Bacha Baa Botsa ...

Nka Lokisa Liphoso Bophelong ba Ka Joang?

JOHN o ile a re: “Ke ne nke ke ka kena ka hare.” O ile a iphumana a eme kantle Holong ea ’Muso ea Lipaki tsa Jehova. Ha e ne e le mocha ea lilemong tse ka tlaase ho 20 o ne a ile a tlohela Bokreste ’me a hahamalla bophelo ba tlōlo ea molao, lithethefatsi, le boitšoaro bo bobe ba botona le botšehali. Ka mor’a ho phela ka tsela eo ka lilemo tse ngata, o ne a ntse a ke ke a tlosa Bibele kelellong ea hae, kahoo o ile a ea Holong ea ’Muso—empa o ne a tšohile haholo hore a ka kena. O ile a re ho motho ea neng a mo khothaletsa ho kena ka hare: “Ha u utloisise. Ke entse liaba. Ha ke utloe eka ho na le tsela leha e le efe eo Jehova a sa tla ntšoarela ka eona bakeng sa seo ke se entseng.”

Bacha ba bangata haholo ba fetohela melao ea batsoali ba bona, bolumeli, le litekanyetso tsa boitšoaro. Haholo-holo ke ho nyarosang le ho utloisang bohloko ha bacha ba hōlisitsoeng ke batsoali ba tšabang Molimo ba etsa sena. Le hoja ba bangata ba ile ba nka tsela eo, ka mor’a nako, ba bang ba qala ho tšoenngoa ke boikutlo ba ho ba ba se nang thuso boo esita le mokhoa oa bophelo bo mabifi o ke keng oa bo koahela. (Liproverbia 14:13) Bacha ba bang, ha tsa lefatše lena le khopo li ba chesa, ba batla ho lokisa liphoso bophelong ba bona ’me ba khutlele linneteng tsa Bibele tseo ba ithutileng tsona ha e sa le bana. Empa na ehlile ho ka khoneha ho bona hore ba etse joalo?

Mora ea Nang le Bofetoheli o Tloha Hae

Papiso ea Jesu ea mora ea lehlasoa, kapa ea senyang, e fumanoang ho Luka 15:11-32 e fana ka temohisiso e eketsehileng tabeng ena. Tlaleho ea baleha: “Motho oa horeng o na a na le bara ba babeli. E monyenyane oa bona a re ho ntat’ae: Ntate, mphe karolo ea letlotlo ee e tla ba ea ka. ’Me a ba arolela lintho tsa hae. Ha feta matsatsi a se makae, mora oa hae e monyenyane a bokella tsohle, a fallela naheng e hōle.”

Ka sebele mocha enoa ha aa ka a ba le bofetoheli hobane ntat’ae e ne e le ea se nang kutloelo-bohloko, ea hlekefetsang, kapa ea thata ka ho fetisisa! Ho ea ka Molao oa Moshe, mora o ne a e-na le tokelo ea motheo ea ho ba le karolo thepeng ea ntat’ae, le hoja ka ho tloaelehileng ho ne ho ke ke ha e-ba joalo ho fihlela lefung la ntat’ae. (Deuteronoma 21:15-17) E ne e le ho hloka kutloelo-bohloko ho hokaakang hore a batle karolo ea hae pele ho nako! Leha ho le joalo, ka lerato ntat’ae o ile a inehela ntle ho khang. (Bapisa le Genese 25:5, 6.) Joale, ka ho hlakileng, ke boikutlo ba mohlankana eo—eseng ba ntat’ae—bo neng bo fosahetse. Joalokaha setsebi Alfred Edersheim a bo hlalosa, mohlomong o ne a “hloile taeo le tataiso ea lelapa labo” ’me ka boithati o ne a e-na le “takatso ea tokoloho le monyaka.”

Joalokaha sehlooho se fetileng letotong lena se ile sa lumela, hase batsoali bohle ba mosa le ba nahanelang.a Leha ho le joalo, ha motsoali e le ea khahlapetsang kapa ea se nang boikarabelo, ho hang bofetoheli e ke ke ea e-ba tharollo; qetellong ho ba le bofetoheli ke ho intša kotsi. Nahana hape, ka papiso ea Jesu. Ka mor’a ho fallela hōle le hae, mohlankana eo o ile “a qhalanya letlotlo la hae teng ka ho phela ka bohlola. Eitse hobane a qete tsohle, ha oa tlala e khōlo lefatšeng leo; ’me a qala ho hloka.” Esita le sena ha sea ka sa mo etsa hore a be seli. A ntse a le makōkō, “o ile a ea tholoa ke e mong oa batho ba naha eo; eo a mo romela merakeng ea hae ho alosa likolobe. O na a lakatsa ho khorisa mpa ea hae ka makhapetla a jeoang ke likolobe; empa o na a sa fuoe ke motho.”

Setsebi sa Bibele Herbert Lockyer se re: “E tlameha ebe Bajode ba neng ba mametse Jesu ba ile ba tšosoa ke mantsoe ana, ‘ho alosa likolobe’ hobane ho Mojode, ho ne ho ke ke ha e-ba le mahlabisa-lihlong a tebileng haholo ho feta hoo.” Ka ho tšoanang le kajeno, hangata ba lahlang linnete tsa Bibele ba iphumana ba le maemong a thata, kapa haesita le a nyelisehang. Ngoanana oa Mokreste ea ileng a baleha hae o ile a ipolela: “Chelete eohle ea ka e ile ea fella lithethefatsing, ’me ke ne ke se na chelete bakeng sa ntho e ’ngoe esele. Kahoo ke ile ka qala ho utsoa thepa mabenkeleng le ntho e ’ngoe le e ’ngoe ho tšehetsa temallo tsa ka.”

‘E Ile Eaba Moo a Ikhopolang’

Leha ho le joalo, mora ea lehlasoa o ile a itšoara joang maemong a hae a tebileng? Jesu o ile a re ‘e ile eaba moo a ikhopolang’ qetellong. Mantsoe a pele a Segerike a bolela hore, “o ile a hlaphoheloa.” Ka mantsoe a mang, o ne a ile a “qoela” ka har’a bohlanya ba lintho tse inahaneloang tsa lefatše, tsa mo foufatsa hore a ka bona kamoo boemo ba hae bo neng bo hlile bo le kateng.—Bapisa le 2 Timothea 2:24-26.

Bacha ba bang ba nang le bofetoheli kajeno ba ’nile ba nyarosoa ke ’nete e tšoanang. Ho kotula liphello tse babang tsa bophelo bo hlaha—teronko, kotsi e tebileng, lefu le tšoaetsanoang ka likamano tsa botona le botšehali—e ka ba phihlelo e tebileng ka sebele. Ka tsela e bohloko mantsoe a Liproverbia 1:32 e ’nile ea e-ba ’nete: “Ho kheloha ha lithoto ke ho li bolaeang.”

Nahana ka Elizabeth e mocha, ea ileng a siea batsoali ba hae ’me a kopanela lithethefatsing. O re: “Ke ile ka lebala Jehova.” Leha ho le joalo, ha a ne a etetse New York, o ile a feta haufi le ntlo-khōlō ea Lipaki tsa Jehova. Phello? Oa hopola: “Bohloko bo ile ba chachametsa kelellong le pelong ea ka. Ke’ng seo ke se entseng? Ke ile ka lesa bophelo ba ka ho ameha koluoeng e joalo joang?”

Ha mora ea lehlasoa a qetella a talimane le ’nete, o ile a etsa qeto e sebete—ho ea hae a il’o lokisa liphoso bophelong ba hae! Empa ntat’ae o ne a tla itšoara joang ka mor’a ho utloisoa bohloko le ho ekoa ke mora oa hae? Tlaleho ea araba: “Eare ha a sa le hōle, ntat’ae a ’mona, a mo utloela bohloko, a matha, a itihela molaleng oa hae, a mo aka.” E, pele mocha eo a ka etsa boipolelo bo lokiselitsoeng ka hlokolosi, ntat’ae o ile a nka bohato ba pele ho bontša lerato le tšoarelo!

Ho Lokisa Litaba le Molimo

Esita leha ho le joalo, mora ea lehlasoa o ile a re ho ntat’ae: “Ke sitetsoe leholimo le uena.” (Mongolo o tšekaletseng ke oa rōna.) Thuto? Bacha ba ileng ba kheloha litseleng tsa Molimo ba ke ke ba lokisa liphoso bophelong ba bona ntle le hore ba “lokise litaba” le Molimo ka boeena! (Esaia 1:18) Re ka leboha hore ebe Jehova o etsa hore poelano eo e khonehe. Ka sebele, ntate ea papisong ea Jesu o tšoantšetsa Jehova Molimo. ’Me Molimo o bonahatsa boikutlo bo tšoanang ba ho tšoarela ho baetsalibe ba bakileng: “Khutlelang ho ’na, ’me ke tla khutlela ho lōna.” (Malakia 3:7; bapisa le Pesaleme ea 103:13, 14.) Empa joaloka Bajode ba neng ba fosa ba mehleng ea Bibele, ba joalo ba tlameha ho etsa qeto e tiileng: “Re batlisiseng metsamao ea rōna, re e nahane, re khutlele ho Jehova!”—Lillo tsa Jeremia 3:40.

Sena se bolela ho hlahlobisisa tsela ea motho ea boitšoaro ba boetsalibe. Ha mocha ea fosang a etsa sena o lokela ho susumetseha ho bolela libe tsa hae ka pel’a Jehova Molimo. Mopesaleme o ile a re: “Enere ha ke khutsitse, masapo a ka a na a felisoa ke ho bobola ha ka ka letsatsi lohle. . . . Ka ba ka u bolella sebe sa ka, ’me ha kea ka ka pata bokhopo ba ka. . . . ’me ua hlakola bokhopo ba sebe sa ka.”—Pesaleme ea 32:3-5.

Ho ne ho tla etsahala eng haeba mocha a amehile liphosong tse tebileng—mohlomong ho ntša mpa, boitšoaro bo hlephileng ba botona le botšehali, tšebelisong e mpe ea lithethefatsi, kapa liketso tsa tlōlo ea molao? Ka ho utloahalang, ea joalo a ka ’na a ikutloa a sa tšoaneloa ke tšoarelo. John, ea boletsoeng qalong o ne a ikutloa ka tsela eo. Ke ka lebaka leo a ileng a ema a sa sisinyehe kantle Holong ea ’Muso ho fihlela ha ka mosa moholo oa phutheho a mo hopotsa hore Morena Manasse oa Iseraele ea boholo-holo le eena o ne a le molato oa libe tse tebileng—ho akareletsa le polao! Leha ho le joalo, Jehova o ile a mo tšoarela. (2 Likronike 33:1-13) John o re: “Moholo eo o ile a boloka bophelo ba ka.” Ka ho tseba hore ho ka khoneha hore a tšoareloe, John o ile a fumana sebete sa ho kena ka Holong ea ’Muso ’me a kōpa thuso.b

Bacha ba maqakabetsing a joalo ka ho tšoanang ba hloka thuso ea ho lokisa litaba le Molimo, ’me baholo ba phutheho ba sebakeng ka seng ba ka fana ka molemo o eketsehileng tabeng ena. Ba ka mamela ka ho ipeha boemong ba mocha le ka kutloisiso ha a ‘bolela libe tsa hae pepenene.’ Ba ka boela ba fana ka taeo le thuso e sebetsang. Ka mohlala, ba ka ’na ba lokisetsa hore mocha eo a be le motho ea ‘mo rutang litaba tseo ho qaloang ka tsona’ Lentsoeng la Molimo ka thuto ea lehae ea Bibele. ’Me haeba ea fosang a thatafalloa ke ho rapela, moholo a ka etsa joalo molemong oa hae. Bibele ea re tiisetsa: “’Me thapelo e entsoeng ka tumelo e tla pholosa mobabi.”—Jakobo 5:14-16; Ba-Heberu 5:12.

Etsetsa Maoto a Hao Litsela tse Lokileng

Ka sebele, ho lokisa litaba le Molimo ke qalo feela. Joalokaha mora ea lehlasoa a ile a inyatsa ho ntat’ae, bacha ba etsang liphoso ba lokela ho leka ho lokisa lintho le batsoali ba bona. Boinyatso bo tšepahalang e ka ’na ea e-ba thuso e khōlō mabapi le ho kokobetsa bohloko boo ba ileng ba bo utloa le ho etseng hore tšehetso ea bona e fumanehe. Mocha e mong ea neng a balehile hae ea ileng a khutla a se a e-na le ngoana oa matšeho oa hopola: “’Mè le Ntate ba ile ba bontša lerato le leholo ho ’na.”

Mocha ea ratang ho thabisa Molimo ho hlokahala a ‘etsetse maoto a hae litsela tse lokileng.’ (Ba-Heberu 12:13) Sena se ka ’na sa bolela hore a fetole mokhoa oa hae oa bophelo, litloaelo, le metsoalle. (Pesaleme ea 25:9; Liproverbia 9:6) Ho theha kemiso ea thuto ea botho le hona ke habohlokoa. Ngoanana e mong eo e neng e le mofetoheli ka nako e fetileng o re: “Ke bala Bibele letsatsi le leng le le leng ’me ke bala boitsebiso bo thehiloeng Bibeleng bo hatisitsoeng ke Lipaki tsa Jehova. Ke leboha Molimo ka ho mpha monyetla oa bobeli.”

John o akaretsa litaba hantle, ha a re: “Ke talima morao nakong eo ke e sentseng. Ke nahana ka tsela eo lintho li ka beng li bile kateng, empa ha ho tsela eo nka etsollang se etsahetseng.” Ka lehlohonolo, re rapela Molimo ea mohau eo ka mofuthu a memang ba ileng ba tloha ho eena hore ba khutle. Ke hobane’ng ha u sa amohele memo ea hae?

[Mongolo o botlaaseng ba leqephe]

[Setšoantšo se leqepheng la 29]

Bakreste ba hōlileng tsebong ba ka u thusa ho lokisa liphoso bophelong ba hao