Ke Joang Theknoloji E Ka Amang Bana Ba Hao?
Ho ka ba thata hore batho ba baholo ba ithute ho sebelisa marang-rang kapa lisebelisoa tsa elektronike. Empa ho bonolo hore bana ba li sebelise hobane ba hlaha theknoloji e se e ntse e le karolo ea bophelo ba bona.
Batho ba bang ba hlokometse hore bana ba qetang nako e ngata ba sebelisa marang-rang, hangata . . .
ba lemalla ho lula ba le lisebelisoeng tsa elektronike.
baa hlorisoa kapa ba hlorisa bana ba bang Inthaneteng.
ba qetella ba shebelletse pornography leha e ne e se ka morero.
SEO U LOKELANG HO SE TSEBA
HO LEMALLA THEKNOLOJI
Ho bonolo ho lemalla lintho tse Inthaneteng joaloka lipapali tsa Inthanete. Taba ena e entsoe ka boomo. Buka ea Reclaiming Conversation e re “lintho tse lifonong tsa rona li entsoe ka tsela e tla etsa hore re lule re li shebile.” Ha re lula re shebile lintho tse bapatsoang lifonong tsa rona, re thusa bo-rakhoebo ho etsa chelete e ngata le ho feta.
SEO U KA NAHANANG KA SONA: Na u bona eka bana ba hao ba rata lisebelisoa tsa elektronike ho feta tekano? U ka ba thusa joang hore ba sebelise nako ea bona hantle?—BAEFESE 5:15, 16.
HO HLORISOA INTHANETENG
Ha batho ba bang ba le Inthaneteng, ba buisa batho ba bang hampe ebile ba ba utloisa bohloko le ho rohakana e leng se ka fellang ka hore ba ba hlorise.
Batho ba bang ba sebelisa marang-rang ka tsela ena e le hore ba ratoe le ho lateloa ke batho ba bangata. Motho e mong a ka utloa bohloko kapa a utloa eka ba bang ba mo tšoara hampe ha a bona hore ho ne ho entsoe moketjana ’me eena a sa mengoa.
SEO U KA NAHANANG KA SONA: Na bana ba hao ba buisa batho ba bang hampe Inthaneteng? (Baefese 4:31) Ba ikutloa joang haeba ba sa kenyelletsoe linthong tse ling?
PORNOGRAPHY
Ho bonolo ho fumana kapa ho bona lintho tse mpe Inthaneteng. Batsoali ba lokela ho hlokomela hore le hoja ba sebelisa mekhoa e thibelang bana ba bona ho bona lintho tse mpe Inthaneteng, ha se ka mehla mekhoa e joalo e sebetsang ka ho felletseng.
E ka ba tlolo ea molao hore motho a romele litšoantšo tsa moo a tsotseng kapa ho amohela tsa ba bang. Ho itšetlehile ka melao ea sebakeng seo u lulang ho sona le lilemo tsa batho ba hlahang lifotong tseo, batho ba etsang ntho ena ba ka qosoa ka pornography ea bana.
SEO U KA NAHANANG KA SONA: Ke joang u ka thusang bana ba hao hore ba se ke ba lekeha ho sheba kapa ho romela litšoantšo tse litšila ka marang-rang? —BAEFESE 5:3, 4.
SEO U KA SE ETSANG
KOETLISA BANA BA HAO
Le hoja ho le bonolo hore bana ba sebelise theknoloji, ba ntse ba hloka tataiso. Buka e bitsoang Indistractable e bontša hore ho fa bana lifono kapa lisebelisoa tse ling tsa elektronike pele ba koetlisetsoa ho li sebelisa hantle, ho tšoana le ho “ba lumella ho ikakhela ka letamong ba sa tsebe ho sesa.”
KELETSO EA BIBELE: “Koetlisa [ngoana] ho ea ka tsela e mo loketseng, esita le ha a tsofala a ke ke a e kheloha.”—LIPROVERBIA 22:6.
Tšoaea litlhahiso tseo u ka ratang ho li sebelisa kapa u ngole lintho tseo u batlang ho li etsa.
Buisana le ngoana ka hore a buise batho hantle ha a sebelisa marang-rang
Thusa ngoana hore a se ke a utloa bohloko ha a sa mengoa linthong tse itseng
Etsa sohle seo u ka se khonang ho koala lintho tse mpe tse ka hlahang Inthaneteng
Hlahloba fono ea ngoana khafetsa ho bona hore na o etsa’ng ka eona
Beha nako eo a ka e qetang a sebelisa fono
Thibela ngoana hore a se ke a sebelisa fono ha a il’o robala
Etsa molao oa hore ho se be le motho ea sebelisang fono nakong ea lijo