Stress ke Eng?

Stress ke boemo boo ’mele o utloang eka o kotsing ’me o leka ho itšireletsa. Boko bo romela molaetsa ho litho tsohle tsa ’mele e leng se etsang hore pelo e otle kapele, ’me seo se fetola tsela eo mali a phallang ka eona. Hape matšoafo aa honyela kapa aa kokomoha, ebe mesifa ea satalla. Pele u ka elelloa liphetoho tsena, ’mele oa hao o se o le malala-a-laotsoe hore o ka itšireletsa. Ha stress se fela, ’mele o boela o sebetsa ka tsela e tloaelehileng.

NA MEFUTA EOHLE EA STRESS E KOTSI?

Stress ke tsela ea tlhaho eo ’mele o itšireletsang ka eona ha o utloa eka o imetsoe kapa o kotsing. Boko ke bona bo fanang ka litaelo e le hore ’mele o itšireletse. Molemo oa stress ke hore se ka u thusa ho sebetsana le bothata ka potlako, ka linako tse ling u bile u sa elelloa. Ha stress se le boemong bo itekanetseng, se ka u thusa hore u atlehe ho phetha merero ea hao kapa u ipabole linthong tseo u li etsang. Mohlala, se ka u thusa hore u sebetse hantle tlhahlobong ea mosebetsi, sekolong, kapa lipapaling.

Leha ho le joalo, ha stress se nka nako e telele, se le sekhahla, se sa laolehe kapa se sa fele, se ka ba kotsi. Se ka u ama maikutlong, ’meleng le kelellong. Hape tsela eo u itšoarang ka eona le eo u tšoarang ba bang ka eona e ka mpefala. Hangata ha motho a e-na le stress se sa eeng moriting a ka fetoha lekhoba la tahi le lithethefatsi, a sebelisa litlhare tsa ngaka hampe, a ja haholo, a tsuba kapa a ba le mekhoa e meng e mebe. Qetellong motho a ka ba le khatello ea maikutlo, a tepella ka tsela e feteletseng, kapa a batla ho ipolaea.

Stress ha se tšoare batho ka tsela e tšoanang, hape se ka bakela motho maloetse a mangata. Se ka ama boholo ba litho tsa ’mele.