Aids Afrika—Ho na le Tšepo Efe Bakeng sa Sekete See se Secha sa Lilemo?
KA MONGOLLI OA TSOHA! ZAMBIA
KA September selemong se fetileng, baemeli ba tsoang libakeng tse fapaneng tsa Afrika ba ile ba kopana Lusaka, Zambia, bakeng sa Seboka sa Machaba sa bo11 se buang ka AIDS le mafu a tšoaetsanoang ka likamano tsa botona le botšehali Afrika. Morero o mong oa seboka seo e ne e le ho khothalletsa libaka ho sebelisana hammoho haholoanyane ho arabeleng potso ena, Re ka loantša ho jaleha ha AIDS Afrika joang?
Moprofesa Nkandu Luo, eo ka nako eo e neng e le letona la bophelo Zambia, o ile a re boemo ba Afrika le likarolong tse ling tsa linaha tse tsoelang pele “bo tebile ka ho fetisisa,” a phaella ka ho re “bo emisa le hona ho etsolla tse ling tsa lintlafatso tsa bohlokoa tse neng li entsoe bophelong le maemong a mang a bophelo le litabeng tsa lichelete.”
Seboka se mabapi le ho sireletseha ha mali se ile sa lumela hore AIDS e ’nile ea nelehetsanoa ka ho tšeloa mali. Ngaka e ’ngoe eo e leng moemeli oa Lefapha la Tšireletseho ea Mali la Mokhatlo oa Lefatše oa Bophelo, o ile a bolela hore le hoja e se ka mehla ho ba le likamano tsa botona le botšehali le motho ea nang le tšoaetso ea HIV ho ka tšoaetsang e mong, motho ea tšeloang mali a nang le AIDS joang kapa joang o tla tšoaetsoa! Ka lebaka le utloahalang, ngaka ena e ile ea bolela hore boemong bo joalo, “tšelo ea mali e se nang kotsi ka ho feletseng ke e sa etsuoeng ho hang.”
Seboka seo se ile sa totobatsa hore ho tura ha phekolo ea batho ba nang le AIDS ho etsa hore ho be thata, haeba ho ka etsahala, hore batho ba khone ho fumana tlhokomelo ea meriana. Ka mohlala, ka karolelano moahi oa Uganda ea sebakeng sa toropo o fumana R1 200 ka khoeli. Empa phekolo e etsoang ka moriana o thibelang ho ata ha kokoana-hloko ea HIV e ka batla chelete e kaalo ka R6 000 ka khoeli!
Seboka seo sa Lusaka se bontšitse hore ho qaleha ha sekete se secha sa lilemo ho ke ke ha bona tharollo ea letho e bonolo ho jaleheng ha AIDS. Leha ho le joalo, Liithuti tsa Bibele lia hlokomela hore qetellong, tharollo ea mafu ’ohle e itšetlehile ka ’Mōpi, Jehova Molimo, ea tšepisang hore lefatšeng la hae le lecha “ha ho moahi ea tla re: ‘Kea kula.’”—Esaia 33:24, NW.
[’Mapa/Litšoantšo tse leqepheng la 31]
Moprofesa Nkandu Luo
[Tlhaloso ea Moo Setšoantšo se Nkiloeng Teng]
Photograph by permission of E. Mwanaleza, Times of Zambia