Ke Khethile Mosebetsi o Molemo

Joalokaha ho boletse Plamen Kostadinov

E NE e ka ba har’a mpa ea motšehare ha ke tsoha. Hohle fatše ho ne ho tletse libotlolo tse sa tšelang ’me literei tse tletseng molora oa koae li nkha hampe. Monate oa phathi ea ka la maobane bosiu o ne o ile kaofela. Ke ile ka ikutloa ke ferekane ke bile ke jeoa ke bolutu ho feta leha e le neng pele. Ntho e ’ngoe le e ’ngoe e ne e bonahala e se na morero! E-re ke u phetele hore na ho tlile joang hore ke be boemong bona bo hlomolang.

Nakong eo ke neng ke le lilemo li 14, ke ne ke se ke ntse ke ithutela botaki ba litšoantšo. E ne e le hlabula, ka 1980. Ntate o ne a qeta ho mpolella hore ke amohetsoe k’holejeng ea bonono motseng oa Troyan, Bulgaria. Ke ne ke thabile haholo. Ka hoetla selemong seo, ke ile ka tloha motseng oa heso oa Lovech ka ea Troyan.

Ke ne ke thabela ho lula hōle le batsoali ba ka le ho iketsetsa borata. Ke ile ka qala ho tsuba, ’me ka linako tse ling ke ne ke noa le metsoalle ea ka ea sekolong ho fihlela re tahoa. Re ne re sa lumelloa ho noa le ho tsuba sekolong. Ke ne ke natefeloa ke ho tlōla molao.

Lerato la ka la ho taka litšoantšo le ile la ’na la hōla. Ke ne ke ipabola ka ho toroea, ’me ka qala ho lakatsa botumo. Ka mor’a hore ke qete lilemo tse hlano ke le sekolong Troyan, ke ile ka batla ho ntšetsa pele lithuto tsa ka Setsing sa Thuto e Phahameng sa Bonono se Sofia, e leng motse-moholo oa Bulgaria. Sena e ne e le setsi se tummeng ka ho fetisisa sa koetliso naheng eohle ea Bulgaria. Ka 1988, ke ile ka amoheloa setsing seo ke le se seng sa liithuti tse robeli feela tse khethiloeng naheng eo. Ke ne ke le motlotlo hakaakang ka katleho eo ke e finyeletseng! Ka letsatsi le leng, ke ile ka icheba ka seiponeng ke le motlotlo, ka re, ‘Plamen, joale ha ho pelaelo hore u tlil’o ba motaki oa litšoantšo ea tummeng!’

Seo ke Neng ke le Sona Pele

Ka mor’a nakoana ke ile ka qala ho apara liaparo tse ntšo, ’me ka tlohella moriri le litelu. Batho ba bangata ba ne ba nka hore motaki oa litšoantšo o lokela ho shebahala joalo. Ke ile ka kopitsa mokhoa oa bophelo oo ke neng ke nahana hore ke moetlo oa bataki ba litšoantšo ba Mabohemia. O ne o akarelletsa ho hira kamore moo bataki ba litšoantšo ba lulang teng le ho e tlohela e hlekemane feela. Ho phaella moo, ke ne ke ruile katse e nang le malinyane a mararo hammoho le ntja. Ke ne ke boetse ke hafotsa chelete.

Leha ho le joalo, ke ile ka tsoela pele ke rata botaki ba litšoantšo. Ke ne ke lula ke penta litšoantšo tse sa hlakang, tse tšoantšetsang lefatše le letle leo ke inahanelang lona. Ke ne ke bile ke li penta le maboteng a kamore ea ka. Ke ne ke nahana hore eo ke qaleho ea mosebetsi o babatsehang.

Ntho e khōlō bophelong ba ka e ne e le ho ea liphathing le liithuti-’moho le ’na. Re ne re atisa ho li tšoarela moo ke lulang teng, re mamela ’mino ’me re noa haholo, esita le ha re ne re itokisetsa ho ea ngola tlhahlobo. Re ne re bua ka lifilosofi tsa ’mino, botaki le morero oa bophelo. Re ne re atisa ho bua ka matla a phahametseng tlhaho le lintho tse ling tse bokahohleng. Ho buisana ka lintho tsena ho ne ho mpha likhopolo tse ncha, tseo ke neng ke li sebelisa ha ke penta. Ke ne ke batla ho qeta nako e telele ke nyakaletse, empa boikutlo boo bo ne bo ba teng feela ha ke tahiloe. Hangata ka le hlahlamang, monyaka oo o ne o tsoha o felile.

Ka mor’a ho qeta lilemo tse ka bang leshome ke phela ka tsela eo, ke ile ka ikutloa ke sa khotsofala. Le hoja ke ne ke penta litšoantšo ka mebala e khanyang, ke ne ke ikutloa ke sulafaletsoe ’me ke jeoa ke bolutu. Takatso ea ka ea ho ba motaki ea tummeng e ile ea qala ho fokotseha. Ke ne ke nyahame ke bile ke sa tsebe hore na ke etse’ng bophelong. Boo ke bona boemo boo ke bo hlalositseng qalong ea pale ena.

Ke Pholosoa ke ’Nete

Ka 1990, ke ile ka etsa qeto ea ho bontša batho ba Lovech litšoantšo tsa ka. Ke ile ka kōpa Yanita, eo re tsebaneng ha re le sekolong Sofia, hore a be le seabo pontšong eo, kaha le eena o ne a tsoa Lovech. Ha pontšo eo e fela, ’na le Yanita re ile ra ea reschorenteng e ’ngoe e haufi le moo ho ea ithabisa. Ha re ntse re qoqa, o ile a qala ho bua ka lintho tseo a neng a ithuta tsona ka Bibeleng, ha a ntse a ithuta le Lipaki Tsa Jehova. O ile a mpolella ka lefatše le lecha le boletsoeng esale pele ka Bibeleng. Seo se ile sa etsa hore ke be le thahasello.

Ha Yanita a ntse a le Sofia, o ile a tsoela pele a ithuta Bibele, ’me o ne a atisa ho ntlisetsa lingoliloeng tsa Bibele. Ha ke lebale kamoo ke ileng ka chesehela ho bala bukana ea “Bonang, Ntho Tsohle ke li Etsa tse Ncha” le buka ea U ka Phela ka ho sa Feleng Paradeiseng Lefatšeng.a Ke ile ka nolofalloa ho lumela hore Molimo o teng, ’me hang-hang ka batla ho tseba hore na ke rapele joang. Ke sa hopola thapelo ea ka ea pele. Ke ile ka khumama, ka bolella Jehova ka tieo lintho tse ntšoenyang. Ke ne ke kholisehile hore o ’mametse. Ho e-na le hore ke ikutloe ke jeoa ke bolutu, ke ile ka ikutloa ke thabile ke bile ke le khotsong.

Ha re le Sofia, Yanita o ile a ntsebisa banyalani ba bang ba Lipaki Tsa Jehova. Ba ile ba ithaopela ho ithuta Bibele le ’na ’me ba ’memela libokeng tsa bona. Ke sa hopola seboka sa pele seo ke ileng ka ea ho sona ka June 1991. Ke ile ka fihla lihora tse peli pele ho nako ’me ka ema phakeng e nyenyane. Ke ne ke ferekane, ke sa phutholoha ke bile ke ipotsa hore na ba tla nkamohela ka mofuthu. Ke ile ka hlolloa ke hore bohle ba ile ba nkamohela ka mofuthu le hoja ke ne ke shebahala ke makatsa ka ponahalo ea ka ea Mabohemia. Ho tloha ka nako eo, ke ile ka ba teng kamehla libokeng ’me ka khanneloa thuto ea Bibele habeli ka beke.

Ke ile ka nyakalla ha ke qala ho fumana Bibele. Ho ne ho se mohla nkileng ka bala ntho leha e le efe e babatsehang le e khahlehang joaloka keletso e bohlale e fanoeng Thutong ea Thabeng! Ha ke ntse ke tsoela pele ho ithuta, ke ile ka lemoha matla a fetolang a Lentsoe la Molimo, joalokaha a hlalositsoe ho Baefese 4:23, e reng: “Le nchafale matleng a susumetsang likelello tsa lōna.” Ke ile ka tlohela ho tsuba ’me ka fetola tsela e bohlasoa eo ke neng ke shebahala ka eona. Eo e bile phetoho e khōlō hoo ka le leng ha Ntate a ne a tlil’o nkhahlametsa seteisheneng sa terene Lovech, a ileng a mpheta a sa hlokomele hore ke ’na.

Ke ile ka qala ho hloekisa moo ke lulang teng. E le hore ke qape lintho, ke ne ke se ke sa susumetsoe ke kamore e bohlasoa, mabota a pentiloeng litšoantšo le monko oa koae. Ke ile ka ikutloa ke tlameha ho hloekisa ntho e ’ngoe le e ’ngoe. Ke ile ka penta mabota ka pente e tšoeu, kahoo ka tlosa setšoantšo se makatsang sa motho ea nang le mahlo a mararo, seo ke neng ke se pentile leboteng.

Metsoalle ea ka e ile ea mphuralla, empa kapele-pele ka fumana e mengata e mecha ho bao ke kopanelang le bona libokeng tsa Bokreste, bao le kajeno e ntseng e le metsoalle ea ka e ratehang. Ka lebaka la botsoalle bo hahang joalo, ke ile ka hatela pele ka potlako. Ke ile ka kolobetsoa ka la 22 March, 1992, kopanong ea pele ea Lipaki Tsa Jehova Bulgaria, e neng e tšoaretsoe motseng oa Plovdiv.

Ke Khutlela Lovech

Le hoja ke ne ke tseba hore ho thata hore motaki oa litšoantšo ea lulang motsaneng a iphelise, ke ile ka etsa qeto ea hore ha ke qeta sekolong ke tla khutlela Lovech. Ke ile ka hlokomela hore ke tla thatafalloa ho hahamalla katleho mosebetsing oa ho taka litšoantšo ’me ka nako e tšoanang ke eteletse pele ’Muso oa Molimo bophelong ba ka. Kahoo ke ile ka etsa qeto ea ho fetola mosebetsi oa ka ’me ka ithaopela ho ruta batho Bibele. Ha ke ntse ke le Setsing sa Thuto e Phahameng sa Bonono, Yanita ea neng a qetile sekolong lilemo tse tharo pele ho ’na, o ne a se a ntse a chesehela ho ruta ba bang linnete tsa Bibele, Lovech. E ne e le eena feela Paki moo.

Ha ke khutlela Lovech, ho ne ho e-na le batho ba seng bakae ba neng ba ithuta Bibele le Lipaki Tsa Jehova. Ke ne ke thabela ho etela batho ka ntlo le ntlo, ke ba bolella tšepo eo ke nang le eona ka bokamoso. Ke ile ka etsa qeto ea ho kopanela mosebetsing ona ka nako e tletseng.

Empa ha nako e ntse e ea, lintho li ile tsa thatafala. Ka 1994, mokhatlo oa rōna oa bolumeli o ile oa hlakoloa ka molao ’me ha phatlalatsoa lintho tse ngata tse re senyang lebitso.b Lipaki li ne li atisa ho bitsetsoa seteisheneng sa mapolesa ’me lingoliloeng tsa rōna li nkoa ka mahahapa. Nakong eo e thata, molao o ne o sa re lumelle ho tšoarela liboka libakeng tsa sechaba. Leha ho le joalo, kamehla re ne re tšoarela liboka ka kamoreng e boholo ba lisekoere-mithara tse 12 e neng e haheletsoe ntlong ea Yanita. Ka nako e ’ngoe, re ile ra kenya batho ba 42 ka kamoreng eo e nyenyane. E le hore re se ke ra tšoenya baahelani, re ne re koala fensetere ha re bina lipina tsa ’Muso. Ka linako tse ling ha ho chesa ka ntle, ho ne ho chesa haholo ka kamoreng eo, empa re ne re thabela hore ebe re kopane.

Litlhohonolofatso Tsa Jehova

Ke ile ka khahloa haholo ke tsela eo Yanita a chesehelang borapeli ba ’nete ka eona, ’me ha nako e ntse e ea re ile ra qala ho ba le maikutlo a lerato. Re ile ra nyalana ka la 11 May, 1996. Le hoja re thahasella lintho tse sa tšoaneng, re thusana ka tsela e hlollang. Ke motsoalle oa ka e moholo le mothusi oa ka. Ke leboha Jehova ha a mphile mosali eo ‘bohlokoa ba hae bo fetang ba likorale hōle.’—Liproverbia 31:10.

Ba bang bao e neng e le metsoalle ea ka pele hona joale ke bataki ba atlehileng ba litšoantšo, e leng seo ka nako e ’ngoe ke neng ke se labalabela. Empa ke thabela hore ebe ke khethile mosebetsi oo ke nkang hore o molemo. Ke thusitse batho ba bangata hore ba fumane morero bophelong, ’me hona joale ke bara le barali beso ba moea. Botumo kapa boemo leha e le bofe boo ke neng ke ka ’na ka bo finyella ha ke le motaki oa litšoantšo, hase letho ha bo bapisoa le litlhohonolofatso tseo ke li thabelang tšebeletsong ea Jehova. Kea thaba hore ebe ke tsebile Jehova Molimo, Moetsi oa tsohle.

[Mongolo o botlaaseng ba leqephe]

[Setšoantšo se leqepheng la 12]

’Na le mosali oa ka Yanita