola malapa. (Mattheu 10:34-37) Potso ke hore, Ke joang u ka sebetsanang le boemo bona?

Kamal, Chani, le Jaswinder ba ile ba ema ba tiile melao-metheong ea Mangolo eo ba neng ba ithutile eona. Ba ile ba tseba ho rapela ka bolokolohi hang feela kamor’a hore ba tlohe libakeng tsa khoebo tsa Midlands ho ea karolong e ka boroa ea Engelane. Leha ho le joalo, mohlomong u sa le ka tlaase ho taolo ea batsoali ba hao ka molao. Joale, ke eng seo u ka se etsang, ho hlōla khanyetso ea bao u ba ratang ha u sa ntse u lula lapeng? Bibele e fana ka melao-metheo e meng e tataisang.

Ba Hlomphe

Ho 1 Petrose 3:15 Bibele e re khothalletsa ho abelana tumelo ea rōna “ka mosa le ka hlompho.” Leha ho le joalo, u ka chesehisoa haholo ke linnete tse ncha tsa Bibele tseo u ithutileng tsona hoo u ka ikhohomosang kapa oa ba leqhoko ka litumelo tsa hao, mohlomong le ho etsa hore batsoali ba hao ba bonahale e le lithoto. Ha ho motho ea ratang ho bonahala a hloka tsebo. Kahoo, haeba u lula u tšoaea batsoali ba hao liphoso ka lebaka la lintho tseo u ithutileng tsona, lebella karabo e bohloko.

Rita, mocha ea ka tlase ho lilemo li 20 ea neng a lula Jeremane, oa lumela: “Ntho e ’ngoe le e ’ngoe eo ke neng ke ithuta eona ke ne ke e bolella batsoali ba ka hona hoo, ha e le hantle ke ba bolella hore seo ba se lumelang se fosahetse.” Empa batsoali ba na le tokelo ea ho khomarela likhopolong le litumelong tsa bona ba sa nyatsuoe—haholo-holo ke bana ba bona. Rita oa lumela: “Ke ne ke lokela e be ke ba hlomphile haholoanyane le ho amohela tumelo ea bona ho Molimo.”

Pauluse o boleletse mohlankana Timothea hore a ‘se nyatse monna ea hōlileng ka thata.’ Na keletso eo ha e sebetse le ka lapeng, ho batsoali ba hao ba u ratang?—1 Timothea 5:1, NW.

Utloa Batsoali ba Hao

“Bana, utloang batsoali ba lona,” ho laela Bibele. (Ba-Efese 6:1) Kay o latetse molao-motheo ona. O kopane le Lipaki tsa Jehova ha a le lilemo li robeli “Batsoali ba ka ba re hōlisitse hore re mamelle ba bang,” ho bolela Kay, “ka hona, ba ntumella ho ithuta Bibele le ho ea libokeng.” Ho ntse ho le joalo, Kay o ne a lokela ho sebetsa ka thata ho tiisa hore tsohle tseo a li etsang le ho li bua li fana ka leseli le letle tumelong ea hae.

“Ha ke qala ho ikopanya le batho ba Jehova ka hlokomela hore haeba ke sa mamele batsoali ba ka ba ke ke ba tenoa ke hoo feela empa hape ba tla talima ’nete e le tšusumetso e mpe ho ’na. Ka hona, ha ke ne ke laeloa ho lahla lithole, ho fihla hae ka nako, ho ithuta piano, kapa eng le eng feela, ke ne ke leka ho etsa ka hohle kamoo nka khonang kateng. Ke ne ke sa ba arabise,” ho hlalositse Kay.

Batsoali ba Kay ha ba ka ba kopanela le eena litumelong tsa hae. Leha ho le joalo, ka lebaka la ho utloa ha hae, o ile a tseba ho sebelisa tumelo ea hae ka ntle ho khanyetso, ea e-ba Mokreste ea kolobelitsoeng ha a le lilemo li 19.

Buisana le Batsoali ba Hao

Morena Salomone ea bohlale o itse: “Ke ipakile ke le mora oa sebele ho ntate oa ka, le ea ratehang ho ’mè oa ka.” (Liproverbia 4:3, NW) E, hobane batsoali ba hao ba sa kopanele le uena tumelong ea hao ha ho ba etse hore e be lira tsa hao. U lokela ho ba “mora oa sebele” kapa morali. Leka ho utloisisa bohloko ba bona bo tebileng ha ba u bona u phehella tumelo e bonahalang e sa tloaeleha. Ka nako e tšoanang, kopanela le bona ka bolokolohi maikutlo a hao le lintho tse u amang. Kahobane mehopolo ea hao e se e tataisoa ke melao-metheo ea Bibele, u ka ’na ua fapana ka mohopolo le batsoali ba hao linthong tse itseng.—1 Ba-Korinthe 2:14.

Ka mohlala, mohlankana ea bitsoang Alan o ne a rata ho sebelisa nako e eketsehileng mosebetsing oa Bokreste. Batsoali ba hae ba ne ba rata hore a tsoele pele ka thuto ea koleche, Alan oa hopola: “Ke lekanya hore ke ne ke tšohile hanyenyane ho talimana le ntate ka qeto e boima joalo. Ka hona, ka qeta ka hore ke tlohele sekolo ka lekunutu—’me seo sa baka mathata a mangata. Kamor’a moo ke ile ka lokela ho sebetsa ka thata ho haha ho tšepana pakeng tsa rōna. Athe haeba ke ne ke ile ka hlalosa merero ea ka, leha hoo ho ka be ho bile thata qalehong, ke nahana hore a ka be a ntlhomphile haholoanyane, ’me nka be ke qobile masisa-pelo ao, bakeng sa ka le ntate.”

Empa ke eng se ileng sa etsa hore Alan a tsila-tsile ho bua le batsoali ba hae? Oa lumela: “Motho a ka itlisetsa maikutlo ahore hloriso e se e mo fihleletse ha batsoali ba thibela ntho e ’ngoe eo re ratang ho e etsa. ’Me re qale ho nahana: ‘Sena ke seo ke ithutileng sona! Motho o tla loantšoa ke ntat’ae—lira tsa hae, batho ba lelapa la hae!’” (Mattheu 10:35, 36) Alan o ithutile habohloko hore ha a lokela ho tšoara batsoali ba hae joaloka lira. Oa eletsa: “Buisana le bona! Ba tsebise maikutlo a hao. Ke nahana hore batsoali ba bangata ba tla mamela—haeba ba bona hore eo ke ’nete.”

Le hoja u lokela ho tiea bakeng sa melao-metheo e lokileng, “ha ho ka etsoa, ’me ha e le ka lōna, le lule ka khotso le batho bohle.” (Ba-Roma 12:18) Ka ho tsebisa batsoali ba hao hore na u ikutloa joang ka litaba tse ling, hangata likhohlano li ka qojoa kapa tsa fokotsoa. E, haeba batsoali ba hao ba u phehella hore u nke tsela e itseng kapa bohato, u lokela ho ba utloa ka hohle ha feela tsela e joalo e sa thulane le melao-metheo ea Bibele. Ho e-na le ho ba manganga, etsa hore “matla a hao a ho nahana a tsejoe ke batho bohle.”—Ba-Filippi 4:5, NW.

Ho Fumana Tšehetso ea Bakreste ’Moho le Uena

“Mamela ntat’ao ea u tsoetseng, u se ke oa nyelisa ’m’ao,” ho bolela Liproverbia 23:22. Ka linako tse ling, batsoali ba hao ba sa lumelang ba ka ba le bothata ho utloisisa lintho tse ling tse u amang. Ka mohlala, moshanyana ea bitsoang John o ile a leka ho buisana le ntat’ae ka melao-metheo ea Bibele. Ntat’ae o arabetse joang? “Ha ke batle ho itšetleha ka Bibele kapa mokhatlo o itseng, kahoo ikemele u le mong!”

Empa ha u hlile ha u mong. Jesu o tšepisitse tšehetso ea “baena le likhaitseli” tsa moea ka hare ho phutheho ea Bokreste. (Mareka 10:30) Kay, ea boletsoeng pelenyana, o fumane ho le joalo ka eena. “Baena le likhatseli tsa ka tsa Bakreste, ba ne ba tšoana le lelapa leso,” o sa hopola. Che, e seng hore motho leha e ka ba mang, le haeba a ka ratoa hakae, a ka nka sebaka sa motsoali oa tlhaho. Empa ka hare ho phutheho ea Bokreste re ka fumana bao re ba ratang—joaloka bo-ntate le bo-’mè—ba ka re fang taeo le keletso tsa bohlokoa bo ke keng ba lekanngoa.—Bapisa 1 Ba-Korinthe 4:15.

Boloka Maikutlo a Matle!

Ke ’nete, esita leha likeletso tse boletsoeng ka holimo li sebelisoa, ha ho pelaelo hore u tla ’ne u fumane hore boemo bo fapane. Empa hopola: Batho le maemo a ka fetoha! Banana ba Maindia ba bararo ba boletsoeng qalong ba tlaleha: “Ka lebaka la boikutlo ba rōna bo tiileng le tlhompho, re thabela kamano e thabileng le lelapa lohle.” Ngoanana oa Lenyesemane ea bitsoang Jane o ngola ka ho tšoanang: “Ke ile ka tšoanela ho loanela ’nete ka makhetlo a mangata, empa joale batsoali ba ka ba amohela ka bonolo litumelo tsa ka e le Bokreste ba ’nete, ’me ke talimile ho kolobetsoa haufinyana.”

Mabakeng a mangata, batsoali ba susumetsoa ke mohlala o sebetsang oa bana ba bona, ’me ba fetohile basebetsi ba inehetseng ba Jehova! Kahoo, ho ka etsahala hore u fumane hlompho ka baka la ho etsa lintho ka tsela ea Molimo le ho ba mohlala e seng feela oa ‘ba leng tumelong’ empa hape le oa ba u ratang haholo. (1 Timothea 4:12) Se ke ua lahla boikemisetso ba hao ba ho sebeletsa Molimo. Ka thapelo latela litlhahiso tse ngoliloeng mona, le ho tšepa Jehova. Mopesaleme oa re tiisetsa: “U laeletse tsela ea hao ho Jehova, u mo tšepe; ho tla sebetsa eena.”—Pesaleme ea 37:5.

[Ntlha e qolotsoeng leqepheng la 23]

Ka linako tse ling batsoali ba sa lumelang ba ka ba le bothata mabapi le lintho tseo mocha oa Mokreste a amehileng ka tsona

[Setšoantšo se leqepheng la 21]

Basali bana ba bararo ba bacha ba ile ba lula ba tiile tumelong ea bona ho sa tsotellehe khanyetso ea lelapa