Boraro-bo-bong bo Hlalosoa Joang?

KEREKE ea Roma e K’hatholike ea bolela: “Boraro-bo-bong ke lentsoe le sebelisoang ho hlalosa thuto e ka sehloohong ea bolumeli ba Bokreste . . . Kahoo, ka mantsoe a Tumelo ea Motheo ea Athanasius: ‘Ntate ke Molimo, Mora ke Molimo, le Moea o Halalelang ke Molimo, ’me leha ho le joalo hase Melimo e meraro empa ke Molimo o le mong.’ Ho Boraro-bo-bong bona . . . Batho bana ha ba na qalo le qetello ’me baa lekana: kaofela baa tšoana ha baa bōptjoa ’me ba matla ’ohle.”—The Catholic Encyclopedia.

E batla e le likereke tsohle tse ling tsa Bokreste-’mōtoana tse lumellanang. Ka mohlala, Kereke ea Greece ea Orthodox le eona e bitsa Boraro-bo-bong “thuto ea motheo ea Bokreste,” e bile e re: “Bakreste ke ba amohelang Kreste e le Molimo.” Bukeng Our Orthodox Christian Faith, kereke eona eo e re: “Molimo ke boraro-bo-bong. . . . Ntate ke Molimo ka ho felletseng. Mora ke Molimo ka ho felletseng. Moea o Halalelang ke Molimo ka ho felletseng.”

Kahoo, Boraro-bo-bong bo nkoa e le “Molimo o le mong ho Batho ba bararo.” E mong le e mong ho thoe ha a na qalo, haesale a le teng. E mong le e mong ho thoe o matla ’ohle, ho se ea moholo kapa ea ka tlaase ho ba bang.

Na ho thata ho latela mokhoa o joalo oa ho beha mabaka? Balumeli ba bangata ba tšepahalang ba o fumane o ferekanya, o hanana le monahano o tloaelehileng, o sa tšoane le ntho efe kapa efe phihlelong ea bona. Baa botsa, Ntate e ka ba Molimo joang, Jesu ea e-ba Molimo joang, le moea o halalelang ea e-ba Molimo joang, empa hoa se ke hoa e-ba le Melimo e meraro empa ea e-ba Molimo o le mong?

“Ka Nģane ho Kutloisiso ea Kelello ea Motho”

PHEREKANO ena e pharaletse. The Encyclopedia Americana e hlokomela hore thuto ea Boraro-bo-bong e nkoa e le “ka nģane ho kutloisiso ea kelello ea motho.”

Ba bangata ba amohelang Boraro-bo-bong ba bo talima ka tsela e tšoanang. Mosinatoro Eugene Clark o re: “Molimo o mong, ’me Molimo ke ba bararo. Kaha ha ho ntho e tjena pōpong, re ke ke ra e utloisisa, haese ho e amohela feela.” Mok’hadinale John O’Connor oa bolela: “Rea tseba hore ke sephiri se tebileng haholo, seo re ke keng ra qala ho se utloisisa.” ’Me Mopapa John Paul II o bua ka “sephiri se ke keng sa utloisisoa habonolo sa Molimo Boraro-bo-bong.”

Kahoo, A Dictionary of Religious Knowledge e re: “Ka ho toba hore na thuto eo ke eng, kapa hore na ka ho toba e ka hlalosoa joang, Balumeli ba thuto ea Boraro-bo-bong ha ba lumellane ka bobona.”

Joale, re ka utloisisa hore na ke hobane’ng ha New Catholic Encyclopedia e hlokomela: “Ho na le matichere a fokolang a thuto ea bolumeli ea Boraro-bo-bong liseminaring tsa Roma e K’hatholike a e-song ho ka a tšoenngoa ka ho botsoa potso ena ka nako e ’ngoe, ‘Empa motho o ruta Boraro-bo-bong joang?’ ’Me haeba potso eo ke letšoao la ho ferekana ka lehlakoreng la liithuti, mohlomong e ntse e le letšoao la ho ferekana ka ho tšoanang le ho liprofesa tsa tsona.”

’Nete ea pono eo e ka tiisoa ka ho ea laebraring le ho ea hlahloba libuka tse tšehetsang Boraro-bo-bong. Maqephe a se nang palo a ngotsoe ka boiteko ba ho bo hlalosa. Ho ntse ho le joalo, ka mor’a ho phenya-phenya ka matla motsoebere oa mantsoe le litlhaloso tsa thuto ea bolumeli tse ferekanyang, bahlahlobi ba khutla ba ntse ba sa khotsofala.

Ntlheng ena, Mojesuti Joseph Bracken oa hlokomela bukeng ea hae What Are They Saying About the Trinity?: “Baprista bao ka boiteko bo boholo ba ithutileng . . . Boraro-bo-bong nakong ea lilemo tsa bona tsa seminari ka tlhaho ba ile ba tsila-tsila ho bo hlahisa ho batho ba bona ha ba le sethaleng, esita le ka Sontaha sa Boraro-bo-bong. . . . Ke hobane’ng ha motho a ka tena batho ka ntho eo le qetellong ba neng ba ke ke ba e utloisisa hantle?” O boetse o re: “Boraro-bo-bong ke taba ea tumelo e hlomamisitsoeng, empa e na le [phello] e nyenyane kapa ha e na eona bophelong le borapeling ba Mokreste ba letsatsi le letsatsi.” Empa, ke “thuto e ka sehloohong” ea likereke!

Bukeng ea hae Christianity and the World Religions moruti oa Thuto ea bolumeli oa Mok’hatholike Hans Küng o hlokometse hore Boraro-bo-bong ke lebaka le leng leo ka lona likereke li sa kang tsa khona ho etsa tsoelo-pele leha e le efe e bonahalang ho batho bao e seng Bakreste. O itse: “Esita le Mamosleme a rutehileng a hlōleha ho bo latela ho hang, joaloka Bajode bao ho tla fihlela joale ka ho tšoanang ba hlōlehileng ho utloisisa khopolo ea Boraro-bo-bong. . . . Liphapano tse entsoeng ke thuto ea Boraro-bo-bong pakeng tsa Molimo o le mong le batho ba bararo ha li khotsofatse Mamosleme a ferekantsoeng, ho e-na le hore e be a behiloe leseling, ke mantsoe a thuto ea bolumeli a nkiloeng Sesyrieng, Segerikeng, le Selatineng. Mamosleme a bo fumana e le papali ea mantsoe ka ho felletseng. . . . Ke hobane’ng ha motho e mong a ka rata ho eketsa ho hong khopolong ea bonngoe ba Molimo le ho ikhetha ha oona ho ka hlapollang feela kapa ha etsa hore bonngoe le ho ikhetha hoo e be lefeela?”

“Hase Molimo oa Mofere-fere”

THUTO e ferekanyang joalo e ne e ka hlaha joang? The Catholic Encyclopedia e-ea bolela: “Thuto eo e leng sephiri hakaalo e nkoa feela e le tšenolo ea Bomolimo.” Liithuti tsa K’hatholike Karl Rahner le Herbert Vorgrimler li bolela tjena ho Theological Dictionary ea tsona: “Boraro-bo-bong ke sephiri . . . ka kutloisiso e tiileng . . . , se ke keng sa tsejoa ntle ho tšenolo, ’me le ka mor’a tšenolo se ke ke sa utloisisoa ka ho felletseng.”

Leha ho le joalo, ho pheha khang ea hore kaha Boraro-bo-bong ke sephiri se ferekanyang hakaalo, e tlameha e be bo tsoa tšenolong ea bomolimo ho hlahisa bothata bo bong bo boholo. Hobane’ng? Hobane tšenolo ea bomolimo ka boeona ha e lumelle maikutlo a joalo ka Molimo: “Molimo hase Molimo oa mofere-fere.”—1 Ba-Korinthe 14:33.

Ha ho talingoa polelo eo, na Molimo o ne o tla ikarabella bakeng sa thuto e buang ka oona e ferekanyang hakaalo hoo le liithuti tsa Seheberu, Segerike, le Selatine li ke keng tsa e hlalosa ka ho felletseng?

Ho feta moo, na batho e lokela ho ba baruti ba thuto ea bolumeli hore ba tle ba ‘tsebe Molimo o ’notši oa ’nete le Jesu Kreste eo o mo romileng’? (Johanne 17:3) Haeba ho ne ho le joalo, ke hobane’ng ha e bile ba fokolang hakaale ho baeta-pele ba bolumeli ba Sejode ba rutehileng ba ileng ba hlokomela Jesu e le Messia? Ho e-na le hoo, barutuoa ba hae ba tšepahalang e ne e le balemi, batšoasi ba lihlapi, balekhetho, basali ba itulelang hae, ba ikokobelitseng. Batho bao ba tloaelehileng ba ne ba kholisehile haholo ka seo Jesu a neng a se ruta ka Molimo hoo ba neng ba ka se ruta ba bang ’me ba ne ba bile ba utloisisa ho shoela tumelo ea bona.—Mattheu 15:1-9; 21:23-32, 43; 23:13-36; Johanne 7:45-49; Liketso 4:13.

[Setšoantšo se leqepheng la 4]

Barutuoa ba Jesu e ne e le batho ba tloaelehileng ba ikokobelitseng, e seng baeta-pele ba bolumeli