Lerato le Leng Matla ho Feta Leholiotsoana!
Ha Leholiotsoana Katrina le Leholiotsoana Rita li hlasela Kou-Mosenekeng United States ka 2005, ho ile ha e-ba le tšenyo e khōlō ’me ha shoa batho ba bangata. Lipaki Tsa Jehova tse likete le tsona li ile tsa ameha koluoeng eo.
Li tataisoa ke ofisi ea lekala ea Lipaki Tsa Jehova e United States, likomiti tse fanang ka lithuso maemong a tlokotsi li ile tsa phallela moo hang-hang. Louisiana, li ile tsa theha litsi tse 13 tsa liphallelo, tse 9 tseo li behang thepa ho tsona le tse 4 tseo li tšelang mafura ho tsona. Li ne li thusa batho ba lulang sebakeng se boholo ba lisekoere-k’hilomithara tse 80- 000. Baithaopi ba ka bang 17 000 ba Lipaki ba tsoang likarolong tsohle tsa United States le linaheng tse ling tse 13 ba ile ba phallela ho tla thusa maemong a tšohanyetso le ho tsosolosa mehaho. Seo se ile sa bontša hore lerato la Bokreste le matla ho feta maholiotsoana.—1 Bakorinthe 13:1-8.
Baithaopi bao ba ile ba lokisa matlo a fetang 5 600 a balumeli-’moho le bona le Liholo Tsa ’Muso tse 90, e leng libaka tseo Lipaki Tsa Jehova li kopanelang ho tsona. Eo e ne e batla e le mehaho eohle e neng e senyehile ea Lipaki. Tumellanong le Bagalata 6:10, e phehellang Bakreste hore ba ‘sebetse se molemo ho bohle,’ Lipaki Tsa Jehova li ile tsa thusa le batho ba bang ba ’maloa ba sa kopaneleng le tsona borapeling.
LE HOJA ho kopanela mosebetsing oa liphallelo ho ne ho hloka boitelo, ho ne ho e-na le melemo e mengata. Nahana ka se builoeng ke Lipaki tse supileng tse neng li okametse likarolo tse sa tšoaneng tsa mosebetsi moo.
“Phihlelo e Thabisang Bophelong ba Ka”
Robert: Ho ba komiting ea liphallelo e bile phihlelo e thabisang bophelong ba ka. Ke lilemo li 67, ’me ke ’na ea moholo ho litho tse ling tsohle tsa komiti. Ke sebelitse le baithaopi ba bangata ba akhang bacha ba ikhethang ba Lipaki ba chesehelang lintho tsa moea. Ruri ke ho khothatsang ho bona bacha ba bontša lerato le nang le boitelo ho Jehova le Bakreste-’moho le bona!
Mosali oa ka Veronica, o nthusitse haholo. E le hore re khone ho thusa mosebetsing oa liphallelo, o ile a ntšehetsa ha ke etsa qeto ea ho tlohela mosebetsi oo ke o entseng ka lilemo tse fetang 40. Hona joale mosebetsi oo re o etsang ke oa ho hloekisa liofisi hang ka beke, bosiu. Re ithutile ho phela ka chelete e seng kae le ho bebofatsa tsela eo re phelang ka eona. Ho sebetsa le batho ba bang ba batlang ho khahlisa Jehova ho entse hore re utloisise ka ho teba se boleloang ke ho etelletsa ’Muso oa Molimo pele bophelong ba rōna. (Matheu 6:33) Re bone ka makhetlo hore Jehova o hlokomela batho ba hae.
Frank: Ke okametse lefapha la tšebeletso ea lijo setsing sa liphallelo se Baton Rouge. Qalong, mosebetsi oa ho fepa baithaopi o ne o hloka hore re sebetse lihora tse 10 ho isa ho tse 12 ka letsatsi, matsatsi a supileng ka beke. Leha ho le joalo, ho ne ho e-na le litlhohonolofatso tse ngata, tse akarelletsang ho bona kamoo lerato la Bokreste le leng matla kateng.
Baithaopi ba bangata ba ileng ba qeta nako e ka etsang beke ba thusa ho lokisa lijo ba ile ba kōpa ho khutlela setsing, ’me ba bang ba ile ba romela liposkarete le ho founa ba bolela hore ba ananela haholo monyetla oo ba bileng le oona oa ho thusa. ’Na le mosali oa ka, Veronica, re angoe ka ho teba ke moea oa boitelo oo ba o bontšitseng.
O Ile a Ameha ka ho Teba
Gregory: ’Na le mosali oa ka, Kathy, re ile ra rekisa lehae la rōna le Las Vegas, Nevada, eaba re reka vene le k’haravene, eo e ileng ea e-ba lehae la rōna. Ho bebofatsa tsela eo re phelang ka eona ho re nolofalelitse ho kopanela mosebetsing oa liphallelo, Louisiana, ka nako e fetang lilemo tse peli. Ho feta leha e le neng pele bophelong ba rōna, re iponela ka mahlo bonnete ba mantsoe a ka Bibeleng ho Malakia 3:10, a reng: “‘Ka kōpo, ntekeng, . . . ’ ho boletse Jehova oa mabotho, ‘[’me le bone] hore na ebe nke ke ka le bulela likhoro tsa moroallo tsa maholimo ’me ke le tšollele tlhohonolofatso ho fihlela ho se ho se letho le hlokoang.’”
Rea thaba ha re utloa batho ba re, “Ruri le bontša boitelo!” Lilemong tse 30 tse fetileng, ’na le Kathy re ne re batla ho sebeletsa ofising ea lekala ea Lipaki Tsa Jehova e United States, empa re ne re hōlisa bana. Mosebetsi ona oa liphallelo o khotsofalitse takatso ea rōna ea ho etsa ho eketsehileng tšebeletsong ea Molimo. Tokelo e ’ngoe eo re bileng le eona e bile ho sebetsa le Lipaki tse ling, tseo tse ling tsa tsona li nang le litsebo tse khethehileng. Ka mohlala, mor’abo rōna e mong ea apehang o ne a kile a apeha reschorenteng e ’ngoe ea maemo, ’me e mong eena o ne a kile a apehela bapresidente ba babeli ba United States.
Ho etsa mosebetsi oa liphallelo ho amme baithaopi ba bangata ka ho teba bophelong. Mor’abo rōna e mong ea lilemo li 57 o ile a ameha maikutlo haholo ha a hlalosa mosebetsi oo a o etsang oa ho thusa batho ba anngoeng ke leholiotsoana. Le Lipaki tse ling tse neng li sa khone ho tla thusa le tsona li ile tsa re khothatsa. Ka mohlala, baithaopi ba babeli ba neng ba tlosa bolele maboteng ba ile ba re fa lesela le leholo le toroiloeng le saennoeng ke litho tsohle tsa liphutheho tse tharo—ho akarelletsa le bana—tse sebakeng sa habo bona sa Nebraska.
‘Re Bone ha Molimo a Hlokomela Batho ba Mahlomoleng’
Wendell: Letsatsi ka mor’a hore Leholiotsoana Katrina le hlasele, ke ile ka kōptjoa ke lekala la United States hore ke il’o hlahloba tšenyo e etsahetseng Liholong Tsa ’Muso le mahaeng a Lipaki Tsa Jehova tse Louisiana le Mississippi. Ke kamoo ke ileng ka qala mosebetsi ona o nthutileng lintho tse ngata. Kaha ’na le mosali oa ka, Janine, re qetile lilemo tse 32 re le sebakeng seo ho hlokahalang bahoeletsi ba eketsehileng ba ’Muso, re ile ra bona ka ho hlaka kamoo Jehova a hlokomelang batho ba hae kateng. Empa hona joale re bone kamoo Molimo a hlokomelang batho le ho feta kateng.
Ke filoe tokelo ea ho ba molula-setulo oa komiti ea liphallelo ea Baton Rouge. Le hoja mosebetsi ona o se bonolo, empa o nkhotsofatsa haholo. Ha e le hantle, ha re ntse re fana ka thuso, komiti ea rōna e bone ka makhetlo-khetlo ha Molimo a rarolla mathata, a re bulela menyetla a bile a hlokomela batho ba mahlomoleng ka tsela eo e leng Ntate ea lerato le ea Matla ’Ohle feela ea ka etsang seo ka eona.
Batho ba bangata ba ’nile ba botsa, “Ho tla joang hore ebe uena le mosali oa hao le ntse le khona ho etsa mosebetsi oo oa liphallelo esita le ka mor’a lilemo tse peli?” Hase kamehla ho bileng bonolo. Re ile ra tlameha ho etsa liphetoho tse ngata bophelong. Empa ka lehlakoreng le leng, re bone melemo e tlisoang ke ho boloka ‘leihlo le talimile nģa e le ’ngoe.’—Matheu 6:22.
Ha re ne re qala ho tsoa letšolo la ho batla mahlatsipa New Orleans, re ne re phomola nakoana feela. Ho neng ho thatafatsa lintho le ho feta ke hore motse oo o ne o laoloa ke sesole ka lebaka la merusu e neng e jele setsi le liketso tse ling tse sehlōhō tse neng li etsahala ka linako tse ling. Ho ne ho le bonolo hore re tepeletsoe ke mosebetsi o moholo o neng o larile ka pele.
Re ile ra kopana le Lipaki tse likete tse neng li senyehetsoe ke thepa. Re ile ra rapela hammoho le tsona ’me ra leka ho li tšelisa. ’Me ka thuso ea Jehova, re ile ra qala mosebetsi. Ka linako tse ling, ke ikutloa eka ke ithutile lintho tse ngata haholo ka lilemo tsena tse peli ho feta tseo ke ithutileng tsona bophelong bohle ba ka.
Nako le nako ha ke ne ke utloa hore ke felile ke mokhathala, ho ne ho fihla baithaopi ba bacha—ba bang ba qeta likhoeli tse ’maloa ha ba bang ba nka nako e teletsana le ho feta. Ho bona batho ba bangata joalo ba thabile ba bile ba ikemiselitse ho thusa, ba akarelletsang bacha ba bangata, ho ’nile ha re khothatsa.
Jehova o ile a re thusa ka makhetlo. Ka mohlala, ha re fihla re ile ra hlokomela hore lifate li ne li oetse matlo a fetang 1 000 a barab’abo rōna. Kaha re ne re se na thepa kapa basebetsi ba ka etsang mosebetsi oo o kotsi oa ho tlosa lifate, komiti ea rōna e ile ea rapella taba ena. Ka le hlahlamang, mor’abo rōna e mong ea nang le teraka le thepa e hlokahalang, o ile a ithaopela ho thusa. Ka nako e ’ngoe thapelo ea rōna e ile ea arajoa ka mor’a metsotso e 15 feela, ’me lekhetlong le leng, le pele re qeta ho rapela, thepa eo re neng re e rapella e ne e se e le tseleng! Ka sebele, Jehova o ile a re bontša hore ke “Ea Utloang thapelo.”—Pesaleme ea 65:2.
“Ke Motlotlo ho ba e Mong oa Lipaki Tsa Jehova”
Matthew: Letsatsi ka mor’a hore Leholiotsoana Katrina le hlasele, ke ile ka thusa ho hlophisa hore ho romeloe lijo, metsi le lintho tse ling tse hlokahalang tsa boima ba lithane tse 15 sebakeng se angoeng ke koluoa. Ruri batho ba Jehova ba ile ba bontša hore ba fana ka seatla se bulehileng!
E le hore re khone ho thusa haholoanyane, ’na le mosali oa ka, Darline, re ile ra fallela moo re neng re tla nka lihora tse peli ho ea sebakeng se angoeng ke koluoa. Paki e ’ngoe ea moo e ile ea re fa mosebetsi oa nakoana e le hore re ka qeta nako e ngata re le mosebetsing oa liphallelo. E ’ngoe eona ea re fa ntlo eo re ka lulang ho eona. Ho ba karolo ea bara ba motho ba ratanang joalo ho ntlatsa kananelo ho bile ho etsa hore ke be motlotlo ho ba e mong oa Lipaki Tsa Jehova.
Ted: Nakoana ka mor’a Leholiotsoana Katrina, ’na le mosali oa ka, Debbie, re ile ra ithaopela ho thusa mosebetsing oa liphallelo. Ka mor’a matsatsinyana, ke ile ka fumana k’haravene ea khale e bobebe eo re neng re ka khona ho e hula ka koloi ea rōna ebile e rekisoa ka halofo ea chelete eo li rekisoang ka eona—’me e lekane matla a rōna ebile e le karabelo lithapelong tsa rōna. Ho se ho fetile lilemo tse peli re ntse re lula ka k’haraveneng ena.
Nakong eo re neng re le phomolong, re ile ra rekisa ntlo ea rōna le thepa ea rōna boholo, e le hore re lokolohe ho etsa mosebetsi o eketsehileng New Orleans, moo ke leng mohokahanyi mosebetsing ona oa liphallelo. Ntho e re thabisitseng haholo e bile ho bona kamoo Jehova e leng “Molimo oa matšeliso ’ohle” kateng ho barapeli ba hae. Ba bangata ba ne ba lahlehetsoe ke mahae a bona, Liholo Tsa ’Muso, ba bile ba lahlehetsoe ke phutheho le tšimo eo ba neng ba bolela litaba tse molemo ho eona ka lebaka la ho fallisetsoa libakeng tse ling.—2 Bakorinthe 1:3.
‘Tumelo ea Tsona . . . e Ile ea re Ama Maikutlo ka ho Teba’
Justin: Ka October 2005 ho ile ha kōptjoa baithaopi hore ba thuse mosebetsing oa liphallelo Kou-Mosenekeng. ’Na le mosali oa ka, Tiffany, re ile ra romela mangolo a rōna a kōpo hang-hang, ’me ka February 2006 re ile ra kōptjoa ho ea thusa basebetsi ba rulelang ba setsi sa liphallelo se Kenner haufi le New Orleans.
Letsatsi ka leng re ne re lokisa ntlo e itseng ’me re kopana le Lipaki tsa sebakeng seo, tseo tumelo ea tsona le ho itšetleha ha tsona ka Molimo ho neng ho re ama maikutlo ka ho teba. Letsatsi le letsatsi re ne re bona bopaki bo matla bo re hopotsang kamoo ho tšepa lintho tse bonahalang e leng booatla kateng. Ha re na mantsoe a ho hlalosa thabo eo re bileng le eona ha re bona kamoo Jehova a thusitseng batho ba hae kateng ho finyella mosebetsi ona le thabo eo re bileng le eona ka ho thusa Bakreste-’moho le rōna.
[Lebokose/Setšoantšo se leqepheng la 18]
Se Etsahalang Letsatsi ka Leng Setsing sa Liphallelo
Ba sebetsang ka kichineng setsing sa liphallelo ba qala mosebetsi hoo e ka bang ka 4:30 hoseng. Ka hora ea bosupa, basebetsi bohle ba ea sebakeng sa ho jela ho hlahloba temana ea letsatsi ka metsotso e leshome pele ba ja lijo tsa hoseng. Molula-setulo a ka ’na a sebelisa nako eo ho amohela ba bacha ba fihlang le ho pheta phihlelo e khothatsang ea se sa tsoa etsahala.
Ka mor’a hore ho etsoe thapelo ea teboho, bohle ba thabela lijo tse lutlisang mathe ba ntan’o ea mosebetsing. Ba bang ba sala moo setsing, e le hore mohlomong ba etse mosebetsi oa ofisi, ba hlatsoe, kapa ba apehe. Ba apehang ba phuthella motho ka mong lijo tsa motšehare ’me ho ba le motho ea ba latelang tsona.
Mantsiboea a mang le a mang ka Mantaha “lelapa” le bokana hammoho ho tšoara thuto ea Bibele e thehiloeng makasineng ea Molula-Qhooa, e hatisitsoeng ke Lipaki Tsa Jehova. Thuto eo e thusa bohle hore ba lule ba le matla moeeng—e leng sona se ba thusang ho mamella ka thabo le hore ba be le boikutlo bo nepahetseng ka mosebetsi oo ba o etsang.—Matheu 4:4; 5:3.
[Lebokose mo leqepheng la 19]
“Ke ne ke E-na le Maikutlo a Fosahetseng ka Lōna”
Mosali e mong oa New Orleans o ne a behile letšoao monyako oa ntlo ea hae, le reng: “Lipaki Tsa Jehova—Le se ke la Kena Mona.” Ka letsatsi le leng baithaopi ba ile ba qala ho lokisa ntlo e ’ngoe e neng e sentsoe ke leholiotsoana seterateng seo a lulang ho sona. Kamehla o ne a bona kamoo basebetsi bao ba leng mofuthu ba bileng ba leng botsoalle kateng. Ha nako e ntse e ea, o ile a qetoa ke bohelehele hoo a ileng a ea ho ea bona hore na ho etsahala’ng. Ha a utloa hore baithaopi bao ke Lipaki Tsa Jehova, o ile a bolela hore ha ho le ea mong kerekeng ea hae ea neng a lekile le ho mo founela feela ka mor’a leholiotsoana leo. O ile a re: “Ho totobetse hore ke ne ke e-na le maikutlo a fosahetseng ka lōna.” Ho ile ha etsahala’ng ka mor’a moo? O ile a tlosa letšoao leo le monyako, ’me a kōpa Lipaki hore li mo etele.
[Mantsoe a hlalosang setšoantšo se leqepheng 16, 17]
Robert le Veronica
[Mantsoe a hlalosang setšoantšo se leqepheng 16, 17]
Frank le Veronica
[Mantsoe a hlalosang setšoantšo se leqepheng 17]
Gregory le Kathy
[Mantsoe a hlalosang setšoantšo se leqepheng 17]
Wendell le Janine
[Mantsoe a hlalosang setšoantšo se leqepheng 18]
Matthew le Darline
[Mantsoe a hlalosang setšoantšo se leqepheng 18]
Ted le Debbie
[Mantsoe a hlalosang setšoantšo se leqepheng 18]
Justin le Tiffany