Pheko e Ncha ea Malaria

JOALOKAHA ho tlalehiloe ho Awake! ea May 8, 1993, lefu la malaria le boea sekoele e le seoa sa lefatše. The New York Times  (March 23, 1993) e ile ea tlaleha hore “selemong se fetileng, Brazil e tlalehile bakuli ba 560 000 ba lefu la malaria.” Selemo le selemo baahi ba Brazil ba 8 000 ba bolaoa ke lefu la malaria. Hona joale mofuputsi oa Colombia, Dr. Manuel Elkin Patarroyo, o hlahile ka pheko e fapaneng—motsoako oa ho enta o iketselitsoeng oa lik’hemik’hale o jang lisente tse 90 feela bakeng sa ho enta ka makhetlo a mararo. Dr. Patarroyo o itse: “Theko ea oona e ka tlaase ho ea Coca-Cola [Colombia].” Ho tla fihlela joale e ipakile e atleha hoo e ka bang karolo ea 67 lekholong ea bakuli ba phekotsoeng. Le hoja e se pheko e feletseng ea lefu la malaria le bolaeang, ho bonahala e le mohato o moholo ntoeng ea ho phekola malaria.