Pono ea Bibele

Ke Eng se Susumetsang Boloi?

“BALOI.” Lentsoe leo le u hopotsa eng? Litšoantšo tsa basali-baholo ba tšabehang ba betsang batho ka mantsoe a kotsi kapa tsa basali ba boitšoaro bo bobe bao e leng metsoalle ea Satane? Ho fapana le maikutlo ao a tloaelehileng, ba bangata kajeno ba ipolelang hore ke baloi ba tšoana le batho feela ba tloaelehileng. Ba bang ke litsebi tse hlomphehang, tse kang babuelli ba molao, matichere, lingoli le baoki. Ho bile le mekhatlo ea bolumeli e tsosolosoang lefatšeng ka bophara eo ho bonahalang e sebelisana le bonohe, joaloka malumeli a setso le tsosoloso ea borapeli ba bohetene.a Ofisiri e ’ngoe ea sepolesa naheng ea Russia e ile ea re: “U ka ea kae le kae Russia matsatsing ana ’me boloi ke karolo ea bophelo ba letsatsi le letsatsi.” United States ho na le baloi ba hakanyetsoang ho 50 000 ho isa ho 300 000 kapa “ma-Wicca,”b kamoo ba bang ba ipitsang kateng.

Kajeno lentsoe “moloi” le atisa ho sebelisoa ka tsela e pharaletseng ’me le ka bolela lintho tse sa tšoaneng ho batho ba sa tšoaneng. Ho ata ha kajeno ha boloi ho bonahala ho amana haholo le mofuta oa borapeli ba molimotsana oa bolumeli bo thehiloeng setsong bo lumelang ka matla matleng a ba sebelisanang le meea. Baloi ba bang ba itšehla thajana—ba etsa meetlo ea bona ba le bang, ba sheba linako tse fetohang tsa selemo, boemo ba khoeli le liketsahalo tse ling tsa tlhaho. Ba bang ba rapela le ho laola e le sehlopha, hangata e le sa baloi ba 13.

Ke ’nete hore ka Bophirimela, kutloisiso ea batho ka kakaretso ka boloi kajeno e fapane haholo le maikutlo a neng a khothalletsa hore baloi ba chesoe Mehleng e Bohareng. Leha ho le joalo, ho ntse ho e-ba le litlhaselo tsa seoelo tse mabifi khahlanong le baloi. Ka mohlala, mathoasong a October 1998 maquloana a nkileng lithipa tse khōlō a ile a bolaea batho ba fetang 150, Indonesia, ba neng ba belaelloa ka hore ke baloi. Afrika Boroa ho tlalehiloe liketsahalo tse fetang 2 000 tsa pefo khahlanong le baloi, ho akarelletsa le lipolao tse 577, pakeng tsa 1990 le 1998. Ha ba talimane le maemo a joalo a feteletseng—a ho thahasella boloi le a ho hloea baloi—Bakreste ba lokela ho talima taba ee joang?

Litlhoko Tse sa Khotsofatsoang

Ke eng se susumelletsang batho ho sebelisa boloi kajeno? Ba bolela hore tšusumetso e ’ngoe ke ho hlompha tlhaho le bophelo. Ha e le hantle, ba bang ba thahasella ho hlalosa hore borapeli ba bona ha bo akarelletse ho etsa liphoofolo mahlabelo litšebeletsong tsa bona. Ba bang ba bolela hore ba ikamahanya le boloi e le karolo ea ho batla batho bao ba ka phetlelanang lifuba le bona, ba ba tšepa le ho ba le lithahasello tse tšoanang tsa moea. Moloi e mong oa kajeno o re: “E mong le e mong eo ke mo tsebang kopanong ea bohetene o na le botsoalle hape o phutholohile . . . Ke batho ba hlasimollang.” Ba bangata baa hana hore ba ikamahanya le Satane ka tsela leha e le efe, ba tiisa ka matla hore ha ho na molimo oa bobe tlhophisong ea bona ea bolumeli.

Ho ba bangata, lebaka le leholo la ho ba baloi ke boikutlo ba ho haelloa ke ho itseng bomoeeng le ho se ipiletse ha malumeli a sehlooho. Ha a bua ka sehlopha sa hae, Phyllis Curott, moprista oa Wicca e moholo oa mosali, o re: “Kaofela ha rōna re ne re sa khotsofalla lithuto le mekhoa ea malumeli ao re neng re hōliselitsoe ho ’ona.” Curott o hlalosa hore baloi ba kajeno ba leka ho araba lipotso tse kang, ‘Re ka boela ra fumana se halalelang joang?’ Empa na boloi ke eona tsela e isang bomoeeng ba sebele?

Bomoea ba Sebele—Bo Tsoa Hokae?

Bibele e bontša ka ho hlaka hore Jehova ke eena feela Molimo oa ’nete le ’Musi oa Bokahohle. (Pesaleme ea 73:28; 1 Petrose 1:15, 16; Tšenolo 4:11) O mema batho bohle ho mo batla ‘’me ka sebele ba mo fumane.’ (Liketso 17:27) Kahoo, bomoea ba sebele bo ka fumanoa feela ka ho ithuisa tsebo e nepahetseng ka Molimo oa ’nete, Jehova. Sena se ka finyelloa ka ho ithuta Lentsoe la hae, Bibele e Halalelang. Mongoli oa Bibele Jakobo oa re tiisetsa: “Atamelang ho Molimo, ’me o tla atamela ho lōna.”—Jakobo 4:8.

Leha ho le joalo, Lentsoe la Molimo le lemosa ka mohloli o kotsi oa bomoea bo khopo. (1 Johanne 4:1) Le tsebahatsa Satane Diabolose, e leng sera se seholo sa Jehova, le bademona ba hae e le mohloli o moholo oa bomoea bo khelosang bo atileng kajeno.c Ho ea ka Bibele, Satane o ‘foufalitse likelello’ tsa ba bangata. Ha e le hantle o ‘khelosa lefatše kaofela leo ho ahiloeng ho lona,’ ho akarelletsa le ba amehang boloing—ho sa tsotellehe hore na ba bolela hore ba rapela Diabolose kapa che. Ke hobane’ng ha ho le joalo?—2 Bakorinthe 4:4; Tšenolo 12:9.

Mekhoa le litšebeletso tse ngata tse tsamaisanang le boloi ba kajeno li tšoana ka tsela e hlollang le litšobotsi tse tšosang tsa Bosatane. Kahoo, esita le se bitsoang bohelehele bo se nang molato bo ka lebisa habonolo tšebelisong ea bonohe. Ha e le hantle, ba bangata ba oetse tšusumetsong e khopo ea Satane ka tsela ena.

Ntlha e sa lokelang ho hlokomolohuoa ke ea hore ka linako tse ling ba sebelisang boloi kajeno ba huleloa ho bona ke ho labalabela matla kapa ho iphetetsa. Jennifer, moloi oa mehleng ena, o ile a re: “Ho na le batho ba ka ’nang ba ipitsa baloi ’me ba bo sebelisetsa merero e sehlōhō.” Ka sebele, baloi ba se nang kotsi hammoho le ba tletseng boiphetetso ba kotsing ea ho ba tlas’a taolo e feletseng ea Satane le bademona. Baloi ba bang ba ka ’na ba latola boteng ba meea e khopo joalo, empa sena se etsa hore ba pepesehele ho thetsoa ke eona haholoanyane.—Bapisa le 1 Bakorinthe 10:20, 21.

Bibele e nyatsa ho laola, bonohe, tšebeliso ea boselamose, ho betsa ka mantsoe a boloi le boiteko leha e le bofe ba ho buisana le bafu. E bolela ka ho hlaka: “Bohle ba etsang litaba tseo, ba manyala ho Jehova.” (Deuteronoma 18:10-12) Ka sebele, Bakreste ba ikemiselitse ho ‘sebetsa se molemo ho bohle,’ ’me tšebeletsong ea bona ba thusitse ba bangata ho itokolla mefuteng eohle ea tšebelisano le meea. (Bagalata 6:10; Liketso 16:14-18) Leha ho le joalo, Bakreste ba ’nete ba qoba ho ikamahanya le borapeli ba bohata ka tsela leha e le efe, ho akarelletsa le mofuta leha e le ofe oa boloi.—2 Bakorinthe 6:15-17.

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 31]

Picture Book of Devils, Demons and Witchcraft/Ernst and Johanna Lehner/Dover