Lipaki Tsa Jehova li Thusitse Tsoelo-peleng ea ho Buuoa ha Pelo
DAILY NEWS ea New York ea la 27 August 1995, e tlalehile sehlooho se reng, “Ho Buoa Ntle ho Mali.” E boletse hore Hospital-Cornell Medical Center ea New York e “utullotse mokhoa o mocha oa ho buoa methapo ea mali pelong—e leng ho buuoa ho neng ho hlokahala haufinyane tjena ho eo e kileng ea e-ba Ramotse, David Dinkins—ntle le tahlehelo e ngata ea mali.”
Pampiri e ile ea re: “Limakatso tsa mokhoa o mocha, o susumelitsoeng ke kameho ea Lipaki tsa Jehova . . . li sa tlil’o bonahala polokong ea lidolara tse likete tse makholo bakeng sa lipetlele le ho fokotseheng haholo ha likotsi tsa tšilafalo ea mali bakuling.” Dr. Todd Rosengart, motsamaisi oa lenaneo la ho buoa ntle ho mali, o ile a re: “Hona joale re khona ho fokotsa mali a hlokahalang bakeng sa tšelo ea mali nakong ea ho buoa ho tloha lipaenteng tse peli ho isa ho tse ’nè tsa mali tseo ka tloaelo li sebetsang ho mokuli a le mong ho ea ho ha ho letho.”
Dr. Karl Krieger, ngaka ea pelo ea sepetlele, e ileng ea thusa ho bula maliboho mokhoeng ona, o ile a re: “Ka ho khaotsa ho kōpa mali le lihlahisoa tsa mali, re boetse re fokotsa menyetla ea likotsi tsa mafu a itseng a bang teng ka mor’a ho buuoa le litšoaetsano tse atisang ho amahanngoa le tšelo ea mali.”
Litsebi tse ling li bolela hore “tšebetso ea methapo ea mali ntle ho tšelo ea mali e fokotsa nako e qetoang tlas’a tlhokomelo e khethehileng ka mor’a ho buoa—ho tloha ho lihora tse 24 kapa ho feta ho ea ho lihora tse tšeletseng feela. Bakuli sepetleleng sa liphuputso tsa ho buoa ntle ho mali ba ile ba hlaphoheloa ’me ba tsoa sepetlele lihora tse 48 pele ho nako e tloaelehileng.” Hona ho bolela poloko e khōlō ea chelete bakeng sa lipetlele, ’muso le lik’hamphani tsa inshorense. Dr. Rosengart o hakantse hore “ho buoa hona ho ka boloka bonyane $1,600 [R5800] ho mokuli ka mong.”
Tlaleho ea Daily News e ile ea tsoela pele:
“Ka ho makatsang, mokhoa ona o mocha oa ho buoa ha oa susumelletsoa ke likhothaletso tsa moruo kapa leha e le tsa bongaka, empa e bile ka lebaka la cheseho ea bolumeli. Mokhatlo oa Lipaki tsa Jehova—oo litumelo tsa oona li thibelang tšelo ea mali—o ne o leka ho thusa litho tse hōlileng tse khathatsoang ke lefu la pelo. . . .
“Ka likhothaletso tsa mokhatlo oa Lipaki tsa Jehova, lingaka li ile tsa kopanya mekhoa eo li e sebelisang ho boloka mali le meriana e mecha. Li boetse li fumane tsela e ncha ea ho sebelisa mochine oa pelo le matšoafo o sebelisoang ho thusa bakuli ho lula ba ntse ba phela nakong eo ba ntseng ba buuoa pelo.
“Ho phaelleng ho bakuli ba 40 ba Lipaki tsa Jehova bao phuputso ea sepetlele e qalileng ka bona, thimi ea Cornell ea New York e ile ea kenya tšebetsong ho buuoa hona sepetleleng ka kakaretso, likhoeling tse tšeletseng tse fetileng. Krieger o ile a re: ‘Ho tloha ka nako eo, e ile ea buoa ka katleho methapo ea pelo ho batho ba 100 ka ho latellana ho se ba shoang.’ Palo e tloaelehileng ea ba shoang nakong ea ho buuoa mothapo oa pelo e ka ba 2,3%.”
Lefatšeng ka bophara lipetlele tse 102 li kenyelelitse lenaneo la ho buoa ka ntle ho mali lisebelisoeng tsa tsona, e leng ho etsang hore mekhoa ena e sireletsehileng e fumanehe lipetleleng ka kakaretso lefatšeng ka bophara.