Ho Hlahloba Litaba Tsa Tikoloho

Australia

Ho hakanngoa hore metsi a seng letsoai hakaalo, a ka koahelang sebaka se boholo ba li-cubic kilometer tse 500 000, a fumaneha botebong ba maoatle a lefatše. Vincent Post oa Univesithi ea Flinders e Adelaide o re: “Pele metsi a leoatle a ne a le tlaase haholo ho feta kajeno,” kahoo lebōpo la leoatle le ne le le leholo. Ka nako eo, pula e ne “e tlatsa libaka tse nang le metsi tseo hona joale li leng botebong ba leoatle.” Bo-rasaense ba lumela hore ha nako e ntse e ea, metsi ao a tla thusa batho ba fetang limilione tse 700 ba sa fumaneng metsi a hloekileng.

Lehoatata la Sahara

Halofo ea mefuta ea liphoofolo tse khōlō e kileng ea fumaneha Sahara, e nyametse kapa e se e tlameha ho phela sebakeng se etsang karolo ea ’ngoe lekholong ea sebaka seo e neng e phela ho sona qalong. Lebaka le leng la sena ke ho se tsitse ha maemo a lipolotiki tikolohong eo le ho tsoma. Le hoja lintho tse phelang mahoatateng li lekana le tse phelang merung, bafuputsi ba re “bo-rasaense ha ba na thahasello e kaalo linthong tse phelang mahoatateng, hobane ho se na tšehetso ea lichelete e lekaneng.” Kahoo, ho thata hore bahlokomeli ba lintho tsa tlhaho ba hlahlobe tikoloho le lintho tse phelang ho eona tse kotsing ea ho fela.

Lefatše

Ho hakanngoa hore motho a le mong ho ba robeli ba ileng ba shoa ka 2012, o bolailoe ke tšilafalo ea moea. Ho ea ka Mokhatlo oa Lefatše oa Bophelo, “tšilafalo ea moea ke e ’ngoe ea lintho tse kotsi ka ho fetisisa tikolohong ’me e kulisa batho.”