Na U Tla ba Teng?

Selemong se fetileng, batho ba fetang 8700 000 lefatše ho pota ba ile ba ba teng Kopanong ea Setereke ea Lipaki tsa Jehova ea “Barorisi ba Thabileng.” Na u tla ba teng ho e ’ngoe ea Likopano tsa Setereke tsa “Manģosa a Khotso ea Bomolimo”? U mengoa ka mofuthu ho ba teng.

Libakeng tse ngata, kopano e tla qala ka Labohlano ka 9:30 hoseng ka lenaneo la ’mino. Lenaneo le qalang le tla totobatsa puo e khothatsang e reng “Ke Eng Seo Molimo a se Hlokang ho Rōna?” Ena e tla akareletsa boitsebiso boo re ka bo sebelisang ho thusa ba bang ba limilione ho etsa seo Molimo a se hlokang.

Nehelano ea thapama e reng “Ho Thusa ba Bang ho Ithuta ka Litlhoko tsa Molimo” e tla hlomella ba teng kopanong ho ba le karolo e mafolo-folo haholoanyane mosebetsing oa ho etsa barutuoa. Ho tla latela, neheletsano ea lipuo tse peli tlas’a sehlooho se reng “Itebeleng Khahlanong le Maraba a Patehileng a Boithabiso” e tla re lemosa ka maraba a bodemona ao re lokelang ho a qoba. Lenaneo ka Labohlano le tla phetha ka puo ea bohlokoa e reng “Ho Tšoara Lentsoe la Molimo ka Botšepehi U sa Sekisetse.”

Lenaneo la Moqebelo hoseng le tla hatisa bohlokoa ba mosebetsi oa ho etsa barutuoa ka neheletsano ea lipuo tse tharo tlas’a sehlooho se reng “Manģosa a Tlisang Litaba Tse Molemo Tsa Khotso.” Puo ea ho qetela lenaneong e tla ba ea boinehelo le kolobetso, ’me ho kolobetsoa ha barutuoa ba bacha ho tla latela.

Ka Moqebelo thapama nehelano e reng “Nahanisisa ka Mehopolo ea Jehova Litabeng” e tla araba lipotso tseo ba bangata ba ’nileng ba e-ba le tsona meqoqong e tloaelehileng. U tla thabela neheletsano ea lipuo tse peli tse thobang pelo tlas’a sehlooho se reng “Molimo oa Khotso oa U Tsotella.” Joale ho tla thabeloa ho hong ho ikhethang puong e phethang lenaneo e reng “Phehella Khotso ea Bomolimo Bophelong ba Lelapa.”

Ka Sontaha hoseng neheletsano ea lipuo tse tharo tlas’a sehlooho se reng, “Ho Khetholla Mofuta o Nepahetseng oa Manģosa,” e tla totobatsa sehlooho sa kopano ka ho sebelisa mehlala ea baprofeta ba Bibele. Lenaneo la hoseng le tla phetha ka tšoantšiso e aparetsoeng e tla hatisa bohlokoa ba thuto ea tlaleho ea Bibele e buang ka Moahloli Gideone.—Baahloli 6:11–8:28.

Lenaneo le qetellang la kopano ka Sontaha thapama le tla ba le polelo ea phatlalatsa e nang le sehlooho se reng “Khotso ea ’Nete Qetellong!—E Tsoa Mohloling Ofe?” Qetellong, puo e susumetsang e reng “Hatelang Pele Joaloka Manģosa a Khotso ea Bomolimo” e tla phetha kopano.

Kaha likopano tse 30 li se li lokiselitsoe bakeng sa Afrika e ka boroa feela, ho ka etsahala hore ho be le e ’ngoe e tla tšoareloa haufi le moo u lulang teng. Botsa Lipaki tsa Jehova sebakeng seo u lulang ho sona bakeng sa nako le sebaka tsa kopano e tla ba haufi haholo le uena.