U se ke ua Lebala ho re Kea Leboha!
U QETETSE neng ho fumana lengolo le u lebohang? Hona uena u qetetse neng ho le romella ba bang?
Mehleng ena eo batho ba seng ba ngollana melaetsa ka lisebelisoa tsa theknoloji, melaetsa e ngotsoeng ka letsoho ea ho leboha e se e fumaneha ngope setšoha. Leha ho le joalo, ho ngola molaetsa o reng “kea leboha” ke tsela e khethehileng ea ho bolella batho hore u ananela mosa oo ba u bontšitseng oona. Ka tlaase mona ho bontšitsoe litlhahiso tsa kamoo u ka etsang seo kateng.
1. Ngola lengolo ka letsoho ho e-na le ho le thaepa ka mochine kapa ka k’homphieutha.
2. Ngola lebitso la motho eo u batlang ho mo leboha.
3. Haeba u filoe mpho, e bolele ka lebitso le kamoo u rerang ho e sebelisa kateng.
4. Leboha hape qetellong ea lengolo.
Lengolo la teboho le thabisa motho ea le fumanang.
Kahoo, haeba nakong e tlang motho a u amohela ka mofuthu, a u etsetsa ketso e bontšang mosa kapa a u fa mpho, bontša hore u ananela seo a u etselitseng sona. U se ke ua lebala ho re kea leboha!
[Lebokose/Litšoantšo tse maqepheng a 28, 29]
’Mangoane Mary ea Ratehang, (2)
Ke leboha haholo ka oache e nang le alamo eo u ntheketseng eona! (3) Kaha ke motho ea tsohang motšehare, oache ena e nthusa haholo. Ho bile monate haholo ho ba le uena bekeng e fetileng, ’me ke tšepa hore u tsamaile hantle ha u khutlela hae. Re labalabela ho boela re u bona nakong e tlang.
Ke leboha haholo ka mpho eo u mphileng eona e bontšang ho nahanela! (4)
Mochana oa hao,
John
[Setšoantšo]
(1)
[Lebokose le leqepheng la 29]
LITLHAHISO
● U se ke ua bolela mpho ea chelete ka ho toba. Ka mohlala, ho e-na le hore u bolele chelete eo u e filoeng, u ka ’na ua re: “Ke leboha haholo ka mpho eo u mphileng eona ka lerato. Ke rerile ho e sebelisetsa . . .”
● Bua feela ka lintho tse amanang le mpho eo le kamoo u e ananelang kateng. Ena hase nako ea hore u bue ka lintho tse ka thōko tse kang phomolo eo u tsoang ho eona kapa hore u ’nile ua kena sepetlele.
● U se ke ua bolela mathata ao u bileng le ’ona ka mpho eo u e filoeng. Ka mohlala, e tla be e le ho hloka mosa hore u ngolle motho ea u fileng mpho u re, “Kea leboha ka toaster eo u mphileng eona—empa bothata ke hore ha ho na moo ke e behang teng!”
[Lebokose le leqepheng la 29]
Bibele e re khothalletsa ho leboha. (Luka 17:11-19) E re laela hore re ‘rapele [Molimo] re sa phetse,’ hape e phaella ka ho re: “Mabapi le ntho e ’ngoe le e ’ngoe le lebohe.”—1 Bathesalonika 5:17, 18.