Li Lumela Eng?

Lipaki tsa Jehova li lumela ho Molimo o Matla Oohle, Jehova, ’Mōpi oa maholimo le lefatše. Bona boteng ba limakatso tse qapiloeng ka ho rarahaneng bokahohleng bo re pota-potileng ka ho utloahalang li pheha khang hore ’mōpi ea bohlale ka ho phahameng le ea matla o li entse kaofela. Feela joalokaha mesebetsi ea banna le basali e bontša litšoaneleho tsa bona, ho joalo le ka tsa Jehova Molimo. Bibele e re bolella hore “tse sa bonoeng tsa oona, e leng matla a oona a ka mehla le bomolimo ba oona, li bonahala haholo, ha e sa le lintho li hloloa, ha ho lemohuoa mesebetsi ea oona.” Hape, a sa bue, “maholimo a bolela khanya ea Molimo.”—Ba-Roma 1:20; Pesaleme ea 19:1-4.

Batho ha ba bōpe lipitsa tsa letsopa, kapa ha ba etse lithelefishene le li-computer, ntle ho morero. Lefatše le pōpo ea lona ea bophelo ba limela le liphoofolo ke tse babatsehang ka ho fetisisa. Sebopeho sa ’mele oa motho o nang le lisele tse litrillione se phahametse kutloisiso ea rōna—esita le boko boo re nahanang ka bona bo babatseha ka ho ke keng ha utloisisoa! Haeba batho ba e-na le morero ha ba hlahisa lintho tseo ba li qapileng tseo e seng tsa bohlokoa ha ho bapisoa, ka sebele Jehova o ne a e-na le morero ka pōpo ea hae e hlollang! Liproverbia 16:4 e bolela hore o na le oona: “Jehova o etselitse lintho tsohle merero ea tsona.”

Jehova o entse lefatše ka morero, joalokaha a bolelletse batho ba pele ba babeli: “Ngatafalang, le ate, le tlale lefatšeng, . . . le buse lihlapi tsa leoatle, le tse rurang tsa maholimo, le tsohle tse phelang, tse hahabang lefatšeng.” (Genese 1:28) Kaha ha baa ka ba utloa, batho bana ba babeli ba hlōleha ho tlatsa lefatše ka malapa a lokileng a neng a tla hlokomela ka lerato lefatše lena le limela tsa lona le liphoofolo tsa lona. Empa ho hlōleha ha bona ha ho etse hore morero oa Jehova o hlōlehe. Likete tsa lilemo hamorao ho ile ha ngoloa: “Molimo o bōpileng lefatše, moetsi oa lona . . . [ha a ka] a le bōpela lefeela.” O le “bōpetse hore le ahuoe.” Le ne le sa lokela ho timetsoa, empa “lefatše le mamella ka ho sa feleng.” (Esaia 45:18; Moeklesia 1:4; The New English Bible) Morero oa Jehova ka lefatše o tla phethahatsoa: “Morero oa ka o tla tiea, ke tla phetha thato ea ka kaofela.”—Esaia 46:10.

Ka baka leo, Lipaki tsa Jehova li lumela hore lefatše le tla hlola ka ho sa feleng, le hore batho bohle, ba phelang le ba shoeleng, ba tla lumellana le morero oa Jehova bakeng sa lefatše le ntlafalitsoeng, le ahiloeng, ba ka phela ho lona ka ho sa feleng. Batho bohle ba futsitse ho se phethahale ho Adama le Eva, ’me kahoo ke baetsalibe. (Ba-Roma 5:12) Bibele e-ea re bolella: “Moputso oa sebe ke lefu.” “Ba utloang bona ba tseba hobane ba ea shoa, empa bafu ha ba tsebe letho leha le le leng.” “Moea o etsang sebe ke oona o tla shoa.” (Ba-Roma 6:23; Moeklesia 9:5; Ezekiele 18:4, 20) Joale ke joang ba ka boetseng ba phela ho kopanela mahlohonolo a lefatšeng? Ke feela ka sehlabelo sa topollo sa Kreste Jesu, hobane o itse: “Ke ’na tsoho le bophelo; ea lumelang ho ’na, leha a shoele, o tla phela.” “Bohle ba mabitleng ba tla utloa lentsoe la hae; ’me ba tla tsoa ho ’ona.”—Johanne 11:25; 5:28, 29; Mattheu 20:28.

Hoo ho tla etsahala joang? Ho hlalositsoe ‘litabeng tse molemo tsa ’muso’ tseo Jesu a qalileng ho li bolela ha a le lefatšeng. (Mattheu 4:17-23) Empa kajeno Lipaki tsa Jehova li bolela ‘litaba tse molemo’ ka tsela e khethehileng haholo.

[Chate e leqepheng la 13]

SEO LIPAKI TSA JEHOVA LI SE LUMELANG

TUMELO LEBAKA LA MANGOLO

Bibele e tšepahala ho feta neano Matt. 15:3; Ba-Kol. 2:8

Harmagedone

Tšepo ea bafu ke tsoho 1 Ba-Kor. 15:20-22;

Joh. 5:28, 29; 11:25, 26

Melao ea Bibele ea boitšoaro 1 Ba-Kor. 6:9, 10;

[Setšoantšo se leqepheng la 12]

LEFATŠE . . . le bōpiloe ke Jehova . . . la hlokomeloa ke motho . . . le ahuoe ka ho sa feleng

[Tlhaloso ea Moo Setšoantšo se Nkiloeng Teng]

NASA photo