Na Ke Entse Sebe se sa Tšoareloeng?

“HO NE ho se mohla nkileng ka ikutloa ke nyahame hakaalo. Ke ne ke itella ka ho feletseng, ’me ke nahana hore Molimo a ke ke a ntšoarela le ka mohla.”—Marco.a

“Ke ne ke tepeletse haholo. Ho ikutloa ke le molato ho ne ho aparetse pelo ea ka. Ke ne ke nahana hore ke entse liphoso tse sa tšoareloeng.”—Alberto.

Bibele e re: ‘Ha ho motho ea sa sitoeng.’ (1 Marena 8:46) Empa ka linako tse ling mocha a ka ikutloa hore o entse phoso e khōlō. Joaloka Marco le Alberto, a ka khathatsoa ke maikutlo a sa khaotseng a hore o molato. A ka ikutloa hore seo a se entseng se sebe hoo, se khopo hoo Molimo a ke keng a mo tšoarela le ka mohla.

Ho thoe’ng haeba u hlaseloa ke maikutlo a tjee? Khothala. Tšepo e teng ka ho feletseng bakeng sa boemo ba hao.

Lebaka Leo Letsoalo la Rōna le re Tšoenyang ka Lona

Ke ntho ea tlhaho ho ikutloa u sa thaba ha u entse phoso e se nang kelello. Kaofela re tsoetsoe re e-na le matla a kelello ao Bibele e a bitsang “letsoalo.” Ke boikutlo bo ka hare ba hore motho o nepile kapa o fositse, ke temoso eo ka tloaelo e utloahalang ka hare ho rōna ha re etsa ho hong ho hobe. (Ba-Roma 2:14, 15) Ka mohlala, nahana ka Morena Davida. O ile a feba le mosali oa monna e mong. Hamorao, a etsa hore monna oa hae, Uria, a isoe moo ho seng tika-tiko ea hore o tla shoa. (2 Samuele 11:2-17) Phello e bile efe ho Davida?

Davida o ile a lumela: “Letsoho la [Molimo] le ne le le boima ho ’na nyene le bosiu.” E, o ne a utloa boima ba ho se amohelehe ho Molimo. Davida o ile a boela a re: “Sebe sa ka se tlositse pholoho eohle masapong a ka. Hobane makhopo a ka a phahamile ho feta hlooho ea ka, a nkimela ka boima ba ’ona joalo ka phahlo e thata. . . . Ke tsamaea ka bofifi tsatsi lohle.” (Pesaleme ea 32:4; 38:3-6) Letsoalo la Davida le ile la tsoela pele ho mo khathatsa ho fihlela a susumeletseha hore a nke khato e nepahetseng ’me a bakele phoso ea hae.

Ka tsela e tšoanang, haeba u rutiloe ke batsoali ba Bakreste ’me u kheloha litekanyetso tsa Bibele, u tla ikutloa u sa thaba. Boikutlo bona ba ho ikoahlaea bo tloaelehile, bo molemo. Bo ka susumeletsa motho hore a ikhalemele kapa a batle thuso pele bobe bo itsetsepela ka metso. Ka lehlakoreng le leng, motho ea phehellang sebe o senya letsoalo la hae. Hamorao ha le sa ikutloa, le tšoana le letlalo le cheleng. (1 Timothea 4:2) Joang kapa joang ho tla latela boitšoaro bo bobe.—Ba-Galata 6:7, 8.

Ho Soaba ka Mokhoa o Ratoang ke Molimo

Kahoo, ha ho makatse hore ebe Bibele e bua ka “sebe se isang lefung.” (1 Johanne 5:16; bapisa le Mattheu 12:31.) Sebe se joalo hase feela bofokoli ba nama. Se etsoa ka boomo, ka ho phehella ntle ho lebaka, ka manganga. Hase sebe ka bosona se etsang hore sebe se joalo e be se sa tšoareloeng kaha ke boemo ba pelo ea moetsalibe e se etsang hore e be se sa tšoareloeng.

Leha ho le joalo, ’nete ea hore u ikutloa u sa thaba hape u tšoenyehile ka lebaka la boitšoaro ba hao bo fosahetseng, e bontša hore ha ua etsa sebe se sa tšoareloeng. Bibele e bolela hore “ho soaba ka mokhoa o ratoang ke Molimo ho hlahisa pako e pholosang.” (2 Ba-Korinthe 7:10) Ka sebele, hlokomela khothatso e fanoeng ho Jakobo 4:8-10: “Baetsalibe, hatlelang, ’me lōna ba pelo li peli, hlatsoang lipelo tsa lōna. Hlomohang lipelo, le lle, le bokolle; litšeho tsa lona li fetohe lillo, thabo ea lōna e fetohe masoabi. Ikokobetseng pel’a Morena, ’me o tla le phahamisa.”

Ke ’nete hore phoso e ka ba e tebileng haholo. Ka mohlala, Julie e monyenyane, o ile a qala mokhoa oa ho phollana le mohlankana oa hae. O bolela hore: “Qalong ke ile ka ikutloa ke le molato haholo, empa ha nako e ntse e e-ea, ke ile ka ho tloaela. Ha hoa ka ha tšoenya letsoalo la ka haholo.” Hamorao, liketso tse sa hloekang li ile tsa eketseha ho fihlela ba kopanela likamano tsa botona le botšehali. Julie o re: “Ke ile ka ikutloa ke hlomohile pelo. Letsoalo la ka le ile la fokola ho fihlela sena se etsahala ka makhetlo a mangata.”

Na boemo bo joalo bo ke ke ba rarolleha? Bo ka rarolleha. Ho thoe’ng ka Manasse, e mong oa marena a Juda? O ile a etsa libe tse tebileng ka ho fetisisa, ho akarelletsa ho sebelisana le meea le ho etsa mahlabelo ka bana. Empa leha ho le joalo, Molimo o ile a mo tšoarela ka lebaka la pako ea hae e tiileng. (2 Likronike 33:10-13) Ho thoe’ng ka Morena Davida? Ha a bakile liketsong tsa hae tse khopo, o ile a fumana Jehova e le Molimo ‘ea molemo, ea lulang a loketse ho tšoarela.’—Pesaleme ea 86:5, NW.

Kajeno Bakreste ba na le tiiso ena: “Ha re ipolela libe tsa rōna, Molimo oa tšepeha, o lokile, hore o re tšoarele libe, ’me o re hlatsoe bokhopo bohle.” (1 Johanne 1:9) Motho o lokela ho ipolela joalo ho mang? Ea ka sehloohong eo ho ka ipoleloang ho eena ke Jehova Molimo. ‘Le tšollele lipelo tsa lōna pel’a hae.’ (Pesaleme ea 32:5; 62:8) U ka fumana ho le molemo ho bala boipolelo ba Davida ba tšoabo ho Pesaleme ea 51.

Ho phaella moo, Bibele e phehella Bakreste ba oetseng sebeng se tebileng hore ba buisane le baholo ba phutheho. (Jakobo 5:14, 15) Keletso ea bona le lithapelo tse tšepahalang li ka u thusa hore u boele u tsitsise kamano ea hao le Molimo le hore u boelloe ke letsoalo le hloekileng. Ba ka lemoha phapang pakeng tsa bofokoli le bokhopo. Hape ba lokela ho bona hore u fumana thuso e hlokahalang e le hore u qobe ho pheta phoso eo ea hao. Kaha Julie o ile a nka bohato bona bo sebete ka boeena, o buella hore: “Ke ile ka leka ‘ho ikhalemela’ ka ba ka nahana hore hoa sebetsa ka tekanyo e itseng. Empa ka mor’a selemo ke ile ka tseba hore ke fositse ka ho feletseng. U ke ke ua rarolla mathata a tebileng ntle ho thuso ea baholo.”

Ho Ikutloa U le Molato ka Libe tse Fokolang

Leha ho le joalo, ka linako tse ling mocha o “nka bohato bo sa lokang pele a bo hlokomela.” (Ba-Galata 6:1, NW) Kapa o lumella tšusutlello ea nama hore e mo hlōle. Mocha ea boemong bona a ka hlokofatsoa ke maikutlo a tebileng a ho ikutloa a le molato—mohlomong a ikutloa a le molato ho feta kamoo phoso e hlileng e leng kateng. Liphello e ba bohloko bo boholo bo sa hlokahaleng. Maikutlo a tebileng joalo a ho ikutloa u le molato e ka ba phello ea letsoalo le phelang hantle empa le ameha kapele. (Ba-Roma 14:1, 2) Hopola, ha re etsa sebe “re na le moemeli pel’a Ntate: ke Jesu Kreste ea lokileng.”—1 Johanne 2:1, 2.

Hape, nahana ka taba ea Marco e monyenyane, eo ho qotsitsoeng mantsoe a hae ka kenyeletsong ea rōna. Mokreste enoa e monyenyane o ne a kholisehile hore o entse sebe se sa tšoareloeng. O ne a ee a ipolelle hore: ‘Ke tseba melao-motheo ea Bibele hantle haholo, empa ha ke khaotse ho etsa sebe!’ Sebe sa hae e ne e le sefe? Bothata ba ho pholla litho tsa botona ho ikhotsofatsa. Marco o ne a ee a nahane: ‘Molimo a ka ntšoarela joang haeba ke sitoa ho khaotsa mokhoa oo?’ Alberto, eo le eena a neng a hlaseloa ke ho pholla litho tsa botona ho ikhotsofatsa, o ile a re: “Ke ne ke ikutloa ke le molato ka hare botebong ba ka hobane ke ne ke sitoa ho itokolla sebeng sena.”

Ho pholla litho tsa botona kapa tsa botšehali ho ikhotsofatsa ke mokhoa o sa hloekang. (2 Ba-Korinthe 7:1) Leha ho le joalo, Bibele ha e ho behe sehlopheng se le seng le libe tse tebileng tse kang bohlola. Ha e le hantle, ha e bue ka hona ho hang. Ka hona, ho khutlela ka nakoana ketsong ena e mpe ea ho pholla litho tsa botona kapa tsa botšehali ho ikhotsofatsa hoa tšoareloa. Ho ho talima joalokaha eka ha ho tšoareloe, ka sebele ho ka ba kotsi; mocha a ka nahana hore ha ho na thuso hore a leke ho hlōla bothata bona. Empa melao-motheo ea Bibele e bontša hore Mokreste o lokela ho ikitlaetsa ka matla hore a loantše mokhoa ona.b (Ba-Kolosse 3:5) Jehova o tseba hore “re khopjoa linthong tse ngata.” (Jakobo 3:2) Haeba mocha a khutlela ka nakoana ketsong eo e mpe, ha ho hlokahale hore a ikutloe e le ea nyatsehang.

Hoa tšoana ka ho fosa ho hong le liphoso. Jehova ha a batle hore re itlhokofatse ka ho ikutloa re le molato ka mokhoa o feteletseng. Ho e-na le hoo, oa thaba ha re nka mehato ea ho lokisa bothata.—2 Ba-Korinthe 7:11; 1 Johanne 3:19, 20.

Mehloli ea Thuso le Matšeliso

Leha ho le joalo, mohlomong u tla hloka thuso ea botho ha u etsa joalo. Hangata batsoali ba tšabang Molimo ba ka etsa ho hongata ho thusa le ho tšehetsa bana ba bona. Phutheho ea Bokreste le eona e fana ka tšehetso ka mekhoa e meng. Marco oa hopola: “Ntho e ileng ea nthusa ka sebele e bile ho qoqa le moholo e mong. Ke ile ka lokela ho ba sebete hore ke qoqe ka bolokolohi le ho mo bolella seo ke ratang haholo ho nahana ka sona. Empa ho bua ho ile ha nketsa hore ke ikutloe ke mo tšepa, eaba ke kōpa keletso ea hae.” Alberto, le eena o ile a batla keletso ho moholo. Alberto o re: “Nke ke ka lebala keletso ea hae e khothatsang. O ile a mpolella hore ha a sa le monyenyane, le eena o ne a e-na le bothata bo tšoanang. Ke ile ka utloa a mpolella taba eo ke neng nke ke ka e lebella ho hang. Ke ile ka mo mamela ka kananelo e khōlō ka lebaka la botšepehi ba hae.” Ka thuso e joalo le tšehetso, Marco le Alberto ba ile ba hlōla mathata a bona. Hona joale bobeli ba bona ba sebeletsa maemong a boikarabelo liphuthehong tsa habo bona.

Thuso e ’ngoe ke thapelo e etsoang ka tieo. Joaloka Davida, u ka rapella “pelo e hloekileng” le “moea o mocha, o tiileng.” (Pesalema ea 51:12, Bibele—Phetolelo e Ncha) Ho bala Lentsoe la Molimo ke mohloli o mong oa matšeliso. Ka mohlala, u ka ho fumana ho khothatsa ho ithuta hore moapostola Pauluse le eena o ne a loana ntoa ka hare ho eena. Oa lumela: ‘Ha ke rata ho etsa botle, bobe bo nkhomaretse.’ (Ba-Roma 7:21) Pauluse o ile a atleha ho laola litšekamelo tsa hae tse mpe. Le uena u ka atleha. U ka fumana matšeliso a khethehileng ka hore u bale lipesaleme, haholo-holo tse buang ka ho tšoarela ha Molimo, tse kang Lipesaleme tsa 25, 86, le 103.

Ho sa tsotellehe se hlahang, qoba ho itšehla thajana le ho lumella hore u busoe ke ho felloa ke tšepo ea hore u tla atleha. (Liproverbia 18:1) Etsa hore u fumane mohau oa Jehova ka ho feletseng. Hopola hore “o tšoarela haholo” motheong oa sehlabelo sa Jesu sa thekollo. (Esaia 55:7; Mattheu 20:28) U se ke ua bebofatsa liphoso tsa hao, empa le teng u se ke ua etsa qeto ea hore Molimo a ke ke a u tšoarela. Matlafatsa tumelo ea hao le boikemisetso ba hao ba ho mo sebeletsa. (Ba-Filippi 4:13) Hamorao u tla ba le khotso ea kelello le thabo e tebileng ka hare ho uena ka ho tseba hore u tšoaretsoe.—Bapisa le Pesaleme ea 32:1.

[Mongolo o botlaaseng ba leqephe]

[Setšoantšo se leqepheng la 19]

Ho bua le Mokreste ea tšoanelehang ho ka u fa pono e ncha ea litaba