PONO EA BIBELE
Moea
Malumeli a mangata a fana ka likarabo tse hanyetsanang mabapi le hore na ho etsahala’ng ka moea ha re shoa. Leha ho le joalo, Bibele e fana ka tlhaloso e hlakileng.
Na moea ha o shoe?
SEO BATHO BA SE BUANG
Batho ba bangata ba nahana hore moea ha o shoe. Ba bang ba lumela hore ka mor’a hore motho a shoe, moea oa hae o hlaha e se e le motho e mong sebakeng se itseng. Ha ba bang bona ba lumela hore moea o ea liheleng kapa leholimong.
SEO BIBELE E SE BUANG
Bibele e re moea oa shoa. Moprofeta Ezekiele eo Molimo a ileng a mo sebelisa hore a ngole karolo e itseng ea Bibele, o ile a re moea o ka ahloleloa lefu. Maemong a mang, Bibele e sebelisa lentsoe ‘moea o shoeleng’ ha e bua ka setopo. (Levitike 21:11) Ha e le hantle Bibele e re moea oa shoa.
“Moea o etsang sebe—ke oona o tla shoa.”—Ezekiele 18:20.
Na moea le ’mele ke lintho tse peli tse fapaneng?
SEO BATHO BA SE BUANG
Ha motho a ntse a phela, moea ke oona o phelisang ’mele, empa ha a shoa lia arohana.
SEO BIBELE E SE BUANG
Bibele e bua ka ’mè ea belehang “meea,” e leng batho. (Genese 46:18) Ha e le hantle, lentsoe la Seheberu le sebelisitsoeng ka Bibeleng bakeng sa “moea” le ka fetoleloa e le “ntho e phefumolohang.” Ka linako tse ling lentsoe lena le sebelisoa bakeng sa ho khetholla liphoofolo. Hape, Bibele e re moea o hloka lijo. (Deuteronoma 12:20) Haeba moea o arohane le ’mele, na moea o ne o tla khona ho hema kapa ho ja? Ka Bibeleng, hangata lentsoe “moea” le amahanngoa le motho ea phelang, e leng se akarelletsang ’mele, maikutlo le botho.
‘A tsoala meea e leshome le metso e tšeletseng.’—Genese 46:18.
Ho etsahala’ng ka moea ha motho a shoa?
SEO BIBELE E SE BUANG
Bibele e re ha ’mele ea rōna e shoa, “ha ho mosebetsi kapa morero kapa tsebo kapa bohlale Sheole.” (Moeklesia 9:10) Bibele e re ha motho a shoa, “o khutlela lerōleng la hae. Ka letsatsi leo menahano ea hae ea timela.” (Pesaleme ea 146:4) Kaha ha moea o shoa ha o sa etsa letho, Mangolo a re bafu ba robetse.—Matheu 9:24.
KE HOBANE’NG HA U LOKELA HO TSEBA SEE?
Ha motho eo u mo ratang a e-shoa, u batla ho fumana likarabo tsa lipotso tse kang: Bafu ba hokae? Ho etsahala’ng ka bona? Na ba utloa bohloko? Kaha Bibele ea re tiisetsa hore bafu ha ba utloe letho, hoa tšelisa ho tseba hore baratuoa ba rōna ba shoeleng ha ba utloe bohloko. Re boetse rea tšeliseha ha re ithuta hore Jehova o tšepisa hore o tla ba tsosa nakong e tlang.—Esaia 26:19.
“Ba shoeleng, ho hang ha ba tsebe letho.”—Moeklesia 9:5.