Molimo o Ikutloa Joang ha re Sebelisana le Bademona?

BATHO ba bangata ba rata ho bala libuka, ho kena Inthaneteng le ho shebella lintho tse nang le bodemona. Ba li nka e le lipale feela tse se nang kotsi. Empa Bibele e re khalemella lintho tse joalo. Mohlala, lengolo la Deuteronoma 18:10-13 le re: “Ho lōna ha hoa lokela hore ho fumanoe . . . leha e le mang ea sebelisang bonohe, ea sebelisang boselamose kapa leha e le mang ea batlang lipontšo tsa se tlang kapa moloi, kapa ea betsang ba bang ka mantsoe a boloi kapa leha e le mang ea batlang keletso ho ea buisanang le meea kapa setsebi se bolelang liketsahalo esale pele kapa leha e le mang ea botsang bafu.” Hobane’ng? Lengolo leo le tsoela pele ka ho re: “Etsoe e mong le e mong ea etsang lintho tsena ke ntho e manyala ho Jehova. . . . Le lokela ho hloka molato ho Jehova Molimo oa lōna.”

Ke hobane’ng ha Bibele e re khalemella lintho tse amanang le bodemona?

BODEMONA BO QALILE JOANG?

Bibele e re bolella hore pele Molimo a bopa lefatše, o ile a etsa mangeloi a limilione. (Jobo 38:4, 7; Tšenolo 5:11) Mangeloi ao a ne a ka ikhethela ho etsa se nepahetseng kapa se fosahetseng. A mang a mangeloi ao a ile a khetha ho se mamele Molimo eaba a theohela lefatšeng. Ka lebaka leo, lefatše le ile la tlala lintoa.—Genese 6:2-5, 11; Juda 6.

Bibele e re mangeloi ao a khopo a ile a susumetsa batho ba limilione hore ba se ke ba mamela Molimo. (Tšenolo 12:9) A ile a boela a etsa hore batho ba tšoenyehe le ho feta ka bokamoso.—1 Samuele 28:5, 7; 1 Timothea 4:1.

Ke ’nete hore bademona ba bonahala eka ba thusa batho ba bang. (2 Bakorinthe 11:14) Ha e le hantle, bademona ba batla ho sitisa batho ho tseba ’nete ka Molimo.—2 Bakorinthe 4:4.

Bibele e re ntho leha e le efe e amanang le bodemona e fosahetse. Ka mor’a hore batho ba mehleng ea baapostola ba tsebe hore ntho leha e le efe e amanang le bodemona e fosahetse, ba ile “ba bokella libuka tsa bona [tsa bodemona] ’me ba li chesa”, le hoja li ne li le turu.—Liketso 19:19.

Le mehleng ena, ho na le batho ba ileng ba lahla ntho leha e le efe e amanang le bodemona. Mohlala, ha ngoanana e mong ea bitsoang Mariaa a le lilemo li ka bang 12 feela, o ne a khona ho bona hore na ho tla etsahala’ng kamoso. O ne a balla bana bao a kenang sekolo le bona likarete tse bontšang bokamoso ’me lintho tseo a neng a li hlalosa li ne li fela li etsahala.

Kahoo, o ile a rata ntho ena le ho feta.

Maria o ne a nahana hore ke Molimo ea mo fang matla a ho hlalosetsa batho ka bokamoso. Empa o re: “Ke ne ke makatsoa ke hore ke khona ho bona bokamoso ba batho ba bang empa ’na ba ka ke sa khone ho bo bona.”

Maria o ne a lula a ipotsa lintho li hana ho fela, kahoo o ile a rapela Molimo. Hamorao o ile a ithuta Bibele le Lipaki Tsa Jehova. Ha a ntse a ithuta o ile a hlokomela hore ha se Molimo ea mo fang matla a ho hlalosa bokamoso. O ile a boela a ithuta hore mang kapa mang ea batlang ho ba motsoalle oa Molimo o lokela ho lahla ntho leha e le efe e amanang le bodemona. (1 Bakorinthe 10:21) Maria o ile a etsa’ng? O ile a lahla likarete, libuka le lintho tse ling tseo a neng a li sebelisa. Hona joale Maria o ruta batho ba bang lintho tseo a ithutileng tsona Bibeleng.

Ha Michael e sa le mocha, o ne a rata ho bala libuka tse buang ka batho ba nang le matla a fetang a tlhaho. O re: “Ke ne ke rata ho bala ka bacha ba lekanang le ’na ba nang le matla a fetang a tlhaho, ba etsang mehlolo.” O ile a qetella a se a bala haholo ka boselamose le lintho tsa kereke ea Satane. Michael o re: “Ke ile ka ba bohelehele eaba ke batla ho tseba haholo ka lintho tsena.”

Ka mor’a hore Michael a ithute Bibele o ile a hlokomela hore o lokela ho hlahloba lintho tseo a li balang. O re: “Ke ile ka lahla ntho e ’ngoe le e ’ngoe e amanang le bodemona. Ke ithutile ntho ea bohlokoa lengolong la 1 Bakorinthe 10:31, le reng: ‘Le etse lintho tsohle bakeng sa thoriso ea Molimo.’ Kahoo, pele ke bala ntho, ke se ke ipotsa hore na ntho eo ke e balang e tlotlisa Molimo. Haeba karabo e le che, ke e tlohela hang-hang.”

Bibele e tšoantšoa le lebone. Ke eona feela e khonang ho senola kotsi ea ho sebelisana le bodemona. (Pesaleme ea 119:105) E boetse e re tšepisa hore haufinyane re tla phela lefatšeng le se nang tšusumetso ea bademona. Mohlala, Lengolo la Pesaleme ea 37:10, 11 le re: “Ho setse nakoana e seng kae, ’me ea khopo ha a sa tla hlola a e-ba teng. Ka sebele u tla lebisa tlhokomelo sebakeng sa hae, ’me o tla be a le sieo. Empa ba bonolo ba tla rua lefatše. Ka sebele ba tla fumana thabo e phethehileng khotsong e ngata.”